KUM THAK – NGAIHSUTNA THAK

KUM THAK – NGAIHSUTNA THAK

Kum thak hong tun simin, mi ngeinate in tup le ngim, kumlui sang-a a hoihzaw ding a lamet kalsuanzia leh ngaihsutna thak kibawl zel hi. Tua pen mi ngeina, mibang i hihna, leh mihingte tungnunna khat ahi hi. Cihnopna-ah, mi bang lian lo, gamsa, leh vasate in tua bang ngaihsutna nei lo uh hi. Tua ahih manin kum thak ahih tawh kitonin i theihsasa ahi phial zong, ngaihsutna leh kalsuanzia thak, a hoih lama i nuntakna hong makaih thei ding a lamet pawlkhat tungtawnin tha lakhawm leng i ci hi.

 

1.      Ngaihsutna dik – Texas a unau nih tangthu ka lungsimah mangmawh hi. A pa pen zu lungvei (alcoholic) innsuang a buaina bawlden ahi. A ta upazaw amah bang hi a, a neuzaw ahih leh a sepna lamah mi lawhcing leh mite zahtak khat ahi hi. Tuaci bang nuntakzia a neihna uh a dot uh ciangin, a uzaw in, “Ka pa’ nuntakzia en un, ama makaihna nuaiah bangci mi hoih leh picing suak thei ding ka hiam? Hih ka dinmun pen ka dinmun ding mah hi” ci hi. A nauzaw in ahih leh, “Ka pa in haksatna leh buaina tampi bawl a, amah bang a nuntak sawm lo ka hih manin hanciamin hici bang dinmun tung ka hi” ci hi. A pa uh kibang, a muhdan leh a muhzia uh (mi ettehhuai lo ahihna) zong kibang, ahi zongin muhdan kibang pana amau lamah na a sepdan kibang lo ahih manin, khat ading a hoih theihlohna pen khat adinga thakhauhna leh hanciamna a tun, amah a lawhcingsak suak hi. I sep i bawl, i kalsuanna, i nisim nuntakna, leh i Khristian nuntakna-ah, ngaihsutna dik i neih leh a hoihlo pen nangawn zong tha hong pia na manpha suak thei hi.

2.     Ki-ukzawhna – Mi tampi, mi gam mi leiah, a nuamsa lo pipi mah, lungzuang leh gim le tawlin, na sem, sangkah-siamsinna, nekzonna ci tuamtuam kinei hi. I kholhpihte pen mi namdang leh hong it law lo bang zong hi mai thei. Mite etteh leh mite thupingaihsut ding khopin i nungta thei kei zongin, ki-ukzawhna (self-discipline) nei a, kampau, gamtat pilvan ding, mite niam-et leh minam a minsiasak i hih ding kidophuai hi. Mi hau, mi lian leh ut bangbang, hoih a sakdan bekbek a om minam khangtosate laka gina meel lo khangno pawlkhat ii kizepdan, nopsakna a zondan uh, a kampau leh a kalsuanzia uh mu a, amau bang a om sawmna, ngeina/paizia kician nei lo a gamdang, mundang, minamdangte laka omna-in haksatna tampi hong tun thei hi. Sam lang thelthal, san thelthal, nin mahmah, hik bang om phial inteh, cihnophuai phial, nik le puan bang a ngeina lo lua, siing lua, lian lua, neu lua cih bang… Nek le dawn lamah zong uang lua lo dingin ki-ukzawhna kisam… I Khristian nuntakna-ah zong ki-ukzawhna pen Kha gahte laka khat hi a, gahkhiat pen i sawm, i kisin ding ahi hi. Lai Siangtho a kimu Joseph leh Daniel nuntakna panin sin ding thupi mahmah om dingin ka ngaihsun hi.

3.     Service thupisak leng – Sepna-bawlna tuamtuam nei a tu-a i munah om i hi hi. Pawlkhatte kumpi nasem, pawlkhat company ah, pawlpi leh kipawlna tuamtuam nuaiah nasem kihi kha ding hi. Tua i sepna munah i om theihna ding ngaihsun ciat lehang, midangte ading a na hoih sem ding leh ‘kisapna’ a omna hang tua dinmunah om/sem thei i hi hi. Tua ahih manin, i nasepna-ah sum le pai lama eima meetna (benefits) bek sang a nasep (service), tua muna i om theihna hang i thupingaihsut kei leh, tua i nasepna-ah lawhcinna leh nasepna tungtawn a lungdamna kingah lo mai thei hi. I gam i nam sungah, a sepna lam sangin a meetna lam kilim ngaihsut lua ahih manin, lampi sia mahmah den, mi genthei panpihna ding a sum tampipi hong lut, tuate a semte in service hoih sang a amau mimal meetna a limzat lua ahih manin i gam a khantoh ding bangin khangto thei lo hi kha ding hi. Diktatna tawh i sepna-ah, a sum lama meetna bekbek sangin mite ading a na hoih sepna mahmah thupisak masa leng khantohna om thei pan ding hi. Veng sung makai ding a kiteel/kisehna, MLA, MP, Pastor, Evangelist, leh pawl tuamtuam a makai hihna-ah, tua makai sepna tungtawna mimal hamphatna sangin, tua munah sepding om a hong kiteel/kikoih ahihna thupingaihsut a sem makai, zum nasem, company a nasem, zato inn a nasem etc. hih ding thupi hi.

4.     A ziak/hang om a kiom – I gensa mah bangin, tu-a i omna numah a ziak/a hang (purpose) om a ki-om ahi. Nek le tak zon baihzawk ding lametna, kumpi nasepna hang, siamsinna, etc. hangin tua i omna i khua leh khua lo, mun gamlapi ah zong kiom kha ding hi. Zogam sung leh a pua lam, tuipi gal nangawnah pai a, mi gam mi leiah nasem a, haksatna tampi om mah leh tua muna i omna ‘a hang’ om teitei ding hi. I omna hang ngaihsun lo leh phawk lo a nuntak baihlam mahmah. En nuam sa lel a, omna munah sum tawmkhat muh ciang inn lamate haksatna bang phawk kha nawn lo, nuam sa gawp khawng i hi kha hiam? Sum tampi bei a simsin ding a khuapi tuamtuam a pai, i paina hang phawk kha nawn lo a khuapi a vakthap, innkuan nuntak-khausak baihzawk ding lametna tawh sumbawl a, khuapi-ah numei peuh tawh kimawl a hun beisak, ect. Tu-a na omna munah bang hangin om na hiam, na omma-in a hang kician tak omin tua munah om ding hanciam kha ding hi teh, tua pen kum thak ahih tawh kitonin ngaihsun pha-in, tua tu-a na omna hang pen lawhcinsak sawm in.

5.      Nang pen nangmah na hi – Khatveivei mite thugen leh ngaihzutna peuh kibuaipih lua ahih manin i nasepna leh i nisim kalsuanna kibah thei hi. Mite hong gendan, mite hong theihdan, mite hong muhdan leh mite hong ngaihsutzia peuh tawh kibuai-in na hoih sem zo lo leh a hoih lamen zo lo ding bang a ei le ei kingaihsut siatna om thei hi. Mite pawlkhat, gensiat, langbawl leh i thanem ciang a hong huh a, tha hong pia ding a i ngaihsutte khawng peuh, i hatlohna leh thanemna hang a kipak a, lungdam mahmah zong om thei mawk hi. Tua ahih manin mite tungah kinga masa loin, Pasian lungkimna, mite ading a manpha ngaihsut ding ahi hi. Mite muh leh theih ding-a a hoih gamtatna leh kalsuanna pen kisam mahmah ahih hangin, tua kalsuanna hangin mi khempeuh lungkim lo ding a, pawlkhat hehna a tun peuh hi zawsop kha ding ahih manin, hoih leh pha na sak, mite ading a phattuam, leh Pasian thu tawh kituak ahih naak leh tua lamah kalsuan in. Israel galkap khempeuh leh a sanggamte nangawnin a muanloh, ciahkik ding a sawl uh David pen mi thugen leh ngaihsutna hangin lungkia hi leh kua in Goliath that ding hiam? Gensiatna leh ngaihsutna hoih lo hangin Moses lungkia hi leh Izipt saltanna panin Isarelte cikciang suakta ding hiam? Nang pen nangmah na hi hi.

6.     Missionary i hi uh – Joel Osteen in, “Khristian khempeuh missionary kihivek” ciin gen hi. Jesu Khris in zong vantung-a a kahtoh ding ciang a nungzuite kam a vaikhakna-ah zong, pai a lungdamna thu tangko ding, mite Jesu nungzui suaksak ding ci hi. Tua banah, Khristiante leitung mun khempeuh-ah ama teci (testimony) hi ding, ciin na gen hi. I nisim nuntakna-ah, mi khempeuh lungkim leh hoihsak bangin ki-om thei ken teh, ahi zongin, Khris teci, ama nungzui i hihna miten a theih/muh ding leh, a thei nailote tungah ‘Lungdamna thu’ a gen ding a seh (appointed/ordained) i hihna mangngilhloh ding ahi hi. Adiakin khuapi sungah, seppih, kithuahpihte bang Khris a thei nai lo zong hi thei hi. ‘Bang hang a hih munah om, bang hangin amau tawh kithuah kha, kei panin bang hamphatna ngah thei ding uh,’ cih ngaihsutna tawh Gospel i hilh theih leh tua pen nasep thupi leh lian mahmah ahi. Paul mahmah in zong thonginn sungah a omlai nangawnin lungdamna thu mah genbelin na nei hi.

7.      Mangngilhloh ding – Kum thak, hun thak i ngah simin, haksatna, buaina, lungkhamna, leh i deihloh nate in hong beisan, hong gamlatsak pah ding cihna hi tuan lo hi. Lungdamn leh lawhcinna i ngah zong om ding a, a lang lamah i hun beisa a sang a nasiazaw leh lianzaw haksatna, kamsiatna, lungkhamna leh gentheihna bang zong kimangat thei lai hi. Tua ahih manin kiginkholh zong kisam a, tuate thuak khak ciangin zong lamdang sak luat ding hi loin, leitung ngeina ahih manin a kipelh thei lo ahihna phawk ding zong kisam hi.  Tua banah, mihingte ading a kisehsa ahi sihna i tuah hun ding nai semsem ahihna phawkin, Pasian tawh i kizopna a hoih hiam? cih ngaihsut kisam hi.

I sep theih kibang ke’n teh, siamna leh kivakna lam zong kibang ken teh. Ahi zongin a thupipen-ah, Pasian in hong piak nuntakna, cidamna leh hun thak sungah, bang ci bangin kalsuan sawm? Bangci bangin a hong piak hun manpha leh Kha Siangtho piak siamnate manpha takin zang ding? cih pen a thupi leh ngaihsuthuai dotna ahi hi. Kum thak thupha note tungah hong tung hen la, hong tung (ding) kum thak pen ngaihsutna thak leh a hoihzaw tawh Pasian leh a it mite adingin na lianpi sepna kum, kum manpha hi ta hen.

~ T. Sawm Lian, 30122016



Kum thak tawh kisai thugelh lui pawlkhat kum 2011 leh 2012 a kigelh a sim nuamte adingin, an khing zong lumsak leng lim veve, gilvah thei veve ahih manin ciin kong koih thak hi... 

Kum thak - 1: https://sawmdaihnacabin.blogspot.in/2011/06/kum-thak.html

Kum thak - 2: https://sawmdaihnacabin.blogspot.in/2012/01/kum-thak.html
 

ZI LEH PASAL ZON PILVANHUAI

ZI LEH PASAL ZON PILVANHUAI

Minam khangto masate mah bangin tuhun ciangin Zomite lakah kitenna kibaih ngaihsut mahmah a, tua sangin kikhenna kibaih ngaihsutzaw lai tawh kibang hi. “Amah bang hi tuan?” “Amau nupa zong hua bang lel hi uh a…” cih ding, a sia lama ngaihsutna a om ding lauhna tawh bangcik hiam pana ka vei thu pen tu-in, a phattuampih ding, zi leh pasal tawh kisai a theihhuai a thei lo, a thei nuamte adingin manphatna a neih khak leh ciin, “a lel nuam singta’n bangbang a lel zong” ciin hih thu kong gelhkhia hi.

Kitenna pen Pasian in pha a sak leh a bawl, a patkhiat ahi hi. Tua ahih manin a kipatna i ngaihsut ciangin dau ngaihsut leh thupisimloh theih hi lo hi. Zi leh pasal ding zong ei tawh a kituak mah, ei tawh a ki-it, a kilem thei ding mah, hong theisiam a, hong huh thei ding mah neih ding kisam hi.

Pasal hoih lo neihna hang a numei nungsang lam buaina pen tam lua lo tawh a kibat hangin, zi gina lo hang a pasal innkuan sung buaina pen tam mahmah a, Lai Siangtho in, ‘zi hoih mute na manpha mu, suangmanpha sangin manphazaw’ a cih laitakin, a hoih lo neih sangin innkhum tunga tangten hoihzaw cih leh zi hoih lo neih pen guh natna nei tawh kibang banah a theu thei lo guah bang hi, na ci a, pasal/innkuan tampi tua bang dinmunah om hi. Tua ahih manin pasalte in ngaihsut ding ah, “Ka zi (ding) pen kei adingin a hoih mah diam, a manpha mah diam?” cih hi a, amah leh a innkuanpihte ading a kilemlohna leh buaina a tun zi peuh neih khak ding pilvanhuai hi. Tua bang mahin numei in, “Ka pasal in hong it taktak mah diam?” cih ngaihsunin, amah a it thei ding leh a it theih ding innkuan thak a zon/ngaihsut ding kisam hi.

Lawm kingaihna tawh kisaiin, tuhun leitung khantohna hangin facebook, WhatsApp cih bang, bangbang hiam tam a, mi pawlkhat in a lawm ngaih uh mi’ theihloh ding lau bang keekin, a kingaihna uh thu peuh kapkhia ziahziah, pawlkhat bangin tua bang bek deihkhop loin, lim/maan et nuam lo pipi bang zong kapkhia mawk uh hi. Nungak–tangval lai, lawm kingaihna pen tua bang a miteng muhsak leh theihsak ding hi mawk loin, a nungak leh a tangval hoih tak a kingaih uh a, a kiten uh leh tua pen lawhcinna thupi leh a paizia ding hizaw hi. Mi pawlkhat bang, kingailua, “kikhen thei nawn mahmah kei ven cia” i cih pawlkhat bang a sawt loin a thugelh, a thu kapkhiat (post) uh maizumna a tun hi maimah thei ding bang zong tampi kimu hi!

Zi leh pasal zonna kipilvang nawn lo, a lemtang peuh, geelkholhna leh kiginkholhna om meel loin a kiteng kitam lua a, bang teng kisam a, bang haksatna om thei, zi leh pasalte mawhpuakna bang hiam cih ngaihsun masa kha lo a kitenna tam lua ta ahih manin, tua in innkuan kalsuanna leh khuatang (society) mahmah nakpi takin a hoih lo lamah kilamdanna piansak hi.

Tuhun i nuntakna, i kim i pam leh khuahun zui-in ei Zomite zong mun tuam gam tuam-ah nekzonna, siamsinna, sumbawlna leh sep le bawl khatpeuh nei-in ki-om kawikawi ta a, mi tuamtuam tawh kithuah-in, lawm kingai bang zong honpi khat mah ki-om ta hi (a kiteng khin zong honpi khat mah pha). Tua bang dinmunah teng i hih manin ei minam tektek, khuapih-tuipih tektek hiam tenpih ding cih a piang thei nawn lo suak a, minamdang a neite zong mawhsak theih hi lo hi.

Tua bang dinmunah om i hih manin kuakua i tenpih ding zongin tuhun nungak-tangvalte adingin pilvanhuaina tam mahmah hi. I koppih nu/pa in i innkuanpihte hong ngaihpih ding diam? A diakin pasalte adingin (numeite belh ding ahihna-ah) mawhpuakna/vaipuak/tavuan lianzaw tawh kibang hi. Tua ahih manin i zi pen – I khua, i mipih-sapihte kiangah hong pai nuam diam? Teeng ding hi leng zong hong ompih nuam ding hiam? Thungetpih leh lungkim takin i biakna pawlpi ah hong kikhawm nuam diam? I ngeinate hong thupingaihsutpih-in, i pawite ah hong kihel nuam diam? “Na mite ka mi hi a, na pau ka pau hi a, na pawlpi ka pawlpi hi a, na Pasian ka Pasian hi” ciin pasal tungah hong ki-ap zo takpi mah diam? Na innkuanpih, lawm le gual, meltheih, u le naute na innsungah nuam takin hong sungtum-pusuak thei ding hiam? cih bang zong kiten ma-in ngaihsuthuai leh ngaihsut, geelkholh ding thu ahi hi.

Nupa pen numei leh pasal nih kigawm, Lai Siangtho in pumkhat a cih mah bangin, Paul in pawlpi (church) pen pumpi (body) ahihna leh a lutung Jesu Khris tawh a kizopna tawh na tehkak hi. A kikhen thei lo pawlpi leh Khris (pumpi leh luting) pen, leitungah etsakna hoihpen numei leh pasal kiteng a nupa-a kibawlna ahi hi. Tua hi a, Pasian in a hoihsa-a a patkhiat, nupa pumkhat suahna pen thupi ahih manin zi ding, pasal ding pen pilvanhuai mahmah hi.

Tuhun leitungah, melhoihna hiam, laitan sangpi zawhna hang hiam, sum le pai, neih le lam hauhna hang hiam, ommmawhna hang hiam a kiteng tampi omin, kitenna bang hiam cih thei mel lo a kiteng kha zong bangzah hiam om hi. Bangbang ahi zongin, ki-itna hanga kiteng ahi a, innkuanpihte gawm leh thu tuamtuam hang a kiteng ding nungak-tangvalte in kitenna pen kikhenkik theih ziau leh etsinna hi lo hi cih i theih kisam a, thupingaihsut a, pilvan a, kiten khit nangawn ciang zong a thupina kan, ngahsut semsem ding leh nu leh pate in zong tate tungah hilh ding ahi hi.

Eite in lawm kingaihna, kiteng a innkuan nuam bawlna dingin Bollywood hiam, Hollywood hiama mawk gamtat, melhoihna khawng, sum khawng bek a iplah, kitenna bang hi a, kitenna a bawl Pasian in a deihna bang hiam cih a kan lo mite i etteh ding hi lo hi. Pasian in kisam a sak, a thupi mahmah kitenna pen thupingaihsutin, dam sung a koppih ding mah, dam sung a hong it ding mah, Ruth mah bang-a a citak, “Na innkuante ka innkuan, na pau ka pau, na beh ka beh, na pawlpi ka pawlpi, na minam ka minam, na gam ka gam” a ci thei a piangthak koppih mah neih ding, tua bang mi pilvang taka zong siam dingin Pasian kiangah nget ding thupi hi.

Daihna Cabin|| 28122016