REV. KAI CIN MANG TAWH KIHOLIMNA

BOM Founder & President

REV. KAI CIN MANG TAWH KIHOLIMNA

Zosuan Tuailai Khawmpi zanga Tedim khua-ah ka om sung, June 7, 2013 zingsangin Tedim khua sunga tagah leh mi gentheite a khual, itna tak tawh a kem Rev. Kai Cin Mang, Founder & President, Bethesda Orphanage Ministry (BOM) tawh kiholimna hun nuam tak, Upa T. Thang leh Upa Nang Sian Mung’ kithuahpihna tawh nei thei ka hih manin lungdam ing (Sawm = T. Sawm Lian, Rev. Mang = Rev. Kai Cin Mang).

Sawm          :   Hih banga kiholim nading hun hoih nong bawlsak manin lungdam. Amasa in na nu leh pa min, zi le ta leh hih mun na tun dan uh nong gen thei diam?

Rev. Mang      :   Kei zong lungdam ing. Ka pa pen Kai Khan Dal (Thawmte beh) hi a, ka nu pen Man Ngaih Niang hi. Kum 1956 September 25 in suakin, kum 1958 in Tedim khua ka tung uh hi. Ka zi pen Pa Gin Khup leh Nu Niang Za Vungte tanu, Dim Sian Ngai hi a, kum 1987 in kiteng ung.

Sawm                :   Na sangkahna tawh kisai nong hilh thei diam?

Rev. Mang      :  Tedim sangpi-ah tan lang pan tan sawm ciang ka kah hi.  Kum 1975 in galkap ah lutin kum 1977 in ka khawlkik hi. Kum 1985 in piangthakin, 1986 in Faith Baptist Bible College (FFBC) ah Lai Siangtho sang ka kah hi. Ko pen a first batch hi ung. Ka sangkah lai, a kum nihna (1987) ciang zi ka nei a, 1991 kumin B.A. B.S ka ngah hi. Tua banah kum 2011 in M. Min zong ka ngah hi.

Sawm                :   Na lai sim sungin haksa na sak pen bang hiam?

Rev. Mang      :   Kei pen pu le pa ngeina tawh a khangkhia ka hi a, dawi kithoihna innkuan pana khangkhia ka hi hi. Ka pianthak ma-in Tedim kualah lawki makai sem den ka hih manin leh unau lakah upen ka hih manin ka pianthak ciangin haksatna tampi om a, ka nu leh ka pa lungkim thei vet lo uh hi. Hong gen sau pak leng, ka nu leh pate pen Mizogamah a om lai-un Tapidaw ngeina zong a theisa ahi uh hi. Ahi zongin limsang (hlimsang) kici pawl a muh uh ciangin tapidaw hih pen ut ngiat lo uh a, lipkhap uh hi.

                                                Tua bang innkuan sung pana khangkhia ka hih manin, ka pianthak ciangin Pasian nasep ding bek utin ka nei hi. Siamna nei lopi-in Pasian na ka sep suak ding ka lungkim zo lo ahih manin Lai Siangtho ka sin a, tua munah zong haksatna tampi om hi. Siate in Lai Siangtho hong piak khawng uh pen inn sungah ka lutpih ciangin ka pa in thei lianlian a, inn sungah zong tawi ngam loin, dai peuhah ka selsim hi.

                                                Ka gensa mah bangin, ka pianthak ciangin FFBC ah sang ka kah ciangin, zingsang pai baih kul a, nitak cih hak kul hi. Zing ann pen ka pai hun ding ciangin min man lo den a, ka cih ciangin zong annkhing om nawn lo den phial hi.  Tua banga ka hatsatna thu Sia Do Suan Mung in thei ahih manin hehpihna tawh piada zatin hong zangin, hong huhna hang tawh kum 4 ciangin degree ka ngah hi. Tua banah ka laisim sungin Tedim EBC numei hanciam pawlin laikung laidal hong sikh uh ahih manin lungdam ing.

                                                Ka gennop lianpi-ah, Pasian lamah nakpi takin pan la-in, na i sep ciangin i lang lamah pang dingin satan in i nu leh pa, innkuanpihte peuh hong zang hi. Tua pen haksa sa mahmah ing.

Sawm                :   Aw, thupi ei. Ahih leh na nu leh na pate in tuazah ta in tapidaw na suah ding hong do uh ci leng, amau a nuntak sungun a piangthak man uh hiam?

Rev. Mang      : Ka nu leh pate in tua banga tapidaw ka suah ding hong nak dal mahmah uh hangin, amau dam sungin piangthak in tapidaw suak uh ahih manin ka lungdam hi.

Sawm                :   Ahih leh, hih BOM hong kipatkhiatzia leh hih tawh kisai tom kim cingin nong gen thei diam?

Rev. Mang      :   BOM  pen kum 1996 Jan 14 in a thu-in kipan photin, signboard suangin apna nei ung. Ko nupa pen Myomah ah sai bawlin, tua munah ka teeng pah uh hi. Ka inn sap uh pen neu lua mahmah ahih manin ka lupna uh leh sai kizom pah hi. Kha khat khit ciangin naupang khat hong kipia a, tua ka omna uh inn pen neu lua mahmah ahih manin inn sap ding dang zongin, inn khat ka mu uh a, a sap hong la loin a khawnkhongin hong omsak lai uh ahih manin lungdam mahmah ung.

                                                Pasian in hong it ding mi hong pia a, sawt loin Nu Buah in Sakollam vengah inn hong leisakin, tua inn pen Siapi Vul Cin Thang in NGO huhna tawh hong puahsak hi. Kum 2000 panin tu-a i omna mun pen lei kipan a, innmun 50 bang kilei (mi hong pia zong om) a, 15 Hectare a zai hi. Mai lamah Pasian in pha a sak leh lei beh lai dingin ngaihsun ing.

                                                Genthei tagah, a kem a don ding om lo, huh leh panpih a kisam, Jesu in zong a it mahmah naupangte in Pasian itna a theih nading leh, Pasian deihna banga guihtheih-khamtheih a zat khakloh nading uh leh, nuntak-khuasuak nading siamna khatpeuh a neihzawh nading uha pattah pen hih BOM ngimna bulpi ahi hi.

Sawm                :   Naupang tawh kisai-in, deihsak tuam (priority) om maw, ahih kei leh hong kipia peuhpeuh sang lel? Nangpang bangzah om thei ding cih ciangtan a om hiam?

Rev. Mang      :   Hih muna om dingin naupang pen a kideih tuam om mah. 1) Nu leh pa nei lo, a kem a vaak om lote  2) Nu nei lote  3) Pa nei lote  4) Nu leh pa nei napi, a nu leh pate in kem zo lo a, hong apte uh cih bang hi.  A kipat cilin Pasian nasem tate zong kikoih hi.

                                                Naupang pen kum 5 – 12 kikal kila a, amau a ut sung uh, amau le amau kivak thei dinga a picin ciang uh kikem nuam hi. College a kah uh leh zong sum le pai bei teng sikhsak ding; tu banah siamna tuamtuam a ngah theih nading un hanciam pih ding a sawm hi ung.

                                                Naupang om ding zah tawh kizui-in ciangtan om kei. Ei kep dinga kilawm hong pai leh, tua pen Pasian in ama kivak nading leh a kisam tuamtuam tawh hong sulzuih ding hi, cih upna tawh kal a kisuan hi.

Sawm                :   BOM in haksatna a tuakte nong gen thei diam?

Rev. Mang      :   Haksatna bel tam mahmah cih ding hi. Tuate lak panin – Naupang, kep ding a hong kipiate pen, sangkhak khawng ciangin leh, nasem silbawl thei ahih uh ciangin a tha uh iplahin hong la om thei a, lo kho ding, singpua ding, leiseek bawl a Tonsim kiim a sum thalawh ding peuh in deih uh ahih manin, tua pen hoih ka sa het kei uh hi. Bang hang hiam cih leh, hih munah picing lian nai lo uh ahih manin, a paikhiat uh ciangin sum le pai zeekin, suakta lua uh ahih manin zangkhial thei uh hi.

                                                Nu leh pa pawlkhat in na sem sak lo, ann huan, lo khoh zong siam lo ciin hong gensia pawl om, na semsak leng, na limsepsak lua a ci pawl zong om. Tua manin a tawlhuai lua lo nasep tuamtuam sep kisinsakin, a picingzaw deuh khat leh a neu khat ka kithuahsak zel uh hi. Ahih hangin ka huan khawh ding khawng uh pen naupangte semsak loin midang ka cial zel uh hi.

                                                Tua banah, sum le pai leh a mi mahmah-ah haksatna tampi om hi. Huhna ngah ding baih lo a, sai pana kimu tawmte khawng tawh kal kisuan ahih manin nek ding neihloh dekdek hun bang om hi. Ahi zongin a lungdamhuaiah, mite in hong hehpihin, a vante uh a ba in hong pia zel uh ahih manin lungdam ung.

Sawm                :   Tulaitaka BOM in a kisap lianpen a na ngaihsut bang hiam?

Rev. Mang      :   Kisap tampi lakah, naupangte limtaka lai a hilh thei ding om leh tua kisam sa pen ing. Kumpite khasum hong khan ciangin, mi hoih ngah ding baih lo a, a khasum lah kumpite aa zah kipia zo lo ahih manin mi hoihte in hih muna sep ding iplah lo uh hi. A kipia zo mi bang omin, naupangte itna tak tawh, sum le pai lametna sangin itna a bulphuh om leh, tua banah khut siamna leh siamna tuamtuam tawh naupangte a sinsak ngiat ding om leh tua kisam sa pen ing.

Sawm                :   Ahih leh, hih BOM ii mailam kalsuan zia ding bang geelna om hiam?

Rev. Mang      :   Ko lam panin tuaci bangin pai ni, ciin geelkholh luatna zong om kei. Pasian hong makaihna bangbang a pai ding hi mai hi. Pasian tungah kinga in, pilna lam leh khutsiam lam sina mai lamah kinei thei leh lunggulhna bel om hi. Bangbang ahi zongin Pasian bek mah muan leh kingakna bel in nei ung.

Sawm                :   Huhna lam tawh kisai-in, gamdang panin huhna ngah maw, bangci bangin mi hizawh nek le dawn, silh le ten ding vaihawm?

Rev. Mang      :   UK gama Kids Alive kicite in kum 13 sung hong huh uh hi. Ahih zongin amau geelna leh kei veina kituak lo ahih manin kum 2010 panin kizopna ka nei nawn kei uh hi. Tua hi a, tu dinmunah, Myomah ah sai neu khat ka neih uh pan leh, mi kiphalte in Pasian a itna uh hanga hong piakkhopte tawh a kikalsuan hi. Pongman (regular) taka huhna pen a om lo hi mai hi.

Sawm                :   Aw, tua bang hi mawk ahih manin haksat hun tamzaw ding cihna hi maw? Na genna panin, Kids Alivete tawh na sepkhop nawn lohna, ‘amau deihna leh ka veina kituak lo’ na cih pen nong gencian thei diam?

Rev. Mang      :   Amau (Kids Alive)te deihna pen, naupang kepte pen siangtho ding, cidam ding, pil ding cih ahi hi. Naupang cidam lo, lungsim hat lo cihte pen sang lo uh hi. Tua banah, kei pen Tedim khua leh a kiim a amau tawh a kizom khempeuh a vil (supervise) dingin hong koih ding, khua sungah zum khat hongin tua muhah hong sepsak sawm uh a, hih munah nasem midang koih ding uh hi. Amau deihna-ah, naupang cidam lote pen tuam koih ding, ann tuam neksak ding cih bang ahi hi.

                                                Tua bang geelna om ahih manin kei veina, naupang nu leh pa nei lo, a cidam lo ahi zongin, a lungsim uh a hat kei zongin tuate khualna tawh a kipan ka hi a, tua ka veina tawh kituak lo ahih manin, amau sanga lianzaw Pasian muanna bek tawh, hong huhna uh leh panpihna pen sang nawn loin, kizopnawnloh ding ka khentat hi.

Sawm                :   Huhna tawh kisai-in mi pawlkhat pen kuama huh ding a deih ngiat lo om hi. Huhna tawh kisai-in nang ngaihsutna nong gen thei diam?

Rev. Mang      :   I gensa mah bangin, regular takin huhna pen kingah lo hi. Ahi zongin Pasian in a mite zangin tu ciang ann ngawl loin hong koih hi. Ni simin nek le dawnah Ks. 15,000 – 20,000 (sa ne loin) bang kibei den a, Nipi ni simin sa mehsak den ding ka hanciam uh hi. Sangnaupangte uniform, boat, pencil, exercise book cih bang kisam den hi. Ei kianga omte pen mite lakah a hoih lo pen a silh a ten uh a, mite in a simawh ding kilau ahih manin a hoih theithei kiguan nuam lai hi.

                                                Huhna tawh kisai-in, Pasian in a mite zangin hong huh nop leh tua pen san dingin ngaihsun ing. Ko adingin ci leng, ko nupa bek adingin sum le pai zong kisam lua lo ci mai ni. Ka gil uh pana piang ta zong ka nei kei uh hi. Tua hi a, ko ading hi peuhmah lo, hih naupangte a huh nuam a om leh lungdam takin san dingin ngaihsun ing.

                                                Haksat luat ciangin maingap pawkhat tungah huhna ka nget hun zong om hi. Ahi zongin tuate pen naupangte ading vive ahi hi. Ken mi tungah huhna ka nget ciangin, keima pumpi ading peuhmahin ka ngen ngei kei hi. Tua hangin zong mite in hong theisiamin, hong hehpih uh hi-in thei ing.

Sawm                :   Naupang tawh kisai, tu laitak bangzah om a, bang kumin tampen hiam? Tua ciang a sponsor nuam om leh tua lam bangci ngaihsut ding?

Rev. Mang      :   Tu laitakin naupang 32 om a, a tampen kum, 2005 in naupang 87 om hi. Nidangin naupang pawlkhat a sponsor om hi. Ahi zongin tua bang tata khawng a gina loin hong pang thei uh hi. Tua bang hun ciangin a sponsorte tungah gen ding tam lo a, nuam het lo hi. Tua ahih manin a neu laiin kiminvawh kei hen la, tan 10 a zawh uh ciang sivuan, siamah sin ding khawng ahih uh ciangin min vawh nuam tentan a om leh kivawh pan leh hoih dingin ngaihsun ing.

Sawm                :   Nangma nungah hih BOM a vaisai ding mi pattah na nei hiam?

Rev. Mang      :   Ko sung pana piang ta pen om lo ahih manin hih dotna pen mi tampi in zong hong dong hi. Ke’n ka ngaihsutna-ah, hih pen meltheih u le nau, lawm le gual, pawlpite tawh a kivaihawm hi lo a, ko nupa veina tawh a kisemkhia ahih manin, bul hong patpih Pasian in hong nusia lo ding hi, cih upna nei ing. Mi pattah cih pen, i pattah tata khawng sia nuam un zawmah lai uh. Tua ahih manin, a kisap hun ciangin Pasian in hong vaihawmsak ding hi, cih upna ka nei uh hi.

Sawm                :   Lutolte kianga naupang omte tawh kisai na ngaihsutna tom cikin nong gen thei diam?

Rev. Mang      :   Ei Tapidawte lak sangin, lutolte lakah naupang a tamzawk pen na sa ing. Lutolte kiangah a koih uh ciangin, a innkuanpihte in satpiang peuh, anntang peuh ngah lawh uh a, tuate lametna hang bekbek tawh lutolte kiangah a koih om mawk hi. Mai lamah tua munah a koihna uh hangin, a tate un bang lungsim hong nei ding cih pen ngaihsuthuai ka sa a, na ka sa mahmah hi.

Sawm                :   A tawpna penpen dingin, hih BOM hangin lungdamna tampi na ngah ding lamen ing; tua laka tawmkhat nong gen thei diam?

Rev. Mang      :   Veina tawh kisem ahih manin, mi adingin a haksa zongin lungdamna lianpipi pen ngah ung. Naupangte lakah Lai Siangtho sangah B. Th. a zosa 10 val omta a, Siamah (GNM) a zosa khat omin, a sin laitak khat mah om hi. Tomcik ka behlapnopin, hih pilna siamna sinte a sinkhit uh ciangin lamet kikna bangmah om lo hi. Amau kisam a sak uh a, hong etkik uh leh lungdam takin kisang hi.

                                                Tua banah, hih BOM a kipatcil kum 1996 a kipan, hih mun panin misi khat zong kivui nai lo ahih manin, Pasian in hong kepna pen thupi ka sa a, lamdang zong ka sa hi. A tawpna pen dingin, hih ciang hong makaih Pasian tungah leh, itna leh lainatna tawh sum le pai leh thungetna tawh hong panpih tawntung mite tungah lungdam ka ko hi.

Address :

                            Rev. Kai Cin Mang B.A.B.S., B.C Min, M. Min

                            Founder & President

                            Bethesda Orphanage Ministry (BOM)

                            5/285

                            Tedim, 03041

                            N. Chin State, Myanmar

                            Ph. No. 09400674720

                            Email : bommang@gmail.com

Note : Tedim ka om sung ka phone sicip ahih manin a maan hong kikoih thei lo hi.

ZOMITE TAWH ZOGAM-AH

ZOMITE TAWH ZOGAM-AH

(Zosuan Tuailai Khawmpi & Kawlpi Zinna)

 A tuam vilvel a cialna a omloh hangin, June 5 – 9, 2013 sungin Zogam khuapi Tedim-ah, Zomi Innkuan Singapore vaihawm siamna tawh, “Zosuan Tuailai Khawmpi (ZTK)” om ding cih thu ka zak ciangin ka lungdam mahmah a, thulute leh hunzatzia ding hong kigen ciangin ka lawpzaw kan lai hi. Tua banah, Champhai pan sangin, Tedim panin Kawlpi naizaw ahih manin suangtang khat tawh vasa nih kikapkhia thei ding cih ngaihsun ka hih manin kihelloh ding ka lau pha mahmah hi.

ZTK hong kipat khiatna

                Tutung ka khualzinna ah ka meel hong mu cilte in hong ngaihsutna uh sangin ka kum a tawmzawkna thu hong gen zel mah bangun, thei dinga hong lamet zah uh ka theihloh pawlkhat om a, nuam ka sakloh hun bang om hi!

                Zomi Innkuan Singapore (ZIS) nasep lianpipite laka ka theih masak pen bel, Cope Centennial Jubilee lai a laibu bawl nadinga sum le pai a piakkhiatna uh pan hi a, tua panin Singapore Zomite’ minam itna leh a kipiakkhiatna uh pen thupi ka sa mahmah pah hi.

                Kum 2011 August kha-in ZIS in kha simin Zomi suanga phatuamngai kipawlna Zomi Youth Association (ZYA) a huh ding thu ka zak lailai ciangin, hih bangin sem tek leng i gam pawh nuam sin teh, ciin ka ngaihsun hi. Ka theih khakloh, ka nung theih pawlkhat a nasep lianpi uh zong om a, pastor si sate’ zite huhna a piakna uh, Yangon kiim a Pasian thu a thei nai lo mite tungah na lianpi a sepna uh leh Kawlgam sunga Zomite in leitungbup a kisam Mikang pau le lai a theih nading uha a vaihawmna uh zong thupi mahmah hi.

                Tua banah, Zosuan Tuailai Khawmpi cih min vawhin, sak le khang, tum le suah a om Zomi khempeuh kihel kim theih nading khawmpi lianpi hong vaihawm uh pen ‘minam itna taktak lungsim pana hong piangkhia hi,’ ciin ka ciamteh a, gam tuamtuama om Zomi innkuante adingin Zogam leh Zomite adinga nasep thupi sep nadingin a hoih lama tona (challenge) lianpi-in ka tuat hi.

Champhai pan Tedim

                June 4, 2013 nitak nai 8 pawlin Aizawl panin sumo khat dimin Aizawl Zomi Innkuan lutangpi Pa Sawmpi makaihna tawh Champhai lam hong zuan uh a, June 5 zingsang nai 5 pawlin Champhai hong tung uh hi. Sianu Awi Ngaih Lunte inn ah niangtui leh moh a nek khit uh ciangin, Champhai lama Zomi makai lian pawlkhat tawh sumo nih (2) dimin Zokhawthar lam zuanin kitai pah ving veng hi.

                Zokhawthar ah Zomite a zindo den Upa Z. K Dongte innah kinga phot in, a kisam tuamtuamte man ciang Zokhawthar BYFte in ann lim tak hong huansak uh gilmul vang liangin kine a, nek khit bek leh Ciau lam zuanin kipaisuk pah phengphang hi.

                Haksatna om loin Ciau lui kikan a, Ciau a om Zomite innpi khat ahi Pa Mungte innah kinga in, amau mawtaw hong vaihawmsak uh a, haksatna bangmah om loin Ciau panin Tedim lam zuanin ka dingkhia uh hi.

                Haimual khuathak gate ah receipt nei lo uh ahih manin a bawl sung naikal 3 val deuh bek(!) ka ngak khit uh ciangin Tedim lam zuanin ka pai thei ngawngaw uh hi. Mawtaw lamah zong haksatna bangmah om lo ahih manin Tedim pen nai 4:30 pawlin tungin, Lamzang lamka ah mawtawpi (bus) khat in hong ngak gige ahih manin lut pahin, min khumna CMBC biakinn ka delhsuak pah uh hi.

Bethesda Orphanage Ministry (BOM)

                CMBC biakinn panin min sazian ap khit ciang, zin tun nading a hong kisehsakna BOM (Bethesda Orphanage Ministry) ah bus mahin hong khasuak a, a lampi a nopluatloh hangin a mun ka tun taktak uh ciangin BOM pen a mun le mual nuamin, tui kicing zihziah a, a neite in zindo siam lai uh ahih manin, a nung ciangin a nopna thu a thei tek hi napi, ka kihilh kikkik uh hi.

                Hun khat laiin Tedim khua kiimah innkuan nek le dawn haksat luatna hangin lutolte kiangah naupang bangzah hiam om a, tuate veihuai ahihna thu ka za ngei hi. Ka ngaihsutna-ah, tuate a kem ding kipawlna ahi zongin, mimal ahi zongin a sem om lo hiam? ciin kei le kei ka kidong thei zel hi. Ahi zongin tutung Zosuan Tuailai Khawmpi ka simna panin ka lungdam mahmahna pen ko zin tuna tektek (BOM) ah tagah naupang, nek le dawn haksatna hang leh thu tuamtuam hanga nu leh pate kianga om thei lo mi 30 val bang kikem ahih manin, hih bang nasepna thupi ka muh bekbek zong ka khawmpi pai meet tuam hing ciin ka ngaihsun a, a tamzaw sem meetpih sawmin ka kithawi lai veve hi.

Khawmpi kipan ta..

                BOM ah kisilin, ann ka nek khit uh ciang, Cope Centennial Jubilee Hall lam zuanin paipah in, tumging tuamtuam hong ging zuazua a, tha lawpsak mahmah pah hi.  Zo lianu, Zo puan silha etlawm mahmahte in hun hong makaih uh a, Rev. Dr. Do Suan Mung, Asst. Secy., GZA leh Pa Suang Za Nang, President, Khawmpi Main Committee, Tedim in khau attan-in pawi honna hong neih khit uh ciang Rev. Khup Khan Pau in hun-apna nei hi.

Laipian Pawlpi panin ngeina laam lahna hong neih khit uh ciangin Pu Hang Khan Lian, ZIS in pawi muakna thupulakna hong nei hi. “Zosuan Tuailai Khawmpi ah, hong khenkham thei ding, aw suah, pawlpi, khua, beh lungsim khempeuh inn sungah tumpih lo ding hi hang” ci-a, “Party khatpeuh a phuh sawm leh kipawlna omsa khatpeuh a phiatsawm kihi peuhmah lo hi” ci-in, Zosuan Tuailai Khawmpi’ tup le ngim, ‘a bucing hantohna’ ngah nading ahihna thu kician takin hong pulak hi. 

Pa Suang Za Nang in vaidawn thugenna hong nei a, ‘Zomite kipumkhat nading lunggulhna tawh kibawl ahihna leh, kideidanna, kipampaihna om lo, Zomi kici khempeuh innteek nading’ ahihna thu hong pulak hi.

U Hau Suan Cin in Information dept. lam panin meel kilahna leh thupulakna hong neih khit ciangin MP Pu Kham Suan Mung in ‘parliament kivaipuakzia leh theihhuai thu manpha tampi’ hong gen hi. Laipian pawlpi in Zo la sain, hong laam kik uh a, mipite mit tai mahmah hi.

Tua khit ciangin Rev. Dr. Do Suan Mung in thu gen a, ‘pumpi ci le sa siangtho ding, ngaihsutna man nei ding, kuhkal ding, tup le ngim nei ding, geelsiamna nei ding, a nuam bekbek tawh khantoh sawm lo a, thuak a kul leh zong thuak ding, thumanna lenkip ding ahihna thu leh a thupipenah hong piangsak Pa phawk ding’ ahihna thu hong gen a, mipite in tha kingah mahmah hi.

Zogamah la siama minthang vangvang Thawn Kham in la tawh hong awi a, zan sawt mahmah ta mawk ahih manin la siam dang tampi in zong hun a ngah nawn lo suak hi.

Thusunna leh kamkupna

                Thusun khempeuh leh a sungte banah, kamkupna pen a vekpi in gelh hi leng sau lua ding ahih manin, a tom thei dingin kong gelh mai hi.

                Devotion pen nai 8 pan kipan a, nai lang sung kinei zel hi. Nai 8:30 (7:30 IST) pan thusunna kipan a, sunma lam (zinglam) in thusun 3 veita om hi. Sun niangtui dawn hun kikhawl a, nai 1:00p.m ciangin nitak lam hun kipankik zel hi. Thusunna 3 mah om a, thusun khat a zawh ciangin genkhopna kinei pahpah hi.

                June 6, 2013 sunma lamin, “Zomite’ Pianpih Thuneihna” cih tawh kisai thulu 3 tawh thusunna leh kikupnawina om hi. Nitak lam ciangin, “Zogam, Zomi Pupa’ Gamh Zo Ngeina, Gam le Lei” cih tawh thulu 3 mahin thusunna om a, thusunna khat a man ciangin kikupnawina om pahpah hi.

                June 7, 2013 in sunma lamin, “Zomite Nasep Silbawlna” cih tawh kisai-in, thulu thum (3) mah tawh thusunna leh kikupnawina om a, nitak lam ciangin, “Zomite Cidamna leh Pilna” cih tawh thulu 3 mah zangin thusunna leh kikupnawina om hi.       June 8, 2013 in sunma lamah, “Zogam, Zolei – Kep leh Huaina” cih tawh thulu 3 mahin kikhen a, thusunna leh kikupnawina om hi. Hun a kiman ciangin niangtui dawn ma-in TBC huang sungah singno suanna/koihna, hih huna kihel khempeuh in kinei hi. Nitak lam ciangin, “Khangthak Zomite’ Mailam Hun Ding Geelna” cih tawh kisaiin thusunna leh kamkupna zong om hi.

                Hih a nini-a thusunna leh kikupnawina panin a kigencim thei lo, mipi lungsimah a liandiakte leh ka vei diak pawlkhat pen :

1.   Gullu Mual vai : Kumpite leh Sen Companyte in mipite hamphat nading leh lawhtak ding om lo a, Gullu mual tawh hong sawm mawk uh pen a gam sunga om mipite (Zomite) in hoih sa lo a, to nai lo dingin kumpi tungah nakpi takin kingen hi.

2.   District vai : Chin State sungah district ngah dinga kilawm mahmah, Tedim in district i ngahloh mawk pen kuamapeuh in gen belin kinei hi. Zomite kalsuanna sa-ah mipite leh kumpi lama uliante sepkhop siamlohna hangin na tampi kitaan ahih manin, mai lam hunah tua bang tuak kikloh nadingin sepkhop siamna kisam mahmah cih thu kilimgen mahmah a, mipi lungsim ah kipumkhat nopna lungsim lian mahmah hi. Mipite tawh a semkhawm siam makai pen mipite in zong kinawlkhin ngei lo ding hi.

3.   Phatuamngai kipawlna : Kumpi uliante lamlaka, sepkhoppih a, a tawsawn ding (pressure group) kician, pawlpi leh political party tawh a kisawh kha lo, phatuamngai kipawlna, min khat tawh, kizopna kician tak Zogam bupah a om theih nading kideih tek hi.

4.   Kimaisak thei : Kawlgam sungah a zawng pen Chin state sungah lai thei lo a tamna pen a kigen Tedim Township in kum 2013 tan 10 laivuanna ah Chin state sungah a ong hoih pen hi a, a haipen hi-a Kawlgam kumpi in hong pulak kumin Kawlgam kumpi tangmi dingin Zomite gam thupi ah a pai kum ahih manin, hih banga hai pauna leh mi hong simmawhna pen maan lo hi, ciin kisang a, kimaisak zo hi!

5.   Zo ngeinate : Zo puan kilaih themthum pen hoih kisa lo a, pawite (i.e. Sialsawm leh Khuado) pen i zat hun kibang thei leh cih deihna zong lian hi. Zomi Nam Ni leh pawi tuamtuam i zat ciangin khuabup or Zomi khempeuh a huam thei dingin kizang leh deihhuai. Innkuan nih le thum, pawlpi khat bekin zat zel pen khawlsan thei leng.

6.   Zogam : Zogam pen koi cia pha? I pi le pute in “Gunkhawm sak siah ei Zogam nuam” ci uh hi napi, state gamgi zong kilaihlaih mawk! A kancian thei omin, hong kankhiat nading uh deihuai hi.

Zan lam hunzatzia..

                Zan simin kikhopna hun om den hi. Tua hunah Zomi Lasiam leh tumging tumsiamte in zaila tawh hong awi den uh a, ngeina lam tuamtuam kilak hi. A siam vive lakah ‘Dimtui Cultural Troupe’ kiginkholhna uh thupi ka sa hi. Tua banah thugente’ thugenna panin :

·     Rev. Suan Khan Thang – Minam min khat a kibang nei ding. Thukizaktuahna hoih zaw neih theih nading vaihawm ding, Zomite in pautaang khat nei ding, tup leh ngim kician tak nei ding hi hang.

·     Sia Suan Do Cin – District pen a ngah lo hi lo hang a, a ngah nai lo bek I hi hi. Zomite in pilna, kithutuakna, sepkhop siamna kisam hang.

·     Rev. Thang Van Lian – Nidangin biakna makaite hangin Zomite laka kikhenna om a, tuhun ciangin biakna makaite hangin kipumkhatna om ta. A hai pen hong kicih kum leh lai thei lo tamna pen hong kicih kumin, Kawlgam bup taangmi dingin Zomite gamdangah kipai hi. Makaite nungthuap siam kisam hi.

·     Rev. Dr. Cin Do Kham – Dawi biakna lungsim paikhia-in, anungta Pasian bia-in, Khazih lungsim nei ni. Minam neu lungsim paikhia-in nampi lungsim nei  ni. Aisa lungsim nusia-in vaphual lungsim nei ni. Ahi liamliama nuntak sawmna panin cihtakna leh thumanna tawh picin sawm ding. Tangtatna leh simtat nopna lungsim nusia in kipumkhatna tawh nungta ni. A guallelte simmawh a, a gualzote gensiatna panin, a guallelte domto in, a gualzote pantah ni.

                Note : Ciau pan Tedim zuana ka paina lam uah guah thuak ka hih manun bukvei-in ka ci sa gawp a, hun bupin kihel thei lo ka hih manin kei ciamteh teng bek kong gelh hi. Ka gelh khaklohte in hong theisiam un.

Tedim om sunga a lungdamhuai thute

                BOM ka muhna hangin ka lungdamna thu bel gen kik kul lo hi. June 7, 2013 zingsangin Upa T. Thang leh Upa Nang Sian Mung tawh kithuahin BOM founder & president Rev. Kai Cin Mang holimpihna hun nei thei ka hih manin ka lungdam hi. Hih holimna hunah BOM Kum 10 cinna laibu hong letsong ahih manin zong lungdam mahmah hi.

Kum 1996 pan a kipan BOM pen, amau ta a neihloh uh hangin hanciamin, nakpi takin naupangte pantah uh ahihna thu hong hilh a, naupangte limtakin lai a hilh thei ding a kisapna thu leh, lutolte kiangah naupang 200 val bang om a, ei kiangah mi a tawmzawk mawk pen a lungtang a natna thu, nikhat a 15,000 – 20,000 kiim nek le dawn bekin beiden (sa ne loin) ahihna thu leh, ‘tu dinmunah gamdang panin huhna bangmah ngah lo, amau innkuan hanciamna leh Pasian makaihna hanga hih ciang a tung’ ahihna thu hong hilh a, thupi-in, lungtang hong khoih mahmah hi.

                Tua bang kawmkalah, Mizogam lam pana paite Ui leh Ak hong gawh a, gilvah takin ka tam sung khempeuh uh hong vak uh ahih manin lungdam mahmah hi. A mi bang lo pen kei, natna ka thuak deldol ciang, hong kep hong cinna uh pen maizumhuai liang hi. Thuhkikna Topa’ aa hi, ciin thupha ka paih hi.

                Nipi ni pen ka zin tunna uh Rev. Kai Cin Mangte’ pawlpi ahi EBC ah pawlkhat ka kikhawm uh a, Rev. Dr. Do Suan Mung in, “Ka Tecite Na Hi Ding Uh Hi” cih thulu tawh hanthotna hun hong zang hi. Hun man ciangin, “Puak Kawikawi Theih LAI SIANGTHO SANG” kici laibu a kingah theih nading ka dot leh, aman, “Tua banga na deih uh leh a khawnkhongin na na vekpi un (Mizogam lamte) hong pia ning” hong ci a, zak nuam mahmah hi. Nitak ciang Rev. Kai Cin Mang in a inn uah hong na laksak sawnsawn lai a, kisuanglah simin ka nuam mahmah uh hi.

                Cope Centennial Jubilee, 2010 a laibu ka deih mahmah khat ka leiloh, ‘Makaih Pilna’ laibu gelhpa Dr. Lian Muan Kim hih kikhopna-ah hong kihel thei ahih manin a kingah nading lampi ka dot leh, a inn uah a kepna thu hong gen a, a inn uah zui pahin, ama laibu bawl mah ahi ‘Filippi Hilhcianna” zong ka lei pah hi.

                Inn 54 leh mihing 246 omna Siangsawnah hong paipihin, High School, leh Zato innte hong etpih ban uah, Golf satna mun leh Vocational Training school gal-et theih nading munah hong paipih U Tuangneu leh Tuangpite tungah nakpi takin lungdam hi.

                Khawmpi hun sung khempeuh, Singapore pana hong paite thusiamna, TYF, ZYA, leh mimal khatpeuh pen thudik, thunuam, thuman uh a, hopih nuamin, kikholhpih nuam uh ahih manin lungdam hi. Tedim khuapi sunga khangnote gim le tawl ding zia, mandat (pandal) hoih tak nuaiah, tutna hong bawlsak uh zong lungdamhuai sa ing.

                Hih khawmpi hun sungin, mipite lungsim ah a lian pha mahmah, Gullu mual tawh kisaiin, to lo dinga kumpite tungah ngen a, a mapang, tha le ngal, sum le pai, hun tampi a bei Gullu Watch Group thapiakna leh sunsiah tunna, a tam leh tawm thu tuam, sum le pai tawh mipite in mapan theih nading hong kivaihawm pen lungdamhuai sa ing.

                Zolai tawh laihawm a saite kimuhkhopna kinei a, Zingsol pen hong taan suak theih nading lampi kingaihsunin, Zolai khantoh nading kikupna nasia tak kinei thei ahih manin zong lungdam hi. Zomite lakah ‘Lai’ thupina i telna zahzahin i minam khangto ding hi, cih thu zong kilimgen mahmah hi. Rev. Dr. Chin Do Kham tawh zong kimuhkhopna kinei a, Zolai a itna leh Zolai khantoh ding a deihna thu hong pulakna leh, “Zomi khat a kihelna pen taisan ngei lo ding” cih thu hong pulak pen thupi ka sa mahmah hi.

                Tua banah, khua 90 val pana paikhawm mi (zasian a kikhum) 760 valte leh Tedim khua sunga om khangnote panin haksatna leh buaina a bawl om lo a, numei pasal thangtatna tawh kisai thusia kiza lo ahih manin lungdam hi. Zomite zong kimuhkhop, kikholhkhop siam mahmah ta cih kilang hi.

Tedim pan Kawlpi lamah

                Nipi khuavak ni, June 10 ni-in khawmpi siimte kikhenni hong tung vak mawk hi. Kham lo, cim lo pipi-in ei utna mun tekah pai dingin kikhen hong kul ta hi. Ko zong nau Vial Sawm Piang tawh, zanitaka Zogam Bus Transport kici pana letmat (ticket) ka lak uh tawh, zing lam nai 6:00 (5:00 IST) in Tedim panin Kawlpi zuanin, Zogam mual le guam kantanin ka pai uh hi.

                Hiangzing khua kiangah lampi siatna hangin naikal 1 kiim ka khawl khit uh ciangin dingkhia-in, Sozangah apple thak, Zogam sunga piang, a limci mahmah lei-in, nek ding kal ka ngaklah uh a, ne pah samsamin, Zogam pana piang khaite pen lim mahmah mawk hi.

                Zosuan Tuailai Khawmpi a kilim gen mahmahte laka khat, hih i gam sung pana piangte pen, bangci a tawmzaw sem piangsak thei ding cih kantelna (research) om hen la, tua khua kiim ah mipilte lamlahna tawh lim takin kicing leh Apple bekbek tawh zong sum tampi kingah ding hi. Tua banah, a kepdan leh a saidan (processing) kician tak om hen la, Kawlgam, Vaigamah kizuak thei hi leh, Zogam adingin sum muhna lianpi suak thei ding hi, cih ka ngaihsun hi.

                Taingen ah Aksa leh Voksa gilvah taka nek khit ciang, lusu kawmkawmin Kawlpi lam zuanin tai suksukin, nai 3:00 kiim ciang ka tunna ding mun Munlai ka tung hi.

                Munlai ka tun ciangin meltheih u le naute na om uh a, ka mai-a pai Pa T. Thangte in Ui na go ahih manin, Uisa in hong na ngak gige na hi mawk hi. A kikhami sak mahmah bang hi leng, ‘pei sa lawt’ cih suk pah demdam dingin hoih hi!!

Kawlpi Khua – June 11

                Kawlpi ka om sung (June 10-15, 2013) in mun tam pi ka pha man a, ka pai nopna tengah ka pai manloh hangin, ka muh ngeiloh tampi mu in, ka theih ngeiloh tampi thei ka hih manin ka lungdam hi. Kawlpi khua sunga ka tam sung khempeuh bike tawh hong pua kawikawi U Tuangpu leh a mawtaw thak liklek a hoih mahmah Honda CRV (4x4) tawh hong pua kawikawi Rev. Dr. Lang Khan Khai @ Pa Khai, Zomi Times tungah lungdam hi.

                June 11, 2013 ni-in, ZBCM zumah hawhin, siate tawh holimna hun nuam tak zang thei ka hih manin lungdam ing. ZBCM nuaia lai lam nasepna Zomi Association for Christian Communication (ZACC) vaisaina tawh laigelh kidemna kumsim-a a bawlna uah nihvei ka kihelna panin thaman 2010 in thumna leh 2011 in nihna ka ngah theihna, Zolai khantoh dinga a deihna uh hanga ken zong phattuamna tampi ngah ka hih manin lungdamkohna in ka laibu bawl khat, “Nuntak Manphazaw Tawh Lawhcinna” cih pen ZBCM Library adingin ka pia thei hi. Theitui limtak tawh hong zindo uh a, Sia Kathawn in zum kiim le pam thu theihuai nonote hong hilh ahih manin lungdam hi.

                Pa Khai tawh kithuahin, tua mun panin vakkhia kikin, ZCLS zum leh laibu zuakna-ah pain, ka laibu deih pawlkhat ka leikhit ciang, paikhia kikin, KVBA zumah ka pai uh hi. Dr. Rev. Man Hau Cing in hong vaidawn a, a zum phual mahmah mu ngiat a pai ka hihna thu genin, aman a sangkah pih Sia Lam Thang leh Sianu Awi Ngaih Lunte a phawkna thu zong hong gen hi. Sianu Lun zong amah mah bangin nungak lai ahihna thu khawng hilhin, peuh ka ciamnui zanzan uh hi. “Niangtui hong taih ning ei” ci-in, amah man lo ahih manin Rev. Neng Khan Go in hong zui-in, Lansong pekah Sia Go tawh niangtui (bawng nawi), Siamah Hau Cing’ hong taih ka dawnsuk uh hi.

                Niangtui (bawng nawi cih zawk ding) ka dawn khit uh ciangin Pa Khai’ mawtaw mah tawh Tamu lampi lamah pai-in, Kalaymyo Town hall ka en uh a, ciamnuihna-in a kigen thei zel, pawlpi khatah biakinn lam ding a kikup laitak uh a mi khat in, “I biakinn pen khua nawlah lam leng a center pen tam?” a cih khawng hong phawksak hi. A khang lamah inn bangzah om cih thei lo ka hih manin, Kawlpi khuasunga adingin nawl ka sa mahmah pong hi.

                Tua panin ciahto kikin, Rev. Job Thawngnote’ inn ah ka paisuak uh hi. Sia Thawngno na vakkhia ahih manin sawt om loin mun dangah vak ka sawm uh leh lampi ah kituakin, ka kileh kik uh a, holimna hun nuam tak Pa Khai, Zomi Times tawh ka neikhawm uh hi. Aman a zing (June 12) ciangin ann ne dingin hong sam a, lungdam takin ka sang pah hi.

                Sia Thawngnote inn panin vakkhia kikin, innkuanpih Pa Gin Do Liante inn ah Pa Khai tawh ka pai kik uh a, Pa Lian om lo ahih manin a lawmnu Nu Khoi Lam Cing tawh ka kigengen uh ciang Nu Cing pen Pu Hau Do Suan (Ambassador to Canada) nau na hi mawk hi. “Pu Hau Do Suan’ nu sihna thu nung lamin kizaza napi, nang’ nu ahih lam kiphawkkha het lo” ciin Pa Khai in kisuanglah pi-in hong gen a, siatvehna ka nung piak uh hi.

Kawlpi Khua – June 12

            A lampi cian lian lo ka hih manin keimah guak a Sia Thawngnote innah pai ding nuam ka sa kei hi! Ka zintunna-ah Pa Khai in hong pi ding ngakin ka om a, buai mahmah ahih manin hun maanin Sia Thawngnote innah zong ka tung thei kei uh hi. Ka tun bek uh leh Sianu in ann hong lui pahin, ka thum un ka ne pah uh a, gennop tam, nek ding tam ahih manin a masa leh a nunung ding zong khensiam haksa hi. “Tulai ciang upa lamte in ak gil khawng ne thei pha nawn kei in, nang na nek theih leh ne ou” ciin Sia Thawngno in deihsakna tak tawh hong gen a, ‘Nun kilamdang, pian kilamdang ta’ cih peuh hong ngaihsunsak hi.

                Ann neek kawma thugente ann kham ciang zom suakin, Zolai khantoh nading tawh kisai genkhawmin, “A sum nei lo tengin i vei zong a buaihuai mahmah thu hi” ci-in, pankhop a kisapna leh minambup in lai manphatna i theihcian ciangin i minam khanhto taktak pan ding hi, ci-in ka genkhawm uh hi. Lai lam nasepna-ah aman tulaitak-a a sep, laibu a suak thak dingte pen :

1.     Zomi in Diaspora (Zokam in kilet laitak)

2.    Psalm Sermon Outline (Zokam) – by J. M Paupu

3.    Dr. J. M Paupu Sermon & Articles

4.    Hong Nungtasak Kik In – by J. M Paupu

5.    Thuhilhna leh Thusinna – by J. M Paupu

6.    Amah (Job Thawngno) tangthubu (autobiography)

7.    Judson phawkdenna laibu….

Cih teng masuan nei ahihna leh sawt loin hih laibute suakkhia ding ahihna thu hong gen hi.

Tua banah, laibu honpi khat hong letsong a, aman pen sumin kituak hi leh tul sawm bangzah hiam hi ding hi. Ka ngaihsutna sau sak mahmah a, hi zahta in Siapa in kei leltak hong piakpiak mawk pen, a lunggulhna bangin a laibute ka zat theihloh khak ding ka lau mahmah hi. Tua laibu hong letsongte pen :

1.   Tedim Thukizakna Lai (Rev. Dr. J. H Cope  ii gelh leh hawmkhiat)…. Laimai 792

2.   Hunbit Siate’ Tangthu (Tahan Baptist Pastor Area sung)….. Laimai 168

3.   Paknamtui ……. Laimai 130

4.   Zomi Numei Ordination Ngah Teng……. Laimai 102

5.   Sihna Sermon – 40 (Bu Nihna)………….. Laimai 164

6.   Tedim Gam Christian Tangthu leh Rev. Sukte T. Hau Go Tangthu….. Laimai 300

7.   Zomi Handicap Uplift Ministry Kum 10 Cin Ceptehna….. Laimai 140

8.  Rev. Go Khen Thang’ Ciamnuih kam, Pil Kammal leh Article Tuamtuam…. Laimai 248

9.   Lungsim Limlang……. Laimai 172

10. Muvanlai ………… Laimai 36

11. Zomi Khristian Kumza Mualsuang (Tedim)……. Laimai 448

12. Bangkua siam tunnu – Nu En Sial Mang cihte ahi hi.

 

Siapate inn panin paikhia in Tahan Tuiphum Pawlpi biakinn a kilam laitak Sianu in hong etpih khit ciang, innah Pa Khai in hong kha to a, kisilin, ka kisil khit ciangin U Tuangpu tawh Tahan lam mahah bazaar in tua khit ciang mail check dingin Moonstar ah ka lut leh, internet hoih vet lo mawk ahih manin sepnop teng zong sem khin loin lungkia-in ka pusuak kik hi.

Tua pan ZYA office ah paisuk in, kai pianta ahih manin makaite ciah khin uh a, Siamahnu tawh zum sung enin, khua 19 ah ZYA omta ahihna leh nasepna sazian kiciana takin record bawl uh ahih manin makaite leh nasemte kician ka sa a, ka pakta hi.

Zan ciangin Pa Khai in kikhawm dingin hong zawn ahih manin ka nih mahun ka kizui kik uh a, Pinlong Baptist Church ah Papite Kikhopna ah thugen dingin hong ci vat ahih manin ka gen vatvat hi. Pute gual ding papite maia thugen pen a nuam het lo ahihna leh, Lai Siangtho in, “Kigingkhol den un” a cih tawh kituak lo a, kigingkhol lopi-a thugen pen i gennop tak kigen mangngilh thei, cih ka phawk hi.

Hih hunah Jonah nuntakna panin sin ding tuamtuam, Pasian sapna nial-a a taina mun panin siatna tuamtuam hong tun ciang “Kileh kik ning e” ci loin, “Tui sungah hong khia un” ciin a sih ngam bangin, omloh nading muna om, zu le guihtheih-khamtheih zanga, Pasian deihloh na i sepnaah Pasian kiang zuana ciah kik sangin sih peuh ki-utzaw thei hi. Jonah bangin Pasian in hun hoih hong pia lo thei ahih manin, hun hoih i neih lai-in ama lamah kihei ni. Tuin koi munah om na hiam? ci-in hanthotna ka zang hi. Ka thugen tawh kituak lo zah dongin letsong hong pia uh ahih manin lungdam mahmah hi.

Zan ciangin Pa Khai tawh holimna hun kician takin nei in, a ministry tuamtuam theih dinga kilawm nono hong gen ahih manin lungdam hi. Naupang 9 a kepna lak uah, Naga mi li (4) kihel a, eipau bang siam zawzen uh hi. Zomite a itna leh khualna tawh Mangpau sinna hon sawmin, a sia ding kisam mahmah ahih manin a khawnkhonga kisinsak ding ahih manin a khawnkhong maha a hilh thei ding om leh a deihna thu hong pulak hi. June 20 pan Oct. 18, 2013 sung sinsak ding a lunggulhna thu zong hong gen hi.

Ama ministry Global Network International (GNI) kici nuai panin Border Area Community Development ci-in kumpi-ah registration hoih tak bawl ding a kisapna, tu dinmunah khua 30 ah tui kicingzaw-a a neih theih nading uh vaihawmpihin, mailamah Kawlpi sung a Zomite teenna munte ah lampi hoihzaw (blacktoped) a neih theih nading uh hanciam a sawmna thu hong pulak hi. Zomi College & Theological Seminary ci-in mail amah sang picingzaw neih ding a lunggulhna zong hong pulak hi.

Tua banah, gamdang a thungen pawlte tawh kizom a, Kawlpi ah zong tatsat lo a thungetna neih ding mailamah hanciamna om ahihna thu zong hong gen hi. Mi genthei leh sum le pai nei lozawte a hih theih bangbanga huh theih nading ngaihsutna lian mahmah ahihna thu hong pulak a, zak nuam mahmah hi. Tua nitak a inn uah ka giak suak hi.

Kawlpi Khua – June 13

            Papi Thusinna, Pinlong Baptist Church ah zingsang pan om a, Pa Khai in sinsak ding ahih manin ka kizui suk uh hi. Tua thusinna-ah, ‘Pasian piansak nate leh mihingte’ kikal, biological theology lam tawh kisai-in, “Bang hangin Pasian in nate khempeuh bawl masa a, mihing bawl nunung pen hiam?” cih dotna pen genkhopna nasia takin nei uh hi. Tua panin, “Mihingte kihel loin, nate nungta/om thei a, nate kihel loin mihingte nungta thei lo ahih manin mihing pen kibawl nunung hi. Tua ahih manin amaute lo-a a nungta thei lo mihigte in, Pasian bawlsa nate pen dawmin, kem siamin, i zatsiam ding hi” ci-in kigen hi.

                Tua banah, ‘pa’ pen bang hangin ‘sal’ in zui a, ‘nu’ pen ‘mei’ in zui hiam cih zong kikupnawina nasia takin papite in hong nei uh a, zaknop mahmah hi. Bang hang ahi tam? Nang bangci ngaihsut? Tua banah, pate tavuan leh thu manpha tuamtuam gen hi.

                Sun nai 12 kiim ciangin inn ah pawlpi mite khat in hong kha to a, inn ka tun ciangin ka lup mawkmawk leh, kisam mahmah ta hi kha ding hi; ka ihmu pah hi.

                Nitak ann pen Pa Khai in “Ko innah hong ne in” hong ci ahih manin ama hong pi hun dingin ngakin ka om hi. Ann nek dek ciangin hong pi-in, a inn uah aksa gil mul vang lianin ka nek khit uh ciang, “Meltheihte inn pha kawikawi ni” ci-in hong vakpih a, mi thupi tak khat mah bangin mi lakah hong pulak zel ahih manin nuam lo dekdek mawk hi!

                Zan ciangin meltheihte hong paikhawmin, thukikupna leh holimna ka nei uh a, thu tampi, meltheih tampi, kimuhloh man bek khawnga a kingai lo tawh a kibangte kimukhawm ka hih manun manpha ka sa mahmah hi. Kimuhkhop khit ciangin Sia Do Khupte inn sik phei pakin, Pa Khai mah in ka zintunna, amau inn pan a gamla mahmahna-ah hong kha kik hi.

Kawlpi Khua – June 14

                Keima geelna bang hi leh, tuni pen ka ciah ni ding ahi hi. Vai tuamtuam hangin ciah thei lo, man nai lo ka hih manin ka ciah kei hi. Zingsang lamin Kaplei veng (pawlkhat in Dowaing Chaung ci) ah vakphei in, u le nau a kimungei lote kimu-in, leitung mite gamgi bawlin hong khen hangin, i lungsim, i ngaihsutna leh i sisan pen kikhen thei lo, ki-it, kingai den hi hang, cih hong phawksak hi. Deihsakna tak tawh niangtui hong bawl sawmte tungah (niangtui pen ken duh lua lo ka hih manin) leh ann hong nekpih manloh mana sunsiah hong tuunte tungah lungdam ko pah ing. Gam ki-ukna tuam, mual le guam, mihing bawltawm gamgi-in hong khen hangin Zomite ki-itna pen bangmahin hong khen tuan lo ding hi. Zing ann pen Pa Gote innkuan in gilvah takin hong vaak uh hi.

                Ann nek kham ciangin Zomi Siamsin 2000 valte (sangkahte gen ka zak) sangkahna, Kalay University en dingin U Tuangpu tawh ka pai uh hi. Kalay University kici pen a min taktak hi lo cih leh, a omloh nading munah om hi, cih ka zak ngei pen a maan leh maanloh zong ka thei tuan kei hi. A min maan tak tawh, a om nading muna om kik ding cih zong ka gen thei tuan kei hi.

                Bangbang ahi zongin, Kalay University pen a manpha thei pena i zat siam ding kisam mahmah hi. A mun le mual zong kicing (a om nading takah om leh zong kicing veve ding bel hi) a, department tampi kibehlap thei lai ding hi. Tu laitakin a building mahmah zong a kipuah saan laitak hi a, hong zo uh leh nuam mahmah ding hi. Zomi Siamsinte hanciam ni; innmun-logam pana sin theihna mun ahih manin lungdamhuai cih ding hi.

                Kalay University pan ciahsuk kikin, kisap tuamtuam lei dingin bazaar lamah ka pai kik uh hi. Mun kigamla pipi ah kipai ahih manin lam pai sung mahmah zong hun tampi bei mawk hi. Nitak ann pen ka zin tunna ka Pa Ngaihte in mun dangah nek ding hong phal lo uh ahih manin nitak ann pen ngasa limci mahmah tawh ann ka ne khawm uh hi.

                Zomi Siamsin Kipawlna – Kalay in a bawl “Siamsin Awging Special Issue - 2012” zuak dingin bu 20 hong puaksak uh banah, zan ciangin Siam Khaute in a let/tei “Nupa Kal Nopsakna Ngah Nading” cih laibu zuak dingin Rev. Cin Ngaih Thang in hong khak a, thungetna hong neihsak ahih manin lungdam mahmah hi.

Kawlpi Pan Ciahta

                Zingsang tho-in ka kisil khit ciangin ka Pa Ngaih in thungetna hong nei hi. Tedim a U Cinpu (Will Computer) in, “Nong ciah ciang Shwe Nee Sat ah hong tuang in” hong cih mangin, Shwe Nee Sat counter pana letmat (ticket) ka lakuh tawi-in counter lam zuanin U Tuangpu tawh ka pai suk uh hi. Nai 8:00 ciangin Kawlpi panin dingkhia-in, Zogam mual le guam tawn dingin zangsung ka nusia uh a, Taingen ah zing ann ne-in, Sozang ah Apple leh Thobat lei to in, Tedim ah tomcik ka khawl sung uh U Cinpu (Will Computer) muh ka sawm leh, a kikhopni tawh kituak kha ahi diam ka mu thei kei hi.

                Nitak nai 5:00 pawlin Ciau tungin, puaisate thusiamna tawh nawngkaina bangmah om loin gate kantanin, guahzu meikai nuaiah Zokhawthar tungin, mawtaw om lai ahih manin Champhai lam zuanin ka taisuak a, haksatna bangmah om loin inn ka tung hi.

Thuhialna

                Tutung Zogam sunga Zomite tawh ka kithukholhna panin Zomite in khantoh ding kilunggulh mahmah a, tua dingin sep le bawl ding tuamtuam omte zong sem ngam, thuak ngam dingin lungsim khensatna nei a, geelkhawm, semkhawm, bawlkhawm leh zuunkhawm dingin ngaihsutna maan kinei ta hi-in ka thei hi. Ei sung mahmahah, a nawngkai, a philhphit khat le nih a om hangin, Zomi a tamzawte in khut khat tawi, khe khat khai bangin kalsuan sawm ta a, mite hong neumuhna, simmawhna leh pampaihna pen a thuak den dingte hi loin, Sia Pauno la in, “Mi sang a niamzaw dinga Pasian hong bawl hi tuan lo” cih pen Zomite lungsim sungah lian mahmah ta hi. Zomi bup khangnote kimuhkhop theih nading hong vaihawm Zomi Innkuan Singaporete in vai thupi dang zong a hun zui-in hong geel zawh nadingun Sian in siam hen la, na hoih sep hong cimtak het kei uh hen, ciin lungdamna leh hanthotna ka pia hi. Z = Zomite, hanlung ciam, khangto diam!

T. Sawm Lian

Daihna Cabin || 19.6.2013