NAUPANG LAMDANG

March 11, 2011 a Japan gamah Richer Schale 9.0 a zinlingin siatna lianpipi, Tsunami leh Fukushima Nuclear Plant a suksiatna leh, misi 15,787 val omna lak pan a suakta Japanese naupang kum 9 mi tawh a kimuhkhakna thu Viatnamese pem thak Ha Minh Thanh in a sanggampa kiangah a laikhak, Magazine tuamtuam a kisuah, a thu hoih lua mahmah ahih manin teikhia dinga ‘sawlna’ ngah ka hih manin kong teikhia hi.  ~ T. Sawm Lian, Daihna Cabin

Sanggampa,

Na dam tek uh hiam? Tulai na khempeuh buai khinin, khanlawh lian leh ihmut lianin misi luang kimuden hi.

Ni khat sungin naikal 20 sung nna ka sep hangin, naikal 48 omin, hih lai muna siattuakte panpih theih nading hun tamzaw om thei leh ut peuhmah ing.

Tui leh electrict kitasamin, nek ding a kikholsate zong bei dektak hi. Mun danga kisuankhiat nading thupiak hong tun ma-in galmuanna munah galtaite koih thei liailiai ung.

Nuclear plant omna mun pana km. 25 khawnga gamla, Fukushima khua-ah tu-in ka om hi. Ka tuakkhak thute leh ka theihkhiat thute pan gelh ding hi leng, hih bang haksatna lian hong tun hun cianga mihing kizopna a thupizia a dawkkhiasak laibu sah mahmah ka gelh kul ding hi.

Hih muna teengte in hih bang siatna lianpi, sihna leh haksatna a thuak uh hangin linglawng lo uh a, muanhuaina khahsuah loin, amau nuntakzia ngeina-in nungta lel uh hi. Tua hangin nasep nuamin mazang mahmah hi. Ahih hangin Nipi kal khat sung hih bang dinmunin om lai le ung, ka nuntakzia ding uh kigen thei lo hi. Bangbang ahi zongin, mihing mah hi uh a, gilkial-dangtakin thanem mahmah ta uh hi. Kumpite in nek ding leh zatui vanleng tawh nakpi’n hong khia mah leh, tuipi sunga ci tang neu khat khiat tawh kibang lel a, kicing zo mahmah lo hi. Tua manin, tua bang dinmun panin thukham palsat a om khak zenzen uh leh zong ka mawhsak het kei ding hi.

Zani zanin grammer school hawm sungah galtaite adingin mi phatuamngaite in nekding a hawm uh etpih dingin hong kisawl a, a ki-tuh om het loin, gilkial pipi-in saupi kigual uh hi. Tua lakah pasal naupang kum 9 khawng a upa, t-shirt silh leh pheituam siing bek a teeng khat zong kihel hi.

Khuadam mahmah a, naupang pen a kigualte lakah a nunungpenah kigual hi. Ama hun hong tun ciang nek ding a om nawnloh ding ka patausim mahmah hi. A kiangah dingin ka holimpih hi. Zinlin lai-in sanginnah om a, a galkhat lama a pa in pi sawmin a car tawh ama lam zuanin a pai laitak tsunami in pha-in, a omna inn khan thumna panin inn nuai lama tui in car tawh a pa a letmang lai a muhna thu hong hilh hi. A nu vai ka dong kik a, a inn uh pen tuipi naipenna mun lakah om ahih manin, a nu leh a sanggamnu pen inn panin taikhia man lo hi dingin um hi. A khitui hong luangkhia-in, ka langlam hekin kihum hi.

Khuadam sa lua ling keuhkeuh ahih manin ka jacket silhlai phelkhiain ka silhsak a, ka jacket ip sung panin ka nek dinga ka puak ann tun hong kia hi. Tawmin ka pia a, “Na hun hong tun ciangin nang ading om nawn lo kha thei hi. Tua manin hih ka nek tang ne in. Ke’n bel ne khin ka hih manin hih pen nangma’n ne in” ka ci hi.

Pasal naupang pen ka maiah kunin zahtakna hong piak khit ciangin ka ann tun la a, a ne pah samsam ding ka sak leh ne lo hi. Tho khia-in, a maia mipi kigual diudeute maiah paiin, a kihawmkhia ding ann a kikoihna munah tua ka piak ann tun va koih hi!

Lamdang ka sa mahmah hi. Ne pah samsam lo a ann tun koihkhopna-ah a koihna hang ka dong a, “Ih maw, kei sanga gilkialzaw tampi ka mu hi. Hua lai munah koih leng hoih tak leh tangzai takin hawmkhia thei ding uh hi” hong ci mawk hi.

Ka tuahkhak thu in hong zo lua a, ka khitui a muhloh nadingin kei papi khatin naupang neucik lam nga ngam loin a langlam ka nga leltak hi.

Pasal naupang kum 9 mi tungah tua bang lianga kipiakzawhna, muanhuaina leh nuntakzia maan lam a lak thei gam leh minam pen ken bel pakta lo thei lo hing.

Ka duty hun hong tung kik ding hi, vai khat peuhpeuh kizasak kik zel ni. 

Ha Minh Thanh

ZBYF Tangko Editorial (May & June 2012)

ZBYF Tangko Editorial (May 2012)

Nidang lai pana a kibuaipih mahmah khat, pawlsung, khua sung buaina lianpi laka khat pen ‘khang kibansam’ (generation gap) hi kha ding hi. Tua pen bang hiam cih leh deihdan, ngaisutzia, muhzia leh kalsuan nopzia kibatlohna hanga buaina ahi hi. Bang hangin hih buaina hong tung hiam? cih leh, bangci bangin vengsak ding? cih pen ngaihsut taak mahmah hi.

                Khua sungah, kum lama upazawte leh khangmoizawte kithutuaklohna hangin buaina tampi piang hi. Makai uzawte malakdan deihkhoplohna, a ngaihsutna uh khanglui vai sakna, leh upazawte in khangmoizawte a muanlohna hanga hih thute hong piang ahi hi. Nu leh pate leh khanghamzawte in ngaihsutna hoih tak zat kisam hi. Tua ahih kei leh khua nuam, khua kithutuak cih om thei ngei lo ding hi.

                Pawlpi sungah, khangnote in tulai khantohna tawh kituakin leitung mun dang a mite biakpiakzia, vanzat leh gamtatna bangin, a tulai theithei-a a ngaihsutna uh a zat laiun, upazawte leh nu leh pate in tuate pen theihsiamna ciang a neih kei uh leh pawlpi sungah khangnote thadahin, nuamsa loin, biakinn gamdai tuam mahmah ding hi.

                Tuhun leitung khantohna tawh kizuia khangnote lungsim ngaihsutzia, gamtat khuahek, a lunglut lam uh pen tel siam kisam hi. “Ko khangno laiin zong tua bang hi kei”, “Tua bangin kuaman hih ngei kei” a cici makai a omna munah khangnote in nuam sa lo a, tua bangte a theisiam, a zang siam, a pai khial ding uh a khual a lam a makaih siam makai om nana khangnote in nuam sa ding uh hi.

                Muan taak dinga kisinsakna om lo, makai dinga seekkhiat sawm lo, thu a thei pian hong om cianga neekcip a sawm, a langbawl makaite hangin pawlpi sungah buaina om thei zel hi. Makai hoih, makai siam, makai lawhcingte in amau a thuap ding, amau zaa a laih ding, a nasep maban a sem zom thei ding mi seekkhia uh a, tua kipawlna/khua pen mainawtin, bah liailuai cih om ngei lo hi. Khangnote in zong, mite hong makaih theih, mite sinsak theih, thuhoih lahoih hilh theih hih ding kisam a, makai hih baih utluatna, (pil hi lo a) kipilsak luatna, thei kisak luatna hangin makaite tawh kithutuakloh theih a, buaina piang thei hi.

                Hih thu pen i thupi ngaihsut kei-a ahih leh mai lamah khang kibansam hangin buaina hong omom lai ding hi.

ZBYF Tangko Editorial (June 2012)

Mihing i mel i sa a kibatloh mah bangin, i lungsim ngaihzutzia, nekzonna, buaina, nasep, leh nopsakna kibang lo hi. Leitung khantohna tawh kizuiin nasep baih deuhdeuh zaw napi’n ‘kibuai’ deuhdeuh mawk hi. Kuamah theihpihlohin kipumbuai thei a, lawmte tawh kikhawl man lo, cina veh man lo, kikhawm man lo, thungenman lo,mi panpih/huh man lo... cih bangin buaina tuamtuam, ei kama gen ding a kilawm zah bel i kam sungah na kiphum khin hi!

Pumbuai gawpna hangin na tampi kitanlawh thei a, tampi kisiasak thei hi. Manmawh luatna hangin a masa leh a nunung ding kikhentel man lo thei a, tua hangin kisuih khakna leh pukna zong om thei veve hi. Mi pawlkhat (kei kihelin) bangmahpi sep khiat thupi taktak nei lo a pumbuai om hi. Buaina thu gengen a, sep ding (a kilawm) gengen napi, buai lua ing, bangmah sem man keng, ka nasep ding tamlua bangmah semthei keng, a cici, lawhcinna gen ding bangmahpi a nei lo om veve hi.

A tangpi thu-in mi pumbuai (i ci diam a kibuaisak i ci zaw diam) te pen tupna (goal) kician tak a nei lo hi nuam mahmah hi. Tupna kician tak a neite buai lua lo uh hi. Amau goal pen tang takin enin, tua lampi-a nasep masa ding leh nunung ding, haksatna om thei leh a vensak dan ding, leh kalsuan dan ding hoih taka thei sate ahi uh hi. Tua bang a goal kician a neite in hun neihdan tawh kituakin, kha khat a lawhcinsak ding, kum khat a lawhcinsak ding, kum 10 khit cianga lawhcinsak ding ciin hoih takin ngaihsun masa uh a, buai gawp lo uh hi.

‘Buai lua ing’ cici napi T.V maiah tuden thei om veve hi. Kampi bek tawh a buaina thu gengen a, bangmah sep a sawm tuan lo om veve a, tuate pen mite’ Nuihzat suak lel hi. Kam bek a buaina pen buaina lianpi, mitampi buaina, a vensak hak mahmah thu khat hi!

A kibuaisakte buaiden uh hi. Kikhawm man lo ding zah donga buaina, thungen man lo zah donga buaina pen Zomi Khristiante haksatna khat ahi hi. Na buaina in na Khristian nuntakna a siasak hiam? Na innkuan nuntak a siasak hiam? Lawm le gualte tawh kithuahkhopna a buaisak hiam? Ka kam sunga buaina cih kammal kiphum in nang tunga hong kisuan mawhpuakna a buaisak hiam? Tupna mun (goal) kician tak nei a, kalsuan dan ding hoih taka a geelkhol thei mite mipil, mi lawhcing, mi buai lo hi nuam mahmah uh hi.

ZBYF Tangko Editorial (March & April 2012)

ZBYF Tangko Editorial (March. 2012)

                A kip lo leitungah a kip ding bang kekin a kip lo ding kibuaipih mahmah lel hi.

Mi’ pilna, siamna, leh hoihna mu thei ding a ka pilna mit a vaakloh sung tengin, kei le kei pil kisain, mite hai ka sakna lian mahmah ding hi. Upate manphatna mu ban lo ding zah donga ka hai a, a thu uh sang ka thu pil ka sak zawk hun a tam ciangin ka pilloh lam ka theihbatloh man na hizaw hi. Kei theihnate lakah amau theihna sanga a hoihzaw a om sam hangin, kei theihzah sanga tamzaw a hoih a theite theihna ka theihloh man na hizaw hi.

Mipilte pilna hang ka ngaihsut ciangin, mihai pente pilna, cihtheihna leh manphatna a thei ban dinga a pil man uh, mi pilpente pilna theisiamin, tua tawh kituakin mi a hopih siamna hang ahi hi. A neupen leh a lianpen tawh a kikhawlsiam mite mipil hiin ka theih hang, tua mipilte banga nuntak haksa ka sa mahmah hi. Pil utin, ka delhsuk ka delhtoh hangin lawhcin haksa ka sa mahmah hi.

Makai sepna-ah, sep le bawl ding hong tam a, gen le sak ding leh vaihawm ding hong tam ciangin makai masa leh makai hoihte sep gimna, a cihtakna uh leh a thuakzawhna uh ka theisiam pan hi.

Bangmah sem ut lopi a makai hih ka ut pong hun khawng, ka siamna leh theihna in a bat zawhloh dong hihna ka deih sung tengin makai hoih ka hi ngei kei ding hi.

Haksatna leh nopsakna a tuak ngei lo hi leng, haksatna tuakte hehpih nopna lungsim ka nei ngei kei ding a, lawhcinna ngah ngei lo hi leng lawhcinna ngahte lungdampih dan ding ka thei ngei kei ding hi. Haksatna ka thuak ciangin kei sanga thuak gimzawte nuntakna ka theisiam pan a, lawhcinna ka ngah ni in mite lawhcinna hanga lungdamna ka theisiam pan hi.

Natna thuak nei lo hi leng, natna thuakte hehpihna ka nei thei kei ding hi. Natna thuaka ka om laitak lawm le gual hong panpihte manphatna ka theih ciangin natna satna thuak mite panpih nopna lungsim ka nei thei pan hi. Pasian in mihingte adingin a khawnkhongin bangmah piangsak lo hi.

ZBYF Tangko Editorial (April 2012)

Israel gam neucik hizahta-a a khantohna, a kitheihna hang leh, leitung gam thupi leh hatpen a kigen USA in hizahta-a a gupna hang lianpen in Israeli-American (Judah mi America a omte) hang ahi hi.

America gama scientist za ah sawmgiat (80%) pen Judah minam, Judah sisan tawh a kizom hi, kici hi.  Dr. Farrukh Saleem, Pakistan neuclear scientist in a genna ah, “Israel Prime Minister in, ‘Leitung a bem hi loin a zangtam hi’ ci leh, the American-Israel Public Affairs Committee (AIPAC) in US Congressah Israel PM in a muhkhiat pahpihna thu pass-sak pah thei ding hi” ci liang hi. Tua zah a USA kumpi in Israel thu a lak mahmahna hang pen America gama Judah/Israel mite hang ahi hi.

Israel leh Palestine a buai laiun, sum le pai leh thauvui thautang tawh Israel a huh lianpen USA hi a, Israel pen America in aktui dopa a dop, a hun tantan man leh a kithuahpihna hanga hih ciang a tung ahi hi.

India gam kumpi in Non Resident India (NRI) kici, India mi, gamdang a omte tawh kizopna hoih neih sawmin nakpi takin pan la a, India gam kiteelpina ah zong a kihel theih nading uh zong vaihawmsak sawm lai hi. Bang hangin tua bang vaihawm uh hiam cih leh hih mite pilna, siamna, sum le pai pen India in manpha taka a zat theih nading, gamdanga omte in innteek tang taka a pianna gam uah na a sep theih nading uh deihna ahi hi.

Tu globalization hunah minam khat pen gam khat sung bekah omkhawm cih bang om thei nawn lo a, pawlpi khata member teng khua khat/ biakinn khatah omkhawm den,  innkuan khat pen inn khat sungah teengkhawm den, khua khat sungah omkhawm den cih bang hi thei nawn lo hi. A omkhawm a om leh tuate pen a khangto het lo, tuhun leitung nuntakzia a mupha ban lo hi ta mawk hi.

Tua hi a, pawlpi/khua/gam khata memberte zong mun tuamtuam - US, UK, Singapore, Autralia, Nepal, Bhutan, Norway, Bangalore, Delhi, Maishu, Saiha, Tongkawlong etc. ah kumpi nasem, sang kah, sum bawl, zinsuk zinto in omloh theihloh hi. Tuaci bang hunah omta i hih manin mun tuam gam tuama omte in, ‘gam dangah om ta ing e’ ci lo a, inn lam a omte in zong, ‘gamdangah om ta uh’ ci a puaseh pah lo a, kizopna hoih nei a, i pankhop leh i khua, pawlpi, minam khangto bek ding hi.

ZBYF Tangko Editorial (Jan. & Feb. 2012)

ZBYF Tangko Editorial (Jan. 2012)

Maanlohna khatpeuh nei ka hi diam, tulai editorial dinga ka hawi giugiaute ka gelh ciang sau thei lua in hih munah kita zo nawn lo zel! (laimai 3na). Hih thu pen, Kawlpi pana kalsim kihawmkhia Tongsan kici i pupi Sia Khampeek (Tongsan Pu) of Norway in, 2012 kum thak thului/editorial gelh dinga hong cial ciang hih thulu tawh thu ka gelh a, tua ka gelhna pan pawlkhat pai-in, pawlkhat ka behlap zawh ciang kong suaksak hi.

                Kum thakah laimai 4 behlap ding kilunggulh a, kibehlap thei ahih manin khantohna khat in ka tuat hi. Laimai kibehlapna hangin pilna kisapna thugelh khat Sia Thang of Shillong in hong teikhiat kisuaksak thei pah lian hi (laimai 9)

                December 2011 issue sungah Upa Kham Suan Pau in ZBYF Annual Council biakpiak kikhop huna a thugen ka ciamteh, a thulu ka vuahsaktawm suaksak dingin hoih ka sa hi. Ahih hangin ka simsim ciangin, 'hih pen kum thak message dingin hoih mah si e' ka ci kik hi.

                ZBC General Council, 2011 in kum 2012 ZBC thulu dingin, "Keima Kha tha bek tawh na ma na tun ding hi" (Zekh. 4:6) cih hong tel sawnsawn a, Sia  Pau’ thugen tawh hong kituak mahmah hi. Pasian in eima kipiakna zahzahin hong zang thei ahihna leh, i sep i bawlna-ah i khut sunga omte tungtawnin na lianpi sem thei hi cih kidawk cian mahmah hi.

                Shillong lam pan khangno laisim laite hong tat taktak uh ciang a meethuai thu manpha mahmah kimuh beh zel (laimai 6). Hih lo zong Shillong lam pana thugelh hoih nono, thului gelh kidemna ate zong pawlkhat om lai hi. Tua banah Murlen lam tangval in zong thuhoih mahmah ‘Bang sunsiah ding’ hong gelh kikoih cing lai a, Diphu lam pan ‘Khristian khangno gamtat kilawm’ cih khawng, kum 2011 kum bul a ka gelh ka suaksak nailoh ‘Tu hun bang hun hiam?’ cih khawng, ka teikhiat ‘Thupha natna’, ‘Solar storm’, ‘Ka pa khedap’ cih pawl in zong suak ding ngakin kigual diudeu uh hi!

ZBYF Tangko Editorial (Feb. 2012)

                Democracy a nop mahmahnate laka khat pen - mipite in deihdeih tel theihna ‘suahtakna’ i neih ahi hi. Tua deihtelna panin a telte nuntakzia, khantoh leh khantohloh, pil leh pilloh bangzah hiam kitheithei hi.

H. Mann in, “Kitelna-ah a tamzaw deihna bangin kipai a, a tamzaw hai ta lehang zato inn zuanin pai kul ding hi” ci hi. Pawlsung, khuasung, gamsung siatna pen mipite in a telkhiat/sehkhiat makaite tungtawnin hong piang tawntung hi.

Kitelna ah telkhiat dingte leh a tel ding mipite tungah gennop pawlkhat ka nei hi :

Makai khat hih sawm na hih leh, makai sep na utna  bang hang hiam? Pawl, khua, gam khantoh ding, kipumkhat ding, kithutuak ding deihna leh veina taktak nei lo a, sum le pai, minthanna bek khawng deih na hih leh makai na sepma panin a lawhsam pah cihna na hi hi.

Makai dingin mite in hong telcing takpi leh tua makai sepna tawh kisai tavuan - thunget hawma vak, mipi mai a thugen, nat veh, siatna munah tung masa, genthei mangbangte panpih, kumpi zum (office) tawh kizop, zinsuk zintoh (makai hihna tawh kizuiin sep ding a tuamtuam om ding) etc. na zo takpi mah diam? Kikhawm nuam lo napi pawlpi upa hih khawng na ut mahmah pongmawk leh a lawhsamsa na hi. Tua ahih manin na sep ding theician inla, na zo takpi mah diam cih nang le nang ki-encian masa in. Mi in na nunglam pan hong nuihsansan makai khat na hih sangin, mi nautang, member muanhuai khata na om hoihzaw hi. Na kivakna, na hihna leh hih theih theician in.

Mipite in, makaite tavuan leh mawhpuakna (duties & responsibilities) thei mahmah lo makai i telkhiat zel manin pawlpi, minam, gam kibuai hi. Eima telkhiatte tungah i lungkim kei a, a telkhia mipite mah kiphun masa hi. I makai tel pen i pawl, i khua, i gam adingin - pawl dang, khua dang, kumpi leh gam dang tawh kizop nadingin a hoih takpi hiam, i kipawlna, i khua, i gam tang dingin a cing hiam, cih ngaihsut kisam hi. Zato inn lamah damlohna (pumpi & lungsim) hangin i makai telkhiatte tawh i paikhop ngeingai ding lauhuai hi.

Tua ahih manin deihtel theihna a nei mipite leh a kitelkhia ding makaite khempeuhin i hihna, i tavuan, i mawhpuakna i theihcian kisam mahmah hi.

A 65-VEINA ZOMI NAM NI (ZNN), 2013

Leitung mun tuamtuamah tukum Zomi Nam Ni pen nuam takin buaina leh haksatna om loin kizang thei hi. Zomite lakah nidangin Zomi cih min ngiat tawh a zang a tam loh hangin, tukum Zomi Nam Ni zatna ah Chin cih a zang pen 15% khawng bek hi ta, ciin thu thei pawlkhat in gen uh hi. Zomi itna lian semsem, Zomi itna khang semsem hi, cih kithei a, mun tuamtuamah Zomi Nam Ni zatzia zong khangto mahmah ta hi.

Singapore

            Singapore gam sunga om Zomite in kum 2013 Zomi Nam Ni pen Zomi Innkuan Singapore (ZIS) makaihna tawh nuam takin zang uh hi. Hih hunah Kawlpi pana vaimim kikhak vangvang pen ne ziahziah photin, gilvah phitphet khit ciang hun zang uh hi.

            Hih hunah Steven Vocal Bandte tawh la a sa zel Tg. Suan Za Tuang leh lasiam Lia Niang Ngaih Hau, Tg. Dal Sian Kham, leh ZIS khangnote in la sa uh a, Siangapore Baptist Convention in sathau a nilh ngiat Rev. Khup Cin Pau in Zomi leh Zogam ading thungetna nei hi.

            Pu Pau Khan Suan in Zosuan Tuailai Khawmpi, Tedim khua-ah June 5- 9, 2013 sunga kibawl ding ii tup leh ngim pulakna nei a, Zomi khangno tampite kilamthakna lianpi a neihna hun ahih ding a lametna thu gen hi. Pu Pau Khan Khup in Zomite a bucing khantohna leh kipumkhatna i neih nadingin Zomi ah kipumkhat a kisapna, pupa luahsa gam Zomite in i ngahkik mateng mainawt ding a kisapna thu gen a, GZA President & Secretary leh LZI General Secretary laikhak simna nei hi. ZIS Lutangpi Pu Hang Khan Lian in zong tangkona, mipite kiciamna leh ki-apna neihpih hi. Rev. Khup Cin Pau in hunzawh lungdamkohna a neih khit ciang nuam sa lai pipi mahin kikhen uh hi. ZISte pen minam ading a hanciam mahmah hi uh a, Kawlgam sunga Zomi Youth Association (ZYA) huh nading kha khatin Singapore $ 500 khak tangtang ding nung deuhin a vaihawm, gamdang pan Zogam a it leh a puahnuam mahmahte ahi uh hi.

Thailand

            Thailand gamah zong tukum ZNN pen Zomi Association of Thailand (ZAT) inntekna tawh nuam takin zang thei uh a, Lia Mansen leh Tg. William in siam takin hun-uk uh hi. Hih hunah mipite in Zogam dialkhai leh Zomi makaipite zahtakna minute 3 daidide in pia uh hi. Zomi Association of Thailand (ZAT) president Zomi Paul Pau leh Sia Thang Cin Pau in hanthotna hun zang uh a, Zomi khangnote in Zo ngeina laam tawh ZNN pahtawi uh hi. ZAT numei makai Nu Thang Kang Cing in ZCD laikhak simna nei hi. Zomi naupang ten Zogam lapi tawh limlahna nei uh a, ZAT Secretary Tg. Gin Khan Mang in statement simna nei hi.

Malaysia

            Malaysia gam sunga Zomite in zong Chinwoo Stadium, Kuala Lumpur ah ZNN nuam takin zang uh hi. Hun kempa in A – Ak khuangta, thawh hun ta, B – Bii leh lo, gamlak po, C – Ci om lo, sa lim lo, D – Dialkhai khai, limtak pai, E – Etlawm mualkuam Zogam nuam, F – February 20 ni, Zomi Nam Ni.. cih aw neih zahzahin mipi awngsak ziahziah a, hun a kipan hi pah hi.

            Zomi Association of Malaysia (ZAM) President Pu Nang Khan Pau in Zomi leh Zogam adinga nuntakna a pia Zomi Salphate zahtakpiakna makaih a, gamdai takin minute khat hun zang uh hi. Hih hunah Singapore panin Dr. Hau Za Cin zong kihelin, thugenna hun limci takin zang a, ‘Zomite mipil misiam hi dingin mun sangna munah Pasian in hong teengsak a, siktui siang phulna mun panin hong khangkhia sak hi. Tua ahih manin minamdangte a tung etet dingte hi lo hang a, a suk et dingte i hizaw hi’ ciin, a 65 veina Zomi Nam Ni i zatna ah Zomite kipumkhatna lian mahmah ta a, kikhangto mahmahta in, maban limci mahmah ahihna thu gen hi.

            ZCD President Pu Cin Sian Thang tungah, nidang lai hun pana gal le sa a mi hangsan, gualtung tuangte pahtawina a kipia zel Tangciing puan silhsakna Dr. Cin Sian Pau in nei hi.

            Hih hunah Zongeina laam tuamtuam Ton lam, phit lam, namkan lam, lumsuih lamte banah, lamvuite kilam ziahziah hi. Pa Kap Lian Tuang in lungdamkohna a neih khit ciangin hun nuamtakin zo uh hi. Tukum Malaysia Zomi Nam Ni ah kumdang bang loin, Kawlgam pan Pu Cin Sian Thang, Pu Lengtong Pauno, Pu Lengtong Kam Khen, Sia T. S Khai, leh INHCR – CDU pan Miss Joanne kihel uh ahih manin Malaysia Zomite in nuam sa pha mahmah uh hi. Zomite lunggulh pen ahi Buhsih leh Vok gawi duh zahzah nek theih dingin kizuak zihziah a, tua banah Zomi vangil tuamtuam – khi, bilbah, leh Zopuan nam tuamtuam kizuak zihziah hi.

            Tukum ZNN zatna ah zukham kitawng om vet lo ahih manin ZNN zang mipi tul valte in lungnuam leh suakta takin hun zang uh a, makaite a lung uh dam mahmah hi.

New Delhi, India

            Lamka gama Zomi Council vaihawm siamna tawh India gam khuapi New Delhi a Thayaraj Stadium ah sim le mal, sak le khang pana paikhawm Zomite in nuam takin ZNN zang uh hi.

            Nitak 2:00 ciangin Zogam lasiamte in Delhi Zomi Nam Ni 2013 theme song Sian siamsa piaksa luahsa Zogam cih la sa uh a, Mr. Manga Vaiphei leh Dr. Grace te’n hun uk uh hi. Pu Gin Sian Lian Pau’ makaihna tawh Zogam ading nuntakna a piasate phawkna hun kizang hi. Tua khit ciang Delhi a Zomi pastor 10 te’n amau uniform ciat uh silh kawmin Rev. P. K Lianmang makaihna tawh Zomi nam pumpi adingin thungetna nei uh hi. Pu Vumsuan Naulak, President, ZYA Delhi Region in mipite vaidawn thugenna leh ZRO Presidential Message simna nei a, tua-ah, ZNN pen mipite suahtak ni, mipite khuta vaihawmna a omna ni ahihna leh, ZRO in ahih theih sung teng Burma gamah mipi vaihawmna a om theih nadingin pan la ding ahih banah, UPF nuaia Autonomous Hill State pen Manipur state pan ngah nading pen eima tungah kinga ahihna thu, gamgi in hong khen Zomite pen gamkhatah kigawmkhop nadingin ZRO in a panlakna pen tawpsan ngei lo ding ahihna leh, hangsan taka mainawt a, Zosuante kipumkhatzaw sem dinga a deihna leh, phamsa Zogam salphate zahtakna thu kigelh hi.

            Zomi Council Chairman Pu L. B Sona in meel lahna leh hanthotna hun nei hi. Functional President Pu Phungzathang Tonsing in ZNN piankhiatna thu gen a, a mawkna a kizang ahih lohna leh dialdial a diamdiamin, kithutuak leh kipumkhat zawsema Zomi teng i teenkhop ding a deihna thu gen hi.  Pu Vungzagin Valte in zong, mainawtna, khantohna leh kigawmkhawmna thupi tak ZNN in hong tun leh a deihna thu gen hi. ADCC Chairman Pu Langkhanpau Guite in MDCte meellahna nei a, organizing committee tungah letsong pia hi.

            February 19, 2013 niin Zomi tawh kisai seminar Jawaharlal Nehru University a Committee room ah om a, tua hunah ZRO Adviser Pu K. Guite in, UPF in a demand Autonomous Hill State tawh kisai genna zong nei hi.

            Hih hunah chief guest dingin Union Home Minister Sushil Kumar Sindhe kilamen hi mah leh, ni 19 leh 20 in gamsungah haksatna lian pawlkhat om ahih manin kihel theih lo a, Guest of Honour ahi Shri Oscar Fernandes, MP & Chairman, Parliamentary Standing Committee on Human resource Development ban ah Functional President Pu T. Phungzathang, Minister, GoM leh Chief Host Pu L.B. Sona, Chairman, Zomi Council, Shri H.S. Brahma, Election Commissioner of India, Pu K Guite, Zomi Council Steering Committee Chairman, Pu Vungzagin Valte, Parliamentary Secretary (Horti, Soil Conv & CADA), Pu Ginsuanhau, Singngat MLA, Pu Manga Vaiphei, Chairman, MTDC, Pu K. William Vaiphei, Zomi Council Speaker, ZOYCA President Pu Zakai Thawmte, Pu Dal Sian Pau, ZOLLS, Pu Dr R.Sanga, Zomi Council Steering Committee member, Pu K Vungzamawi, Secretary, ZEPADA hqtrs., Pu K.G. Tungnung, Secretary Zomi Council, Pu H. Kham Chin Khup, Treasurer Zomi Councilte zong kihel uh hi

            Amaute banah Pu L. Tualkhanhau, President Paite Tribe Council; Pu Khatkhotong Baite, President Vaiphei People’s Council; Pu Kai Khan Mang, President. Tedim Chin Union; Pu B. Dongzalian, President Simte Tribe Council; Pu Manglianthang, President United Zou Organisation; Pu M.C. Chinminthang, President Mate Tribe Council; Pu Pauminlianthang, President Thangkhal People’s Organisationte zong kihel uh hi.

            La siam Liani Parte, Muan Hangzou, Ginlian Hangzou, Lia Vungngaihlian, Lia  Rody Za Lien Sing,  Mr. Hangkhanlian, Mr. T. T Lal Zou, The ZoKIDS, leh Lia Vunggohchingte in siam takin mipi zaila tawh awi uh hi.

           

Bangalore, India

            Bangalore khuapi a om Zomite in zong ni February ni 20 niin ZNN a zat theihloh uh hangin nuam takin Zomi Youth Association (ZYA) Bangalore Region makaihna tawh zang uh hi. Hih hunah Manipur panin ADCC Chairman Pu Langkhanpau Guite leh MLA Pu Manga Vaiphei zong kihel uh hi.

Chennai, India

            Chennai khuapi ah zong Zomi Youth Association (ZYA) Chennai Region makaihan tawh ZNN kibawl hi. Hih hunah Zopuan a silh lo, a teng lo, a ok lote mi khat Rs. 100/- kiliausak hi. Zomite in mai lamah Zopuan a thupingaihsut nading leh Zo van khat beek a neih hamtang nadingun kihanthawnna ahi hi. Zomi Cultural Troupe in Buhtuh lam, Gua lam, leh Zo lam tuamtuam lak uh a, mipite in tha ngah mahmah uh hi. Hih hunah ZYA Chennai Region kiteelna zong om hi.

Singngat, Manipur

            Singngaat khua-ah zong nuam takin ZNN zang uh a, zing nai 6 – 9 kikal sung thungetkhopna hun PCI ( R) biakinn ah om a, sun nai 11 panin Singngat Community Hall ah hun kizang  hi. Hih hunah Pu Thangkhangin Ngaihte chief guest in pang a, functional president in Pu Pumkhanmang Samte leh Pu Xavier Nengkhanlam pang uh hi. Guest of honour ah Pu Michael Ginzasuan pang a, Chief host in Pu Calvin H leh ‘Nam Ni Pa’ in Pu M. K Thomas pang hi.

Bungmual, Lamka

            Bungmual YPA inntekna tawh Bungmual khua-ah ZNN thupi takin kizang hi. Lamka leh a kiim a paam panin lasiam leh mipi tampi paikhawm uh a, chief guest in Pu Halien Kipgen leh guest of honour in Pu Sanga Hmar banah, functional president in Pu Calvin H pang hi.

Aizawl, Mizoram

            Mizoram khuapi Aizawl ah zong Archives Hall, Babutlang ah Zomi Cultural Society, Mizoram (ZCSM) saina tawh kibawl a, media lam panin DDK, Aizawlte kihel thei hi.

            Hun khatna kipat nadingin Rev. Zam Sian Lal in thungetna a neih khit ciang host N. Khup Mung in makaih to a, ZCSM, Aizawl Unit in Buhtuh Lam a lahkhit uh ciang ZCSM president Pu Gin Za Go in vaidawn thugenna nei hi. Zomi bang a piang, Zomi banga nungta leh Zomi banga si dingin mipite hanthawn a, tua banah Zomi hihna kepcing ding ahihna thu gen hi.

            Hih ZNN tawh kituakin Leitungbupa Zomi thukizatna khat ahi Tongsan International Media group in tua group sungah laigelh siam, thu le la a puak tawntung zote pahtawina kum sima a piak den uh ahi kum 2012 ading, “Tongsan Pen Award, 2012”  certificate leh US $ 100 pen Tg. N. Pau Tun Thang tungah Tongsan Consultant Pa Hang Thawn Tuang in piakkhiatna nei hi.

            Hih hunah Mizoram Information Service (MIS) a nasepna a ngah thak Dorothy Muansangi leh Mizoram Civil Service (MCS) a cing thak Laltanpuiate pahtawina kipia a, Laltanpuia pen kihel thei lo hi. Laito zum (post office) a sem, zakhanna (promotion) a ngah Patrict Thang Sian Piang zong amah a kihel theihloh hangin pahtawina kipia hi. Pu B. Suan Za Lang, IFS in Andaman & Nicobar Island ah Chief Conservator of Forest (CCF) zakhanna ngah thak ahih manin lungdampihna kipia a, amah in Zaam lei nadingin ZCSM tungah Rs. 5000/- pia hi. ZCSM in registration a ngah theih nadinga a mapang Pu Gin Za Go leh Sia Nang Sian Mung tungah pahtawina laipi kipia hi. Nu Cing Sian Zam in ZCSM zat ding Zo nik leh ngawng-awh hih hunah pia hi. Lia Suan Cing in la siam taka a sak khit ciangin Rev. Kham Khan Thang in Zomite adingin a huamkim thungetna nei hi.

            Hun nihna ah Sia Nang Sian Mung leh Pa J. Thang Lian Pau in Zomite piankhiatna thu suutna, kipumkhat a kisapna, sumbawlna, siamsinna lamah mainawt a kisapna thu gen uh a, ‘Mite hong sapna, ei le ei’ kisapna hi lo tawh mi hong sapsap ding pen hoih i sa hiam?’ cih leh, ‘India gam kisimpina ah Zomi kicih ding hoih na sa hiam?’ cih dotna te mipite tungah dong uh hi.

            ZNN zat hun sungin Pa Tuang leh a lawmte in dak lam, Pa Nang Khaw Suan in sahang lukan, Nu Cingpi leh a lawmte in Aksi lam lak uh a, mipite in muhnopsa thei mahmah hi. A tawpna lamah lamgui kaihna mi honpi in nei uh a, Rev. Dai Do Thang in lungdamkoh thungetna tawh hunzatna hial hi.

Mimbung, Mizoram

            Mizoram sunga Zomite khuapi khat ahi Mimbung ah zong ZNN nuam takin kizang a, a kum 10 cinna Paite Tribe recognition lopna tawh kithuahkhawm hi.

            February 20 zingsang tuung panin Zomi Nam Ni ahih manin inn khempeuh leh mobile tower tung sang pekah Nam puan kizak hi. Sai khempeuh kikhak a, kuamah gam kuan leh nasem muh ding om lo hi.

            Programme pen zinglam nai 9:30 in kipan a, gam le nam itna la – Sakmi khangmi kikhen loin, Pupa huaisa I Zolei leh Aw zuunloh gam lummei in bawh cih la sa ziahziah uh hi.

            Pastor S. Thualgouthang in programmete Pasian kiangah a ap zawh ciangin Pu V. Gin Suan in vaidawn thugenna leh Mizogam sunga Zomite adinga nuntakna a pia Martyr 19-te zahtakna leh pahtawina in suunna hun kizang a, “Phamsa Mihangte cih la kikhahkhia a, mipi lung khoih mahmah hi ding hi, a kap khia bang om liang hi! Suktuah lam MES naupangte in a kan zawh uh ciangin Pu Muana Hangsing in Mizoram a nam dinmun uh leh thu tuamtuam genna nei hi. Tua khit ciangin Tg. Ginlalmuan in siamsinna lamah panlak a kisapna leh nam zahpihloh ding ahih dan gen hi. Choreography muhnop tak MES naupangte in siam takin lak uh a, Pu Mangzathang in thugenna a neih zawh ciang Upa Ginthuam in hun masa khakna nei hi.

            Hun nihna Pa Thangzasiam Munluah in makaih a, Upa Kangzalian in kipat thungetna a neih zawh ciangin chief guest Pu L. Thangmawi in thugenna nei hi. Functional president Pu Lalpi in nam leh gam it ding ahihna thu leh pau thupi bawl ding ahihna gen a, thulu, “Nam a cian semna” cih pen lawhcing mahmah hi. Pu Thangkhanlal Samte, Secretary PTC Mimbung Unit in report a piak khit ciangin Pastor S. Thualgouthang in hunzawh lungdam kohna nei a, Mimbung Community hall dimlet liang a paikhawm mipite in cim het loin kikhen uh hi.

Murlen, Mizoram

            Murlen khua ah zong ZNN pen Murlen khua sunga om Zomi a kici khempeuh kipawlkhawmin Vok khat tawh nuam takin hun zang uh a, ZNN piankhiat dan leh a thupina khawng a kigen banah, lamgui nuam takin kai uh hi.

Vapar, Mizoram

            Vapar khua ah zong ZNN nuam takin zang thei uh a, Vapar khua pana lal, Champhai Bethel venga VCM Pu Z. K Thang leh Pu T. Thangte kihelin ZNN piankhatna leh a manphatna thu gen uh a, kipumkhatna lo tawh mainawt theihloh ahihna leh, leitung mun tuamtuama Zomite in ZNN pen bawlden uh a, eite zong Zomi i hih manin i zat pelmawh ding ahihna thu gen uh hi. Tua banah, zu leh sa hanga siatna tampi i tuakte pen thei-in, tuate taisan thei dingin i ngaihsutna i zat kisam hi, ci uh hi. Hih hunah Champhai lam panin sanggamte pawlkhat in zong va uap uh hi.

Hnahlan, Mizoram

            Hnahlan khua ah zong a khatvei nadingin ZNN kibawl hi. ZNN piankhatna leh a manphatna gen dingin Rev. Suan Khan Thang, ZBC – E.S cial uh a, amah kihel thei-in hun manpha takin zang thei hi. Zinpi dingin Congress Champhai North Block 2 President Pu Hma Ngaih Zam leh zinmang Pu Kapchhuanthanga, VCP, Hnahlante zong kihel theiin thugenna hun zang thei uh a, tua banah Pi Helen Hmar, Manager, Mizoram Rural Bank leh Pu Lalrotluanga, President Hnahlan Branch YMA, Pu Thang Za Lian, Pa Neng Za Lian leh Pa Khen Za Nang in zong thugenna hun nei uh hi.

ZIA, Myanmar

            Zomi Independence Army (ZIA) in zong February 20 niin mun suakta khatah ZNN bawl uh hi. ZIA pen September 10, 2012 ni-in a kiphutkhia hi a, Zomite suahtak nading leh minam dangte tawh liangko kikima khantoh nading a hanciam ahi uh hi.

Yangon, Myanmar

            Yangon khuapi a om Zomite in zong Tamaii Yadana Khanmah ah nasia takin bawl uh a, ngeina lam tuamtuam leh fashion show lahna nei uh hi. Letsong piakna zong om a, M.A zo khinsate Prof. Dr. C. Thang Za Tuan in pia hi. Tua banah tan 10 distinction thum tungsiah a ngahte zong pahtawina kipia hi.

Maryland, USA

            USA gamsunga om Zomite in zong a omomna uah ZNN zang tek thei uh hi. Maryland state a omte inzong Baltimore ah zang uh hi. Zomi min tawh a kizat khatveina ahi hi. Rev. Zam Khai in thungetna a neih khit ciangin hun nuam takin kipan hi. Thugenna hun a zang Pa Thang Lian Pau in, ‘USA a tunzawh kum 18 bang pha ta a, ahih hangin Zomi hi napi’n a beisa hunah ZNN pen Kawlpau leh Mikang pau bekbek tawh kibawl in, tukum Zomi Innkuan Maryland in Zopau ngiat tawh kibawl thei ahih manin Zomi Innkuan Maryland makaite thupi a sakna thu gen hi. Tua banah Pu Kai Khup in zong Zomite tangthu genna zong nei hi.

Oklahama, USA

            Zomi Innkuan Oklahama inntekna tawh US gama Zomite tamna khuapi ahi Tulsa khuapi-ah ZNN nuam takin zang uh hi.

            Hih hunah Zomi Innkuan USA thusiamna tawh Zomi mipil Doctor of Philosophy (Ph. D) a ngah thak mi 7 tungah pahtawina kipia hi. Zinpi ahi Dr. H. Kham Khan Suan in Ph. D a ngah thakte pahtawina Zomi mipil teng taangin sang hi.  Hih hunah pahtawina a kipiate pen :

1.   Dr. Gin Lian Mung, Ph.D. (Philosophy), University of Pune, India. Sept. 2008

2.   Dr. H. Kham Khan Suan, Ph.D. (Political Science), Jawaharlal Nehru University, New Delhi, India. June 1, 2010

3.   Dr. Dim San Nuam, Ph.D. (Physics), University of Yangon, Myanmar. 2010

4.   Dr. Mang Uap, Ph.D. (Botany), University of Yangon, Myanmar. March 2011

5.   Dr. Don Sian Man, Ph.D. (Botany), Dagon University, Myanmar. August 2011

6.   Dr. Luan Za Ciin, Ph.D. (Electrical Engineering), Mandalay Technological University, Myanmar. 2011

7.   Dr. Zam Dongh, Ph.D. (History), University of Mandalay, Yangon. Jan. 7, 2012

            Hih hunah Zomi Ph. D. ngah thakte kikaikhawm kim man lo ahih main Zomi Innkuan USA kipawlna kumcin khawmpi ciangin a ban kizom lai ding ahihna thu zong kipulak hi.

            Leitung mun tuamtuamah ZNN pen kipawlna tuamtuam, pawlpi tuamtuam in kibawl ziahziah hi. Kigingkhol meel lo-a a zang tawh, kiginkholna bang lo-a a zang mi tampi om hi. Hih munah gelh khit zawh ding hi lo a, hih i gelhna mun ahi lo, Kawlgam, Vaigam leh leitung mun tuamtuam ah zong thupi takin kizang ziahziah hi, cih phawk ni.  (Source : Internet)