LUNGDAMBAWL THUNGETNA

LUNGDAMBAWL THUNGETNA

Vanglian Topa Pasian,

         Pasian kimlai mihing lim le meel pua a, mawhneite honkhia dinga leitungah mawhbaang lo Jesu Khris hong kum sukna hun, Amah, Tapa Jesu Khris leh vantungmite adingin 'lungkham hun' ahih hang, tawntung gimthuak ding a sihna pana Amah tatkhiatna a um mihingte in a nuam nuntak tawntungna a ngah kik nading hun, lungdamhuai lua mahmah ahih mana 'lungdambawl hun' a kici zang kik thei dinga hunpha nong ngahsakna hangin lungdam ing.

         Ama gui tangtawng pek tawh a kizom, Amah pen kote hong 'ukpa' ding, a min zong 'Lamdang thulakpa, Vanglian Pasian, Tawntung Pa, leh Nopsakna Kumpi' a kici ding kimlai, kiniamkhiatna lim la a, mihingte inn zong ahi lo, gan buuk sunga gan ann nekna kuang sungah mihing lim pua a Tapa Jesu Khris hong suak mawk pen, leitung na lamdangte laka thupi ka sak pen ahi hi. Mi genthei leh liangvai, huh ding leh belh ding nei lote leh, ko mawhna tawh a kidim mihingte adingin haksatna khempeuh thuak dinga leitungah Tapa Jesu Khris hong paina thu pen lamdang lua mahmah a, thupi lua kaan lai hi.

         'Vanglian Pasian' ahi kimlai, kote natna teng thuak a, kote gimna teng khempeuh pua a, kote khialhna hanga liamna thuakin, kote mawhna hangin satnimna thuak ding leh, tuu banga lam a khial khin mihingte' mawhna khempeuh kisuan ding cih theisa a leitungah Tapa Jesu Khris hong paina hangin, kote in Ama mawhna hanga thuak bangin ka ngaihsutna uh hong maisak inla, Ama gimthuakna hanga nopna ka ngahna uh leh, Ama liamna hanga damna ka ngahna uh a thakin in hih lungdambawl hunah hong phawksak kikkik in.

         Kote hanga kinengniamin, gimna a thuaksak uh hangin Amah kam khat beek pau lo a, sa gote kiangah a kipaipih tuuno leh, a mulmette maiah a kipaipih tuu a hamloh mah bangin, kote hanga haksatna a thuak hunin Amah kam khat beek a pauloh mah bangin, kote tungah haksatna hong bawl leh gimna hong pia mite tungah, hih lungdambawl tungtawnin Jesu Khris lungput, phunphun lo dingin ka lungsim uh hong lawng inla, Nangma hanga thuakna a om ciangin zong thanem lo dingin hong huh in.

         Tapa Jesu Khris in thukhenna maan lo thuak ding cih theisa leh, mawhna bawl het lo leh zuau thu gen ngei lo napi, a mulkimhuai pen singlamteh tunga kilhcipna leh a pang’ teiipi tawh dawtna hang a sihna ciang dong thuak dingin, leitung mite na itna hangin hong kumsuk hi tah, cih ka ngaihsut ciangin lamdang ka sa semsem a, nong itna sanga lianzaw bangmah om lo ding hi, ciin ka ngaihsun hi.

         Tapa Jesu Khris leitungah mawhna tawh a kidim mihingte ‘Tanh’ dinga hong pai hunin, a pian nading mihingte lam inn sung a tanloh hangin, inn thupi leh lupna thupite, kham leh ngun tawh a kizut munte sanga manphazaw, keima lungsimah hong lut inla, ka nuntakna hong ukin, Nang tawh nungtakhawm thei dingin hong paisan ngei kei in.

         Herod lungtang bang lungtang tawh lungdambawl a zang lo dingin ka nuntakna hong makaih in. Tua ahih kei leh mite adingin sihna leh natna, thusia-lasia leh a hoih lo tuamtuam ka sem kha ding a, keima nuntakna mahmah zong, lungdambawl hun ka zatzia in hong maigumsak kha ding hi. Bawlphat theihnawnloh ding zah dongin natna lauhuai AIDS ngahin, nau paai-in, Nangma deihloh nasep tuamtuam sep na’ngin hih lungdambawl hun ka zat khak ding ka lau hi.

         Tua ahih manin, tuucingte leh mipilte mah bangin, lungdam taka kote mawhna pua ding a Tapa Jesu Khris hong paina hunah, hong paina ii a manphatna theician a, lungsim siangtho tak tawh lungdam-bawl muak a, Nangma zia le tong sunin mite huh leh don thei dingin hong siam inla, mite adingin lungkhambawl hi lo a, lungdamna a bawl ka suak theih nadingin hong ompih tawntung in; kong thuum hi.

         Lungdambawl tungtawnin - citak taka Nangmah upna, khahsuah ngei lo a nong ompih den ding lametna kip, Nong itna mah banga na bawlsa nate itna, mawhna tawh a kidim kei nong maisak bang a ka tunga hong mawhte maisakna, nong hehpih mah banga midangte hehpihna, nong tatkhiatna hang a lungdamna leh, Tapa Jesu mah banga thumang dingin ka lungsim-ah na hong sem inla, Jesu Khris tungtawna nuntakna thak nong piak mah bangin, ka mi lui ngeina hoih lote nusia a, nuntakzia thak tawh Nangma nungzui muanhuai suak dingin ka nuntakna hong nosuak sak in.

         Nang tawh loin bangmah tangtung zo lo a, mihing hoih sawmna leh geelna bek pen bucing thei lo hi. Nang na omna nuam a, na kihelna mun siangtho hi. Nangma hanga ki-itna kip-in kho a, nangmah tawh ka neih uh thuphate kip hi. Hong khahsuah loin hong ompih den inla, Nangma deihna banga nungta dingin ka lungsim hong ukden in.

                Ka nuntakna cingtaak lo nong kepna hang leh ka mawhna simzawhloh nong maisakna hangin lungdam ko-in, kote mawhna a puakhia Tapa Jesu Khris min suangin kong ngen hi. Amen.

Daihna Cabin || Nov. 30, 2013

SIHNA LEH ZU

SIHNA LEH ZU

Zu hanga siatna tuamtuam hong tungte leh haksatna hong tungte ka tuattuat ciangin ka lungsimah ciamteh zawh ding hi nawn lo hi. Zu hanga siatna hong tungte sum tawh lohkik ding hi leng, tam zen si’n teh ciin ka ngaihsun a, zu hanga siatna tuamtuam ka tuat ciangin zu dawn ngam dingin ka lungsim hangsan zo lo hi.

Zu hanga siatna tuamtuam, sihna leh sih dektakna thu, innkuan sung siatna ka tuattuat ciangin lipkhaphuai ka sa a, lau thei lo leh a pil thei lo hi mai hang, ciin ka ngaihsun hi.

Makai hoih pipi, thu dang la dangah zong a zat theih mahmah, pilna siamna lamah ci leng zong a zahpih huai lo, thatang hat leh lungsim manlang mahmahte in, zu hanga mual hong liamsan uh a,  it le ngaih, a hun het lo a zu hanga hong nusiate ka ngaihsut kikkik ciangin, ta-gahna, meigonna, sum le pai leh haksatna lianzaw hong tun hi tah, ciin ka lungsim na kikkik hi.

Sihna a om ciangin zu nung bang kek a, a ut peuhpeuh in zu kham a, a misite it taktak banga a kahna uh ka muh ciangin, ka luak suakin, ka heh suak zaw lai hi. Pa J. Thawmte in, “Kei bel ka sih ciangin zu kham limlim in hong kah kei hen la, ka kivuina hunah zong hong kihel vet kei leh deih ing” ci hi. Kei deihdan zong hi pah hi.

Zu dawn a, pumpi in a zawhloh ding cianga a dawn mite in itna nei lo hi. A tate, a u leh nau, a lawm le gual zong it lo uh hi. Zu it zaw uh a, a tate uh tawh nuntak sangin a zu tawh sih ding teelzaw uh hi. Tua ahih manin a lang lamin ngaihsun leng, zu hanga site khawng pen kah zong kahhuai lo hi.

Tua bang lawmlawm hi sam kei e, a ci zong om kha ni. Hoih takin mihing nuntakna suut leng, a it lohpi, a kep noplohpi in bang hangin leitungah a tate uh a pian nadingin vaihawm uh hiam?

Sihna hanga ta-gah, nu le pa nei lo bel thu tuam, ahi zongin zu hanga ta-gah leh meigongte ka ngaihsut ciangin cik mah ciang maisak thei lo ding zah-a ka ngaihsut hun bang om thei hi.

Zu le sa hangin haksatna bang teng na thuak, zu kham siatna hangin kithah na sawm ngei hiam? Zu hangin zato inn bangzah vei na tung a, zu hangin na innkuan leh khua in bangzah tak siatna na thuak uh hiam?

Thuakthuak lai ding maw, ahih kei leh tu-a ciang zong cimtak ta; Nang khut sungah kinga hi. 

(Vapar khua context a kigelh ahi... Vapar Weekly Newsletters a kisuah)

I THUPINGAIHSUT BANG?

I THUPINGAIHSUT BANG?

Khantohna pen i thupingaihsut thute in sai mahmah hi. A thupi het lo thu a kithupingahsut mahmahna munah a thupi het lo nasepna leh a gah (result) om nuam mahmah hi. Tua tawh a kilehngat lianin na thupi leh a hoih a pha deih a, a lamen leh tua bang a semte leh a kisepna munah khantohna om hi.

Laigelhpa khat in, “Nungakte in tangval zu kham a thupisimlohna khua-ah tangvalte in zu kham ngam lo uh hi” ci hi. Maan mahmah dingin ka lamen hi. Nungak pawlkhat in, tangval zu kham lote thugen um loin, zu kham kawma thu-a gengente peuh um zaw uh a, tua bang a tamna munah zu i khaam-khaam zongin khaam baih lo thei hi. Zu khamte a kiphasak theihna munah zu dawn mite pen kithupingaihsut hi kha thei a, a thupisim lo ding a zu dawn lo mipi a tawmzawk man zong hi thei hi!!

Mizogam-ah hun khat lai panin la siam kithupingaihsut mahmah ahih manin la siam kidemna ki-uang mahmah hi. India gam mipite in cricket pen thupingaihsut mahmah ahih manin cricket siamte minthang uh a, England gamah football pen kithupingaihsut ahih manin a siamte minthangin vaang nei pah se uh hi.

I gennop bang hiam? Khantoh ding, ki-it ding, kilem ding leh khua kithutuak ding i deih taktak leh, mipite lungsim-ah tua bang a sem nuam, a sem ngamte thupisimin, a nawngkaisak, a buaisak leh haksatna a tun mite i muhdan khat a kilaih hun ciangin I lunggulhte neih ding hong nai mahmah ding hi.

“Lai a siam hangin a phattuamna om tuan kei”  “Tan 10 a zawh hangin bang mahmah in zang tuan ke’n teh” i cihcih sung teng Tan 10, 12, B.A zo hong tam thei lo ding a, a zo nuam zong hong kibehlap lo kha ding hi.

“Zu a dawnloh hangin………”  “Thu hoih a gengen hangin amah zong……” i cihcih sung teng khantohna taktak om ngei lo ding a, na hoih a sem nuamte i thupingaihsut ciangin na hoih sem nuam hong kibehlap-in, khantoh ding lunggulhna hanga zu dawn lo ngamte i thupingaihsut taktak ciangin zu dawn lo hih manphatna hong lian ding a, khangnote in zu dawnlo hih pen tup le ngim in hong nei ding uh hi.

Thungetna tawh damsakna nei mi a lunggulh a, thupi a sa mahmahte lakah a damsak thei lote nangawn kineihkhemin om thei uh hi. Tua in i thupingaihsut nate in mite tawh i kizopna leh i nuntakna sungah nakpi takin na sem hi, cih kilangsak hi.

Na thupingaihsut bang hiam? Bang thupingaihsut sawm na hiam? Nangma khentatna in khua, minam, gam khangtosak thei ahihna phawk gige in.

(Vapar Weekly Newspaper ading a ka gelh hi)

MI NGEINATE NUNTAKZIA

MI NGEINATE NUNTAKZIA

Khatvei laibu ka simna khat-ah “Mi picingte nuntakzia” cih point tawm khat hong gelh a, ka lungsim hong khoih mahmah leh zui thei leng hoih ding hi, ka cihte behlapin point 20 gualsukin, ka website ah ka guang hi.

Ahi zongin, tuhun i dinmun ka ngaihsut ciangin, mi picing nuntakzia cih gengam sangin, “Mi ngeinate nuntakzia” ci leng a kituakzaw diam maw? ciin ka ngaihsun a, tua ahih manin mi ngeinate neih ding, a nuntakzia ding uh pawlkhat kikum dih ni.

1.   Zahtak nei uh hi : Mi picingte in mi neupen nangawn zahtak bawl uh a, ahi zongin mi ngeinate in mi neupente a zahtakloh uh hangin zahtak mahmah khat le nih nei sam uh hi. Zahtak neih pen mi ngeina hihna ahi hi. Mi site in zahtak khat zong nei lo uh a, mi bang lo pawlkhat in bel zahtak nei sam uh hi. A zahtak uh pen a tuamtuam hi thei a, innkuanpih, nu leh pa, u leh nau, pi leh pu, khuasung makai leh pawlpi makai etc. zong hi thei hi. Na nuntakna sungah zahtak khat zong nei loin, na ut bangbangin na gamtat gawpgawp lai teng, mi bang lote nuaiah, amau sangin a haizaw leh mihing a cing lo zaw na hi ding hi.

2.   Thu hoih deih : Mi picingte in thu hoih tawh na hoih sep sawm uh a, mi ngeinate in bel ngaihsun sam uh hi. Mi ngeina nuai lam leh mi bang lote in thu hoih leh manpha deihna mel thei lo uh a, mite siat nading ahih hangin a ut bangbangun gamta phangphang uh hi.

3.   A hoih lamin ngaihsun hi : Haksatna leh buaina, sihna leh dahnate pen mikim tuak hi a, a om thei mah hi, cih phawk hi. Amah bekin a thuak hi loin, leitung mite in a thuak uh ahihna phawk hi. David bangin haksatna hanga lungdamna a ngah (Late 119:67-69, 71,72) sam loh hangin, a kamsia lua leh a thuakpen danin kingaihsun tuan lo hi.

4.   Mite it : Mi picingte in midangte in a it kik ding zah dongin mite it siam uh a, mi ngeinate in tua bang a siamloh hangin midangte itna nei sam hi. Ganhingte in zong itna nei sam uh a, itna a nei het lo mihing pen ganhing sanga manpha lo zaw leh haizaw hi kha ding hi. Itna a omlohna munah kilemna leh daihna om lo a, kikhangto thei lo hi, cih mi ngeinate in phawk sam a, tua a neih uh pen khansak semsem sawm uh hi.

5.   A manphatna thei : Ganhingte in zong amau a itte thei-in, a manphatna leh tuate zong it kik ding a kisapna zong thei uh a, tua pen mi ngeinate nuntakzia ding zong ahi hi. Mi picingte in amau a it het lote in zong a it theih nading un hanciam uh a, ahi zongin mi ngeinate in bel amau a hazate a it zawhloh hangin, amau a itte ii manphatna thei sam uh hi. Leitung pen khat guak a teenna hi lo ahih manin mite manphatna thei a, a kisapna uh zong thei ahih manin mite tawh kitot, kisel, kihuat ding pen ut masa het lo uh hi.

Ganhingte sanga niamzaw leh thupi lozaw-in na nuntakna na zang kha hiam? Mi ngeina na hi hiam? Mi bang lo hi-a na theihte sangin na ngaihsutna a niamzaw hiam? Nangma khensatna pen na nuntakzia ding ahi hi.

(Vapar Weekly Newspaper ading a ka gelh hi)