((Hih thu pen Hnahlan Pastor Area ZBC Khawk Khawmpi October 4 – 6, 2013
sung a Murlen khua-a a kizatna huna Oct. 5 & 6, 2013 zingsang a Upa Seminar
huna seminar paper ahi hi)
MAKAIH SIAM NADINGA
PANMUN LAKZIA
(Strategies to become a good leader)
Thupatna
Amasa-in, ‘Upa’ i cih kuate? Upate
in bang sem ding? Bang vaipuak leh tavuan nei hiam? cih pen ngaihsut masak ding
ahi hi. Tua banah, Upate pen makai kicite laka nam khat ahih manin, makaihna
lam tawh kisai i uang gen ding hi.
Upa cih pen Greek pau ‘Diakonos’, Latin pau ‘Deaconus’ leh Mikang pau in ‘Deacons’ cihna hi a, a khiatna pen –
Nasempa (worker), Silapa (servant). Uk sepna (to administer), hilh sepna (to minister),
sabuai pana/kianga nasem ding a ngakpa (Luka 17:8) cihna hi a, Upa dinga a
kiteelna a hang pen – Sawltakte in a hun uh ‘thungetna’ leh ‘lungdamna
thugenna’ in a zat theih nading banah, pawlpi sungah ann nek tui dawn
ding, sum le pai vaihawm ding leh meigongte ann nek ding vaihawm ding hi[1]
(Sawl. 6:1-5). Sawltakte in hun awng a neih theih nadinga a nasepna uh pawlkhat
a huh/dawn ding cihna hi.
Sawltak Paul in Upa tawh kisai
na thupi-ngaihsutin, Upa sem ding zong deih teel mahmah a, tua banah, Upa nasep
hoih taka semte pakta mahmah-in, ‘khial hi’ ci-in mi khat bekin a mawhsakna
pen mawhna picingin sang lo hi[2].
Upa masa sagihte[3] pen Kha Siangtho tawh
kidim uh hi. Tua ahih manin, Upate pen mi mawkmawk hi loin, nasep thupi a sem
ding leh Pasian in a seh (I Thes. 5:12) a hihna phawk a, makai thupite laka
khat ahihna phawk ding ahi hi.
I. Makai
A hat lo mite pen eimah bekin zong zawh theih hi a, na thupi lua lote
zong eimah bekin sep theih ahi hi. Ahi zongin na thupi sem a, geel a, lawhcin
sawm i hih leh, khatbek tha tawh lawhcin theih khit hi lo a, tua manin omkhop,
kithuahkkhop, geelkhop leh sepkhop kisam hi. Tua banga mi khat sanga tamzaw a
omna-ah a mapi ding a om kisam a, tua bang a om kei leh, “Sia tam lua tembaw
pai thei lo” cih bangin mainawt a lawhcin nading lampi kician takin kitawn
thei lo ding hi.
Leitung-ah a neu mahmah ganhing Miksite leh a lian mahmah Saite pan
kipan, Pasian bawl nate laka a thupi pen mihingte ciang dongin – innkuan, khua,
pawlpi, minam leh gam adingin kisap lianpen in – kimakaihna hoih, khantohna,
hong susia thei tuamtuamte lak pana kikepbit nading leh suahtak nadingin amaute
lakah vaihawm ding a telkhiat / sehkhiat / om
kul a, tua pen ‘makai’ kici hi. Tom cikin gen lehang – “Nungzui
a neite makai hi” cih theih hi. Tua makaite pil leh pilloh, a kivak leh
kivaklohin pawl sung nop leh noploh, khantohna leh niamkiatna sai mahmah hi.
Tua hi a, ‘makai’ cih pen Pasian in a
saan kammal thupi khat hi ding hi.
Makai
tawh a kikhen thei het lo pen ‘nungzui’
ahi hi. Makai hoih mahmah napi’n nungzui hoih het lo om thei hi. Makaite thahat
nading, mazan nading leh nasep a lamzan nadingin nungzui hoih kisam a, makai
hoih suak nadingin zong nungzui hoih hih masak kisam hi. Tua dingin – makaite’
thumang ding, zahtak ding, haksatna thuak ngam ding, phunphun lo ding,
thuanuamin citak a, a kisin nuam mi hih ding kisam hi. Jethro nungzuiin Moses
makai hoih suak a, Elisha in Elijah, Timoti in Paul, Josef in Faro, Esther in
Mordekai, Josua in Moses, Nungzuite in Jesu cih bangin makaite nung hoih takin
a zuih manun makai hoih suak uh hi.
II. Bang hangin makai hoih kisam?
Mihingte
in khantoh ki-ut ciat a, mainawt kisawm ciat hi. Pawlkhatte in tua dingin lampi
ngaihsun thei loin, a pai nading, a zuat ding uh leh a mailam hun uh zong
bangmah thei lo uh ahih manin tua bangte a makaih thei dingin makai hoih kisam
hi. A gina lote a ginasak ding, a haite pilsakin, a mawlte a tat-hiam ding, a
thahatlote tha khauhsakin, lungkia mite hanthawna lametna thak neisak ding,
amau beka lampi a thei lote lak ding leh makaih ding, lamet bei-a om mite
nangawn lametna thak a nei thei dingin huh-in panpih ding leh, nungzui gina
lote leh makai gina lote zong a ginasak dingin makai hoih kisam hi. Lai
Siangtho in ‘makaih siamna a neite in
hoih taka sem dingin’ gen hi (Rom 12:8).
III. Makaih siam, makai hoih i cih kuate hiam?
Harry S. Truman (1884 – 1972), US President (1945 – 53) in, “Makai siam i
cih pen mipite in a sepnoploh uh na khatpeuh, thanuam tak leh lawp taka semsak
thei dinga makaih siamna a neite ahi hi” ci hi.
Peter G. Wiwcharuck in, “Makai siam i cihte pen mipite leh
a upna, ngaihsutna, hun, neihsa leh thatangte siam taka zanga nasep a
lawhcingsakte hi” ci a, Ted W. Enstrom in, “Makai omzia bulpi pen
hih leitunga a hoih na khat peuhpeuh seppihte zang a tangtunsak / picinsak ahi
hi,” na ci hi. Victor Manogram in, “Makai hoihte pen, pawl tup le
ngimte tel a, a lawhcin theih nadinga mite thapiak a siamte ahi hi,” na ci hi. Lord
Montgomery in, “Makai i cihin kipawlna hoih dangte bangin tup le ngim
kician nei ding a, tua pawl’ tup le ngim-ah mipite a lunglut theih nadingin
kaihkhop, thapiak siam ding hi” ci hi. US President Jimmy Carter’ zi Rosalyn
Carter in, “A makaih mite tun nopna munah makai hoih ngeinate in tunpih
uh a, makai thupite in ahih leh a makaihte in a phattuampih ding uh ahih nak
leh a utna mun uh a tunma-in zong khawlpih ngamin, khatveivei a utna muh sanga
gamlazaw zong paipih thei uh hi” ci hi.
IV. Makaihzia nam tuamtuamte
Leitungah mihingte – lungsim puakzia, pau, ngeina, khua, minam, leh gam
a kibatloh mah bangin makaite makaihzia zong nam tuamtuam om hi[4]. Talkhaih (Gtn. Hitler), Hawl (Colonialist), Tonpih (Gandhi, Mandela) cih bang zong na om hi.
Ki-ukzawhna, cihtakna, sawlna leh
sepkhiatna tawh tupna a bulphuh, a hangsan, a gen ngam, a sem ngam, buaina leh
haksatna om mahleh a tup le ngim a tangtun mateng thudang tawh a meh lo – Tupna a bulphuh (goal
oriented). Hih bang makaihnazia a nei a hatte in – thukhentatna kician,
citakna, hangsanna, thuakzawhna, sep masak ding thei; A thanemte pen – lungtom,
aw khauh, khut manlang, theihsiamna nei lo, thagum suang, hehpihna leh
thukhualna nei lo hi.
Mipi a bulphuh, mi a lungdamsak
thei, a thuzawh thei, mipi tha leh neihsa bekah kinga – Mipite a bulphuh (People oriented). A hatte – kam cidam, lungsim
manlang, lawm le gual hau, hehpihna, deihsakna nei, a hun zui-in kikhel
thei-in, thapiak siam uh; A thanemte pen – ciampel baih,
thuakzawhna nei lo, hun zeek siam lo, patau baih, a kahneh, a kineih siam,
matut tam nei lo.
Mi lungdam leh khasiat ding
sangin thuman taka a kalsuan nuam, thu nung, thuma thei, theihtel teng bek na a
sem nuam – Thukhun a
bulphuh (schedule oriented). A hatte in – thukhun zui, thuman,
citak, lungduai, kamtawm, kiniamkhiat, thukhual, leptuah siam; A thanemte
pen – Kineumuh, tuantual/zekai, thu siatkaih, thu khentat haksa, saupi heh,
nuak, kilawmtatna kisam mahmah uh hi.
A gen ding leh sep ding a
theician, midangte deihsakna a nei, kipawlkhop, sepkhop, ngahkhop, kipumkhat
ding a lunggulh mi – Sepkhopna
a bulphuh (Co-operation oriented). A hatte pen – ki-ukzo, kamtawm,
makaih siam, ngaihsutna hoih nei, hun zeek siam, kipumkhat nading deih ngiat; A
thanemte pen – aipeng thei, kikhelpak thei lo, ama gen bek thupi sa,
lungtom, midem hat, hazatna nei hi.
Hihte a zangkhawm siamte mazang mahmah uh a, lawhcing baih uh hi.
Tuate banah Lai Siangtho sungah en lehang, makaihzia nam tuamtuam kimu
thei hi.
1. Abraham : A makaih mite it-in, khual mahmah a, a kikhen ding uh
ciangin zong a deihna teel masasak hi. Tua banah, a pai nading zong a
kitheician lo munah a mite hangsan takin Pasian thu hangin paipih ngam hi.
2. Moses : Pasian in makai
dinga a sapkhiat hi a, Pasian sawlna bangbang mang hi. Sehnel gamah dangtakin
mipite a phun uh ciangin mipite mai-etin kawi vakvak lo a, Topa tungah kiko hi
(Pai. 15:24,25). A nungah makai sem ding Joshua pantah hi.
3. Joshua : Mite in haksatna
leh lauhuai hi-a a muh uh pen aman zawh theih dingin ngaihsun a, lau loin
hangsan taka a sepna hangin gualzawhna thupi ngah hi.
4. Ahab : Ahab pen a zi Jejebel in thuzawh ahih manin a ngaihsut
ngeiloh Naboth dik lo takin that (I Kum. 21)
5. Jeptha : Pasian tungah gualzawhna a ngahsak leh, gualzo-a a ciah
ciangin a inn pana amah a dawna pusuak masa pen meihal biapiakna dingin piak
sawm a, a tanu in dawn ahih manin melhal biakpiakna in pia takpi hi (Thukhente
11:30,31 &39).
6. David : David in Pasian
sathaunilh Saul pen zahtakin, that
nuam lo hi.
7. Solomon : Makaih siamna Pasian kiangah ngen, pilna tawh makaih.
Kilemna bawl sawmin kumpite tanute teenpih a, milim biakna a gamah lut lawh
zawsop hi.
8. Daniel : A tungsiahte maipha
muhnopna hangin ama adinga hoih lo leh zuau thu banah, Pasian nungheksan nuam
lo hi. A citak, a ki-ukzo makai khat ahih manin ama tung panin Pasian zong a
thei nai lote in theihlawh uh hi.
9. Jesu : Taii a kulte
tai-in, hilh a kisamte thuhilh a (Mat. 11:20; 16:22, Marka 8:32; 16:14, Luka
9:55), thumaanna leh cihtakna tawh nasem ding leh, hangsan taka Lungdamna thu
pulak dingin makaih hi. Ama adingin mite in sem lo a, a mite adingin
kiniamkhiat takin semzaw hi. A nungzui ding mi pantah hi.
10.
Paul : “Kei hong etteh un
la, kei gamtat bangin gamta un” (Fil. 3:17, I Kor. 4:16; 11:1) ci ngam hi. Haksana
lianpipi[5]
a thuak hangin muanhuai-in a nungzui, a tha laih ding Timoti pantah hi.
V.
Makaite sep ding/tavuan (Role of the leaders)
1.
Lamlak ding (piloting) : Sep
ding bawl ding, leh kalsuanzia ding a thei lo leh a ngaihsun thei lo mi bangzah
hiam makaih ding ahih manin lamlakin, amah mah in bul pat masak a kisap ciangin
pan ding hi. Hilh in theician sak ding a, kizopna hoih bawlin lam lak ding hi.
2.
Kembit ding (Protecting) : Lauhuaina
mun, siat theihna, nat theihna leh sih theihna mun panin a makaih mite huh a
kisap hun ciangin huh-in, kembit ding hi.
3.
Ann vak (Feeding) : A
gilkialna, a dangtak hun uh ciangin ann le tui pia, a dah hun uh ciangin hehnem
ding.
4.
Tawldamsak (comforting) : Gim
lua, tawl lua, lunggim lua leh haksatna nei kawmin nasep pen muibun lo,
lawhcing taktak thei lo ahih manin tawldamsak ding a, a gimna a tawlna uh, a
haksatna uh pan ama (makai) kiangah tawldam ding uh hi.
5.
Kimaingap sak ding (intimacy) : I theihcianloh leh i muan hetloh mi pen kizui ngam lo a,
amau ading leh amau makaihna nuaiah thalawp tak leh kuhkal taka sep haksa hi. Kipawlna
kip bawl ding (build strong teams). Kimaingapna tawh kizopna hoih neih pen
lawhcinna bulpi khat hi[6].
VI. Bang teng sem
ding :
1. Tupna (Goal) nei ding : Leitung mihingte in pai nopna leh lunglutna kinei ciat
hi. Kipawlna khatpeuh a om ciangin zong tupna kibulphuh zel hi. Tua ahih manin
tupna kician nei a, tua mun tung dingin makaih ding ahi hi. Tua tupna pen amah
bek hi loin midangte in zong a phattuampih theih hi ding hi.
2. Geelkhol (plan) ding : Tup le ngim kician tak tun nadingin geelkholhna kician
nei ding a, tua bangin a nungzuite makaih ding hi. Geelkholhna a om kei leh a
lawhcinna ciang leh a tunna ciang uh kithei lo ding hi. A hun zatna sa panin
mailam hun zatzia ding geelna kician nei ding hi.
3. Huaikhawm ding : Anungzui mite pen kilem tak leh thanuam taka a sep theih
nading un huaikhawmin, thalawp taka ma a pang thei dingin a lungsim uh zo ding
hi.
4. Ma kai ding : A nungzuite in a sep ngamloh uh a om a, a sep noploh uh a
om phial zongin, bul pan masa dingin lamen thei uh hi. Tuate ah a hoihna thu a
tel, a theihcianna munah haksatna a thuak masa ngam dingin ma kai ding hi.
5. Mithak seek ding : Lungsim, pumpi leh kha thu-ah mi picing hi thei dingin a
mite pantah a, makai hoih suak thei dingin mithak seek picing ding hi.
VII. Makaite cinna leh makai hoih, makai siam hih nading
Zomite makaihna tawh kisai i gen
laitakin, Zomibup phial Khristian kihi ta ahih manin Khristian kimakaihna tawh
kisai i tam gen ding hi. Makaite cinna leh makai hoih hih nadingin:
1.
A piangthak mi : Kipawlna dangte lakah zong kisam mahmah napi’n, biakna
pawlpi sung diakah makaite/Upate pen a piangthak, Pasian a zahtak, Pasian in
sem dinga a seh (I Thes. 5:12) ahihna phawkin a zahtak, thunget a hat, leh a
kiniamkhiat mi ahih kisam pha mahmah hi. Bang hang hiam cih leh, mi mangthang,
mi kibang lo, leh a gi lo mahmah zong makaih ding uh ahih manin, mi piangthak
lote in tua bang mite makaih zo lo uh hi. Jesu in mittaw leh mittaw a kimakaih
theihloh ding thu gen hi (Luka 6:39).
2.
Muanhuai ding : Mihingte in i muan hetloh mi pen kizui ngam lo hi. Makai
hoih hi a, nungzui hoih/tam neih na ut leh muanhuai inla, mite muan theih
dingin om in.
3.
Tuhun in a kisap
makai : Mihingte hi ta leh, nate thupina leh
manphatna pen a kisapna a tamna zahzah uh ahi hi. Makai hoih, makai siam hi
nadingin tuhuna leitung paizia, tuhun mite deihdan, ut lam, lunghihmawh,
thalawpnate theihpih a, tuate tawh makaih siam kisam ding hi. Mite thu zong a
manphatna a theihsiampih, mi a thupi bawl siam hih ding kisam hi.
4.
Tupna leh muhkholhna
kician nei ding : Tupna kician neihna pen mihing
ngeinate nuntakzia hi a, makaite bang diakin neih pelmawh ding ahi hi. Tua
tupna pen a tangtun theih nadingin lampi-ah haksatna, buaina, lungdamna, sum le
pai bei dingte kician takin theihkhol, mukhol ding hi. I pil mahmah hangin
tupna kician i neih kei leh a mawkna hi lel ding hi.
5.
Mi citak: Mipite lutang ding ahih manin makai pen a makaihte etteh
tak dingin citak ding a, a makaihte a lungkiat hun uh ciangin zong tha a ngah
kik theih nadingun leh haksatna lauhuaipen a tuak uh ciangin zong kibelhna taak
dingin a nuntakna kip ding hi. Sum le pai leh nu le pa (sex) thu-ah a citak mi
hi ding hi. Nuam taka pai theih nadingin kongkhak kihong den lo ding ahih manin
a cihtak mahmah kisam hi.
6.
A ettehtak mi : Makai ahih manin ama nuntakna leh a innkuan nuntakna pen
mite in etteh den hi. Tua ahih manin a makaihte’ ettehtak dingin ama nuntakna
leh innkuan kemzo-in, ukzo ding hi. Pawl nasep nadingin a hun leh a neihsa sum
le pai kipiakhia ngam ding hi.
7.
Midangte a pahtawi
siam : Mihingte eima hihna leh sepna
ciangciangah pahtawi nuam kisa-in, ki-ut ciat hi. Makai hoih, mipite tawh
kithutuak hih nadingin mi phat siam, pahtawi siam kisam a, mi pahtawi a siamte
in a pahtawite tha a piapia ahi hi.
8.
Thuakzawhna nei : Kipawlna khat peuhpeuhah haksatna leh buaina, makaite
hawmthawhna leh gensiatna om teitei a, makai hoih in tua bang hun ciangin
kiniamkhiatna leh lungduaina tawh thuak zo hi. Thu hoih mahmah zong a makaihte
in ahoihna tel pak lo thei a, a saan theih nadingun hanciamin, kinawh tengtung
loin ngakzo ding hi. Moses minthanna pen a lungduaina hang hi, kici hi.
9.
Pil ding : Mite makai ding, mipite maiah pai ding ahih manin na khat
peuhpeuhah a makaihte tunglam, a makaihte sangin theizaw, siamzaw, pilzaw-in,
thudik leh zuau thu khentel thei ding a, a hun leh mun tawh kituakin kampau leh
gamtatdan ding khentel ding hi. Ama khantohna ding bek ngaihsun loin, a makaih
mite’ khantoh nading zong gelpihin lamlak ding hi. Mi lungsim nasak het loin a
hoihlohna leh kicinlohna hilh siamin, a thalawp theih nadingin hanthawn siam
ding hi. Mipite theihna, muhna, hatma leh hatlohna theician ding, khialhna pan
kisinin ngaihsutzia kibang lote a hang zongkhia ding.
10.
Ciamnuih gen siam : J. Oswald Sanders in, “Makai ciamnuih siam lote lawhcing
thei taktak lo hi” na ci hi. A makaih te’n a mai-ngap theih nadingin
ciamnuih a gen zong a kisap hun om hi (Mat. 23:24,27)
11.
A kiva mi : A makaihte in haksatna leh nopna a tuak uh ciangin a kidawk
masapente lakah kihel ding hi. Vaihawmna tungtawna sep le bawl ding kipiate
leh, ama tunga kisuante lawp tak leh a theihna tawpin sem ding a, tavuan
awlmawh ding hi. A gen bekbek hi loin a takin semkhia ding a, thuak a kul leh
zong thuak masapen ding hi.
12.
Amah a kimuangngam mi
: Makai hoih hi dingin amah leh amah
kimuan-ngamna (self confidence) a neih kisam a, lawp taka sem a pulak /
genkhia thei dingin amah leh amah kimuanngamin hangsan (courage) ding
hi. Mi lakah zahkai den makai pen makai hoih hi ngei lo a, mipite in zong
muangzo lo pah hi. Amah a kimuan laitakin, ama pilna le siamna bek suang lo a,
Pasian leh mipi deihna bang hi hiam, cih kantel ding hi.
13.
Itna nei ding : Itna a neite mi gina, makai gina hi nuam mahmah hi. Itna lo
tawh mite adingin nasep taktak haksa hi. Leitunga makai hoihte in kipawlna,
minam leh gam na it mahmah uh hi.
14.
Theihsiamna nei mi : A makaih mipite cinlohna leh hatlohna theisiam ding hi. A
haksatna uh leh cinlohna panin bangci hotkhiat ding, cih a ngaihsun mi hi ding
a, a makaihte utdan, lawpdan, leh lungsim ngaihsutnate theisiamin tua
tungtawnin na semin vaihawm ding hi. A makaih mipite pen mihing mah ahihna uh
thei ding a, semkhial, bawlkhial, leh ngaihsunkhial thei ahihna uh phawk ding
hi.
15.
A huaiham lo mi : A makai hihna suangin, nekguk-takguk theihna leh ama
phattuam nading bek ngaihsun lo ding hi. Ngah ding bekbek a lamen hi loin, a
piakhia hizaw ding hi (not greedy, but giving).
16.
Mi muangngam : Amah a kimuanngam mah bangin mi muangngam ding hi. Nasep
thupite pen khat beka zawh theih hi lo hi. Mi muanngamna pen nasep lawhcinna
bulpi ahi hi.
17.
Sapna a ngah mi : Khristian makaihna pen thubaih lo hi. Sapna a za/ngah lote
adingin cimtakhuai mahmah thei hi. Ba’m cih leh, sapna in a sappa/nu tha piaden
a, tua-in na hoih sem dingin huh hi.
18.
Hun manphatna a thei
: Vai khat peuhpeuh a lap lo den mi pen
makai hoih suak ngei lo kha ding hi. Sep ding khatpeuh a kigen ciang a buai pen
bang kek a omden makai pen makai hoih hi ngei lo hi. Mi pawlkhat pen makai a
kicih uh hangin nungthuap na hi gige a, hamphatna khatpeuh in paisan lianlian
uh hi. Jesu pen kum 3 sung bekbek na a sep hangin a sep ding teng zo man veve
hi. Nepoleon in gal a lelhna hang pen hun a maan zawhloh man hi, kici hi[7].
19.
Khensatna kician a
nei mi : Kipawlna
sungah vai haksa leh thu buaihuai om lo thei lo hi. Tuate pen a hun leh a
haksatna tawh kizui-in khensat siam kisam hi. Baih taka khensat a kisap hun om
thei a, ngak phot a kisap hun om thei hi. Tuate pen theician ding hi.
20.Kikhel thei ding : Na
khatpeuhpeuh a hoih lo pan a hoih a kikhel thei mi leh a kikhelsak thei mi, mite
in a hoihna a muh banloh uh zong a mu thei, a hoihna leh manphatna a theihlohte
uh zong a thei, Pasian deihna ahih nak leh a kikhelsak ngamte mite in zui nuam
uh hi.
21.
A ki-ukzo : Hehna i neih pen Pasian lim le mel sutna khat hi a,
hamphatna khat hi[8]. Makai
hoih a kigen mi tuamtuam banah, Jesu nangawn heh mahmah hun nei thei hi. A hen
ngei het lo mi pen mibang lo hi kha ding a, ahi zongin a hun leh a mun, a mi
tawh kituakin heh dan siam kisam hi. Tua banah, ci le sa deihna leh a hoih lo
tuamtuam panin zong makai khat adingin ki-ukzawhna kisam pha mahmah hi.
22.
Hangsan ding : Mipite in a meidawi lua makaite’ nung zui nuam lo uh hi. A
hai hangsante hi loin, thudik leh thuman gupna hanga thuak a kul leh zong a
thuak ngam mite a nung zui nuam uh hi. Amau thuak ding zonga thuaksak ngam ding
zah donga makai hangsante tungah mipite in a nuntakna uh pia ngam uh hi.
23.
Mite a zangsiam leh a
pantah nuam : Kipawlna a omna hang pen khatbekin na
lianpi i sep theihloh man hi. Tua manin makaite in i nungzuite i zatsiamna
zahzahin i manphatna lian ding hi. Tua banah makai thak ding pantah zong
makaite tavuan lianpi hi. Makai ding a pantah nuam lo mite omna leh kipawlna
pen khangto ngei lo ding hi. Bang hang hiam cih leh, sem dingin thahatna leh
siamna a nei nawn lo pawlpi-ah bangci khangtohna om ding. Tua banah mi thak a
seek nuam lo makaite pen amau bek thunei nuam leh amau angsung a khual hi nuam
mahmah ahih manin zakdahhuai mahmah ahi hi.
24.
A masa leh a nunung
ding thei : Kisapna pen leitungah a kisam lianpen
ahi hi. Kisapna nei het lo a kithei mi pen a nuntakna nuam het lo kha ding a,
nuam a sa phial zongin midangte adingin enhuai het lo kha ding hi. Tua kisamte
lakah a masa leh anunung ding, sep masak leh sep nunun ding, sep pah hanga
manpha thei leh seppah lo hanga siatna a piang thei thute pen khensiam kisam
mahmah hi.
25.
Theician ding : Makai khat in a sep ding, a bawl ding, a tavuan theician
ding hi. Ama sep ding ngeingei zong paulap bawlin sep loh theih ding dan lampi
ngaihsunsun lo ding hi.Tua banah, makai hoih in a gualzawhna ii manphatna leh
lawhsapna hanga supna om theite kician takin thei ding hi.
26.
Deihsakloh luat nei
lo ding : Nungzuite pen mi kibang lo pipi ahih
uh hangin deihsakna nei ding hi. Deihsakloh luat nei loin, a deihsak deuhte
zong kilangkhia sak lua lo ding hi. A khangto nuamte dal loin, huh ding a, lampi
a thei lote pantah ding hi.
27.
Ngaihsutna maan nei
ding : Na khatpeuh sep ding a om ciangin sem
zo lo leh sem thei lo dingin kingaihsun pahpah lo ding. Amah leh a makaih
kipawlna pen mite in sem thei dinga a ngaihsut nate sem zo dingin kingaihsun
ding hi. Nungzuite in hun haksa pana a ngaihsut uh zong a vensak theih
nadingin, ciim tak leh kician taka a muh theih nadingin linglawng gawp pahpah
lo ding hi.
VIII. Makai hoih tawh
kisai telkhialh theih thu pawlkhat om hi. Makai hoih i cih pen …..
1. Hihna
(position) hi lo : Makai hoih i cih ciangin hihna/dinmun (position)
genna hi lo hi. Makaih a siam mahmah, ahi zongin pawlpi leh organization
tuamtuamah dinmun poimawh a luah lo om thei a, tuamah bangin, dinmun poimawh
tampi a lente khempeuh zong makai hoih hi khin tuan lo hi. Moses tutphahah
Laigelhte leh Farisaite a tut uh hangin makai hoih ahihloh zia uh Jesu in gen
hi (Matt. 23:1,2).
2. Mimal
pianzia(personality) hoihna bek hi lo : Makai
hoih i cih ciangin mihing migitna leh pianzia (personality) hoih genna
hi lo a, personality hoih neite zong makai hoih hi khin tuan lo hi. Ama
nuntakna pen mite etteh ding ahih laitakin, makaihna lamah a lawhsap leh a
makaih mite adingin a khiatna tam lo
thei hi. Farisaite hoih gamtat mahmah tase leh mipite lampi maan tawnsak tuan
lo uh hi (Matt. 23:1-12; Mk.12:39).
3. Thuneihna
(authority) hi lo : Makai i cih ciangin thuneihna (authority)
genna hi lo hi. Lungdamna Thu Johan 13 sung i et ciangin Jesu in
a nungzuite khe a silsak thu i mu hi. makaihna
pen kiliatsakna, kithupitsakna hi loin, midangte ading a nasepsakna hi zaw a,
mite taanga sem, mite deih banga gamta ‘sila’ hizaw hi.
4. Kum
tam sepna (Seniority) hi lo : Kum tam sep manin makai hoih cihna hi lo hi.
Midang omloh man khawng, mi kicinloh man khawng, kipawlna taisan ding lauman
khawngin makai in hong kiseh/kiteelden zong na hi thei a, cimtak pipi-in loh
theihloh in zong makai in a kiseh/kiteelteel zong hi thei hi. Kipawlna a
buaisak lianpente lakah hih thu kihel den phial hi. Jesu in leitungah kum 3 leh
a lang sung bek nasep hun[9]
a neih hangin makai hoih suak veve a, tuni dong ciang nungzui a haupen leh,
makai thupipenin kigen veve hi.
IX. Makaite puk
theihna tampi om a, makai hoih hi dingin anuaiate panin kidophuai hi
1.
Thadahna (Laziness) :
Thadahna pen
makai tampite pukna leh makai hoih a suak zawhlohna lianpi ahi hi. Sep ding
khatpeuh a om ciangin paulap bekbek a zong den makai pen makai hoih suak ngei
lo ding hi. Mi khat in, “Paulap bawl a
siamte in siam dang nei lo uh hi” ci hi.
2.
Kisaktheihna (pride)
: Sep le bawlna-ah lawhcinna hang leh kum
tam makai sepna hangin kisaktheihna piang thei hi. Makai in kisaktheihna leh
kiphatsakna a neih leh, tua in pukna piangsak hi (Pau. 16:18).
3.
Minthanna
(popularity) : Minthanna pen ahoih mahmah ahih
laitakin tua-in kisaktheihna leh hi kisakna piangsak thei a, a hoih lo lamin
mihingah nasem thei hi. William Penn in, “Avoid popularity; it has many
snares and no real benefits” na ci hi. Meetna pi om lo, thaang
(trap/snare) lauhuai mahmah hi thei hi.
4.
Lawhsapna (failure) :
Mikang te’n, “Lawhsapna pen lawhcinna khuam
muanhuai ahi hi (Failure is the pillar of success)” na ci uh hi. Makai te’n
makaihna-ah lawhsapna tuak teitei uh a, makai hoih lote pukin, lungkia thei uh a,
makai hoihte in tha saan kik uh hi (Mikah 7:8). Joshua in Ai khua a zawhloh
hangin a makai hihna panin kitawp lo hi.
5.
Hazatna (jealousy) : Makai pawlkhat amah sanga mi a siamzawk, pilzawk leh
neihzawk ding a lau om thei hi. Hazatna pen – guh a muatsak natna hi a
(Pau. 14:30b), hehna leh sin-sona siahuai a, tua sangin zong siahuaizaw lai
hi (Pau. 27 :4).
6.
Huaihamna (greed) : Amau phattuam nading bek a ngaihsun, a huaiham makai pen
makai hoih hi ngei lo hi. Lai Siangtho in huaihamna pen, ‘milim biakna zahin
sia’ (Efesa 5:5); ‘Enna leh huaihamna a om nak leh buaina leh siatna nam
khempeuh tawh kizom pahpah hi’ (James 3:16) na ci hi. A huaiham makai pen a
puk, a kisia makai ahi hi.
7.
Lungkiatna
(discouragement) : Makai hoihte a lungkia pahpah lote ahi
hi. Haksatna leh galte tamna lakah Joshua lungkia lo dingin Topa’n ci hi (Joshua 1:9). Ai khua a zawhloh na panin
lungkia lo a paikik dingin Topa’n hilh hi (Joshua 8:1). Cidamlohna, gensiatna,
lawhsapna, mipite thadahna, sum haksatna etc. hangin lungkiat theih hi.
8.
Lamdawt (shortcut) : Lamdawt tawna lawhcinna, hauhna,
gualzawhna, vangliatna pen kip lo a, lauhuai hi. Tua manin makaite adingin
kidophuai mahmah hi.
9.
Gensiatna (criticism)
: Leitungah mihingte a paubang lo (perfect)
om lo hi. Mi khat in na a sepna gensiat nading a zong teitei pawl om hi.
Gensiatna pen nam nihin kikhen a, kibawlphat nadinga gensiatna (constructive
criticism) leh siat semsem nadinga gensiatna (destructive criticism)
kici hi. Mi pawlkhat tua bang gensiatna hangin puk thei hi. Martin Luther pen Upna man lo, kici a, D. L
Moody pen Grammar maan taka pau thei lo kici hi. Makai thupi leh makai hoiha
kigen – Mahatma Gandhi, Nelson Mandela, Abraham Lincoln etc. pen gensiatna a
tam thuakpente hi kha ding hi.
10.
Haksatna : Hih atunga thute khepeuh zong
haksatna nam tuamtuam hi veve napi’n, makaihna pen a baih leh lawhcinna pen ol
taka ngah thei hi lo cih phawk ding a, haksatna hunah lungkia pahpah loin,
tha-thak la kikkikin hanciam ding hi (Late 119 : 67-72, Mikah 7:8).
X. Khristian makaihna
Pawlpi leh Christian Organization tuamtuam makaihna pen Kha
lam thu ahih manin tua pawl-a makaite pen Kha-lam-makai (Spiritual Leader) hi ding hi. Zogam leh Zomite sungah Pasian
nasemte (ministers) leh Upate lakah Kha-lam-makai ahihna uh sangin vaihawm makai
(administrative leader) a kisa, na khempeuh a sai nuam, a sai ding peuh a sa
pawlkhat om a, pawlpi kilem lai a khenkham leh thusia a bawl zawsop makai a om zel pen awlmawhhuai a, tua bang mite in Pawlpi
leh Pasian gam tangzaisak lo bek tham loin, amaute hangin mi tampi in tha
kiamna neih lawh zawsop hi.
J. Oswald Sander in makaihna tawh kisai
nam nih – Pianpih makai (Natural leaders) leh Kha-mina tawh makai (Spiritual
leader) in khen a, hih bangin na genkak (compared) hi :
|
Natural Leader
|
|
Spiritual Leader
|
||
|
1
|
Amah bek kimuang
hi.
|
1
|
Pasian muang hi.
|
|
|
2
|
Mite theitel hi.
|
2
|
Pasian zong theitel
hi.
|
|
|
3
|
Lungtupna lian nei
(nawk gawp)
|
3
|
Kiniamkhiat hi.
|
|
|
4
|
Ama hamphat nading
bek ngaihsun hi.
|
4
|
Ama hamphat nading
bek ngaihsun lo
|
|
|
5
|
Sepdan thak
bawlkhia hi.
|
5
|
Pasian sepsa zui
hi.
|
|
|
6
|
Thupiak nuamsa hi.
|
6
|
Pasian deihna
kancian hi.
|
|
|
7
|
Ama hamphat nading
bek ngaihsun hi.
|
7
|
Pasian leh midangte
it hi.
|
|
|
8
|
Amah bekin tang din
hi.
|
|
8
|
Pasian tungah kinga
hi.
|
Thukhupna :
Nidang lai a Greek politiciante paunak,
“Mipite in amau tawh kituak gam makai nei
uh hi” cih pen tuhun ciangin maan nawn lo hi. Mipi haite in makai pil kisam
sem a, a zawng mipite in hauhna lampi a thei makai kisam hi. A hat lote in hat
theih nading lampi a sialsak thei makai kisam uh hi. Kum 1961 a Gen.
Park Chung Hee in S. Korea president a sep cilin na khempeuh phial-ah N.
Korea lamte tungtuangzaw hi. Kum 1960 kiim a per capita income USD 72 bek pen
kum 1989 ciangin a zah 67 in khang man hi. Malaysia gam en lehang, Mahathir
bin Mohammad in kum 1981 in Prime Minister sep kipan a, tua huna per
capita income pen USD 450 bek hi napi, 2003 in USD 9,000 hi man hi. Kum 1960
kiimin ‘mun kihhuai, niin teng khempeuh a luankhopna’ a kici Singapore khuapi’
khantohna pen Lee Kuan Yew hang hi a, kum 2007 in per capita income USD
49,700 hi man zen hi. India gamah en lehang, Gujarat[10]
Chief Minsiter – Narendra Modi, Tripura CM – Manik Sarkar, Bihar CM – Natish
Kumar hanga a khantohna uh i thei ciat uh hi. A lang lamah, gamsung
hauhna tampi a nei – Iraq, Burma, Africa gamte khawng ii khangtohlohna pen a
gam makaite hoihlohna hang hi. Makai hoih leh dik in kipawlna/gam a makaih
ciangin a mite lungnuamin thalawp uh a, khantohna om hi. “Makai hoihte makaihna nuaiah lawhcinna a om leh tua lawhcinna-ah
makaite leh a nungzuite lungdamna kikim lian hi” a kici pen dik mahmah hi. Pawlpi,
minam, gam a khantoh nadingin makai hoih i kisam a, tua dingin nang’ zong
tavuan lianpi na nei hi.
Etkakte :
1. Khaizakham, Rev. Dr. Kh. Responsibilities
of Church Leader”, CBA Seminar, 12/12/2001
2. Hoihnu, M, Makai tawh
kisai thusinna” Seminar paper @ AG
Biakinn, Zarkawt, Aizawl; May 25 – 26, 2002
3. Tuang, Rev. S. Chin Khan, Seminar paper, Leadership on June 2, 2013 @ Vengthar
ZBC
4. Thang, Rev. Cin Ngaih, Seminar paper, Makaite leh a makaihzia @ Cikha.
5. Lian, T. Sawm, Article, Leadership,
Laitai, April 2008
6. Lian, T. Sawm, Article, Makai
Siam leh Nungzui Hoih
7. Tuangpu, N, Article, Makai
Manphatna (Leadership Qualitiy) Nam 5, Laitai, October 2013
8.
Campbell, Rhonda, Article, Role of a Good Leader
9. Sander, J. Oswald, Spiritual
Leadership, http://www.nicklica.com/pastor-and-leadership-topics/174-book-summary-spiritual-leadership-by-j-oswald-sanders
10. _______, The
importance of Leadership & How to be a good leader, http://emilgen2011.hubpages.com/hub/The-Importance-of-Leadership-and-How-to-be-a-Good-Leader
11. _______, Qualities of Good Leadership, http://www.ourcommunity.com.au/boards/boards_article.jsp?articleId=1356
12. _______, 10 Characteristics of Good Leadership, http://www.ronedmondson.com/2012/12/10-characteristics-of-good-leadership-repost.html
13. Thawngno, Job, Article, Makai Siam
leh Nungzui Hoih, ZOLUS No. 16, 2012
14. Sapdanga, K, A New
!dea, Charity Press, Aizawl, 2013
15. Kim, Lian Muan, Makaih
Pilna (2nd Edition), Hebron Printing Press, Yangon, June 2010
16. Thawngno, Job, Pawlpi Upa leh A Nasep,
Tahan, 1996
17. Lian, T. Sawm, Nuntak
Manphazaw Tawh Lawhcinna, Gilzom Offset, Aizawl, 2012
[1]Thawngno, Job, Pawlpi Upa leh A Nasep, Tahan, 1996
[2]Tim. Masa 3:8-13 leh Titus
1:5 sung i sim ciangin Upa sem dingte nuntakzia ding Sawltak Paul in kician
takin gelh a, Upa muanhuaite a pahtakna thu leh a thupingaihsutzia zong Tim.
Masa 5:17-20 sungah kician takin gelh hi.
[3]Stefen, Filip,
Prokhoras, Nikanor, Timon, Parmenas, leh Nikolas (Sawl. 6:5)
[4] Judge leader :
Encikin a hoihlohnate muh sawm, tua pana mite zawh a sawmte. Democratic
leader : Mi tamzawte deihna leh hoihsak bang a vaihawmte. Consultant
leader : Midangte thu dong kawma makaite. Contextual leader : A hun
leh mun tawh kituaka lungsim puak siamte. Skillful leader : Mite sanga
tangzaizaw a gelsiamna leh muhkholhna (vision)
neite. Spontaneous leader : A kulna-in a phut hun ciang sem, hun dang
ciang awlmawhna a nei lote. Expert leader : Siamtuam neel, makaih talent
a neite. Autocratic leader : Ama thu bek thu sa a, midangte gen thupi
sim lo, ama thu leh deihna a tun masiah lungkim ngei lote. Laissez - faire
leader : Mi tungah kinga, mi gen peuhpeuh hoihsa kawikawi. Diplomatic leader : Ama angsung bek
khual, a seppih/nungzuite tha tawh ama angsung ading bek mitsuan. Bureaucratic leader : A kigelh or
kigeelna omsa bang lianlianin na sem. A tungsiahte lungkim nading ahih naak leh
a nungzuite thuakna leh haksatna zong phamawh sa lo.
[5] 2 Korin 11: 19-33
[6] Napolean hatna pen a
nungzuite ama tungah a cihtakna hang hi a, tua pen a officerte a theihciannna
pana piang hi.
[7] Napoleon pen France galkap
mang hi a, England kumpi tawh nakpi takin kido-in, kum 1815 in Battle of Waterloo kici gal kidona panin
gual lelin, a galte (Englandte) in zo hi.
[8] Kim, Lian Muan, Makaih Pilna (2nd Edition),
pp. 93, Hebron Printing Press, Yangon, June 2010
[9] Kim, Lian Muan, Makaih Pilna (2nd Edition),
pp. 187, Hebron Printing Press, Yangon, June
2010
[10] Singapore a bawngnawi
khempeuh phial leh Afganistan gama mehthuk khempeuh phial pen Gujarat pana
kikhak hi – A New !dea, Charity
Press, Aizawl, 2013
No comments:
Post a Comment