My Best Christmas Ever!

My Best Christmas Ever!

Sawm kholh luatna zong om loin, inn lam lah kiciah zo lo ahih ciang ciin Mysuru (a min masa Mysore) lamah pai theihna ding lampi YWAM a sem sanggamnu Kimno in hong gen ciang, amah a om sunga va phak zong hoihsakna tawh va pai-in, sawm kholh luatna om lo mahin Lungdambawl bang ka innkuan un ka va zang suak uh hi.

Nidang lai a Mikang kumpi in India gamah vai a hawm ma, Vijayanagar Empire kici, kumpi gam thupi khat ii khuapi Mysuru pen khuapi nuam mahmah khat hi a, nidang lai a kumpite in a lam uh kumpi inn thupi bangzah hiam omte, sahuan (zoo) lianpi - sa nam khempeuh phial omna, paak huan leh bual (lake) bangzah hiam pansana tawldamna ding kibawlte bang zong Mysuru a nuamsak leh mite in tua khua a phaknopna hang thupite hi kha ding a, tuate Dec. 23 leh 24 sungin pawlkhat ka pha uh hi.

Kum 2011 kisimpina (census) ah Khristian 2.71% bek a omna hih khuapi-ah Lungdambawl ni zingin ka tunna YWAM kici, Khristiante nasep/mapanna khat kiang a kimawlna tualpi-ah Nipini ahih hang hiam kumpi zum khakni ahih hang hiam a nidang sanga kimawl ding a tamzawkna hang-a a thawm uh ngaihzawk cihloh, Lungdambawl tawh kisai a kiginna leh kilamdanna muh ding om lo hi.

YWAM a nasemte lakah a tamzaw inn lamah ciah uh ahih manin a om lai mi thum, YWAM a sem mah innkuan khat, a gammite thum, leh ko innkuan in biakpiakna hun tom khat zangin, tua khit ciang theitui leh moh nekhawmin Lungdambawl a zangkhawm ka hi mai uh hi.

YWAM a sem innkuan a om, Pa Simeon in giahna ding a nei lo, lam gei peuha a giak ziau mite adingin puanza, moh leh theitui a leina uh leh, a pia (donate) zong a omna thu hong hilhin, leh tuate hawm dingin zan masa (Dec 24 zan) in hong zawn himah leh, bang hiam lemtanlohna hangin Lungdambawl zan a hawm ding ahihna hong hilh kik hi.

Amau nasepna mawtaw Van zangin, a lawmte nih tawh zanpuan/puanza, moh, leh theitui bangzah hiam pua-in zan nai sawm-le-khat kiimin ka paikhia uh a, lampi-ah thungetna nei-in, giahna ding nei lo, lampi gei peuh a lumte zongin ka tai kawikawi uh hi.

Ka upmawhna sangin Mysuru khuapi-ah tua bang mite na tam lua lo hi. Ka muh sunsunte uh puanza silhsakin, moh leh theitui ka piak ban uah, 'Merry Christmas' ciin deihsakna paihin, ka paisan zel uh hi. Midang, a kim a kianga omte in bang hih sawm ka hi uh hiam cih hong en gega-in, pawlkhat in dotna pawlkhat bang hong dong gaga uh hi.

Hih hunah van ka piakte lak uah lamdang a sa leh a lungdam mahmah banah, van pia ding ka hihna uh thei lo a kitom ek bang zong om hi. Khatpa bang lawmte khat in a ihmu lai puan va silhsak a sawm leh a khe tawh lawmpa tuan vat mawk a, kigamla pian uh ahih manin bangmah ci lo bilbel hi. Piak veve ding maw piakloh ding cih ngaihsunin, aman zong hong en gega ahih manin buaina a pian sangin ciin ka paisan mai uh hi.

Pawlkhat, a tamzaw in bel lamdang sa-in, 'Khrismas letsong' cih ka gen uh ciang theisiam pah uh a, a mel uh panin a lungdamzia uh kimu thei pah hi. Moh leh theituite hong pahin, lungdam taka puan a silh leh vante a nek uh muh bel, lungkimhuai mahmah ka sa a, cimul bang tho thei zawzen hi. Lawmte in zong tua bang a muh uh, a lungdamna thu uh gen belin nei uh hi.

Lam kiang, daai kawma lumte banah ka lungsim hong khoih mahmah, khe langkhat nei nawn lo, ciangkhut nih tawh khualai a vak, gim mahmah cih a mel pana kithei, khua-ul in a mai a buak, lampi geia omte ka piak uh a muh cianga lamen a ka paina mawtaw uh hong zuan, ka tutna kongkhak lamah mawtaw in a phut khak ding zong lau lo phial a, ka paisan ding uh lau a kin le buang a hong pai, puanza, moh leh theitui ka piak zawh ciang-a a lungdam mel ka muh ciang, ka cimul tho-in, ka mitkhitui luang dek zawzen hi (tudong ka mitkha ah thaam zo lai hi).

Lai Siangtho in na hoih sep pen a diakin i thu-uppih mite tungah bawl dingin hong hilh (Gal. 6:10) laitakin, Jesu mahmah in zong huh ding a nei lo, mi gentheite huh ding a thupina (Mat. 25:31ff) gen a, upna sunga i sanggamte kiang, i pawlpi, i mi i sa, a kisamte kiang leh, a kisam, huh ding a nei lo a gentheizaw leh meigong-tagahte nangawn zong huh ding Lai Siangtho hong hilh pen thupingaihsuthuai mahmah hi. Khristian biakna pawlpi sung khawngah kum tawnin i hih thei bangbangin i hanciam laitakin, hih bang Lungdambawl hun bangah a kisam mahmah, kuama phawk phakloh mite adingin zong kalsuan ding thupi mahmah hi.

Kei bel hih ka vakna uh tawh kisai bangmahpi ka sep om lo a, piakkhiat zong nei lo, a zui mawkmawk ka lel hi. Kei piak bangmah a omlohna pen ka lungsim a omte suakta taka ka pulak theihna hi kik bilbel hi. Hih bangin ei Khristian pawlpite in zong pawlpi huang pua lamah kalsuan ciat thei leng thupi-in manpha zen sin teh, ciin ka ngaihsun hi.

Pasian hehpihna, a Tapa Jesu Khris hang beka hih Mysuru tung a, mun tuamtuam pha thei ka hihna uh, nidang bang a Ama hong pianhun Lungdambawl zatkhop ngeingai theilohna a ka omna hang a Lungdambawl a thupina ka ngaihsut thakthakna, thukkik ding lametna om het lo-a a kisam mahmah mite tungah piakkhiatna piakna hunah ka kihelna tungtawna ka lungdamna leh ngaihsutna thak ka ngahnate ka ngaihsut ciang, nidang bang a Lungdambawl an nekkhop leh kikhopna-ah ka kihelloh hangin tukum Lungdambawl pen kei adingin manpha ka sa a, tua ahih manin 'My Best Christmas Ever' ci lo thei ka hi kei...

Daihna Cabin||26122016

Jesu Khris - Lungdamna maw lungkhamna

Jesu Khris - Lungdamna maw lungkhamna

Kamsang Isaiah in hong piang ding naungek Jesu pen 'Lamdang Thulakpa, Vanglian Pasian, Tawntung Pa, leh Nopsakna Kumpi' ahihna na gen a, Jesu mahmah in zong, 'mite in ama na a sepsak ding hi loin, ama'n midangte na sepsak ding a hong pai' ahihna thu na gen hi. A lang lamah, 'Nopsakna Kumpi' a kicih laitakin, Jesu mah in, 'Kilemna a piangsak ding a hong pai hi loin, buaina leh haksatna a piangsak, namsau a leengsak ding a hong pai' ahihna thu na gen hi.

Hih thute i ngaihsut ciang, Lungdambawl ciin Pa Pasian in hong itna hang a hong piak Topa Jesu Khris suah hun thupi mahmah a i bawl/zat laitakin, Jesu hong paina hang i ngaihsun takpi mah hiam, cih pen ngaihsut ding a thupi mahmah ahi hi.

 

Pasian kimlai, leitungah mawhnei mihing bang a hong pai, haksatna, gimna, lungkhamna, cilphihna, bawlsiatna leh singlamteh tungah khetcip a om a, a thuaknate pen amah a um, amau adingin a si hi cih a um mite adingin, 'Vanglian Pasian, Nopsakna Kumpi, Tawntung Pa' ahihna a bucinna hi a, tua bang a upna a nei (ding) mite ading a hong pai, na hong sem, hong thuak ahi hi. Tuaci bang mi, innkuan, khua, gam adingin Jesu Khris pen 'Nopsakna Kumpi, Tawntung Pa' tawntung a nuntakna leh nopsakna a pia ahi hi.

Ahi zongin a langlamah, tua 'Nopsakna leh Tawntung Pa' pen innkuan, khua, gam sungah namsau a lengsak, haksatna a piangsak, kilemlohna leh buaina tampi a kipatna zong hi thei hi. Innkuan sung dinmun pan en lehang, Jesu Khris upna a nei a omna hang a nei leh nei lo kikalah buaina leh haksatna tampi om thei hi. I muh leh zaak thu tampi panin Jesu pen innkuan kilemlohna a piangsak ahihna kimu thei a, ahi zongin tua kilemlohna pen thuhoih ahi hi. Tawntung sihna, gimthuakna muna innkuana 'kithutuak leh kilem' taka paikhop diam sangin amah a um mite hang a innkuan kilem lo a om Pasian in phamawh sa lo hi. Hotkhiatna, Jesu Khris upna pen mimal vai ahih manin innkuan sungah zong mimal kimin Jesu Khris, Honpa leh Topa a saan kim Pasian deihna hi mah ta leh, vekpi a saang thei lo innkuan a om ding theikhol ahih manin innkuan sungah namsau leengsak ding, ciin a gen hi kha ding hi.

Tua ahih manin leitung mite ading a hong kipia, piakkhiatna teng pana lianpen, Tapa Jesu Khris pen mi pawlkhat adingin nopsakna, kiit-kilemna, daihna, lungnopna, leh lungdamna ahih laitakin, pawlkhat adingin innkuan a buaisak, kilemlohna leh haksatna a piangsak hi ding hi.

Amah a um, a nei mite lakah zong, buaina leh haksatna om nawn lo ding kici thei lo lai hi. Bang hang hiam cih leh i teenna pen 'leitung thak' hi nai lo mawk a, i teenkhoppih mi tampi in tua i neih Jesu Khris na nei (nai) lo uh hi. Tua hangin Jesu Khris a nei, a um mite in zong haksatna kituak veve a, a um lo mite sangin peuh nasia zaw thei hi. Ahi zongin tua bang hun ciang Jesu a nei mite ngaihsutna leh thuakdan bel aneilote tawh kilamdang mahmah hi.

Innkuan sung, nupa sung, khua sung, pawlpi sung khawngah namsau zah a thubuaihuai leh thu hoih lo a leenna khawngpen mawhna hang a si ding eite honkhia ding a hong pai Jesu Khris i saan kimloh man zong hi thei a, i saan, i upna hang-a a um lo, a saang lo mite kiang pan i ngah haksatna leh buaina hang zong hi thei hi.

Tua ahih manin, hih leitung nuntakna-ah na tuahkhak lungdamna pen Jesu Khris na neihna hang a na ngah ahih ding thupi a, tua bang mahin, bawlsiatna, panpihna, pampaihna leh haksatna na thuakpen Jesu Khris na neihna hang ahih naak leh tua sanga thupizaw om lo hi. Thaman pen leitungah na ngah kei phial zong Pasian in nang adingin hong koihsak hi. Tua hi lo a, Jesu Khris nei lo a lungdam mahmah kisa na hih leh tua pen sauvei het lo ding a, Jesu nei lo a lungkhamna, bawlsiatna thuak na hih lailai leh bel leitung ah zong thuak, tua sang a nasiazawin tawntung meilipi sungah thuak ding hi lailai...

Kum bangzah Khrismas zangta, cih sangin tua hong piang, eite mawhna hang a singlamteh tunga kikilh, kiphum a sihna zoin ni thum ni a thokik Jesu Khris pen Honpa leh Topa a san ding thupizaw hi.

Na lungdamna leh na lungkhamnate Jesu Khris na upna hang maw na uplohna hang? Jesu Khris na neihna hang a lungdamna a nei ding leh Jesu Khris hang-a a nei lo mite pana haksatna omte thuakzo dingin, eite mawhna hang a hong kipia, piakkhiatna lianpen Tapa Jesu Khris minin 'Lungdambawl deihsakna' kong gelh hi.

Daihna Cabin || 25122016

TUNI THUSUAK...

TUNI THUSUAK...

It cihtaka hong it Pasian, Pa a neihkhak mahmah hampha ka kisa a, ka lungdam.

Zi leh pasal nei, ta neikhinte adingin tate tawh kizopna leh tate itdan panin Pasian in a tate hong itdan thupizia bangzah hiam kithei thei ding hi; keima nuntakna panin a bucinloh hang ka phawk bangzah hiam om a, tua sanga lianzaw pekin Pasian in a tate hong it ci leng... Nak thupi zen si...

Pate in a tate uh deihna bekbek pia, leisak, sepsak het lo uh (hauhdan dik meel lo a haute in bel hih mai thei) a, ahi zongin pate in a tate uh adingin a piak, a sepsak, leh a vaihawmsak ciangin a tate hoih leh phatuam ding ngaihsun masazaw uh hi. Pasian zong na khempeuh tung a vaihawm, na khempeuh hih thei ahih hangin a tate deih, kisap leh lungulh khempeuh pia pahpah het lo hi. Ahi zongin, a tate kisap a hun zuiin, a kisapna bang zelin, a tate hoihzawkna dingin a vaihawm na hi gige hi.

Mihing hoihna, pilna, siamna, na hoih sep zawhna hang a hong it a, cidamna leh thupha tuamtuam hong pia ding hi leh tu a nang leh kei dinmun pen i ngah ding haksa inteh... Ahi zong mihing lam pan hi loin Amah Pasian hoihna leh a tate hong itna hangin tu dinmun a tung thei kihi zaw hi.

Mite lamet bang a nungta zo loin, hawmthawhna, langbawlna, kona, haksatna tuamtuam (innkuan sung na leng pan zong) om phial mah leh, lungkia loin, mainawtin kalsuan ni... A mite, a tate a nusia lo vanglian Pasian, tua nate khempeuh tunga thunei Pa in it cihtakin hong it hi...

Tua ahih manin, Sia Do Khup’ la tawh khup leng....

"Aw hong zui ning maw, lampi haksa mah leh,

Dawimangpa in ka lampi hong khak mah leh;

Aw hong zui ning maw Singlamteh pua-in,

Na paina mun peuhah hong zui ning maw."

Daihna Cabin || 30112016

Kingaklah Lua Kha Zel

Kingaklah Lua Kha Zel

Kingaklah lua kha zel ahih manin kikhial thei a, haksatna tampi peuh kibehlapsak thei mawk hi. Ngaklahloh ding peuh kingaklah kha ahih manin supna tampi piangsak zawsop hi.

I nuntakna-ah, i ngak zawhlohna hang a haksatna leh kisiik kik ding na i sep, kam i pau, kal i suanna tampi om a, i ngaklahluatna hang a meetna sangin, ngaklahluatna hang a supna tampi kingah thei zawsop hi. Ahi zongin, ngaklah lua lo ding cih hangin sepna khatpeuh ah ziakai den ding cihna bel hi lo hi!

Mihing i nuntakna-ah a masa leh a nunung ding, a kisam masa, sep masak leh nunun ding om ciat hi. Ngaklah luatna hang-a a masa ding i nunun khak a, a nunung ding i masak khak leh, nuntakna pen a hoih lam sangin a buaihuai lam tun zaw a, a kisam masa leh a nunung ding khensiam sanga kisam zaw om lo hi.

I Khristian nuntakna zong ngaklah luatna in nakpi takin hong bahsak thei hi. Thu livei-ngavei ngen in thupha a lamdang taka ngah sawm, Nipini nihvei-thumvei kikhawm in a hoihpen dana kingaihsun pah... A gah lawh pah sawm a, tua bang a om pahloh ciang a lungkia...cih bang zong om thei hi.

Pasian thu hi ta leh, leitung thu a mi lawhcing a kigente nuntakna hoih tak i et ciangin mi citak leh lungduai, ngaklah lua lo a hanciam a, haksatna tampi kawmkalah zong muanhuai taka a sep ding uh a semte ahi uh hi. Ngaklah lua pah bubu loin, haksatna, bawlsiatna, lungkiatna, gim le tawlna, lawhsapna leh gentheihna tampi palsuak a lawhcingte ahi uh hi.

Hauh khawng, pil khawng, pahtak khawng, siam khawng, leh mi thupi hih khawng ut lua a, ngaklahluatna in thu hoih lo leh dik lo tawh kalsuanna piangsakin, mindaina leh maizumna peuh piangsak zawsop thei hi. Bang hang hiam cih leh na manpha taktakte pen baih taka ngah pah ziau theih hi khol lo hi.

Pawlpi sung, innkuan sung, khua sung khawngah zong gaklahluatna hang a supna tampi om thei hi. Mi nuntakzia, mi kalsuanzia, kum tampi, khang tampi pana a ngah uh hamphatna, vaang leh thuphate bang, amau bang tektek a neih/ngah sawm pah ding ahi lo bang zong om hi.

Nungak-tangval hihna ah, zi le pasal zonna-ah, ngaklah luat hang a buaina lianpi piang thei hi. A hun cing nai lopi a mawk gamtatna, ngaklahluatna hangin mai lam saupi siasak thei nate pan kidophuai mahmah hi. Midangte in mibang lo leh mi ngeina lo bang phial a hong ngaihsut uh hang phamawhsakloh hun bang zong a om kisam a, haksatna a om phial zong, ngakzawhna hang a lungdamna lianzaw a omna munah lungduai taka ngak zawh ding thupi hi.

Na lunggulh zah na mu kei a, na ngah kei a, na thalawh pah kei phial zong, ngak in! A dik, a hoih, a manpha ahih nak leh a hun a tun ciangin na ngakzawhna hangin lungdamna ngahin, a manphatna phawk veve ding hi teh.

Na Khristian nuntakna, nu leh pa na hihna, nungak-tangval nuntakna leh zi le pasal zonna-ah, leh hihna leh kalsuanna khatpeuhah ngaklahluatna hang a supna leh haksatna pelh theih ding tampi om hi; lungduai tak leh citak taka ngakzawh kisin peuhmah phot in...

23122016