PAWLPI ZEKH NIHTE: TUIPHUMNA LEH TOPA’ ANKUANG

PAWLPI ZEKH NIHTE: TUIPHUMNA LEH TOPA’ ANKUANG

(The Two Ordinances of the Church: Baptism & Lord’s Supper)

                Khris nungzui, ‘Khristiante’ in i thupingaihsut ding leh i zuih ding pen Jesu Khris in sem ding leh zui dinga hong piak thute, ama hong sawlna/vaikhakna banga zat ahi hi. Khristiante lakah Zomite in ‘Pawlpi Zekh’ i cih pen Mikang pau in ‘Sacraments’ ahi hih kei leh ‘Ordinances’ kici hi. Roman Catholic leh Orthodox pawlpi in ‘Sacraments’ kici nam sagih (7) nei uh a, tuate lakah ngaihsutzia or deihna a kibatloh hangin Protestant-te zekh ahi thu-um mite tui kiphumna (baptism [of the believers]) leh Topa’ Ankuang (Lord’s Supper) zong kihel hi. Protestantte lakah, adiakin Tuiphumte (Baptists) in Lai Siangtho tawh kituakin pawlpi zekh nih – Thu-um mite tuiphumna leh Topa’ Ankuang nei a, ahi zongin hihte pen ‘Sacraments’ cih kammal sangin ‘Ordinances’ kici zaw hi.

Sacraments leh Ordinances

                Sacrament kici pen Latin pau a sacramenttum kici, kiciamna (oath), galkapte in amau tungsiahte tunga kiciamna cihna hi a, Khristian sungah hih kammal a kizat ciangin thusim, kuama theih zawhloh thusim, hilhcian theihloh (mustçrion/mystery) ciin Latin pau tawh a kitei Thuciam Thak Lai Siangtho sungah kizang hi. Ahi zongin Thuciam Thak sungah mustçrion ahih kei leh sacramentum kici pen tuiphumna leh Topa Ankuang genna dingin kizang lo hi. Tua ahih manin ‘ordinance’ kici, ‘zuihloh theihloh ding a hong kipia ngeina’ cih kammal kizang zaw hi.

                A kitel zawkna dingin, ‘sacrament/sacramentum’ pen a niamzaw mite, a thunei lo zawte in a tungsiahte kiangah muanhuai ding a kiciamna uh hi a, ahi zongin ‘ordinances’ kici pen tungsiah, a lianzawte tung pana a niamzaw, a za neuzawte kiangah zuih ding a kipia ngeina ahi hi. Tua ahih manin, hih pawlpi zekh nih – Tuiphumna leh Topa’ Ankuangte pen, thu-um mite in Pasian kiangah i kiciamna lam hi loin, Jesu in zuih ding, Amah i phawkna ding, Ama thu i man ding a deihna hang a hong piak hizaw hi. Tua ahih manin ‘pawlpi zekhte’ cih i gen ciangin i gennop pen ‘ordinances’ hi, cih phawk masa leng deihhuai hi.

I. TUIPHUMNA

                I gensa bangin, Jesu hong vaikhak leh sep dinga hong piak thute pen Amah a zui taktakte adingin a thupipen leh a manpha pen hi a, Amah a um mite khempeuh in zuih teitei ding ahi hi. Tuiphumna tawh kisai pen pawlpi kim in kithupingaihsut kim phial a, ahi zongin (tuiphumna) a khiatna leh a kizatna hang kibang kim lo hi. Gentehna-in, pawlpi pawlkhat in naupang tuiphumna nei uh a, pawlkhat ‘Jesu’ min bek tawh a kiphum omin, pawlkhat in tuiphumna pen hotkhiatna ngahna a sa bang zong om hi. Tuate a banbanin i gen ding hi.

                Zomite in ‘tuiphumna’ i cih pen Mikang kama ‘baptism’ cih tawh a deihna leh a gennop kibang hi. Tua ‘baptism’ kici pen Greek kammal ‘baptizô’ pana kila ahi hi. Lai Siangtho sungah ‘tuiphumna’ i cih, ‘baptizô’ ahih kei leh ‘baptism’ cih kammal pen tamveipi kimu a, Jesu sunga kiphumna (gtna. Gal. 3:27), sawpsiangna (Mark 7:4), Pharisee-te khutsilna (Luke 11:38) cihte bang zong Greek kammal ah ‘baptizô’ mah kizang khin hi. Kammal khat, deihna or a khiatna bangzah hiam om cihna ahi hi.

Septuagint kici, Hebru a kigelh Lai Siangtho, Greek pau tawh a kitei masa sungah, ‘baptizô’ kici nihvei kizang hi. ‘Jordan gun sunga Namaan a kiphumna’ (2 Kum 5:14) leh Isaiah 21:4 sungah kimu hi (Lacey:1999).

Tuiphum dingte

                Jesu Khris in Nungzuipite kiangah a kamvaikhakna i muh bangin, ‘Ama nungzui mite bek’ tui kiphum ding hi. Jesu in, “Tua ahih ciangin note pai unla, midang khempeuh, keima nungzui mi suaksakin, Pa min, Tapa min, leh Kha Siangtho min tawh tui sungah na phum un” (Mat. 28:19) ci hi. Hih munah a kician mahmah pen – khatna, Ama nungzuite (Khristiante) pen Jesu a thei nai lo mite kiangah pai ding; nihna, tua mite lungdamna thu hilhin, Jesu nungzui suaksak ding, thumna, tua khit ciangin tuiphum ding cih ahi hi. A banbanin sep ding Jesu in hong koihsak hi. Ei ut dandan a hih thute a masa ding nunun a, a nunung dingte masak theih hi lo hi. Tua ahih manin hih mun panin i muh theih a kician sinsen pen, mi khatpeuh in Jesu Khris ama Honpa leh Gumpa-a a san, a pianthak or Jesu nungzui hi ing, a kicih ciang tuiphumna nei ding hi.

                I kiim i kiangah naungek tuiphumna (infant baptism) a zang tampi om hi. Naungek tuiphumna a zang mite in a bulphuh uh pen Lai Siangtho sunga ‘innkuan a hotkhiatna a saang’ (gtna. Sawl. 11:14; 16:15,33; 18:8) mite panin tuiphumna pen naungekte ading zong hi, ci uh hi. Hih Lai Siangtho munte i sim ciangin, innkuan in tuikiphum uh cih kimu mah hi; ahi zongin innkuan cih ciangin naungek kihel teitei cihna hi lo hi. Innkuan tampi, naungek a nei lo zong om hi cih i thei ciat hi. Tua ahih manin innkuan kici pen naungeek a om leh omloh lamah hi loin, inn khat a tengkhawm teng genna hi lel a, naungek, pitek, putek a omloh hangin zong innkuan hi thei veve hi. Tua ahih manin naungek tuiphumna (infant baptism) pen Lai Siangtho in kician takin hong hilh lo ahih manin pawlpi tampi in kizang lo hi.

Pa, Tapa leh Kha Siangtho min tawh

                I gensa bangin, mi khat in, ‘mi mawh hi ing, kei mawhna hangin Jesu leitungah Pa Pasian in hong sawl a, kei taang dingin simmawh, bawlsiat, haksatna tampi thuakin, kei mawhna hangin Kalvari singlamteh tungah ka mawhna tawh sikhawm hi’ (Rom 4:25) ci a Jesu pen Honpa leh Gumpa a sangte in Pa, Tapa leh Kha Siangtho min tawh tuiphumna zang ding uh hi. Hih pen Jesu tektek in a gen hi a, kammal thupi, ama nungzuite’ zuih ding a hong kam vaikhak nunung ahih manin, zuih ding i tavuan/vaipuak ahi hi.

                Lai Siangtho sungah tuiphumna tuamtuam i mu hi. Jesu tuikiphumna khawng (Mat 3:13-17), Johan tuikiphumna khawng (Joh 3:23), thu-um masate Jesu min tawh tui a kiphumna uh Sawltakte Nasepna laibu panin kimu thei hi. Jesu leitungah a om laiin bang min zang or zanglo cih kithei lo a, ahi zongin a sihkhit ciangin, Pa, Tapa leh Kha Siangtho min tawh tui kiphum dingin hong hong vaikhak (order) hi. Ahi zongin, Sawltakte in Jesu min tawh tui na phum uh hi. Khatna, Hih mun panin tuiphumna pen a kithupingaihsut mahmah, a kisam mah ahihna kimu a, nihna, I gensa mah bangin Jesu hong thupiakna mah zuih dingin hoih hi.

                Sawltakte laibu sungah ‘Jesu min bek tawh’ tuiphumna kimu hi. Tua hun laia thu-um mite tui a phumsak makaite in Pasian pen Pa, Tapa, leh Kha Siangtho ahihna saang uh a, theician mahmah uh ahih manin buaina om lo hi. Ahi zongin tuhun ciangin mi pawlkhat in Pasian pen Pa, Tapa leh Kha Siangtho, mimal/To thum, Pasian khat ahihna a saan noplohna pen a buaihuai hong hi ta hi. Sawltak Paul in Jesu min bek tawh a tuiphum hangin Pa, Tapa leh Kha Siangtho pen Pasian khat sunga mimal thum ahihna na theician lua mahmah a (Rom 8:9; 15:16-30; 1 Kor 3:23; 2 Kor 1:21-22, 13:14; Eph 1;17,18, 2 Thes 2:13-14 etc) leh Peter mahmah in zong na theician mahmah hi (1 Pet 1:2; 3:17-18; 4:11, 14; 2 Pet 1:16-17, 21 etc). Tua hi a, tuhun ciangin Jesu min bek a tuiphumna a nei nuamte in Pa, Tapa, leh Kha Siangtho, Pasian khat sungah mimal thumte saang lo ahih man un buaihuai mahmah hi.

                Sawltakte Nasepna laibu sung pen Khristian masate tangthu kigelhna hi a, haksatna tampi kawmkal panin lau leh liing kawm a pawlpi masa hong kipatna thu kigelhna laibu ahi hi. Judah makaite in kumpi ‘Messiah’ a lamet uh hi napi, Jesu Khris pen kiniamkhatna tak tawh hong pai ciangin pawlkhat in ‘Messiah’ a lamet uh hi lo hi, ciin tang pan uh a, amau lametna panin Messiah pen vanglian leh thupi takin leitungah hong pai-in, a Kumpigam hong phut dingin lamen uh hi. Pasian khat um uh a, tua pen leitungah ‘Messiah’ min neiin hong paiin Israelte a saltanna uh panin hongkhia dingin lamen uh hi. Pa, Tapa, leh Kha Siangtho cih bang peuhmah thei nuam lo, bek tham lo za nuam lo bikbek uh hi. Tu ciang dong mah Thuciam Lui a Moses tunga a kipulak Pasian pen To thum ahihna sang loin ‘Messiah’ dang lamen den lai uh hi.

                Tua ahih manin Sawltakte hun laiin zong Jesu pen, ‘Messiah taktak hi, Israel mite lamet pen Jesu hi,’ a kicihcih hangin mi tampi in um loin, a gente leh Jesu mahmah thah sawmin nial uh hi. Tua hi a, Israel mite lakah Pa Pasian, tangtawna Israelte a makaih pen Pasian hi, ci cintenin, Tapa Jesu Khris pen Pasian ahihna saang zo lo uh ahih manin Jesu pen Pasian (Tapa Pasian) ahihna a lahkhiatna kawm un Jesu min tawh Sawltakte in tui phum uh hi kha ding hi. Israelte in tua bang ngaihsutna nei uh ahih manin Sawltakte in ‘Pa, Tapa leh Kha Siangtho’ min tawh thugenin, tuiphum leh mi tampi in telkhial ding ahih manin nawitui tawh a kipantah thu-um thakte pen a theihsiam baihna ding un sawltakte in ‘Jesu min’ a zang uh hi kha ding hi.

                Pa, Tapa, leh Kha Siangtho pen lim gen luat uh leh ‘Pasian thum nei’ kici ding hi. Pasian khat sunga To thum (three Persons in one Essence) pen a theisiam nuam lo leh a theisiam thei lo tampi om veve ding hi, tulai hun mah bangin!!

                Sawltakte laibu pen i gensa bangin, pawlpi kipatcilna ahih manin laibu sunga kigelh, tuhun cianga kizang thei lo tampi om hi. Thu-up (doctrine) lakna ding bangin tampi kizang thei lo hi. Gentehna-in, Pentecost ni a Kha Siangtho kibua (Sawl. 2), thu-um mite in neih khempeuh neihkhop (4:32-37), Jesu min tawh kituiphumna, lutunga khut ngakna hanga Kha Siangtho lutin, Kha Siangtho tawh kidimna, kamtuampau leh kamsaanna nei (8:17; 9:17; 19:6). Tuhun ciangin, thu-umte lakah a tuamin Kha Siangtho hong kibua nawn lo a (kha niin bel om simsim leh kilawm), thu-um mite sungah, Khrismi hihna ciamtehna in omzaw hi (Eph. 1:13), lutunga khut nga a kamtuampau ahih kei leh kamsanna bang om nawn loin, neih teng neih khawm bang zong a piang thei lo hong hi mawk hi.

                Bangbang ahi zongin, kua-kua in tuiphumna tuamtuam a zang zongin, a thupi pen leh zuih ding pen Jesu hong thupiakna hi a, tua pen “Pa, Tapa, leh Kha Siangtho min tawh’ tui kiphum ding ahi hi.

                 

Tuiphumna pen hotkhiatna hi lo

                Mi pawlkhat in Mark sunga “Lungdamna Thu umin tui a kiphum mi peuhpeuh in hotkhiatna ngah ding a, a umlo mi peuhpeuh in mawhsakna thuak ding uh hi” (Mark 16:16) kici pen a ‘up’ cih kammal pen tuiphumna a sa kha om hi. Tua manin ‘tuiphumna pen hotkhiatna hi,’ ci a ngaihsun pawlkhat om hi. Tua manin tui kiphum lo peuhmah Vangam lut lo ding ci uh hi. Tuate lakah naungek tuiphumna a sang lo bang zong om a, mi khatpeuh kum 12/13 a phak ciangin tui kiphumsak teitei uh hi. Tuiphumna pen hotkhiatna hi lo a, hotkhiatna a ngah khin mite ading a Jesu Khris in sep ding hong piak hi zaw hi. Hotkhiatna ahih loh hang, a piangthak taktak mite in Jesu Khris hong sawlna bangin tuiphumna pen thupingaihsut in, sep/hih pelmawh ding hi kik leuleu hi.Tua hi a, tuiphumna pen hotkhiatna ngahna hi loin, gupkhiatna a ngah sate in teci a panna leh Jesu hong thupiakna manna hizaw hi.

                Tawmkhat a thulu tawh a kituak kei phial zongin genbeh zek leng, Mark 16:9-20 sung pen Lai Siangtho pawlkhat sungah kimu lo hi. Bang hang hiam cih leh Lai Siangtho a kiteikhiatna (manuscript) pawlkhat ah hih mun kigelh lo hi. Tua manin Mikang pau pawlkhat bangah hilhcianna tom khat, ‘manuscripts* masa leh laigelh masa ah hih mun om lo’ cih bangin kigelh zel hi. Bangbang ahi zongin, hih (16:9-20) sung pen Lai Siangtho thu dang tawh a kitukalhna om tuan lo banah, Jesu upna, tuiphumna leh thu manpha tampi om ahih manin thupi veve hi.

                W. R White in tomcikin a gen, “Baptists do not believe that baptism is essential to salvation, but they do believe that salvation is essential to baptism. Baptism is never associated with salvation when it stands alone” ci hi. Tua hi a, tuiphumna pen hotkhiatna hi loin, hotkhiat mite ading hizaw hi.

               

Tuiphumna cih ciangin…

                Tuiphumna cih ciangin a tunga i gen bangin, Jesu Khris pen Gumpa leh Honpa a saang, tulai pau leh ‘piangthak’ mite in Jesu ah nuntakna nei ta cih a kitheihna dinga teci hi a, Pa, Tapa, leh Kha Siangtho min tawh tui ‘sungah’ kiphum ding hi. Mi pawlkhat in tui sungah kiphum tektek kisam a sa lo om ahih manin, tui sunga kiphum tektek ding ahihna tawmkhat i genkik ding hi.

                Thuciam Thak Lai Siangtho a kigelhna Greek pau ah Zomite in ‘tuiphumna’ i cih pen ‘baptizô’ cih kammal kizang a, tui sungah bang hiam ‘diah suk, phum, tumsuksak’ cihna ahi hi. Hih Greek kammal pen Lai Siangtho sung hi ta leh, leitung laibute ah a deihna kibangin kigelh hi.

                Lai Siangtho i sim ciangin tui ‘sungah’ kiphum uh ahihna kimu hi. Mark 1:5 i sim ciangin, “…Jordan Gun ‘sungah’ Johan in amaute a tuiphum hi” cih kimu hi. Greek pau ah ‘ev’ (‘en’ ci a sim ding, Eng. ‘in’) kici kammal ‘sungah’ cih kizang a, tui sungah kiphum cihna hi. Jesu mahmah zong a tui a kiphum khit ciangin ‘tui sung panin a thawhkhiat’ (Mark 1:10) cih kimu a, Johan sungah zong, tui tamna mun a tun uh ciangin tui a kiphumna uh kimu a (2:23), Sawltakte Laibu sunga tuiphumnate zong tui sunga kiphumna mah ahi hi.

Tua ahih manin…

1.     Tuiphumna pen Jesu in ama phuhsa pawlpi mite tungah zat ding a hong piak hi a, a manpha leh a thupi mahmah ahi hi.

2.    Tuiphum dingte pen, Jesu Khris a Honpa leh Gumpa a sang a, mawhna pan a kisik (mi piangthak) hi ding a, kum upat leh naupan thu tawh kisai lo hi.

3.    Tuiphumna pen Jesu hong sawlna bang tektekin, ‘Pa, Tapa leh Kha Siangtho’ min tawh kiphum ding hi. Jesu thupiakna pen a thupi pen leh a lianpen ahih manin Jesu thupiakna bangin zat ding ahi hi.

4.    Tui kitheh, kibuak, leh kitaakna hi loin, Lai Siangtho hong hilhna bangin tui sungah kiphum tektek ding ahi hi.

5.    Tuiphumna pen hotkhiatna hi loin, hotkhiatna a ngah, a piangthaksa mite in hehpihna hang a Jesu tungtawna Pa Pasian hong gupkhiatna sang ahihna lim (sign) a lahkhiatna ahi hi.

II.  TOPA’ ANKUANG

                Tuiphumna mah bangin, Topa’ Ankuang umkhopna pen Khristiante adingin a thupi leh a poimawh mahmah khat hi a, Jesu mahmah in a patkhiat, ama hong itna leh hong gupkhiatna phawkdenna ding a hong piak ahi hi.

Jesu mahmah in a patkhiat…

                Lungdamna Thu (Gospels) laibute i et ciangin Jesu mahmahin Kalvari mual tungah a sihma in ama kianga om nungzuite kiangah a patkhiat hi a, nungzuite kiangah a omnawnloh ciangin zong amah a phawkdenna ding uh-a sep ding leh zuih ding a piak ahi hi (Mat. 26:26-28; Mark 14:22-24; Luke 22:19-20). Sawltak Paul mahmah in zong, Topa’ Ankuang pen Topa Jesu tung pana a ngah ahihna thu leh Jesu phawkna ahihna thu gen hi (1 Kor 11:23-29). Tua ahih manin a min mahmah zong Topa’ Ankuang (the Lord’s Supper) a kici ahi hi.

Umkhawm zelzel ding…

                 Jesu in, ‘Kei nong phawkna ding un na ne un’ (Luke 22:19; 1 Kor 11:24-25) ci a, Paul in, ‘(Topa’ Ankuang) na neek a na dawn simin Topa (Jesu) sihna (mi mawhte adingin) hong paikik ma teng a tangkoko/pulaklak na hi uh hi’ (n. 26) cih beh lai hi. Pawlpi a kipat cil pan kipan, thu-ummite in a zatden uh hi a, Korin khua pawlpite in zong Sawltak Paul hunlai (55 A.D kiim) in zang khin uh cih kilang hi (a zatdan uh bel thu tuam hi leh...)

                Jesu in amah phawkdenna dingin ama Ankuang na umkhawm zel un ci hi. Mihingte pen hong theician lua mahmah ahih manin amah i phawkdenna dingin sep zelzel ding hong pia ahi hi. Leitungah mihingte pen mangngilh a hat mahmahte kihi citciat hi. Tangthu i sim ciangin Jesu mahmah a mangngilh, a khawk/gambup bangin zong om hi. Tua ahih manin, Jesu in mihing pianzia theician lua mahmah ahih manin Ama upna leh Amah tawh kizopna, a thuaknate leh hong kipiakkhiatnate phawkdenna dingin hong piak ahih manin manpha mahmah hi.

Jesu Khris sihna pulakna

                Topa’ Ankuang pen ‘Eite mawhna hang a Jesu sihna pulakna hi’ (1 Kor 11:26). Sawltak Paul in kician takin Korin pawlpi mite tungah Topa’ Ankuang pen eite taang a Jesu hong sihna lahna hi ciin gen hi. Anlum/moh (bread) pen Jesu pumpi etsakna hi a, hai (sunga lenggahzu) pen ei mi mawhte adinga hong kibua Jesu sisan etsakna ahi hi.

                An ngeina i nek ciangin i pumpi a thahatsak, a nosuaksak mah bangin Topa’ Ankuang i umkhop ciangin Khris hong kipiakna leh hong paikik ding phawkkikna hi a, kha lam nuntakna nosuaksak lai hi. Jesu mahmah in,

“A mantakin kong genin-ah, Mihing Tapa’ sa na nek kei uh a, a sisan na dawn kei uh leh note sungah nuntakna om lo ding hi. Ka sa ne-in ka si a dawnte a nungta tawntung hi a, nitawp ni ciangin ka hingsak ding hi. Bang hang hiam cih leh ka sa, an taktak hi a, ka sisan, dawnding tui taktak ahi hi. Ka sa ne-in ka si a dawnte pen kei tawh pumkhat ka hi uh hi. A nungta Pa Pasian in kei hong sawl ahih manin ama hangin ka nuntak mah bangin keima sa a ne mite zong keima hang mahin nungta ding hi” (Joh 6:53-57).

                Hih munah Jesu in ama sa leh sisan taktak a ne dinga hong sawl hi lo hi (Jesus not speaking of a literal eating of his flesh and blood). Ahi zongin hih neekna tungtawnin khalam a nuntakna, ahih kei leh khalam-ah nosuakna nei ding, cih a gennopna hizaw hi.

                Pawlpi pawlkhat in Topa’ Ankuang umkhopna hun a moh/anlum (bread) leh leggahzu (wine) pen Jesu pumpi leh sisan taktak hi, cih um uh a, tua ahih manin Topa’ Ankuang umkhopna pen vantunggam tunna ding hi, ci uh hi. Hih Topa’ Ankuang umna pen Jesu hong sihna mi mawh eite ading hi cih um/sang mite ading ahi hi. Tua ahih manin a ne mite pen a piangthak khin ahih manun vangam lut ding uh a, piangthak nailote in a neek hangin Jesu a up kei uh leh tua a nekna un hotkhiatna tun tuan lo ding hi.

Jesu hong paikik ding pulakna/phawkna

                Sawltak Paul in Korin khua mite kiangah, ‘hih anlum/moh ne-in, hai sung panin (lenggahzu) na dawn simun, hong paikik mateng Topa sihna a pulaklak na hi uh hi’ (1 Kor 11:26) ci hi. Hih mun panin Topa’ Ankuang umkhopna pen hun ciangtan (time limit) nei ahihna kimu a, tua pen ‘[Jesu] hong paikik ma teng’ ahih kei leh ‘[Jesu] hong paikik masiah’ a zat ding ahi hi. Tua ahih manin, Topa’ Ankuang in ‘Khris in a zawhsa a nasep, Kalvari mual tunga eite adinga hong sihna’ pulakna hi a, tua hangin eite in a gah i muh ding pen tawntung nuntakna ahi hi.

                Jesu vantungah a omcip ding a hong paisan hiam, hong kileh kik nawn lo ding a hong paisan hi lo hi. ‘Note adingin mun bawlin ka pai ding hi’ (Joh 14:2) ci a, tua mun panin amah tawh teengkhawm dingin a mi siangthote hong la ding hi. Tua pen, Jesu nungzui, Khristiante lamet pen ahih manin, tua hong ‘sihna leh hong paikik ding’ pen phawkden dingin Jesu in hong deih ahih manin Topa’ Ankuang hong pia hi.

Khristiante kipumkhatna etsakna

                Topa’ Ankuang a ki-umkhop ciangin Khris nungzuite pumkhat hihna a kilahkhiatna ahi hi. Sawltak Paul in, “Anlum khat bek hi a, eite mi tampi hinapi-in tua lum khat bek mah nekhawm i hih manin eite pumkhat bek mah i hi hi” (1 Kor 10:17) ci hi.

                Khris hang beka hotkhiatna a ngah, amah a um leh ama hang beka kipawlkhawm thu-ummite in ama hong sawlna banga Topa’ Ankuang umkhopna pen kipumkhatna ahi hi. A zawng a hau, numei pasal, veng leh khua, cih bang a kikhen ding hi lo hi. Topa’ Ankuang pen amah Topa Jesu phawkna ahih manin neih leh lam, numei pasal leh thu tuamtuam hang a kikhen theih hi lo a, Jesu Khris a Honpa/Gumpa a sang mite nekkhop ding ahi hi.

                Sawltak Paul hun laiin Korin khuate in zangkhial mahmah uh cih kimu hi. Tuate lakah, pawlpi sungah kikhen tuamna, nek kibang lo/kikim lo, nek hun kibang lo’ cih nengneng om hi (1 Kor 11:17-34), kingakkhawm a nekkhawm diamdiam ding ahi hi (n. 33). Tuate pen Sawltak Paul in Topa’ Ankuang hong kipiakna hang hi lo, Jesu sungah pumkhat ama nungzuite i hihna lahna hi, ciin gen hi. Tua ahih manin Topa’ Ankuang i umkhop ciangin kilemna, ki-itna, kipumkhatna, kihehpihna, Jesu deihna leh i mawhna hanga hong sihna phawkden ding hizaw hi.

Topa’ Ankuang kuate’n ne ding…

                I gensa mah bangin Topa’ Ankuang pen mi piangthak, Jesu sungah nuntakna a nei mite in a nek ding hi a, mi khempeuh tungah ban hawm, ahih kei leh a ut khempeuh neksak ding hi mawk lo hi. Jesu in a nungzuite tungah na pia a, Sawltak Paul in, “kilawm lo pi a ne” cih leh “amau leh amau ki-entel masa phot ding” cih banah, “mawk nekna pen mawhna, zawngkhalna leh sihna hi” ciin na gen hi (1 Kor 11:27-29). Tua manin a ne ding mite ki-entel masa dingin gen hi.

                Hih munah, kuate ki-entel thei? cih dotna hong om pah a, a dawnna pen, ‘sia leh pha thei mite’ hi peuhmah phot hi. Tua banah, tua ki-ettelna ding pen, ‘piangthak maw, piangthak lo’ cih hong hi ding hi. Jesu phawkna dinga kine ahihna theician lo, Jesu mahmah kua ahi hiam cih zong a thei lo banah, a sang nai lo khat adingin Topa’ Ankuang pen a kilui hizenzen lo hi. Jesu phawkna, a thuakna, a sihna leh a thawhkikna phawkna ahih manin tua a thuakna bang a thuak ding a kipia, a sihna in mawhna sawpsiang hi cih a um, ‘mi piangthak,’ Jesu sungah nuntakna nei ing, cih teci panga tui kiphumsa mite bekin hih Topa’ Ankuang pen ne ding uh hi. Duh man peuh, kilawpna leh a kilawmsakna peuh a nek ding hi zenzen lo hi.

Tua ahih manin…

1.     Topa’ Ankuang pen a poimawh mahmah, Jesu mahmah in a patkhiat (instituted) ahi hi.

2.    Jesu sihna leh hong paikik ding pulakna leh phawk tawntungna ahih manin Jesu hong paikik masiah zat/bawl zel ding ahi hi.

3.    Kideidanna, kikhen tuamna om loin, pawlpi sungah Topa’ Ankuang umkhop ding ahi hi. 

4.    Jesu pen Gumpa leh Honpa a saang a, a piangthak, tua a pianthakna ahih kei leh Jesu sungah nuntakna nei ahihna kipulakna ding a tui kiphumsa mite in Topa’ Ankuang ne/dawn ding uh hi.

5.    A kilawm lo pi, thalawp man hiam, a kilawmsakna peuh a nek ding hi lo hi. Tua mite tungah mawhna om ci hi (1 Kor 11:27-29).

Thukhupna

                Lai Siangtho sungah hih pawlpi zekhte pen a sai ding kician takin kigelh lo hi. Ahi zongin, Jesu in a phuhsa pawlpi sunga zat ding pawlpi zekhte sai ding tawh kisai pen pawlpite in a seh uh, Lai Siangtho tawh a kituaklohna om lo hi. Tua ahih manin pawlpi in hoih a sak, cing a sak (qualified), sem thei ding hi, a cihte in sai ding hi. Lai Siangtho sung i sim ciangin zong, hih zekhte pen a ut peuh, a man peuh in sai lo uh hi. Johan, Jesu, Paul, Peter, Phillip, cih bangin, thu-umte lakah zong a sem (administered) a tuam om hi. Pawlpi sungah kizang ding, pawlpi in a seh pen zat ding hi mai hi.

                Hih pawlpi zekhte (ordinances) pen pianthakna ding hiam, hotkhiatna ahih kei leh vangam lutna ding hiam a hong kipia hi lo hi. Amah guakin bangmah kimanna om tuan lo a, ahi zongin Jesu sungah nuntakna a nei mite adingin seploh/zuihloh phamawh ahi hi. Hotkhiatna ahihloh hangin hih Jesu in a patkhiat, zui/sem ding a hong sawl hih pawlpi zekhte pen a thupisim lo leh poimawh a sa lo (a moivawt!) mite pen Jesu ah nuntakna a nei taktak lo hi mai thei hi. Tua hi a, hih pawlpi zekhte tawh kisai ngaihsutzia pen, mi piangthak, Jesu sunga nuntakna a nei mite ngaihsutzia, poimawh a sakzia leh piangthak lo mite ngaihsutzia pen lei leh van bangin kigamla hi.

                Ngaihsutna tampi a om kawmkal panin Tuiphumte (Baptists) in thu-up kician tak, Lai Siangtho tawh a kituakin kinei ahih manin, tuate pen i thupingaihsut a, ahihna bang taka i zat ding kisam hi. Na khatpeuh, mi khatpeuh in a gen uh, a gen nunungnung thugen hoih sak pahpahna, dinna kician nei lo a huih mutna lamlama kipeipei ding hi lo hi. Tua ahih manin Lai Siangtho sungah kician taka zuih leh zat ding a kigelh ahi lo thu-upna leh kalzuanzia tuamtuam, naungek tuiphumna (infant baptism), Pa, Tapa, leh Kha Siangtho min lo tawh tuiphumna, tuiphumna pen hotkhiatna hi cih upna, tuisunga kiphum hi lo-a tuiphumzia tuamtuam upna, Topa’ Ankuang nekna tawh kisai a utpeuh neksakna, nek hun cianga kikhenna cihte pen, Lai Siangtho tawh kituak lo ahih manin Lai Siangtho tawh kituak banga kalsuanna nei kim ciat dingin hih laigelhna tungtawnin Pasian in a mi siangthote thupha hong pia ta hen. Amen.

* Lai Siangtho pen a gelhte gelh taktak (original copy/autograph) pen kimu lo a, tua pana mipil-misiam masate in a teikhiat uh pen manuscripts kici hi. Tuate panin Lai Siangtho pau tuamtuam in hong piangkhia/kiteikhia hi.

Laibu etkakte

Dever, Mark. The Church: The Gospel Made Visible. Nashville, Tennessee: B&H Publishing Group, 2012.

Erikson, Millard J. Christian Theology. Grand Rapids, Michigan: Baker Book House, 1983.

Grudem, Wayne. Making Sense of The Church. Grand Rapids, Michigan: Zondervan, 1994.

Hammett, John S. 40 Questions About Baptism and the Lord’s Supper. Edited by Benjamin L. Merkle. Grand Rapids, Michigan: Kregel Publications, 2015.

Hiscox, Edward T. Principles and Practices for Baptist Churches. Grand Rapids, Michigan: Kregel Publications, 1980.

Lecey, H. “Baptism.” In The Church: A Symposium of Principles and Practices, edited by J. B. Watson. Kilmarnock, Scotland: John Richie Ltd., 1999.

Spurgeon, Andrew B. 1 Corinthians: An Exegetical and Contextual Commentary. Edited by Venkataraman B. Immanuel, Brain C Wintle, and C Bennema. India Commentary on the New Testament 7. Primalogue Publishing Media Private Limited, 2012.

White, W. R. Baptist Distinctives. Nashville, Tennessee: Convention Press, 1946.

The Church of South India: Book of Common Service. Chennai: Church of South India Publication, 2004.

~ T. Sawm Lian

Daihna Cabin, January 2016

(Ngaizawl ZBC Silver Jubilee Souvenir ading a kigelh hi.)