Tuunnu-zuapa Tha Khek

Tuunnu-zuapa Tha Khek

Tuhun i leitung nuntakna-ah, i pianna nu leh pate, i kha lam nu leh pate, i khua, minam sung a nu leh pa a i neihte kalsuanna hoih leh kipiakkhiatna, a cihtakna uh leh a thuak uh haksatnate kiphawkpih kha loin, tuhun bek en ziauin, tuhun tawh kituak a kalsuan ziau hoih a sa leh, nu leh pate sulnung, nu leh pate na sep hoih zong zuih sawm tuan lo a, ut bang a nuntakna a zang khangno tampi ki-om hi.

Mihing khat-a i piankhiat ciangin siamna, kivakna, lunglutna leh deihdan kinei ciat hi. Tua ahih manin mi khempeuh in a nu leh pate nasep bang teekteek sem ding cih om thei lo hi. Tuhun khantohna tawh kituakin, nidang a i nu leh pate sep ngeiloh, a muh ngeiloh leh a pai ngeilohna munah semin, omin, kinungta kha thei hi. Tua bel tuhun khantohna tawh kituak ahih manin ahi ding mah zong ahi hi.

Ahi zongin, tuhun Zomi khangnote in ngaihsut leh hanciam ding tampi om hi. Mi masate, Khristian-na lama Zomite’ nu leh pate in veng le pam, lawm le gual, hausa leh kumpite nadong panin haksatna tampi na thuak uh a, Khristian a kipiak ding leh Khristian hih ding limlim bang zong a buaihuai leh a haksa, a lauhuaipi ahih hun lai panin hanciamin, citak leh kuhkal takin tuhun i dinmun uh hong tunpih uh hi. Kisin tawmin, Lai Siangtho khawng mah zong simin, amau hun lai-a a hoih thei pen mah tawh biakpiakna ding khawng na bawl uh hi. Muanhuai takin upna lamah na hanciam uh a, pilna siamna lamah ci leng bangmahpi a sinloh uh hangin kimakaihzia, Khristian kalsuankhopna leh ki-itna lamah ettehhuai mahmah uh hi.

Tuhun khangnote kingaihsun thak dih ni e… Nidang a i makai masate, guahzu daikai nuaiah a tu a tate uh hong khualna a gim le tawl phamawh sa lo a thuakte’ thuakna ngaihsun kik dih ni e. Amau tha khek zo dingin hanciamna i nei hiam? Hanciam i sawm hiam? Nidang a kha lama i pi leh pu, nu leh pate sulnung zuih sawm kik dih ni e. Lai Siangtho sim ding zong nei meel lo, nei phial mah leh sim siam meel lo kawma Upa muanhuai tak leh citak taka sem thei, nang khangno, lai siam, laibu tuamtuam tawh Lai Siangtho a kicianzaw a theih theihna ding hun hoih leh siamna a nei mi khat in na nu leh pate upna khahsuahin, zu leh sa leh gualnopna bek tawh buai ding maw?

Zomite nuntakna i sut kikkik ciangin, nu leh pate tha khek zo lo i hih manin i khantoh ding bangin kikhangto thei lo ahi diam, cih bang ngaihsut theih hi. “Ka pa in pawlpi hi ciang hong tunpih a, maban keimah in ka sep kei leh kuan sem tuan ding hiam?” “Haksapi in Pasian biakpiakna ding hibangin na lam uh a, kei hunah a hoihzaw ka hanciam kisam hi” cih ahi zong, “Mission nasepna lamah tua zah na hanciam uh ahih manin amau tha khekin, amau sep zah sang a tamzaw sem dih ning e” cih bang ngaihsutna a nei khangno, nu leh pa tha a khek thei ding Zomite in kisam hi hang.

Leitung thu hi ta leh, Pasian thu hi ta leh, khang kibangsam (generation gap) a omlohna dingin tuhun khangnote in mawhpuakna/vaipuak lianpi kinei hi. Tuhun mahmah in zong, kha lam hiin sa lam hi ta leh makai muanhuai pipi – Dr. Pau Khan En, Dr. J. M Ngul Khan Pau, Bishop Felix Lian Khen Thang, Rev. Pau Khan Khai, Dr. Gin Khan Khual, Dr. G. K Nang, Rev. Suan Khan Thang, Prof. Dr. Thang Za Tuan, Pu Chin Sian Thang, Pu Kam Lian cih bangin makai, nu leh pa a i neihte, leitung ngeina bangin a hun a cin ciang na sep theihloh hun hong nei ding uh hi. Amau tha a khek theih ding khangnote a om diam?  

Innkuan, khua, gam, minam sungah, sa lam leh kha lama hoih taka hong makaih mi masate upna, kalsuanna, cihtakna leh hanciamna maban zom thei dingin hanciamna i nei hiam? A hoih lo lama tha khek hi loin, a hoih lama tuunu-zuapa tha khek thei ding, amau sepna sang a tangzai leh golzaw na manpha a sem dingin hanciam ni…

~ Daihna Cabin ||19122016