MI NGEINATE NUNTAKZIA

MI NGEINATE NUNTAKZIA

Khatvei laibu ka simna khat-ah “Mi picingte nuntakzia” cih point tawm khat hong gelh a, ka lungsim hong khoih mahmah leh zui thei leng hoih ding hi, ka cihte behlapin point 20 gualsukin, ka website ah ka guang hi.

Ahi zongin, tuhun i dinmun ka ngaihsut ciangin, mi picing nuntakzia cih gengam sangin, “Mi ngeinate nuntakzia” ci leng a kituakzaw diam maw? ciin ka ngaihsun a, tua ahih manin mi ngeinate neih ding, a nuntakzia ding uh pawlkhat kikum dih ni.

1.   Zahtak nei uh hi : Mi picingte in mi neupen nangawn zahtak bawl uh a, ahi zongin mi ngeinate in mi neupente a zahtakloh uh hangin zahtak mahmah khat le nih nei sam uh hi. Zahtak neih pen mi ngeina hihna ahi hi. Mi site in zahtak khat zong nei lo uh a, mi bang lo pawlkhat in bel zahtak nei sam uh hi. A zahtak uh pen a tuamtuam hi thei a, innkuanpih, nu leh pa, u leh nau, pi leh pu, khuasung makai leh pawlpi makai etc. zong hi thei hi. Na nuntakna sungah zahtak khat zong nei loin, na ut bangbangin na gamtat gawpgawp lai teng, mi bang lote nuaiah, amau sangin a haizaw leh mihing a cing lo zaw na hi ding hi.

2.   Thu hoih deih : Mi picingte in thu hoih tawh na hoih sep sawm uh a, mi ngeinate in bel ngaihsun sam uh hi. Mi ngeina nuai lam leh mi bang lote in thu hoih leh manpha deihna mel thei lo uh a, mite siat nading ahih hangin a ut bangbangun gamta phangphang uh hi.

3.   A hoih lamin ngaihsun hi : Haksatna leh buaina, sihna leh dahnate pen mikim tuak hi a, a om thei mah hi, cih phawk hi. Amah bekin a thuak hi loin, leitung mite in a thuak uh ahihna phawk hi. David bangin haksatna hanga lungdamna a ngah (Late 119:67-69, 71,72) sam loh hangin, a kamsia lua leh a thuakpen danin kingaihsun tuan lo hi.

4.   Mite it : Mi picingte in midangte in a it kik ding zah dongin mite it siam uh a, mi ngeinate in tua bang a siamloh hangin midangte itna nei sam hi. Ganhingte in zong itna nei sam uh a, itna a nei het lo mihing pen ganhing sanga manpha lo zaw leh haizaw hi kha ding hi. Itna a omlohna munah kilemna leh daihna om lo a, kikhangto thei lo hi, cih mi ngeinate in phawk sam a, tua a neih uh pen khansak semsem sawm uh hi.

5.   A manphatna thei : Ganhingte in zong amau a itte thei-in, a manphatna leh tuate zong it kik ding a kisapna zong thei uh a, tua pen mi ngeinate nuntakzia ding zong ahi hi. Mi picingte in amau a it het lote in zong a it theih nading un hanciam uh a, ahi zongin mi ngeinate in bel amau a hazate a it zawhloh hangin, amau a itte ii manphatna thei sam uh hi. Leitung pen khat guak a teenna hi lo ahih manin mite manphatna thei a, a kisapna uh zong thei ahih manin mite tawh kitot, kisel, kihuat ding pen ut masa het lo uh hi.

Ganhingte sanga niamzaw leh thupi lozaw-in na nuntakna na zang kha hiam? Mi ngeina na hi hiam? Mi bang lo hi-a na theihte sangin na ngaihsutna a niamzaw hiam? Nangma khensatna pen na nuntakzia ding ahi hi.

(Vapar Weekly Newspaper ading a ka gelh hi)

SPECIAL REPORT (OCT., 2013)

SPECIAL REPORT

Galkap Officer Thak : Sept. 14, 2013 in Chennai a Officers Training Academy (OTA) ah Officer training zotte passing out parade om a, a zo thak mi 350 lakah Lt. Hermon Hauh Thang Hlun s/o Dr. Rev. Enn Za Sian, Pangzawl, Manipur zong kihel hi.  Hermon in Rayburn College, Lamka panin kum 2009 in Tan 12 (Com) 2nd division tawh zo a, kum 2012 in Kristu Jayanti College, Bangalore pnain BBM (Graduate) first class in zoin, Combined Defence Services tungtawnin OTA-ah training dingin kingelh cing hi. 

Gold Medal Ngah : Sept. 11 - 13, 2013 sunga Delhi a National Karate Championship-ah Tg. Khan Sian Mung s/o Pa Khup Lian Thang, Vengthar Champhai in Gold Medal ngah a, Mizogam in National Karate Championship panin Goal Madel a lak masakna pen ahi hi. 

SEA Games-ah Kihel Ding : Tg. Sian Za Khai, Tedim Khualai veng a Pa Thang Za Sing’ tapa pen Taekwando kimawlna ah Kawlgam tangmi in Indonesia, South Korea, leh Thailand gamah kimawlin pai khinta a, ngun (bronze) medal thumvei ngahta hi. Tulaitakin zong gam 11te kidemna South East Asia Games (SEA Games) Dec. 11 - 22, 2013 sunga Kawlgamah kimawl dingin Thailand gamah training a neih san laitak cih thu kiza  hi.

Pahtawi : Pu Vungh Suan Pau, Tedim khua pen Forest Resource Environment Development & Conservation Association (FREDA) in Kawlgam sunga leitang leh gammang tuklak a kem, a puah, a it mi 8 a telkhiat lakah kihel a, Aug. 31, 2013 in Yangon-ah pahtawina pia uh hi. 

Model Village : Reserve Bank of India (RBI), Regional Office, Guwahati in model village 21 bawl a sawmna lakah Zomite khua khat ahi Pearsonmun, Manipur kihel a, a masapen-ah kipuah ding cih thu kiza hi. Model village hih theih nadingin a poimawhte pen - innkuan khempeuh in bank account neih ding, inn khat pan mi khat beek in loan a nget uh leh a muh ngeingei ding, sum siangtho (clean note policy) neih ding, leh bankte kiangah a lungkimlohnate uh a genkhiat theih nading omsak, cihte hi a, hih teng a om ciangin model village in kipulak ding cih ahi hi. Hih tawh kisai Sept. 15, 2013 in Pearsonmun ah kimuhkhopna om a, M. T Muanding Guite, Asst. General Manager, RBI, Guwahati Regional Office banah Lamka khua sunga bank tuamtuam pan Manager leh Staffte kihel uh hi.

Medical College : Pu Phungzathang Tonsing, H&F W Minister, GoM in Sept. 10, 2013 in Lamka Zato inn pha a, Lamka Zato inn pen Hill Medical College dingin kibehlap (upgrade) ding ahihna thu pulak hi.

A Innkuanpihte That : Sept. 3, 2013 in Mizogam sunga Lunglei khua kiang, Tawipui North II ah Lalramzauva in a innkuanpihte a nu - Lianngengi (76), a sanggampa - C. Lalbela (46) leh a sanggampa tapa - Chhakchhuakthanga (12)te that hi.

                Lalramzauva in palikte kiangah, a nu leh a sanggampa in a lawmngaihnu tawh kiteen ding deihsak lo uh a, tua hanga that ahihna thu pulak hi. August, 2013 in Aizawl, Mizogamah pasal khat in a lawmnu thatin, gamlak niin paihna-ah pai a, tua thute in mite lungsim phawng mahmah hi.

Dawibia Kiman : Sept. 20, 2013 in Aizawl khua-ah Dawibia (setanic) Lalrinmawia, Champhai Kanan veng Palikte in man hi.

                Lalrinmawia in thungetna tawh cinate damsak theihna power nei hi-in kigen a, tua manin innkuan khat in a tanu dam lo thungetsak dingin cial hi. Ahi zongin a thungetna sungah Pasian min thupi nading cih kammal zang vet lo a, Rs. 3000 ngen zawsop ahih manin muangmawh in Bawngkawn Police Station ah FIR khia uh a, palikte in man hi.

                Lalrinmawia in a genna-ah, nidangin Khristian mah hi a, councellor in zong pang ngei hi. Councellor a sep laiin dawibia Belfatas kici khat in khem a, a nial hangin nial zo lo hi-in kigen hi. Dawibiate in ‘Dark of Prince’ kici group khat nei uh a, Mizogam sungah numei kihelin member 10 om ci hi. Kha simin Nilaini masa-ah dawi bia zel uh hi-in gen a, Dawi biakna pan a suahtak theih nadingun thungetpih ding hoih a sakna thu zong gen hi.

Inn Thak Teng 15  : India Prime Minister Dr. Man Mohan Singh in India kumpi mi gentheite teen nading inn Teng 15 (15 lakhs) val lam ahih nading thu Sept. 14, 2013 a Chandigarh khua kianga migentheite teen nading Re. 2400 crore bei-a kisa pen a honna hunah pulak hi.

                India gamah singtang pan khuapi a zuan kum simin kibehlap zel ahih manin khuapi-ah mi genthei kibehlap zel a, tuate teen nading inn bawl pen kisam ahihna thu zong pulak hi. Hih a kihongthak innte pen Jawaharlal Nehru Urban Renewal Scheme a sak hi a, innkuan 8,500 kiim in teen nadingin zang ding uh hi. Dr. Singh in Chandigarh pen India gamah migenthei omlohna khuapi (Slum free city) masapen hi dinga a lametna thu zong pulak hi.

Thau Kiman : Kum 1995 panin Mizogam sungah thau 661 leh a tang 25,246 kiman ta hi. Hih thau kimante lakah pistol tampen a, 200 val hi. A.K pen 100 val a, tuate banah M-16, SBBC gun, Uzi, .22 Maniature, Boregun, UT gun, Stengun, Machin gun, M-21, US carbine leh bomb tuamtuam kihel hi.

Wai Wai tawh Hau : Nepal gama Wai Wai company neipa Binod Chaudhary (58) pen Wai Wai hangin billionaire suak cih leitunga mihaute thu a kantel Forbes Magazine in gen a, Nepal gam pana billionaire masapen leh a omsun ahihna thu zong gen hi.

                Kum 1980 kiim panin Wai Wai a bawlkhiat pen India gamah zuak theih dinga hong khak theih ciangin lametzah sangin mite in lim sa uh ahih manin tua pen a bawlkhiapa in nakpi takin hauh lawh mawk hi. Ahi zongin misiamte in naupang kum 2 nuailamte in a nek leh a guh uh khang thei lo ahih manin kum 2 nuai lam naupangte neksakloh ding ahihna thu gen uh hi.

Miphazah : Chin Baptist Convention (Nidanga Zomi Baptist Convention) sungah pawlpi - 893, inn - 38,145, milip - 202,991, ordained pstors & minister - 551, leh ordainloh 701 om ahihna CBC Statistic 2013 panin kimu hi.

(ZBYF Tangko, Oct. 2013)

SPECIAL REPORT (SEPT. 2013)

SPECIAL REPORT

ZYA Block Thak : India gama Zomi Youth Association (ZYA) Gen. Hq. innteekna tawh August 1, 2013 in YPA Gen. Hq. Hall, Hiangtam Lamka-ah ZYA Lamka Block laklutna leh honkhiatna om a,  T. Goukhanmang, President, ZYA Gen. Hq in laklutna leh honna nei-in vaipuate kiciamsak hi. Hih hunah Chief Host in Thanglianpau, President ZRO pang a, Funtional President in L.B Sona, Chairman, Zomi Council pang hi.

                Hih hunah Vungzagin Valte, Parliamentary Secretary, Ginsuanhau, MLA, Langkhanpau Guite, Chairman ADCC leh Thangkhosuanmung, Zenhang Lamka huasate in zong thugenna hun nei uh hi. Langkhanpau Guite in a genna-ah, ADC in ZYA Office leh Zomi Secretariat bawl nadingin Rs. 40,00,000/- tuak proposal bawl uh ahihna thu gen hi.

                Tu dinmunah India gam sungah ZYA unit - 101, block headquarter - 13, regional headquarter - 4, constituent unit - 7 om hi.

Gullu Mual Lungphona : World Zomi Congress (WZC) makaihna tawh August 23, 2013 in USA gama kumpi phualpi zum omna ahi Washington DC ah Zomite in a nihveina Gullu Mual vai lungphona Sen Palai zum leh Kawlgam Palai zum maiah lungkimhuai takin nei thei uh hi.

                Hih hun pen Washington DC leh Zomi Innkuan Marylandte pangkhawmin na kisem hi a, Zomi Innkuan Maryland in lungphona huna kihel khempeuh tungah lungdam lahna in Voktal khat gawh uh hi.

                Hih hunah USA gam sunga mun tuamtuam - North Collina, Washington, Oregeon, OK City, Tulsa leh Ohio panin Zomite paikhawm uh hi.

PTC Mizoram : Paite Tribe Council (PTC) Mizoram makaite  August kha bul lamin India kumpi uliante mu dingin New Delhi ah zin uh a, New Delhi a taam sung un Dr. Manmohan Singh (Prime Minister), Pranab Mukherjee (President of India), Sonia Gandhi (UPA Chairperson), leh Rahul Gandhi (Congress Vice President) kiangah Autonomous District Council ngetna memorundum pia uh hi.

                Kumpi ulian tuamtuam bangzah hiam a kimuhpih ban uah, Information & Broadcasting Ministry ah zong All India Radio ah Paite programme neih ding ngetna zong pia uh cih thu kiza hi.

ZOLLS : Zomi Language and Literature Society (ZOLLS) saina in August 22 - 25, 2013 in Lamka Collge, Lamka, Zogam-ah ‘1st Zomi Language Data Collection Worshop’ om hi. Hih hunah ZOLLS, Zomi Youth Association (ZYA), Zomi Student Federation (ZSF), Zomi Human Right Front (ZHRF) makaite banah, Pu L.B Sona, Chairman, Zomi Council, Pu K. Guite, Advisor, ZRO & ZOLLS Consultant, M. Gouzamang Guite, E.M/ADCte leh Lamka khua sunga media tuamtuamte zong kihel uh a, Dr. B. Luaichinthang leh S. Dal Sian Paute in sinsak uh hi.

HPF-M : Hill Peoples’ Forum - Manipur (HPF-M) innteekna tawh August 19, 2013 in Rengkai Community Hall, Lamka-ah “One Day Political Awareness Programme” om hi. Hih hunah Dr. R. Sanga, Chairman, HPF-M in Manipur sunga hill district tuamtuam-ah zong district level committee phuhkhiat ding a kisapna thu gen hi.

                Pu L.B Sona, Spokesman in, Peoples Consultation Committee for Peace (PCCP) tawh kisai a pulakna-ah, hih pen United People’s Front (UPF) leh Kumpi kikal kihona a om theih nadinga kibawl ahihna thu gen a, mai lamah nakpi takin panlak ahih ding thu pulak hi.

                Resource Persons - Dr. John Pulamte leh Pu K. Guite in a genna uah, UPF in Autonomous Hill State a ngetna pen minam, pau le ham khentuam lo a Manipur sunga singtangmite huamkhin ahihna leh, state sunga demand tuamtuam omte lakah kingakna taak pen ahihna thu pulak uh a, a lawhcin nadingin panlak a poimawhna thu gen uh hi.

Zomi Company Thak : USA gam sung a Washington DC gei, Gaithersburg, Maryland a om Pu Thang Lian Pau in tunai-in Yangon khuapi ah “Zotaang Construction & Trading Co., Ltd” kici phuan a, Kawlgam khauhun kikhek tawh kizui-in Zomite in nasep pan thei ta ding ahih manin lungdamhuai hi.

                Hih company in Zogam leh gamdang-ah sumbawlna, import & export leh construction sem thei ding hi. Pu Paute in USA gamah mawtaw sawpna Ser Innpi leh Asian Market zong nei uh hi.

NECTAR : India gam sunga Mission nasepna lam tawh kisai kisinsakna ahi North East Centre for Training and Research (NECTAR) in August 30, 2013 in A 11-veina Cross-Cultural Missionary Training Class, Graduation Ceremony, Garo Baptist Church, Shillong ah zang uh a, Speaker in Rev. Aow Kong Yow, Pastor, SIM Asia Pacific Team pang cih thu kiza hi.

                  NECTAR kici pen Shillong, Meghalaya khuapi a om hi a, mission nasem dingte kisinkholhna ahi hi. NECTAR ah course/training nam thum om a, sangsia sem kawma missionary sem dingte sinsakna - English Teachers Training (kha 2), Missionary kuan nuamte kisinsakna - Cross Cultural Training (kha 4) leh Lai Siangtho a nei nai lo mite kiangah missionary sem dingte kisinkholhna - Bible Translation & Literacy Training (hun ciangtan om lo) course-te sin theih hi.

                India gam sung hi ta leh, leitung gam tuamtuam gammial nasem dingte adingin NECTAR panin kisinkholhna neih masak theih hi leh hoih mahmah ding hi. A kisapna leh manphatna thei-in, sum muhna kician a nei zong ahi lo NECTAR nasepna-ah ZBC in zong kum 2012 panin kha simin Rs.1,000 tawh mapang hi. 

                A kicingzaw a thei nuamte adingin Editor, ZBYF Tangko leh NECTAR Thuvanpi ahi Rev. S Neng Za Khup, Executive Director (Ph. 9436118829 leh email : nectartraining@gmail.com) ah hopih theih hi.

(ZBYF Tangko, September 2013)

SIAMSINNA LAMAH MAINAWT NI

SIAMSINNA LAMAH MAINAWT NI

Pilna i deih hiam? Thu theihna neih ding i lunggulh taktak hiam? Tuate hanga hamphatna leh meetna om dingte i deih taktak hiam? I deih taktak leh tuate ngah nadingin a lampi-a haksatnate i thuak ngam taktak hiam?

High School ka kah lai-un ka Sianu un mehzuak nupi khat in, “Na khasum uh tam mahmah hi lo hiam? Hih ka meh zuak maimai khawng hong leisak ta peuh in’ ci-in hong kun a, ahi zongin ka lungsim-ah, ‘no nuam taka ihmu a, na vaak hialhial lai-un, ko bel mittui luang liangin lai ka sim manun khasum a ngah thei hi ung’ ci-in ka ngaihsun hi” hong ci ngei a, ka ngaihsutna sausak mahmah hi.

Mi pawlkhat in bel, khasum tampi a sangte khawng mawk en-in, haza pong mawk thei uh a, tua bang a khasum tampi leh pilna-siamna a neih nading uh-a a thuakna uh a theihpih nuam vet lo om hi. I gennop bang hiam? Pilna-siamna, khasum tampi i deih leh tua i ngah nadingin i hanciamna leh i thuakna kisam mahmah, cih ahi hi.

Mizogam sungah kum simin Tan 10 (HSLC) zo thak –  12,000 val, Tan 12 (HSSLC) zo thak – 10,000 val, B.A zo thak – 3,000 val, M.A zo thak 500 val bang om den a, ANM, GNM, B Sc (N), MBBS leh Engineer zo thak – 500 val om den dinga tuat ahi hi.

Kum 2011 Kisimpina panin Mizogam sungah khua 830 om a, tuate lak panin a mipi tam dan panin laisiam tuat hi lehang, I dinmun niam mahmah ding hi. Bang hang hiam cih leh, M.A., B.A., Tan 12 gen loh, Tan 10 zong a pass omloh hun bang om mawk hi. A zumhuai lamin ngaihsun leng zumhuai mahmah a, a khasiathuai lamin ngaihsun leng khasiat huai mahmah hi. Ahi zongin i hatlohna thu i theihna pen i hat nadingin zang siam leng hoih mahmah ding hi.

Oct. 2, 2013 in Champhai khua-a Khuado Pawi a kizatna hunah zinmang (chief guest) Pu T. T Zothansanga in, “Pilna na neih kei uh leh (Zomite’n) cik mah ciangin mi baanin khangto ngei lo ding hi uh teh; pilna na neih nading un laisimna mah hahkat un. Na minam ngeina leh pau le hamte kembit un, kepbit taak om lai hi. Minam mangthang hih ding lauhuai hi; tua dingin zong pilna mah tawh kem un” ciin deihsak takin hong vaikhak hi.

Pilna-siamna i neih kei leh mi nuaiah ki-omden ding a, sila lungsim kipua den ding hi. Kihangsan thei loin, na khempeuh-ah launa tawh kidim tawntung ding hi hang. I minam ngeina leh pau le ham, zia le tong kembit dingin zong pilna mah kisam a, nek le taak zonna, khua sung nuntakzia nop nadingin zong pilna mah i kisam hi.

Khantoh ut mahmah napi’n i khantoh theihlohna, a veite in zong na hoih taka a sep theihloh nading zah donga mial i hi hiam? cih ngaihsuthuai a, lam maan totpih theihloh ding zah donga thu hoih a thei-thei mahmah lo tam lua i hi mai tam? cih bang ngaihsutna-ah om hi. Tuate khempeuh a ven theih nadingin pilna-siamna kisam a, tua dingin siamsinna lam mah i hahkat ni.

(Vapar Weekly Newspaper adinga ka gelh ahi hi)