Lametna Hoih Nei Ding

Lametna Hoih Nei Ding

Mihingte, i nuntakna, a sia lam hi-in a hoih lam hi ta leh hong makaih lianpi khat pen mailam a i lametna (hope) ahi hi. Lametna hoih leh hoih lo neihna hangin nuntakna hoihin sia thei hi.

Mihing khempeuh in lametna kinei ciat a, ahi zongin kibang kim het lo hi. Tua i lametna tawh kizui a kinungta ahih manin lametna hoih nei lote in amau adingin hih leitung pen tawlhuai leh kinepna om lo, hih leitungah a omna uh a meetna om loin ngaihsun-in, tua in mailam hun pen a mial leh hoih lo bekbek, hun hong paizel dingin na hoih lo leh kimanna om lo a tun dingin lametna hoih lo nei uh hi. Tua hangin nuntakna pen a manphatna thei a manpha taka zat ding sangin ut bangbang a nuntak teelzaw thei uh a, tua in a hoih lo vanzat tuamtuam, zatui, khamtheih tuamtuam sungah lutpihin, a mulkimhuai mahmah mah-le-mah kithahna (suicide) nadong piangsak thei hi. Tua bang hunah zong, tua bang mite in a lametna uh pen, hih leitung cimtakhuai sa lua, tua pana tawldamna mah a lamen ahi uh hi.

Leitung a mi lawhcing khempeuh pen lametna hoih tak nei a, tua a lamet uh a tangtung theihna dinga hanciamte ahi uh hi. Siamsin-sangkahna, naupang kepna, nasepna tuamtuam, leh nekzonna kibang lo pipi i sepna munah, tua i sepna hang a hong piang ding bang om? Bang lamen a tua nasem i hiam? cih pen ngaihsut ding a poimawh mahmah khat ahi hi. Nasepna khatpeuh-ah i sem zongin, koimun koimunah i om zongin lametna hoih neihna dingin hun hoih om den hi. Haksatna lianpi i tuak hunin zong hong thakhauhsak leh thuthak hong guan pen lametna hoih ahi hi.

Lawhcinna khawng baih tak leh tomcik sunga ngah ziau theih om (khol) lo hi. Tua ahih manin nakpi taka kalsuan a, haksatna leh buaina tuamtuam pal a, nakpi taka hanciam kisam hi. Tua hun cianga tha hong guan a, lampi thak hong ngaihsunsak leh lungkia lo a maban zop theihna pen lametna hoih neihna hang ahi hi. Lametna hoih nei peuh leng, i haksatna pen zong manpha takin kizang thei hi.

I Khristian nuntakna mahmah zong ngaihsun lehang, i muh nailoh, i muh theih nailohte upna tawh a lamen mite i hi hi. I mai lamah bang thu piang ding a, bangci bangin leitung om ding cih leh, upna tawh sih khit ciang a 'nuntakna' a lamen mite i hi hi. Tua bang lametna nei kei leng, hih leitungah Pasian kisam sa lo kha thei hi hang. Tua tawntung nuntakna lamen i hih manin sih theihna ding lampi pana hong honkhia Jesu Khris pen Hongpa leh Gumpa a sangin, tua lametna in ama kiang tun theihna dingin a nuam hiin, haksatna leh buaina tuamtuam, langdona, bawlsiatna leh thu hoih lo tuamtuam a om zong citak taka kalsuan a, kip taka Topa nungzui thei dingin tha hong guan hi.

Zu dawn mite in lametna nei-in zu dawn uh a, zatui kisun mite in zong lamet nei-in a hoihlohna a theih uh hang kisun veve hi. Sangkahte leh a sawl nu leh pate in zong lametna nei a, na khempeuh lametna tawh a kizom vive ahi hi. Tua hi a, a hoih leh hoih lo gamtatna pen lametna bang hiam tawh kizom khin hi.

Lametna khempeuh bel lamet bang tektek in piang khin lo kha ding hi. A piang thei vet lo ding lametna zong om veve hi. Tua ahih manin, Pasian in ei hong piak siamna manpha taka zang thei leh tua sepna tungtawna midangte in a phattuampih theih ding, tua hang a meetna om thei dingte i lamet thupi kha ding hi. Tua hi lo a, omna peuhah phunphun, na hoih sem thei ding a ngaihsutna hoih nei lo leh lametna kician nei lo i hih khak leh i nuntakna pen midang genloh, eimah mahmah in zong kimanna om lo kisa kha ding a, lampi siazaw sem lam hong zuatpih kha ding hi.

Genthei, simmawh, bawlsiat hi a kithei-in lungkhamin na tha a nem kha hiam? Ngaihsutna hoih leh dik nei thei nawn lo zah dongin lungkia in na om kha hiam? A taktak pen tua bang hizenzen lo hi. Ngaihsutna hoih, lametna dik neihna dingin a kaai lua om ngei lo hi. Mi khempeuh in a neih/tuak uh haksatna pen nang bekin na tuak na sa kha hiam? Lametna hoih nei kik peuh lecin tua in na ngaihsutna a hoih lamin makaih ding a, na haksatna tungah na gualzo-in, na nuntakna pen manphasa-in, tua in a lianzaw sem lametna hong neisak ding hi.

Tua ahih manin i ngaihsut ding a thupi pen ahih leh, 'bangci bang lametna nei ka hiam? Ka lamet a hoih takpi mah hiam? Pasian thu tawh a kituak hiam?' cih hi ding hi. Lametna hoih neihna hangin nuntakna nakpi takin nuamin manpha thei ahih mah bangin lametna hoih lo neihna hangin nuntakna sia thei mahmah ahihna thu phawk ding kisam hi. Tua ahih manin 'lametna hoih/dik' nei in.

Daihna Cabin || 22012016

Kha Siangtho Nasep

Kha Siangtho Nasep

Bang hun hiam khat, bangci bang hiam khat a i om ciangin, 'Kha Siangtho nasep' ciin kipulak zel hi. Kha Siangtho bang hi a, bangci bangin nasem a, Kha Siangtho nasep i cih tuamte ahi taktak mah ahi diam, tua bang hun lote ah Kha Siangtho in na sem lo mah ahi diam?

"Tuzan kikhopna-ah Kha Siangtho hong kibua in... nidang bang kei, nuam peuhmah..." ciin Kha Siangtho pen khatveivei hong pha (visit) a, kilehkik, hong paisankik, hong ompih nawn lo bang a ngaihsutna, tua ngaihsutna pana tua bang kam kipau hi leh kilawm hi. Tua pen ahi taktak ahi hiam?

'Kha-mi' leh 'kha-milo' i cih i tehna bang hi a, pawlpi sungah 'kha-mi' a "kici" tuam deuh a omna hangin meetna om maw pawlpi sungah a hoih lo lamin nasem...? Tuhuna mi tampi in Kha-mi leh Kha-milo ci a tehna leh ngaihsutzia pen Lai Siangtho hong hilhzia tawh a kibang mah hiam?

Lai Siangtho in mi khatpeuh in thutak ahi hotkhiatna 'Lungdamna thu' a zak uh a, a up/saan uh ciangin Pasian in ama mi ahihna uh Kha Siangtho tawh na ciamteh hi, ci hi. Tua Kha Siangtho kipia pen mihing thahatna leh nasep zawhna hang hi loin, upna tawh hehpihna hang a Pasian piakkhong/letsong ahi hi. Tua ama-mi (Kha Siangtho tawh a ciamteh mite, Kha Siangtho tenpih mite) pen amah (Pasian) khut sung panin kuaman sut zo nawn lo ding a, ama aa, ama mite hi tawntung ding hi.

Tua hi a, Kha Siangtho pen Pa Pasian in mawhna hang a si ding mite honkhia dinga hong sawl Tapa Khris Jesu, Honpa leh Gumpa-a a sangte tunga ciamtehna ding-a a piak hi a, Jesu Honpa leh Gumpa a sang khempeuh pen 'Kha-mi' cihna hi a, tulai pau leh 'piangthakte' ahi hi. Tuate tha kipia, kihuh, ki-it, leh Khristian nuntakna ah picinzawk semna ding deihna tawh na sepkhopna dingin pawlpi a kiphut hi a, tua tungtawn in 'Kha-mi' hong kibehlap ding hi.

Kha Siangtho nasep ahih leh nidang hun, pawlpi (church) omma hun-a a nasep dan tawh kibang loin, koi mun hiam, kuate hiam kiangah a tuama Kha kibua cih bang hi loin, Kha-mite omna peuhah nasem zaw hi. Tua pen a gah pan kimu thei a, Kha Siangtho piak letsong tuamtuam zatna panin Tuate kimu thei hi. Tuate ahih leh - itna, lungdamna, kilemna/daihna, thuakzawhna, migitna, midang tungah a hoih a gamtatna, gahkhiatna, nunemna, pumpi ki-ukzawhna cih bangin gahkhia zaw hi. Tua pen 'Kha-mi' leh 'Kha-milo' i tehna ding hizaw hi.

Tua ahih manin thu-um (piangthak) khempeuh sung a om Kha Siangtho pen koi mun hiam, bang hun hiam, bangci bang hiam bek a nasemsak leh hong kipulak dana ngaihsutna pen kum za (100) val bang Khristian, Lai Siangtho a sim zel mite in i telkhialhloh ding thupi hi. Tua hi lo a, nasepna tuam, nasepdan tuam bang hiam nei dana i tuat a, 'Kha-mi' a tuam om dana i ngaihsut leh ei sung a Kha Siangtho om lam thei loin mi genna peuhah hoi suk hoi toin, lungkimna nei lo leh singkung, huih in a muhna lamlama kihei kawikawi bang kihi lel ding hi.

Tua ahih manin 'Kha Siangtho nasep' thu i gen ciangin thu dangdangte sangin a gahte - itna, lungdamna, lungnopna, lungduaina, migitna, hoihna, cihtakna leh pumpi ki-ukzawhna a gahkhia hiam tua nasepnaah, cih pen i tehna ding hizaw hi. Hihte gahkhia lopi a, Kha Siangtho letsong paulap a bangbang hiam Kha nasep ci a om leh tuapen kha nasep mah hi ding a, Kha Siangtho bel hi loin, kha-niin leh bangbang hiam kha hizaw kha ding hi.

Kha Siangtho nasep pen a lom, mi tampi omkhopna bekah om a sa bang zong om leh kilawm hi. Tua munte ah zong om mah, ahi zongin a mimal nuntakna mahmahah Kha Siangtho nasepna thupingaihsut-in, i mimal nuntakna mahmahah na semsak lehang, tua in innkuan, khua, pawlpi, minam leh gam sungah Kha nasepna taktak kimu pan ding hi.

Nungkum (2016) in Kha Siangtho nasep tawh kisai, Lai Siangtho hal leh a phumte tawh kisai-in Kha taktak pan hi loin a siangtho lo kha pan tuate 'thusuak' a ngah uh ahih ding lam ka gelh ngei hi (https://sawmdaihnacabin.blogspot.in/2016/10/lai-siangtho-pasian-thu-bu.html). Tunai in Kha sawlna ciin mi pawlkhat in "Thukham Singkuang" bang bawlin lamzuih pih uh a, pawlkhat in amau biakinn zong ahi lo huang sungah kha sawlna ciin amau hoihsak bangin va gamta uh a, mi khat leuleu Jesu tawh kiteeng ding, cih khat bang zong kha sawlna ciin thu om hi. Lai Siangtho in nisim singlamteh pua a Jesu nungzui ding hong hilh laitakin, mimal sungah singlamteh phut lo a, inn kiang leh koi hiamah a phut zeizai, gualzawhna laan (flag) ci a dial a khai zeizai bang zong om hi.

Tua bang mite pen amau tawh a kizom, upna khat a len midangte kha tawh kibang lo ahi diam, a thu-uppihmite in zong saang lo banah tua bangin gamta het lo uh hi. Gentehna dingin, singtang khua khat le nih ah singlamteh kiphut zeizai in, laan/dial kikhai zeizai a, amau tawh upna lama a kibatpih mi, khuapi leh mundanga omte in kisam sa het lo uh... Amau sep bek hoih a sa tua 'Kha nasep' a ci mawkmawkte in midangte, amau ngaihsutzia a koppih lote dawi biakna a zui zahin a koih pawl bang om zawmah lai...!! Tuate kha bel Kha Siangtho hi loin kha kha (bitter spirit) khawng ahi mai diam? Ken zong a min theician tuan keng!!

Tuhun a kha nasep ci a Pasian thu a paikhialhpih, hih a tunga i gen daudaute pan kidop kisam mahmah hi. Leitung a bei masiah tua bang thu leh mite bei lo ding uh a, hong uang semsem lai ding uh hi; Lai Siangtho in hun nunung ciang a hong piang ding a genkholhte ahi hi. Tua ahih manin Lai Siangtho sim a, mi gen khempeuh, mi hoihsak khempeuh um pahpah loin, upna kician, Lai Siangtho tawh kituak i neih ding kisam hi. Bang hang hiam cih leh Pasian thu pen thupi lua ahih manin mi khemna in 'kha nasep' ci a mi a khem kawikawi tampi pawlpi sung nangawn ah om hi.

Jesu Honpa leh Gumpa a sang, piangthak na hih leh nang sungah zong Kha Siangtho diktak om a, tua-in lam hong lakin, hong makaih ding hi. Bang cik hiam ciang bek a nasem a, kua hiam tung beekah nasem hi loin, piangthak mi khempeuh tungah kha piak letsong tawh kizuiin nasem hizaw a, tuate pen a gah pan kimu thei hi. Kha thu, kha nasep cih mana na khempeuh up ding hi lo a, 'Pasian kiang pana hong pai taktak mah hiam?' cih sittel (test), a dik lote kikhemsak ding hi lo hi.

LST: John 3:16; 12:47; 15:16; Rom 8:1-17, 37-39; 12:6-8; 1 Cor 12:8-10; Efe 4:11; 5:18; 1 Pet 4:11; Efe 1:13; 2Cor 5:5; Gal 3:14; 5:22-26; 1 John 3:24; 4:1-6; 1 Thess 5:19-24 etc....

Daihna Cabin || 12012016

Naupang Kepna Tawh Kisai

Naupang Kepna Tawh Kisai

“Nau kep sangin lo kuanin sunkhua-in na sem nuam zaw ing” cih pen nupi, ta nei khinsa mi bangzah hiam kam panin ka za hi. A gen lai-un lamdang lua ka sakloh hangin, tun, ka nung ngaihsut kik ciangin, a bangci dana ta nei a, tate kep sang a gam laka lo kho a sunkhua a nasep utzaw mawk, tua zah a nau kem nuam loin bang hangin nau nei ahi diamah, cih khawng ka ngaihsun hi.

Nidang lai-in, lo kho in a thahat lai khempeuh lo lamah kuana nasep kisam ahih manin nau pen piteek-puteek, nasem thei lote kep hi tangpi hi. Nau kem nuam mahmahte adingin zong nau kep pen a kilawm lo suak mawk hi. Tua banah, tuhun bang a siatna leh na hoih lo tuamtuam pana kikep luat kisam lo ahihna ciang zong om ahih manin a kem a cing lua om khol loin naupang pen picing to lel uh hi.

Ahi zongin, i tuhun nuntakna leh kiim le paam i et ciangin, naupang pen kep taktak kul, et den kul mawk hi. Siatna tuamtuam genloh mi gilo peuh in zong gumang thei mawk hi. Tua ahih manin tuhun ciangin naupang kepna pen nasep lianpi khat suak, ci leng kikhial lo ding hi.

Mun pawlkhat-ah, naupangte kep a manphatna tuni ciang dongin a thei lo leh kisam a sa lua lo tampi om lai tawh kibang hi. Mi pawlkhat bangin naupang kum li/nga a pha peuh zatep (smoking), zudawn, sahdah-khaini muam, kammal hoih lo leh ciindan hoih lo peuh sinsak thei mawk uh hi. A hoihlohna lam sangin ciamnuih bawlna peuhin tuate zangin gualnop bawlna khatin zang mawk uh hi.

Naupang kici, mihing mah, Pasian in ama lim le mel sunin a bawl mah, mai lamah innkuan, khua, pawlpi, gam leh minam makai ding hi uh a, eita ahi kei zongin siatna lampi hilh a totsak pen Pasian deihna hi peuhmah lo hi. Tuhun ciangin biakinn khawngah nau-apna hunah nau hoih taka a khanna dingin huh/panpih ding, ciin kiciamna hiam, thungetsakna hunah dinna tawh i thukimna kilak thei zel hi (a ap pastorte hiamin 'i kikhukim lahna in ding ni' ci uh). Tua bang hun ciang, i lungsim takpi tawh i hih hiam, a kilawmsakna bek khawng a ding i hi kha hiam, cih ngaihsuthuai mahmah a, naupang khan hoih-a a khan theihna dingin pangkhawm taktak lehang, tuhun a i pawlpi/khua sunga haksatna tampi pen kipelh kha ding hi.

Lai Siangtho in tate pen Pasian tung pana kingah thupha hi ci a, Jesu mahmah in zong naupangte lampi maan a tawnsak lo, lampi dik lo tawnsak mite a nuntak den uh sang a ngawng uah an-gawina suangtum khihin tuipi sungah kikhia in si uh leh a hoihzawkna thu na gen a, naupang a limbawl mite in amah (Jesu) zong a limbawl ahihna thu na gen hi.

Tua ahih manin Pasian in a it naupangte, a thupha hong piak naupangte pen i pilna-siamna bangbang tawh lungkia lo a pattah, makaih, lamlah ding ahi hi. Kihuh a, pankhop ding ahi hi. Tua dingin nu leh pa leh picingte in nuntakzia, kampau, nek le dawn, silh le teen pan kipan naupangte etteh theih ding a nuntak sawm ding kisam hi. Gentehna-in, Zu dawn lo ding a hilhhilh sangin, dawnloh a manphatna nu leh pate nuntakna-ah mu uh leh, tua bang nuntakzia pan thuhilh zong baihzaw ding hi. Zatep vuauvuau kawma zatep hoihlohna khawng kihilh pen a meetna om khol lo mai thei hi.

Biakna pawlpi sungah zong a veihuai mahmah naupang kepna leh pantahna ahi hi. Mun pawlkhatah naupang Nipi Sang a Sia dingin a kikhawm ngei mel lo peuh, a kikhop nop khak leh ciin “risk” kila mawk hi (a sem ding mi a kicinloh man zong bel om thei). Hih pen mi seek/puah nopna hang a "risk" lakna dingin hoih ka sak hetloh thu ahi hi. A kibawlpha leh seh ahihna uh a zahtak bangzah hiam om a, a lungdamhuai na ciang zong om hi. Ahi zongin, naupangte pen tua bang maimai a Pasian thu pattah ding hi lo a, Pasian thu hoih tak a hilh thei ding, naupangte manphatna leh Pasian in a itdan a theician, thanuam taka sem thei ding mah seh ding ahi hi. Zogam sung mun pawlkhatah Nipi sang Sia ding "trained" mah zang uh a, thupi ka sa hi. Ahi zongin mun tamzawah kithupisim lua lo ahih manin khangno tampi in lampi maan tawn lo uh ahi mai diam, cih bang zong ngaihsuthuai mahmah hi.

Mihing kimakaih siamna bek hiam, mimal khat i hanciamna hang bek a naupang makaihna pen lawhcing khin thei bel hi lo hi. Za-ah za lawhcin bel hi thei ken teh, a hanciam khempeuh zong lawhcing khol kei. Ahi zongin tuate hang a lungkia lo leh Pasian zahtakna tawh, ama deihna bang a naupang limtaka kem a, kihuhtuah, pankhop ding ahi hi. Pawlkhat in a siat ding uh lau-in naktakpi in innlam, sanginn, leh biakinn khawng pan hanciam a, tua lo lamah lampi dik lo a hilhhilh, na hoih lo a sep uh mu napi bangmah lampi dik hilh nuam lo leh tua lampi dik lo-ah a makaih zawsop bang zong om thei hi.

Bangmah hong ci thei kei, bangmah pi theisiam kei, ci a naupang awlmawhlohna, utut a khemna, Pasian thu tawh kituak lo a bangbang hiam a siatna ding uh sinsak leh pattahna, i kampau leh deihdan hong zuih ding uha deihlohte khawl/tawpsanin, mai lama innkuan, khua, pawlpi, gam makai ding Pasian in a it naupangte, khan hoih a khang a, Pasian a zahtak leh mite ading a thupha a bawl mi manpha a suakna ding un hanciamin pangkhawm ni. I mailam hun hoih leh hoihloh pen tuhun a naupangte i makaih danah kinga hi...

Daihna Cabin || 07012017