SIHNA LEH ZU

SIHNA LEH ZU

Zu hanga siatna tuamtuam hong tungte leh haksatna hong tungte ka tuattuat ciangin ka lungsimah ciamteh zawh ding hi nawn lo hi. Zu hanga siatna hong tungte sum tawh lohkik ding hi leng, tam zen si’n teh ciin ka ngaihsun a, zu hanga siatna tuamtuam ka tuat ciangin zu dawn ngam dingin ka lungsim hangsan zo lo hi.

Zu hanga siatna tuamtuam, sihna leh sih dektakna thu, innkuan sung siatna ka tuattuat ciangin lipkhaphuai ka sa a, lau thei lo leh a pil thei lo hi mai hang, ciin ka ngaihsun hi.

Makai hoih pipi, thu dang la dangah zong a zat theih mahmah, pilna siamna lamah ci leng zong a zahpih huai lo, thatang hat leh lungsim manlang mahmahte in, zu hanga mual hong liamsan uh a,  it le ngaih, a hun het lo a zu hanga hong nusiate ka ngaihsut kikkik ciangin, ta-gahna, meigonna, sum le pai leh haksatna lianzaw hong tun hi tah, ciin ka lungsim na kikkik hi.

Sihna a om ciangin zu nung bang kek a, a ut peuhpeuh in zu kham a, a misite it taktak banga a kahna uh ka muh ciangin, ka luak suakin, ka heh suak zaw lai hi. Pa J. Thawmte in, “Kei bel ka sih ciangin zu kham limlim in hong kah kei hen la, ka kivuina hunah zong hong kihel vet kei leh deih ing” ci hi. Kei deihdan zong hi pah hi.

Zu dawn a, pumpi in a zawhloh ding cianga a dawn mite in itna nei lo hi. A tate, a u leh nau, a lawm le gual zong it lo uh hi. Zu it zaw uh a, a tate uh tawh nuntak sangin a zu tawh sih ding teelzaw uh hi. Tua ahih manin a lang lamin ngaihsun leng, zu hanga site khawng pen kah zong kahhuai lo hi.

Tua bang lawmlawm hi sam kei e, a ci zong om kha ni. Hoih takin mihing nuntakna suut leng, a it lohpi, a kep noplohpi in bang hangin leitungah a tate uh a pian nadingin vaihawm uh hiam?

Sihna hanga ta-gah, nu le pa nei lo bel thu tuam, ahi zongin zu hanga ta-gah leh meigongte ka ngaihsut ciangin cik mah ciang maisak thei lo ding zah-a ka ngaihsut hun bang om thei hi.

Zu le sa hangin haksatna bang teng na thuak, zu kham siatna hangin kithah na sawm ngei hiam? Zu hangin zato inn bangzah vei na tung a, zu hangin na innkuan leh khua in bangzah tak siatna na thuak uh hiam?

Thuakthuak lai ding maw, ahih kei leh tu-a ciang zong cimtak ta; Nang khut sungah kinga hi. 

(Vapar khua context a kigelh ahi... Vapar Weekly Newsletters a kisuah)

I THUPINGAIHSUT BANG?

I THUPINGAIHSUT BANG?

Khantohna pen i thupingaihsut thute in sai mahmah hi. A thupi het lo thu a kithupingahsut mahmahna munah a thupi het lo nasepna leh a gah (result) om nuam mahmah hi. Tua tawh a kilehngat lianin na thupi leh a hoih a pha deih a, a lamen leh tua bang a semte leh a kisepna munah khantohna om hi.

Laigelhpa khat in, “Nungakte in tangval zu kham a thupisimlohna khua-ah tangvalte in zu kham ngam lo uh hi” ci hi. Maan mahmah dingin ka lamen hi. Nungak pawlkhat in, tangval zu kham lote thugen um loin, zu kham kawma thu-a gengente peuh um zaw uh a, tua bang a tamna munah zu i khaam-khaam zongin khaam baih lo thei hi. Zu khamte a kiphasak theihna munah zu dawn mite pen kithupingaihsut hi kha thei a, a thupisim lo ding a zu dawn lo mipi a tawmzawk man zong hi thei hi!!

Mizogam-ah hun khat lai panin la siam kithupingaihsut mahmah ahih manin la siam kidemna ki-uang mahmah hi. India gam mipite in cricket pen thupingaihsut mahmah ahih manin cricket siamte minthang uh a, England gamah football pen kithupingaihsut ahih manin a siamte minthangin vaang nei pah se uh hi.

I gennop bang hiam? Khantoh ding, ki-it ding, kilem ding leh khua kithutuak ding i deih taktak leh, mipite lungsim-ah tua bang a sem nuam, a sem ngamte thupisimin, a nawngkaisak, a buaisak leh haksatna a tun mite i muhdan khat a kilaih hun ciangin I lunggulhte neih ding hong nai mahmah ding hi.

“Lai a siam hangin a phattuamna om tuan kei”  “Tan 10 a zawh hangin bang mahmah in zang tuan ke’n teh” i cihcih sung teng Tan 10, 12, B.A zo hong tam thei lo ding a, a zo nuam zong hong kibehlap lo kha ding hi.

“Zu a dawnloh hangin………”  “Thu hoih a gengen hangin amah zong……” i cihcih sung teng khantohna taktak om ngei lo ding a, na hoih a sem nuamte i thupingaihsut ciangin na hoih sem nuam hong kibehlap-in, khantoh ding lunggulhna hanga zu dawn lo ngamte i thupingaihsut taktak ciangin zu dawn lo hih manphatna hong lian ding a, khangnote in zu dawnlo hih pen tup le ngim in hong nei ding uh hi.

Thungetna tawh damsakna nei mi a lunggulh a, thupi a sa mahmahte lakah a damsak thei lote nangawn kineihkhemin om thei uh hi. Tua in i thupingaihsut nate in mite tawh i kizopna leh i nuntakna sungah nakpi takin na sem hi, cih kilangsak hi.

Na thupingaihsut bang hiam? Bang thupingaihsut sawm na hiam? Nangma khentatna in khua, minam, gam khangtosak thei ahihna phawk gige in.

(Vapar Weekly Newspaper ading a ka gelh hi)

MI NGEINATE NUNTAKZIA

MI NGEINATE NUNTAKZIA

Khatvei laibu ka simna khat-ah “Mi picingte nuntakzia” cih point tawm khat hong gelh a, ka lungsim hong khoih mahmah leh zui thei leng hoih ding hi, ka cihte behlapin point 20 gualsukin, ka website ah ka guang hi.

Ahi zongin, tuhun i dinmun ka ngaihsut ciangin, mi picing nuntakzia cih gengam sangin, “Mi ngeinate nuntakzia” ci leng a kituakzaw diam maw? ciin ka ngaihsun a, tua ahih manin mi ngeinate neih ding, a nuntakzia ding uh pawlkhat kikum dih ni.

1.   Zahtak nei uh hi : Mi picingte in mi neupen nangawn zahtak bawl uh a, ahi zongin mi ngeinate in mi neupente a zahtakloh uh hangin zahtak mahmah khat le nih nei sam uh hi. Zahtak neih pen mi ngeina hihna ahi hi. Mi site in zahtak khat zong nei lo uh a, mi bang lo pawlkhat in bel zahtak nei sam uh hi. A zahtak uh pen a tuamtuam hi thei a, innkuanpih, nu leh pa, u leh nau, pi leh pu, khuasung makai leh pawlpi makai etc. zong hi thei hi. Na nuntakna sungah zahtak khat zong nei loin, na ut bangbangin na gamtat gawpgawp lai teng, mi bang lote nuaiah, amau sangin a haizaw leh mihing a cing lo zaw na hi ding hi.

2.   Thu hoih deih : Mi picingte in thu hoih tawh na hoih sep sawm uh a, mi ngeinate in bel ngaihsun sam uh hi. Mi ngeina nuai lam leh mi bang lote in thu hoih leh manpha deihna mel thei lo uh a, mite siat nading ahih hangin a ut bangbangun gamta phangphang uh hi.

3.   A hoih lamin ngaihsun hi : Haksatna leh buaina, sihna leh dahnate pen mikim tuak hi a, a om thei mah hi, cih phawk hi. Amah bekin a thuak hi loin, leitung mite in a thuak uh ahihna phawk hi. David bangin haksatna hanga lungdamna a ngah (Late 119:67-69, 71,72) sam loh hangin, a kamsia lua leh a thuakpen danin kingaihsun tuan lo hi.

4.   Mite it : Mi picingte in midangte in a it kik ding zah dongin mite it siam uh a, mi ngeinate in tua bang a siamloh hangin midangte itna nei sam hi. Ganhingte in zong itna nei sam uh a, itna a nei het lo mihing pen ganhing sanga manpha lo zaw leh haizaw hi kha ding hi. Itna a omlohna munah kilemna leh daihna om lo a, kikhangto thei lo hi, cih mi ngeinate in phawk sam a, tua a neih uh pen khansak semsem sawm uh hi.

5.   A manphatna thei : Ganhingte in zong amau a itte thei-in, a manphatna leh tuate zong it kik ding a kisapna zong thei uh a, tua pen mi ngeinate nuntakzia ding zong ahi hi. Mi picingte in amau a it het lote in zong a it theih nading un hanciam uh a, ahi zongin mi ngeinate in bel amau a hazate a it zawhloh hangin, amau a itte ii manphatna thei sam uh hi. Leitung pen khat guak a teenna hi lo ahih manin mite manphatna thei a, a kisapna uh zong thei ahih manin mite tawh kitot, kisel, kihuat ding pen ut masa het lo uh hi.

Ganhingte sanga niamzaw leh thupi lozaw-in na nuntakna na zang kha hiam? Mi ngeina na hi hiam? Mi bang lo hi-a na theihte sangin na ngaihsutna a niamzaw hiam? Nangma khensatna pen na nuntakzia ding ahi hi.

(Vapar Weekly Newspaper ading a ka gelh hi)

SPECIAL REPORT (OCT., 2013)

SPECIAL REPORT

Galkap Officer Thak : Sept. 14, 2013 in Chennai a Officers Training Academy (OTA) ah Officer training zotte passing out parade om a, a zo thak mi 350 lakah Lt. Hermon Hauh Thang Hlun s/o Dr. Rev. Enn Za Sian, Pangzawl, Manipur zong kihel hi.  Hermon in Rayburn College, Lamka panin kum 2009 in Tan 12 (Com) 2nd division tawh zo a, kum 2012 in Kristu Jayanti College, Bangalore pnain BBM (Graduate) first class in zoin, Combined Defence Services tungtawnin OTA-ah training dingin kingelh cing hi. 

Gold Medal Ngah : Sept. 11 - 13, 2013 sunga Delhi a National Karate Championship-ah Tg. Khan Sian Mung s/o Pa Khup Lian Thang, Vengthar Champhai in Gold Medal ngah a, Mizogam in National Karate Championship panin Goal Madel a lak masakna pen ahi hi. 

SEA Games-ah Kihel Ding : Tg. Sian Za Khai, Tedim Khualai veng a Pa Thang Za Sing’ tapa pen Taekwando kimawlna ah Kawlgam tangmi in Indonesia, South Korea, leh Thailand gamah kimawlin pai khinta a, ngun (bronze) medal thumvei ngahta hi. Tulaitakin zong gam 11te kidemna South East Asia Games (SEA Games) Dec. 11 - 22, 2013 sunga Kawlgamah kimawl dingin Thailand gamah training a neih san laitak cih thu kiza  hi.

Pahtawi : Pu Vungh Suan Pau, Tedim khua pen Forest Resource Environment Development & Conservation Association (FREDA) in Kawlgam sunga leitang leh gammang tuklak a kem, a puah, a it mi 8 a telkhiat lakah kihel a, Aug. 31, 2013 in Yangon-ah pahtawina pia uh hi. 

Model Village : Reserve Bank of India (RBI), Regional Office, Guwahati in model village 21 bawl a sawmna lakah Zomite khua khat ahi Pearsonmun, Manipur kihel a, a masapen-ah kipuah ding cih thu kiza hi. Model village hih theih nadingin a poimawhte pen - innkuan khempeuh in bank account neih ding, inn khat pan mi khat beek in loan a nget uh leh a muh ngeingei ding, sum siangtho (clean note policy) neih ding, leh bankte kiangah a lungkimlohnate uh a genkhiat theih nading omsak, cihte hi a, hih teng a om ciangin model village in kipulak ding cih ahi hi. Hih tawh kisai Sept. 15, 2013 in Pearsonmun ah kimuhkhopna om a, M. T Muanding Guite, Asst. General Manager, RBI, Guwahati Regional Office banah Lamka khua sunga bank tuamtuam pan Manager leh Staffte kihel uh hi.

Medical College : Pu Phungzathang Tonsing, H&F W Minister, GoM in Sept. 10, 2013 in Lamka Zato inn pha a, Lamka Zato inn pen Hill Medical College dingin kibehlap (upgrade) ding ahihna thu pulak hi.

A Innkuanpihte That : Sept. 3, 2013 in Mizogam sunga Lunglei khua kiang, Tawipui North II ah Lalramzauva in a innkuanpihte a nu - Lianngengi (76), a sanggampa - C. Lalbela (46) leh a sanggampa tapa - Chhakchhuakthanga (12)te that hi.

                Lalramzauva in palikte kiangah, a nu leh a sanggampa in a lawmngaihnu tawh kiteen ding deihsak lo uh a, tua hanga that ahihna thu pulak hi. August, 2013 in Aizawl, Mizogamah pasal khat in a lawmnu thatin, gamlak niin paihna-ah pai a, tua thute in mite lungsim phawng mahmah hi.

Dawibia Kiman : Sept. 20, 2013 in Aizawl khua-ah Dawibia (setanic) Lalrinmawia, Champhai Kanan veng Palikte in man hi.

                Lalrinmawia in thungetna tawh cinate damsak theihna power nei hi-in kigen a, tua manin innkuan khat in a tanu dam lo thungetsak dingin cial hi. Ahi zongin a thungetna sungah Pasian min thupi nading cih kammal zang vet lo a, Rs. 3000 ngen zawsop ahih manin muangmawh in Bawngkawn Police Station ah FIR khia uh a, palikte in man hi.

                Lalrinmawia in a genna-ah, nidangin Khristian mah hi a, councellor in zong pang ngei hi. Councellor a sep laiin dawibia Belfatas kici khat in khem a, a nial hangin nial zo lo hi-in kigen hi. Dawibiate in ‘Dark of Prince’ kici group khat nei uh a, Mizogam sungah numei kihelin member 10 om ci hi. Kha simin Nilaini masa-ah dawi bia zel uh hi-in gen a, Dawi biakna pan a suahtak theih nadingun thungetpih ding hoih a sakna thu zong gen hi.

Inn Thak Teng 15  : India Prime Minister Dr. Man Mohan Singh in India kumpi mi gentheite teen nading inn Teng 15 (15 lakhs) val lam ahih nading thu Sept. 14, 2013 a Chandigarh khua kianga migentheite teen nading Re. 2400 crore bei-a kisa pen a honna hunah pulak hi.

                India gamah singtang pan khuapi a zuan kum simin kibehlap zel ahih manin khuapi-ah mi genthei kibehlap zel a, tuate teen nading inn bawl pen kisam ahihna thu zong pulak hi. Hih a kihongthak innte pen Jawaharlal Nehru Urban Renewal Scheme a sak hi a, innkuan 8,500 kiim in teen nadingin zang ding uh hi. Dr. Singh in Chandigarh pen India gamah migenthei omlohna khuapi (Slum free city) masapen hi dinga a lametna thu zong pulak hi.

Thau Kiman : Kum 1995 panin Mizogam sungah thau 661 leh a tang 25,246 kiman ta hi. Hih thau kimante lakah pistol tampen a, 200 val hi. A.K pen 100 val a, tuate banah M-16, SBBC gun, Uzi, .22 Maniature, Boregun, UT gun, Stengun, Machin gun, M-21, US carbine leh bomb tuamtuam kihel hi.

Wai Wai tawh Hau : Nepal gama Wai Wai company neipa Binod Chaudhary (58) pen Wai Wai hangin billionaire suak cih leitunga mihaute thu a kantel Forbes Magazine in gen a, Nepal gam pana billionaire masapen leh a omsun ahihna thu zong gen hi.

                Kum 1980 kiim panin Wai Wai a bawlkhiat pen India gamah zuak theih dinga hong khak theih ciangin lametzah sangin mite in lim sa uh ahih manin tua pen a bawlkhiapa in nakpi takin hauh lawh mawk hi. Ahi zongin misiamte in naupang kum 2 nuailamte in a nek leh a guh uh khang thei lo ahih manin kum 2 nuai lam naupangte neksakloh ding ahihna thu gen uh hi.

Miphazah : Chin Baptist Convention (Nidanga Zomi Baptist Convention) sungah pawlpi - 893, inn - 38,145, milip - 202,991, ordained pstors & minister - 551, leh ordainloh 701 om ahihna CBC Statistic 2013 panin kimu hi.

(ZBYF Tangko, Oct. 2013)