SHILLONG ZOMITE LEH
KI-ITNA
P. Lianbawi in :
·
Itna nei leng limci kisa a, a duh bek
hi leng kikham baih se hi.
·
Itna nei leng kisem zo a, i sep zawh
ding hang itna i neih kei leh a tawp dong kisem nuam lo hi.
·
Itna nei leng a hoih lamin kimu thei a,
itna nei kei leng a hoih pipi zong a sia in kila thei hi... ciin thu na gelh ngei hi (ZBYF Tangko,
Jan. 2014)
Lai Siangtho in khat le khat ki-itna cih simloh kuama
lei ba lo dingin hong hilh a (Rom 13:8; Heb. 13:1, Joh. 15:17), upna leh
lametna sangin itna thupizaw (I Kor. 13:13) ahihna leh, thukham lianpen leh a
zom zong itna thu mah (Mat. 22:37-39; Mark. 12:29-31) ahihna kimu a, tua banga
itna a neite in Pasian lungdamsak hi.
Leitungah i nuntak sung teng, Pasian’ lungdamna nasep
pen sep ding thupipen hi den ding hi. Tua bang sem dingin itna i neih kisam a,
tua bang a kisepna ah Pasian lungdam ahih manin, tua bang a sem minamte
khangto-in, minam lian suak hi.
Itna tawh nasep pen Khristiante mawhpuakna/vaipuak
thupipen ahi hi. A bahte huh a, a puk mite phong a, a hat lo mite hatsak ding
leh, Khris tangthupha a thei lo mite nangawn Khris nungzui suaksak pen
Khristiante sep ding thupipen ahi hi. Tua bang sem dingin i sep sak ding Pa
Pasian mah i it kisam hi.
Zomite kalsuan dan i etet ciangin, mun tuamtuamah
Zomi hihna tawh minampihte itna leh, Khris zahtakna tawh minam sungah vaihawmna
leh nasepna tuamtuam lian semsem ahih manin lungdamhuai mahmah hi.
A diakin, Shillong Zomite sungah ki-itna, kikhualna
leh ki-angvanna om hi a thei ka hih manin ka lungdam hi. Tunai-a ka theih bel tawmcik
hi kha ding a, ka theih batloh, itna hanga nasep thupi taktak tampi om lai
dingin ka ngaihsun hi.
Meetna leh phattuamna om het lo ding tawh a kibang
nasep, ahih kei leh, thaman ngah pah nading ahi lo nasep pen mi tampi in sem
nuam lo hi. Tua bang leitungah i teen laitakin, Shillong Zomite ulian leh
Shillong khua sunga om Zomite in itna tak tawh – panpih a kisamte panpih a, sum
le pai, thagui thatang, thungetna tawh a huhna pen Khris lim le meel kilatna,
Khris nungzuihna ahih manin Pasian a lungdam ding ka lamen hi.
Pasian lungdam peuh leh ‘na khempeuh’ Ama khut sungah om ahih
manin patauh ding om lo hi.
Shillong khua sunga om Zomi uliante bangin mun danga
Zomi uliante in minam leh Pasian it hen la, Shillong khua sunga Zomite ki-it
bangin mun tuamtuam Zomite kihuh tuah diamdiam leh nuam zen si’n teh, ka ci hi.
Pilna-siamna leh sum le pai tampi nei-in, cidamna
hoih tak tawh i nuntakna pen, u le nau, meltheih-sanggam, mipihte leh hong pia
Pasian adingin zang kei leng bang phattuamna om ding hiam?
Lai Siangtho in na hoih sep cimtak lo dingin hong
hilh a (Gal. 6:9), tua nasep hoih pen itna lo tawh sep zawh ding hi lo hi. Na
hoih zong itna nei kei leng kicimtaak baih a, phattuamna om lo bangin
kingaihsun thei ahih manin Pasian zahtakna tawh mailam kalsuanna ah mite
ettehtak a i nuntakna ah Khris lim le meel kilang a, minam itna tawh i nuntak
nading hanciam semsem ni.
~ T. Sawm Lian, Daihna
Cabin
Camp : Shillong ||
28.2.2014
