ZOMI NAM NI

FEBRUARY 20

                February 20 hi Zofate tan ni pawimawh tak – ‘Mizoram State Day’ leh ‘Zomi National Day/Chin National Day’ a ni a, he ni hi Zofate, khawvela kan om chhung chuan kan tan ni pawimawh a ni reng dawn a ni.  Zomi National Day lo pian chuahdan leh Zofate tan a pawimawhna tlem a zawng han tarlang i la.

                Mihringte hian inrahbehna, inhnuaichhiahna leh imhmuhsitna hi kan duh loh berte zinga mi a ni awm e. Revolution leh hnam leh ram buaina bulpui ber chu mahni dikna leh chanvo, kan chan tur ang chang lo a inrahbehna a tanga zalenna duh vang a ni tlangpui. Mizoram pawhin zalenna a duh avang leh min ngaihsaktu tur ten min ngaihsak loh avangin buaina rapthlak tak kan tuar a ni tih chu in hrilh nawn a ngai kher awm lo ve.

                Chutiang bawkin Zomi National Day lo chhuahna chhan bulpui ber pawh zalenna duh vang a ni a. Mingo imperialist hoin ram hrang hrang an hneh a, an ram zauh zelin, kum 1885 a Kawlram pumpui an thuhnuaiah an dah hnuah kum 1896 khan dodalna tamtak karah Zofate chenna, Chin hills an lut a ni.

                Mingo hovin Zofate chenna ram an rawn awpbeh hnuah mipui-mimir duhdan ni lovin ‘Chin Hills Regulation Act’ hmangin Zofate chenna hmun hrang hrang – Lushai hills, Manipur hill area, Nagaland, tuna Burma ram chhung Sagaing division a Somra hill leh Mizoram a Cacha-Chakma ramte min awpbet a.

                Chu Chin Hills Regulation Act hmang chuan feudal chief an ruat hmiah hmiah a. Chief ho chuan chhiah chi hrang hrang an duh duh an la a, an duh dan leh tha an tih dan ang anga rorelin, an lal em em ringawt mai a, an ro rel dan chu mipui tan sawilsel theih a ni lo. Mipui an rethei em em ringawt mai a ni.

                Chutiang rorelna dan siamtu imperialist ho leh feudal chief ho rahbehna a tanga zalenna duh avang chuan kum 1928 February 20 khan Mindat township Hlingzung (Mahtungnu) khua ah ‘Chin Hills Union Organisation’ (CHUO) din a ni a. Kum 1932 September 29 khan Ware khua ah khawmpui hmasaber neih a ni.

                Hun a lo kal zel a, CHUO hruaitute chuan kumpinu sawrkar ah an mamawh leh tul ni-a an hriat point 9 ziakin dilna an siam a, chungte chu :

1.    Zoram/Zoland hian phairam/Kawlram nen a inangin hamthatna/hlawkna an neihna turin.

2.   Zoram inkaihruaina danpui (constitution) chu a mipui (Zomite) duhdan a siam tur.

3.   Zirna, hriselna leh sumdawnna lama hmasawnna tur.

4.   Zofate chenna hmuna schoolte a rang thei ang ber a cheithat.

5.   Sakhaw zalenna.

6.   Inkalpawhna kawng tha a rang lama siam turin.

7.   Zoram leh Kawlram zalen taka inkalpawh theih.

8.   Zofate hnamdangte nen dinhmun intluktlang a in zom theihna.

9.   Kawlram in zalenna a hmuh hunah Zoram pawhin zalenna a hmu ve nghal tur a ni.

                Kumpinu sawrkar chuan chu dilna chu February 28, 1938 khan a ngaihtuah a, he hunah hian CHUO member 300 an tel ve a ni. Nimahsela heng an dilna hi peka hnekin he pawl hi tihtawp anih theihna turin hma an la hial a, hruaitute pawh politics khel tawh lo turin thu an pe bawk! Hruaitute chu sawrkar hna tha tak pek an tiam a, hruaituten an duh loh avangin sawrkar chuan CHUO tihtawp a nih theihna turin hma nasa takin a la ni.

                Nasa taka an thlem chung pawha sawrkar thu an zawm duh loh avang chuan CHUO hruaitute chu sawrkar chuan an man ta hmiah hmiah mai a. Chutia hruaitute an man avang chuan mipui thinrim in Kanpalet a tangin kumpinu palai ho an um chhuak hial a ni.

                Kawlramin zalenna a hmuh huna ram danpui an hman tur ah chuan lower parliament leh upper parliament a om a, Zofate tan chumi rorelna hmunah chuan aiawh tirh tur a ni. Ram danpui in a phut dawn avangin palai tur rel turin Falam khua-ah kum 1948 February 19 – 22 chhung khan ah ‘Zomi National Conference’ neih a ni.

                He khawmpui ni hnihna February 20 ni chuan Tedim bial Tuithang khua tanga kal Pu Thang Za Kai chuan, “Zalenna hmuh hma a imperialist ho min hnutchhiah thalo tak inrahbehna (feudalism) avanga chhiah chi hrang hrang, hlawh nei lova kuli chhawrna, mi retheite thisen leh thlantui far chunga an hlawhchhuahsa diklo taka feudal chief hoin an laksakna leh thuneihna an hman sual nasat lutuk avangin nasa takin kan tuar a. Chuvang chuan he feudalism hi a zung chawpin phawi a, keimahni leh keimahni zalen taka mipui duhdan democracy a inkaihhruaina hman a ngai a ni” tiin kalkhawm mipui hmaah a sawi a. Falam bial Lailun khua a tanga kal Pu Chun Mang leh Kanpalet a tanga palai Thang Maung te chuan remtihna thu an rawn sawi nghal a. Chu feudal chief ho thuneihna tihtawpna tur chu vote lain mipui 5000 zinga 7 chuan tha ti loin 4993 chuan tha tiin a rawtna chu pawm a ni.

                Lalho rorelna an tihtawp avang chan compensation cheng 5,00,000 chu pek a ni a. Chu pawisa chu lalte hnenah an laldan a zirin 70,000/-  20,000/-  5,000/-  1,000/- leh 100/- tea sem a ni.

                Chumi ni February 20 chu Zofate tan inrahbehna, in hnuaichhiahna leh chhiah chi hrang hrang atanga zalenna ni anih avangin a hlu em em a. Pakistan mipuite tan an ram independence a hlut tluk zetin Zofate tan a hlu a ni. Chumi avang chuan kum tin he ni hi khawvel hmun hrang hranga om Zomite chuan urhsun takin an hmang thin a ni.

                Zofate hi keimahni leh keimahni Zo inti hnam kan ni a. Hnam dangin Chin, Kuki ti-a min lam avangin an sawi ang kan ni chuang lo. Zo vok, Zo ar, Laizo, Zokhua, Zotung Zophei.. tia mahni khua leh hming sa hnam kan ni. Chin State pawh Zo/Zomi State kan tih hun a nghahlhelhawm hle. Sakhuana lamah Chin State a kohhran lian ber pawh ZOMI BAPTIST CONVENTION tiin kum 1953 khan din a ni a, Falam, Hualngo, Tedim, Haka, Mindat, Matupi.. etc. in lungrual taka hma an lak hona a nih avangin, national day pawh Zo/Zomi hming ngei a hman tlan theih hun a nghahlhelh awm hle.

                 Tun kumah pawh USA, Singapore, Japan, Malaysia, Thailand, India, Myanmar leh khawvel hmun hrang hrang ah hman a ni dawn a. India ramah chuan National level in New Delhi a Thyagaraj Stadium ah, India Home Minister Sushil Kumar Shinde chu khuallian niin, Pu Phungzathang Tonsing, Minister (Health, GAD, CADA) Govt. of Manipur chu functional president a ni ang. Mizoram khua hrang hrang – Vapar, Murlen, Hnahlan leh Mimbung ah hman a ni dawn a. Mimbung ah chuan Pu H. Rohluna, Minister, (E&F, FCS&C), Govt. of Mizoram leh Pu Thanglianpau, President ZRO chu khuallian niin, Pu Muana Hangsing, Ex. President PTC chu khualzahawm a ni ang.

(Feb. 2013)