TUA PALIKNU....

TUA PALIKNU....

Ut leh utloh thu hi loin, seploh phamawh ahih manin, sep ding ka ngaihsutsut uh ciang, pau le ham siamloh banah, inn pana gamla lua-ah lah pai thei lo ciin, thonginn (jail) a Pasian thugen zel jail pastor Pastor Das kici zui-in kum 2015 bei kuanin mission trip ciin Tamil Nadu sung a thonginn 6 pha-in, Pastor Das in lungdamna thu thonginn sunga omte hilhin, ko ACA pana sangnaupang paite in Hindi leh Tamil la khat ka sa zel uh hi!

A khangno lai a gitlohna hang a thonginn a lut, thonginn pan piangthak a Karnataka kumpi nuaiah hunbit a thonginn a Pasian thugen (jail pastor) nasep a sem Pastor Das makaihna leh, kumpi lam pan phalna om ahih manin palikte leh thonginn sung a om mite in hong vaidawn dan uh nuamin, thumang thei mahmah uh hi. Mi a tam deuhna bang, a tawm deuhna bang, numei bek a omna bang om hi. Thongkia mite leh palikte ading Lungdambawl letsong (gift) ciin bucket bang, blanket bang pia-in, theitui leh moh bang tawi-in, hun zat khit ciang komau mahmah in ka pia/hawm zel uh hi.

Ka omna khua uh mi teng thum val omna hi a, tua district khuapi Krisnagiri a Numei thonginn ka phak lai-un nupi ta pomlai bang zong omin, pastor in hun a zat laitakin khitui luang bang, kisik tuak mahmah bang om uh a, lungsim hong lawng mahmah hi. Tuate adingin hun man ciang Krisnagiri a thu-um numei hong paite in thungetsak uh a, nek le dawn ding ka tawite uh ka nek ka dawn khit uh ciang thonginn panin tua lai a sem palik numei khat inn-ah Krisnagiri khua a thu-ummite tawh Pastor Das makaihna-in ka kizui khia uh hi.

Palik numei, a tha lian lua zong hi lo, numei thonginn a sem, a innsapna dol thumna, a tungnungpen, khan lian lua lo khatah pai-in, tu-in, theitui a leisa tawh banla leh apple ne-in, thu tuamtuam kikum uh hi.

Nek le dawn ding teng ne-dawn khinin, thungetkhopna ka zang uh hi. Krisnagiri a thu-ummite ki-it mahmah ahihna uh, sepna kibang lo tuamtuam a sep uh hang Jesu Khris sung a sanggamte a ki-itdan uh thupi, ettehhuai mahmah hi.

Thungetna hun ka zat uh ciang zong citak mahmah, thonginn pana ka tonpih uh, inn nei, paliknu bang upmawhloh phialin nakpi takin thungenin, ka paina uh thong sung a omte zong vei mahmah ahihna kitheithei hi. Palik nasem, biakna lam khawng ngaihsun khol lo ding a kilawm khat pen a inn uah ka pai uh ciang a kipiakna leh Pasian a itna, Pasian min a kalsuan Pastor Das, Krisnagiri a thu-ummite, leh ko ACA pana paite hong deihsakna leh a kipiakzawhna leh cihtakna ka muh ciangin lamdang ka sa a, hici bang a mi citak leh Pasian a zahtak, thu-umlo mite kianga palik nasep a sem ka muh ciang tha hong guan mahmah hi.

Tua paliknu pen a minam pih Tamil mi tamzawte tawh kibangin mel hoih ci a gen ding hi lo hi. Ahi zongin, a cihtakna, Pasian a zahtakna, Pasian min a kalsuante hong deihsakna leh a thu-up pih mite a itna, a kizepna puanpi Jesu Khris hangin thupi ka sa a, hici bang thu-umlo kalah Jesu a thupisakna thupi ka sa mahmah hi. Thungetna ka zawh uh ciang, khitui luang a mite ading a Pasian kiangah kiko ahihna bangin lungsim hong zo mahmah hi.

Haksa mah leh, selpihte thu-um lo vive hi mah leh, itna puanpi silh a, hehpihna hang-a a hehpihhuai mite leh a hehpih mite it a, "sum nei ta ing, pil ing, siam ing, kumpi-ah sepna hoih nei ing, hau ta ing" ci lo a, hihna leh sepna bangbang tawh Pasian leh a mite it a, a deihsak mi, aw hampha zen si e tua paliknu.....

I omna, i sepna, i kalsuanna khatpeuh pan mite phattuampih ding, mite thahatna ding leh Khris lim le mel kidawksak thei hi hang...

daihna_cabin
11062017

LUNGDAMKOHNA LEH HOPIHNA

LUNGDAMKOHNA LEH HOPIHNA

         Pasian in i thuumnate hong dawngin, tukum [2015] May leh June kha sangkhak sung, damlohna hang tawh Thuampui ka phak theihloh hang, geelna bangin Hnahlan leh Champhai khawk a pawlpite tawh hun nuam zangkhawm thei ka hih manin hampha ka kisa a, hunpha hong ngahsak Pasian leh hun nuam taka hong zatpih khua pawlpite tungah lungdam kong ko hi. Tua bang a hun ka zat khit ciangin June 23, 2015 in Aizawl panin Bangalore zuanin, nitak nai 11:00 kiimin ka sangkahna ACA cidam takin ka innkuan un ka tung uh hi.

Hnahlan Khawk Vanna

         April 20, 2015 in ACA panin cidam takin Champhai tungin sai ding pawlkhat ka sai khit ciangin Hnahlan khawk van dingin ka kithawi hi. Keimah banga lunggulhna a nei Upa Kap Go [Hnahlan khawk makaipi] leh Pa Vial Sawm Piang [Tedim a Lai Siangtho sangkah] om uh ahih manin amaute tawh kithuza-in, paikhop ding geelna ka nei uh a, tua banah Pasian ading a thasial ngei lo, Lia Mamang in zong hong zui thei hi.

         May 14 in Vaikhawtang khua lam zuanin, tua zan biakpiakna hun nuam takin ka zang uh hi. A zing sun ciang pawlpi inn kimah thungetna nei-in, zan hun pen biakpiakna hun ngeina-in ka zang uh hi. May 16 zingsangin Hnahlan khua zuanin, tua zan biakpiakna nuam takin zangin, a zing, Nipi ni pen misi om ahih manin sun biakpiakna kinei thei lo (misi a om ciang biakinn khempeuh kikhak) a, ahi zongin zan hun nuam takin ka zang uh hi. Pawlpi mite in deihsakna tak tawh ni khat hun zatkhop ding a lunggulhna uh kamkhum hong leel uh ciang, ciahsawm kimlai ni khat ka taam kik uh hi. Sun hunin biakinn ah Khawk Siapa makaihna tawh khangno pawlkhat tawh Pasian thu holimna nei-in, Pastor quarters ah Upa leh numei makaite in Khawk makaipipa tawh holimna nei uh hi. Nitak ciangin holimna a kihel khempeuh in ankuang umkhopna neikhawmin, suakta takin kamkupna hun limci kinei thei hi. Zan hun pen biakpiakna ngeina in kizang hi.

         May 19 in Vapar lam zuanin, tua zan biakpiakna kinei a, a zing ni 20 zan zong biakpakna hun zong kinei kik hi. Ni 21 in khe tawh Murlen khua pha dingin dingkhia-in, galkap a khuan ciah laitak Tg. Go Suan Mung zong hong kihel thei ahih manin lam pai nuamin, gim zong kiphawk man lo phial hi. Murlen khua, Zomite ading a mi pil, mi siam tampi a pianna khua, biakinn kilam thak a kizo siang nai lo sungah kikhawmin, nuam kisa hi. A zing sun ciangin Upa leh a om thei pawlkhat tawh holimna nuam takin sun thapai in kinei a, kei ading mahmahin manpha ka sa hi. A zan ciang zong biakpiakna hun nuam takin ka nei kik uh hi.

Champhai Khawk Vanna

         May 27 niin Kolkata a Lai Siangtho a sin Upa Pau Lian Sang tawh Champhai Khawk van dingin Vengthar, Champhai panin ka kipan uh hi. Zan khat biakpiakna hun nuam zangkhawmin, ni 28 in Zokhawthar ah ka pai uh hi. Zokhawthar pawlpi in biakin gol mahmah lam uh a, maban tampi a neih lai uh hangin, tu ciangciang a sepna uh zong thupi mahmah hi. “Zan khat hun hong zangkhawm lai ni” ciin hong kho uh a, a zing ciang Ngaizawl pai sawm ka hih man un Zokhawthar pan Ngaizawl phaksuak ding hi sa thei loin ka ciahsan mai uh hi. Hong itna uh thupi hi.

         Ni 30 in Champhai pan Ngaizawl pai ding, mawtaw lah Champhai pan a pai om lo ahih manin Pa Robert N. K Hau in, “Ka bike na zang un..” hong ci ahih manin tawldam takin Ngaizawl ka tung uh hi. Champhai Khawk Khangno Khawmpi masapen Sesih ah kizang ding ahih manin, kisuanglah simsimin geelnasa bangin Ngaizawl lamah ka pai uh hi. Khangnote khawmpi laitak ahih manin kikhawm a om diam ci-a ka ngaihsut pen, zan biakpiakna hunah numei-naupang, nupi-papi hong kikhawmin, biakinn dim kikhawm om veve a, Lungdamna Thu gena a khua uh a phate tungah a lungdamna uh lian mahmah cih ka mu a, thupi ka sak banah, a pha thei om zel leh cih a lunggulhna thu uh zong hong gen hi.

         June 1 in ciahkik in ni 2 in New Champhai pawlpi ka pha kik uh hi. Kikhop nuam mahmah hi. Ni 3 zan pen Ngur khua ah zangin, Ngur pawlpi biakinn thak ah ka khatvei kikhopna ahih banah, khangnote lawp uh ahih manin lasak leh biakpiakna nuam mahmah hi. Zing ciang a Leisenzo pha ding ka hihna uh tawh ka ciahkik theihna dingun Upa T. Thang in bike hong zangsak ahih manin zong lungdam hi.

         June 4 in Leisenzo pha ding, amau khua mawtaw pai lo ahih manin Sesih mawtaw ah ka pai uh hi. Sesih ka tun uh ciang Pa Lang Mang tawh kituakin, ‘khe a paitoh ding cih mawk...’ ciin bike hong la a, bike nih tawh kei leh Upa Sang hong khato uh ahih manin tawldamin, Pasian a zahtakna uh leh hong itna uh thupi ka sa hi. Tua zan pen biakpiakna hun zangin, pawlpi inn a tam nailoh uh hang kikhawm pen nuamin, kithalawp hi. A zing sun hun pen pawlpi inn kimah thungetna neiin, zan hun pen biakpiakna hun nuam takin ka nei kik uh hi.

         June 6 in Sesih ah paisuk in, Leisenzo pan Upa Pum Do Lian leh Upa Vung Cin Khai in hong zuisuk a, Kiginni nitak leh Nipini sun leh zan biakpiakna hun ka zang uh hi. Sesih pawlpi pen lawp mahmah uh a, lasak nuamin lamna-dianna tawh phatna kinei ziahziah hi. Sesih leh Leisenzo khuate pen zindo siamin, holimna hun zong nuam takin hong neihpih uh ahih manin manpha ka sa hi. June 13, Kigini nitak pan Nipi zing leh zan biakpiakna hun nuam takin Champhai pawlpi ah zangin, Nipini sunin Upate tawh holimna nuam takin Pastor Quarters ah ka nei uh hi.

Lungdamkohna

         Hnahlan leh Champhai Khawk vanna-ah nuam taka hun hong zatpih pawlpi khempeuh, nuam taka zin hong do a, neihsa siit lo a hong nesak a hong zangsak innkuante - Upa Do Cin, Vaikhawtang; Upa Khampi leh Pa Thang Lian Mung, Hnahlan; Upa Nang Ngaih Lian leh Upa Khai Za Dal, Murlen; Upa N. Chin Thang, Vengthar; Upa Go Thang leh Pa Lang Kap, Zokhawthar; Upa Thang Khan Zuang, Ngaizawl; Upa Ngul Sian Thang, New Champhai; Upa Pau Nang, Ngur; Upa Pum Do Lian, Upa Dai Khen, Upa Cin Dong, Leisenzo; Upa Dal Go Thang, Upa N. K Dal, Upa Do Za Nang, Pa Nang Kap, Sesih; sun ann/lamsap hong pia mimal leh a diakin Hnahlan, Vengthar, Zokhawthar, Ngaizawl, leh Sesih pawlpite; tha hong pia a, a kisam bang hong vansak Sia Gin Lam Thang leh a seppihte, nuam tak leh picing taka Hnahlan Khawk sunga hong makaih a, lam paiman nangawn hong sikhsak Upa Kap Go, ko khawkvan teng ankuang umkhopna hong neihpih banah, keima mimal mahmah, “Sangkahna ah innkuan in pai ta ding na hih manun..” ciin ‘sunsiah’ hong tuun Vapar ZBC tungah lungdam ka ko kikkik hi. Na sup na baina khempeuh uh Pasian in a zah tampi in hong thukkik ta hen.

         Hnahlan leh Champhai Khawk vanna panin a lungdamhuai mahmah pen, khua tamzaw-a biakpiakna ah Upate  leh numei makaite meel muh ding tam hi. Memberte etteh theih dingin om cihna hi a, lungdamhuai hi. Khangnote lakah Pasian thu duh pawlkhat om ahih manin zong lungdamhuai sa ing. Tua banah, Lungdamna Thu hanga kalsuan, ko bang lel hong tutpih a, holimna hun nuamtak hong neihpihdente Pasian na zahtakna uh thupi ka sa hi.

ACA Pai Kikna Thu

         Ka geelna bang hi leh ni 20 in Champhai pan Aizawlah giaksuk in, Thuampui ah Kigini nitak hun zang ding ka cih pen ka tapa damlohna hang tawh ni 21 tan kisut (injection) kul ahih manin ka pai thei kei hi. Deihsak taka hun hong pia Thuampui pawlpi tungah zong kisuanglah pipi in lungdam ka ko hi.

         Ka Pa Cinte innkuan in, “No innkuan a pai ding na hih manun Upate leh Siate samin innah thungetna khat nei ni” ciin thungetna hunkhat hong zatpih uh ahih manin thusiam ka sa a, tua banah Nipini [June 21] in Upa Pian Thang, U Hlutea, leh Pa Nang Do Thangte innkuanin ankuang umkhopna hong neihpih uh ahih manin amaute tungah zong hih Laitai tungtawnin lungdam thu ka ko kikkik hi.

         June 22 in Champhai pan dingkhia-in, Bangalore dong ka tonpih ding Mama s/o Upa T. Thang tawh tonin, Sia Dal Go in lampi ah hong muakin, “No zong hong tung mai un, zing ciang ka inn uh pan (Mama tawh) paikhawm mai un” hong ci ahih manin a inn uah ka giak uh a, ak hong gawh sawnsawnin, ZBC pawlpi kiphuhcil lai thu leh theihhuai thu manpha tampi hong hilh ahih manin gilvahin, manpha ka sa hi.

         June 23 in ka vanleng uh 12:30 a lengkhia ding pen 2:15 ah sotto uh ahih manin Pasian thupha hi. Lampi hoih lo ahih manin lamsau lamah ka pai uh leh lampi buannawi, lam naal lua ahih manin nai 2 zong ka lapkei dektak uh hi. Ahi zongin vangleng hong tu pak thei lo ahih manin nai 3 kiim ciang ka lengkhia thei pan uh hi. Kolkata ah vanleng laihin, Mungmung in vanleng tuan a cimtak manin buaina tawm khat a om hangin, nai 9:15 pawlin cidam takin Bangalore vanlengtual ka tung uh a, ka omna uh zuan suakin, zan nai 11 pawlin ka tung uh a, Siamah Nem Khan Cing (M. Th., final) inn ah kinga in, an ne in ka giak uh hi.

         Ka inn (quarters) ding a hong piak uh pen a omte in kisuanna ding mu pak lo ahih manin guest house ah ka innkuan un kalkhat sung ka om khit uh ciang midang khat a piak khitsa uh (amau om nai lo) tawh kibelhei in, July 1 in lawmte tawh inn puahsiangin ka inn thak uah ka giak pah uh hi. Ka inn uh pen common/sitting room, kichen (an huanna) leh lupna khan (ekbuk zong om pah) hi a, ko adingin nuam mahmah cih ding hi.

Thukhupna

         Keima mimal mahmah ka vaksuk ka vaktohna ah thu hong ngetsak a, niangtui man ding ci a neih man hi lo phal man a hong piate khempeuh tungah zong Laitai tungtawnin lungdam kong ko kik hi. Note thungetsakna, huhna leh lamlahna hang bek tawh hih ciang a tung ka hih manin mai lamah zong thungetna-ah hong phawk zel uh, ciin kong cial thuahthuah lai hi. I omna ciatah Pasian in hong kithuahpih zelzel hen.

T. Sawm Lian

ACA, Hosur

CHENNAI ZCF TAWH HUN NUAM

CHENNAI ZCF TAWH HUN NUAM

Tukum India Republic Day (Jan. 26) pen Pizing (Monday) tawh hong kituak citciat a, Nipini zang a mun dang a paikhiat nadingin hun lem hong suak hi. Tua ahih manin Asian Christian Academy (ACA), Hosur, Tamilnadu a om Zomite in lunggulhna lianpi tawh January 25, 2015 ni a Chennai Zomi Christian Fellowship (CZCF) phak ding a kigeelna Pasian in hong thukimpihin, hun nuam takin ka zang khawm uh hi.

January 23, sun-ann nek khit nai 2 ciangin Hosur panin mi 9 in Chennai lam ka zuanin haksatna om loin zan nai 11 kiim ciangin ka tunna ding inn uh cidam takin ka tung uh hi. Pa Lang Sian Tuangte innah kinga-in, tua panin inn 3 ah ka kikhen kik uh hi.

January 24 niin zing-ann nek khit ciangin mun tuamtuam pha dingin ka dingkhia uh hi. Tg. Min Lian’ makaihna tawh Jesu sawltak Thomas, India gama hong pai laia a omna mualtung ka pha uh hi. A kahtohna lampi geiah Jesu Khris in singlamteh a puakna lim, a puak ciil lai pan kipanin, gimin tawl mahmah napi a kipuaksak teiteina leh haksa a sak dan muh theih nadingin lim tuamtuam lam kiangah kikoih hi. Hih mun pen Chennai laizang taka om ci leng kikhial lo ding hi. Mualtung panin sim le mal, sak le khang en lehang Chennai khua pen kiphalh zihziah hi. Khristian ahi lote in haza mahmah dingin ka um hi. Mualtung ah lim tuamtuam, biakinn leh et theih ding tuamtuam om a, sing lianpi kum 175 a upa zong omin mun nuam leh tawldamhuai mahmah ahi hi.

Tua lai pan paikhia-in, Marina Beach kici mun minthang khatah ka pai kik uh hi. Tuipi gei sehnel mun nuam mahmah kantanin tuipi gei taktakah pai-in, a kilawm thei ding penpenin ‘kipost’ siam dandanin maan ka kila uh hi. Mikangte, mivomte, a vom lua lote ahi zong maan a kila tawh, tui peek tawh, sakol tungah a tuang tawh, ut bang tekin kuamah kibuaisak se loin khawmpi tun kimni mah bangin kiphe biakbuak hi. Tua panin paikhia kikin, University of Madras tawh a kilehngat a om park-ah ka pai uh a, hoih theih ding dan penin maan kila-in, tua pan inn lam ka zuan kik uh hi.

January 25 (Nipini) kikhawm dingin nai 3:30 p.m. ciangin Chennai Zomi Christian Fellowship biakinn lam ka zuan uh a, kikhop pen nai 4:30 ciang kipan hi. Tg. Min Lian leh Tg. Tuan Guite in lasakna nuam taka hong makaih zawh uh ciangin hun kipan hi. Hun-uk pen ZCF lam pan hong nei uh a, ACA lam panin meelkilahna (introduction) hun – Khup Lian Mang in hong nei a, khattang lasakna (solo) Hemma G. Manju, teci (testimony) genna – H. Kaiminlian, ACA pana paite in lasakna nei-in, hunpi (sermon) – Thangbiaksang Ngaihte in zangin, hunzawh lungdamkohna – T. Sawm Lian in zang hi.

ZCF lam panin vaidawn thugenna Pu Mawia Vualnam in hong nei a, Pastor Lunpi Neihsial in sumpi apna, nau-apna (Sia Khampute ta) nei hi. CZCF Chairman Muana Vualnam in lungdamkohna, CZCF mailam geelna pulakna leh ACA pana paite letsong hong pia hi. Sawt lo cik sung hi mah leh hun zatna nuam kisa in, manpha kisam mahmah hi. Biakpiakna a man ciangin theitui leh moh lim tak tawh CZCF in kikhawm mite hong vaak hi.

Chennai ZCF memberte pen kumpi nasem, sangkah leh sepna tuamtuam nei hi uh a, a tawmzaw pen hotel leh company a nasem ahih manun hun ngah ding haksa mahmah hi. Kiginni leh Nipini pen amau adingin a buaipen hun uh, khuan (leave) lak a haksat hun ahi hi. Ahi zongin Pasian a zahtakna uh hangin manlah pipi mahin, hun tom cik a neih sung uh Pasian phat nadingin zat teitei sawm uh hi. Mundang, gamdang, minamdangte lakah omin, nu le pa, u le nau, meltheihte sawl zawhna leh launa hang hi loin, a ut bangbangun om thei napi Pasian a zahtakna uh hanga biakpiakna a piak tangtangna uh ka muh ciang thupi ka sa hi. Zomite koikoiah i om zong, amasa penah Pasian mah i thupisak kisam hi.

Chennai ZCF phakna tawh kisaiin lungdam koh ding tampi om hi. CZCF makaite in phak theih nadingin hun hong pia uh a, nuam taka zin hong do innkuante – Pa Lang Sian Tuang, Pa Mangboi Suante, Tg. Muan Lian leh Pa David Manlunte kiphalna, zindo siamna leh kipiakzawhna uh thupi-in lungdam mahmah hi. Nek le dawn phal taka hong sikh banah, a tuam vilvel a CZCF makai pawlkhat tawh ann hong nekpih Pa Lang Sian Tuangte innkuan tungah lungdamna lian mahmah hi. Topa in Chennai Zomi Christian Fellowship kithuapih zelzel ta hen.

Note: ACA pana paite: 1. Thangbiaksang Ngaihte IV yr. M. Th., Imphal; 2. Khup Lian Mang III yr. M Th., Lanva; 3. Kap Khan Mung Shoute II yr M. Th., Lanva; 4. Angela Lun Hauzel II yr., Imphal; 5. H. Kaiminlian I yr., Simveng, Lamka; 6. Paolen Tuboi I yr M. Th., Saikul, Sadar Hill; 7. Heema G. Manju I yr. MBS, Imphal; 8. K. Muanthang Ngaihte I yr. M. Th., Vengnuam, Lamka; 9. T. Sawm Lian, Champhai, Mizoram.

28|1|2-15

ACA PAN HOPIHNA

ACA PAN HOPIHNA

Kum 2013 ZBC General Council in sangkah ding hong phalsak mah bangin sanginn tuamtuam ka en a, tuate lak panin mun nih – Asian Christian Academy’ Lai Siangtho sang ahi Evangelical Theological College (ETS), Hosur, Tamil Nadu-ah M. Th (ATA) sin ding leh, North East India a Lai Siangtho sang lian khat ahi Eastern Theological College (ETC), Jorhat, Assamah B.D (Serampore) sin theih nadingin entrance leh interview ka piak leh, Pasian huhna tawh cing tuak ka hih manin ACA, Hosur lamah pai ding ka khentat hi.

Serampore leh ATA

               Serampore ci-a i theih ziau Serampore College (University) pen Serampore khua, Hoogly District, West Bengal, India a om hi a, kum 1818 in ‘The Serampore Trio’ kici missionary thum – Joshua Marshman, William Carey leh William Wardte in a phuh uh ahi hi. Tulaitak SCC in a theihpih/saan (affiliation) college pen India, Nepal, Bangladesh leh Sri Lanka gamah sanginn 50 val deuh om cih Wikipedia panin kimu hi. Tua sanginnte-ah diploma pan a sangpen doctorate degree ciang dong kisin thei hi. Mizote laka thu leh la lama min nei mahmah Prof. Dr. Laltluangliana Khiangte pen Council of Serampore College (University) ah secretary hi a, Officers of the Senate ah convenor a sep laitak ahi hi. Gensa bangin ETC, Jorhat pen SSC in a theihpih/saan sanginn min nei leh kumlui mahmah khat ahi hi.

               ATA pen Asian Theological Association cihna hi a, kum 1970 a kiphuan ahi hi. A diakin Asia gam sunga Lai Siangtho sanginnte kipawlkhopna khat ahi hi. Tua banah, Asia gam bek hi loin theihpih/saan (affiliation/accredited) pen gam 27 sungah Lai Siangtho sanginn 212 nei uh a, gam 27te lakah India, Myanmar, Pakistan, USA, Australia, Singapore, Korea, Japan, Spain, Nepal, UAE, Taiwan, Hong Kong leh Indonesiate zong kihelin, phualpi zum pen Manila, Philippines gamah om hi. Tu a ka omna ETS pen ATA in a theihpih/saan sanginn khat ahi hi.

ETC sangin ETS, ACA

               ETS, ACA a lut theih nadingin March 15, 2014 in Guwahati-ah leh ETC a lut theih nadingin April 22 & 23, 2014 in Jorhat-ah entrance leh interview in ka pai hi. ETC, Jorhat pen North East India a sang minthang ngei khat leh minnei khat hi a, a kiphuh zawh kum 100 val ta hi. ZBC sia a tamzawte pen ETC pana zo (graduated) hi uh a, tua manin ZBC innteekna khat zong ahi hi. Ahi zongin a mun ka tun ciangin ka lamet bang loin, nidang bang zo nawn loin ka thei hi (a theite genna tawh ka tehkak ciang!). A mun le mual zong zuunloh Zogam tawh kibatna ciang nei ka sa a, ETC pen Zogam bangin ei aa kici thei taktak lo lai ahih manin nidang ciang, a kizuun man leh zuun dingin nusia photin, a kizuun sa leh a kipuahpuah kum 1976 a kiphuan ACA lam mah zuan phot dingin ka khentat hi.

ETS, ACA

               Evangelical Theological Seminary (ETS) pen ka sangkah nading mun hi a, tua pen Asian Christian Academy (ACA) nasepna hiang khat leh ACA huang sunga om ahi hi. ETS sanginnah Master of Biblical Studies (MBS) kum nih leh Master of Theology (M. Th) kum li sin theihna om hi. Tua banah ACA huang sungah Agape Hospital ciin Zato lianpi khat zong omin, biakinn, auditorium, library (Wi-Fi free), office, hostel leh family quarters tampi om a, library building ding lianpi khat a kilamsaan laitak ahi hi. Tukpeng (football), volleyball, basketball, leh badminton kimawl theih nading mun zong kicing takin om hi. ACA pen mun dang panin en lehang inn a kimu lo thei ding zahin singkung tamin lian thei a, coconut leh haai (mango) tam mahmahin, a gah zong gol thei mahmah hi.

Asian Christian High School (ACHS) kici, tan 12 ciang sin theihna zong om a, sanglutman (admission fee) bekbek zong Rs. 35,000+ bang ahih hangin (tuition fee a tuam om lai) naupang 2600 val om dan hih tuak. Sanginn hoih khat ahih manin hih sang pana zote mun dangah baih takin lut thei ci uh hi. ACA huang sungah (kei adingin) kamtuampau vive zang uh a, ka theihsiam hun bang zong om hi! Kisin ding tam mahmah mawk. A sung om nasemte leh a tate un ko a pai thakte ka mai-ngal theih nading un gamta-in, a nuntakna uah etteh ding tampi om hi.

ACA pen Tamil Nadu state sung, Bangalore (Bangaluru) leh Bagalur khua kikal, a khua kisat zawh kum 800 a valta, kum 2011 kisimpi-ah mi 3,26,821 omna Hosur khua sung a om hi a, mawtaw lam kiang a om ahih hangin mawtaw leh bil am thei ging tuamtuamte in a buaisakloh mun nuam mahmah khat ahi hi.

ACA tunna

               June 1, 2014 pan koh, laitan ngeina (secular background) pana M. Th leh MBS zom dingte kha khat sung orientation class nei ding ci uh ahih manin May 27, 2014 in Aizawl pan paikhia dingin letmat (ticket) ka la hi.

               May 26, 2014 in ka Nu Niang (Cing Go Niang) in thungetna hong neihsakin – pawlpi mite, lawm le gual, leh ngaih teng tawh gibang khenin Pa Piang, Ngur khua sumo tawh Champhai pan Aizawl ka zuan hi. Aizawl pen tung baih bilbelin, Pa Tualboihte innah kinga-in, Tg. Samuel tawh vaknopna pawlkhat-ah ka vak man lai hi.

               May 27, 2014 in Pa Zam Lian Mang, Lecturer, Govt. Saitual College in a mawtaw (car) tawh Lengpui vanlengtual tan hong kha a, Pa Mang lawmnu Nu Niang leh Tg. Samuel in hong zui hi. Amau tegel pen ka bodyguard uh cihna zong hi tuan lo hi!

               12:35 ciang Lengpui vanlengtual pan muhngeilohna gam zuan dingin lengkhia-in, Guwahati leh Kolkata vanleng tualah tawlkhat ka khawl khit uh, thumvei vanleng ka tuanna-ah cidam takin zan nai 9:15 kiimin Bangalore vanglengtual ka tung thei uh hi. Guah tam pian ahih manin khua phelepin van ging zuazua a, ka lawmpa khat in, “Vanleng sunga i tuan laiin na lau hiam!?” ciin hong dong a, ke’n, “Aw, van-ging hi maw….. Guah zong a tam mah ve leh..” ciin ka dawng ziau hi. Ihmut a nop taktak ciang van-ging zong kiza thei lo dan ai ve….

               Vanleng pan pusuakin ka vante uh ka lak khit uh ciang kongkhakah ka pusuak uh leh, kalate mi bangzah hiam, pakkual tawiin kongkhak kiangah na kigual uh hi. “Pakkual liang tawh hong dawn/muak ding thei kei sing e, hong thei khial hi nuteh…. Aw… midang zong hi thei ei” cih ngaihsun kawmin ka pusuak leh, ka upmawh bang lianin kei ading hi loin, ka nung a hong pai lai ding, kei sang a (amau ngaihsutna-ah) a thupizaw om ahih lam tel takin ka thei pah a, tuhun pen kei hun hi lo hi, ciin ka sang siam lel hi!

               Kristu Jayanti College, Bangalore a B.A kum nihna a sin laitak Tg. Thang Lam Tuang (Mama) s/o Upa T. Thang, Champhai in hong dawn a, aman bel pakkual tawi se lo ahih manin ka kibansah (cibai) khit uh ciangin Bangalore ka pai nading uh mawtaw lam zuanin, ka lamlak  lawm SAIACS a M. Th sinlai khat tawh ka pai pah uh hi. Guah tam luat man zong hi tuan loin, gate a tute computer hoihlohna hangin mawtaw sungah naikal lang dektak ka om uh a, mawtaw-hekte thangpai lua uh ahih manin gate dutyte tawh tawlkhat a kinial khit uh ciangin computer tawh bangmah kisai loin ka pai thei uh hi. Computer khawng i deih mahmah a, i zat nop mahmah hangin piang zo nai taktak lo ahi mai diam, ciin ka ngaihsun a, game kimawl nading khawng beka computer i lei zel mawk bang bel… ciin kisai lopi-in ka ngaihsutna sausak mahmah hi.

               Tua zan pen Tg. Mama kiangah giakin, a zingsang ciang ACA lam zuan dingin ka kizuikhia kik uh hi. Rs. 250/- tawh auto rickshaw ka zat khit uh ciang City Market kici, Bangalore khuasung taktak tungin, tua mun panin Hosur pai ding mawtaw ka ngak uh hi. Manglai kitamzat lua lo ahih manin Hosur pai ding mawtaw thei loin, conductor ka dot uh leh, a nihveina-ah Hosur pai ding ka tuak kha bilbel uh hi. ACA a M. Th a sin laitak Nu Nem Khan Cing, Tamu leh Pa Khup Lian Mang, Lanva in, “Hosur bus station panin Rs. 150/- kiim tawh auto rickshaw in kipai thei” ci uh ahih manin auto rickshaw ka dot uh leh, ka khuahek dan uh tual-tel hong sa nai lo ahi diam, “Rs. 400/-“ hong ci mawk!. Paisanin a dang ka dawp uh leh a tawpna-ah Rs. 160/- in pai nading ka mu bilbel uh hi.

               ACA ka tun uh ciang Nu Nemi hopihin, aman a inn (quarters) ah ann hong nesakin, tua khit ciang office ah hong paipih a, vai nuam tuam mahmah hi. Laitan ngeina (secular background) pana orientation class nei ding mah Bandung, Indonesia panin mi khat hong tung lian ahih manin ka nihun quarters khatah hong tungsak uh hi. Ka lawmpa pen Da-Wood, kum 52 hi a, zi nei lo, Hebru leh Greek mahmah a sin nuam a ACA a hong pai, M.A zo sa ahi hi. Amah tawh zan khat ka giakkhop khit uh ciang mun dang khatah hong suan uh a, tua laiah kei bek zan khat giakin, a zing ciang a tha lian mahmah, orientation class nei ding mah MBA zosa Jonley Sam, Kerelate ka room-ah hong koih uh a, pata mah ka bang uh hi!

Nek le dawn leh…..

               Nek le dawn pen khai-gah leh dailuah hi pipen a, sa zong khatveivei om zel hi. Zingann (breakfast) pen zing nai 8:00, sunann (lunch) pen sun nai 1:30, nitakann (dinner) pen nitak 7:30 ciang ka ne uh hi. A tangpi thu-in sun leh nitakann pen nek theih gawp a, zingann bel nek theih hun om cih ding hi.

               Kikhopna-na pen ACA huang sungah biakinn om a, tua laiah kikhop theih hi. Kikhop nading mun dang a neite pen kikhaam loin a ututna uah kikhawmsak uh a, sangsia leh sangnaupang pawlkhat pen mun dangah kikhawm thei zel uh hi.

               Jorhat ka pai laiin “mi hau thei uh ei maw,” ka cih leh hi lam zong tua bangmah na hi mawk. En kisap lei nading khawngin i neihsa a dang khawng i zuak laiin, amau kisap melloh nadongin a kicing takin nei uh a, bang kisam a, koi mun panin kilamdang i hiam cih khawng ka ngaihsun hi. Zomi pawlkhat bang, Khristian hoih or Pasian nasemte or pawlpi pen a zawng khilkhial ding-a a tuat leh a deih pawl bang om mai ding hi ei.…. Mi pen tua bang het lo uh hi. A maan lo a hauhna leh pilna-siamna neih ding lam hi loin, Pasian tung pana pilna-siamna leh hauhna pen a nei, a zeek leh a piakhia ding Khristian or pawlpite i hi hi. “Mi sang a niamzaw ding a Pasian hong bawl hi tuan lo” cih la pen i nuntakpih taktak hun ding ngaklahhuai hi.

               ACA huang sunga inn omte pen – House of Peace, House of Fellowship, House of Harmony, House of Wisdom, House of Worship, House of Joy cih bangin a min phuak uh a, ko omna pen House of Wisdom, room nambat 301 ahi hi.

Lungdamkohna

               Laphuaktu khat in, “Lungdamkoh ding simloh lei bat dang ken nei keng” a cih bangin hih ciang ka tuna pen lungdam nading vive hi. Hong makaih a, lam hong lak leh hong kithuahpih den Pasian tung pan kipanin, vaihawm upa leh sia, hong deihsakte tungah nakpi takin ka lungdam hi. Entrance leh interview pia a ka pai pan kipan sum le pai hong piate, ann hong nekpihte, laibu hong letsongte, thungetna tawh tatsat lo a hong phawkte leh, ACA ka pai ding ciang Vapar ZBC in khakna hun nuam leh limcitak hong zatpihna leh niangtui hong tawi uh banah, lamkal ann nek nading ciin letsong hong piakna hangin lungdam mahmah hi.

               Genloh theihloh, Guwahati leh Jorhat a entrance test leh interview ka pai lai a hong kithuahpih den Tg. Thang Khan Lian @ Pate, B.A., LLB s/o Rev. Gin Lam Thang, Shillong; Aizawl khawsung a hong vakppih a, Lengpui ciang hong kha Tg. Samuel leh Pa Zam Lian Mangte nupa, Lengpui vanglengtual pan ka kithuahpih SAIACS a M. Th sin laitak Tg. Lalengzaua, Lunglei; Bangalore a hong muak-a a kisam teng hong buaipih Tg. Thang Lam Tuang leh ACA a nuam taka zin hong do leh hong buaipih Nu Nemi tungah genkhitzawhloh lungdam ka ko hi.

               Kei thukkik ding lametna hi lo a, Pasian na itna uh leh a nasem cingtak lo nong deihsakna uh hangin na sup na baina khempeuh uh Pasian in a zah tampi in hong thukkik ta hen. Amen.

Thuhialna

               Tukum M. Th sin thak ding pen mi 24 leh MBS sin ding mi 9 ahi ung a, Indonesia, Myanmar leh Nepal banah India gam state tuamtuam 12 pan paikhawm ding ka hi uh hi. Orientation class pen M. Th & MBS sin lo dingte in zong kha khat sung bek hong siim thei uh ahih manin 15 ka pha uh a, tuate pen Nepal, Indonesia, Kerela, Tamil Nadu, leh Mizoram pan ka hi uh hi. Tuate lakah MBS sin suak ding 1 leh M. Th. sin suak ding 5 ka hi uh a, a dangte pen – kumpi nasem, LLB sinlai, Engineering sinlai, Evangelist cih khawng ahi uh hi. A hanciamna uh leh a sinnopna uh thupi ka sa hi. Pasian hang bekbek a mi hi teng, gam leh khawk tuamtuam pan kimukhawm cih ka ngaihsut ciang Pasian thupina ka phawk semsem hi.

               Meel le puam, deihdan, ngaihsutzia, siamna, theihna, neihna leh muhzia kibang lo pipi omkhawm (lai ding) ka hih manun note thungetna ka kisam mahmah hi. Nek le dawn, pau le ham leh a dang tuamtuamah haksatna nengneng om a, sin ding tampi maban nei lai ka hih manin a kuamapeuh in thungetna-ah nong mangngilhloh ding uh kong thuum phapha hi. Hi ciang hong tunpih Topa Pasian in i thungetna guaksuaksak lo hi. Hong tam lua kha zel in ciai, hun khat lai a laikhak danin “Gennop tampi tawh hunsak phot ni”.

Ka address :           

301, House of Harmony

Asian Christian Academy

Jeemangalam, Bagalur P.O.

Hosur, Krishnagiri District

Tamil Nadu – 635 103

~ T. Sawm Lian || Daihna Cabin, 2.6.2014

KHUADO PAWI 2013 NUAM TAKIN KIZANG

KHUADO PAWI 2013 NUAM TAKIN KIZANG

Zomi Cultural Society, Mizoram innteekna tawh Khuado Pawi 2013 pen Champhai khua sunga Bethel Community Hall-ah October 1 & 2, 2013 sungin nuam takin kizang hi.

October 1, 2013 in Mizogam sung khua tuamtuam panin Khuado Pawi leh Zomi Cultural Society Assembly zang dingin zin tung khawm a, Bethel Community Hall zong zat theih lian dingin a mansa-in omin, tumging tuamtuam ging ziahziahin, mun dang pana Pawi sim dingte lawpsak mahmah hi.

October 1, 2013 nitak lam nai 3:00 inZCSM Assembly, Pa T. Thang, President, Sub – HQ, ZCSMte inn-ah kinei a, tua hunah Mizogam sunga ZCSM makaite in kamkupna hun nuam takin nei khawm uh hi. Hih hunah – Unit omlohna, Zomite omna khuate ah ZCSM Unit phuh ding, Khuado Pawi pen Sub-Hq. leh Unit makaite tawh kithuzak a, zatkhop zel ding, leh Ngeina niik leh puante a bawl/a ngan nuam a om leh Zopuan maan taka bawl dingin kisam a sakna thute uh genin zuih a, sep pah dingin pha sa uh hi.

October 1, 2013 zan hun nai 6:30 in kipan a, Chief Guest Pu J. H Rothuama, Minister, Land Revenue & Settlement, Co-operation in Pawi honna hong neih khit ciangin Host Robert N. K Hau in hong makaih a, Upa Cin Than Tuang in hun-apna hong nei khit ciang ZCSM General Secretary Pa Nang Sian Mung in meel kilahna leh ZCSM report hong pia a, ZCSM pen Mizogam kumpi in a theihpih hi a, cimawh huhna, career awareness, pawi zat theih nadinga a mapan zelzelna uh leh nasep tampi hong gen banah, sep lai ding tampi a omna thu zong hong pulak hi. Tua khit ciangin tulai Champhai leh a kiim (mun dang thei lo ka hih manin) a la siam khat ahi Thangromawia Thomte, Hnahlan khua-in zaila tawh hong aw a, hall dim ziahziah in, tawhlet leh kongkhak panin a en nuam kiphu ziahziah hi.

Pu J. H Rothuama in thugenna hun hong nei a, Hih bang Zomite pawi thupi-ah zingmang dingin ciala a om pen a lungdamna leh Mizogam sungah minam tuamtuamte in i ngeina, pau le ham kepbit a kisapna thu leh, Mizogam kumpi in Zomite hong itzia, Sialkal Range Development Board pen tunai-in Sialkal Range Development Council ah upgrade ahihna thu hong pulak a, mipite in lungdamna khut kibeng ziahziah hi. Minister pen a lawmnu in hong kithuahpih thei a, ZCSM in lungdampihna Zoniik pia uh hi. Minister in hih pawi zat nadingin Rs. 1,00,000 hong piakhia hi.

Tua khit ciangin Zomi Cultural Club, Champhai panin la sakna kingaikhia a, tua pen Bethel Veng VCP Pu Lalsanglura Zote in thugenna tawh hong zom hi. Tua khit ciangin T. P Khaw Lian in zaila tawh siam takin hong awi a, Pa Hang Thawn Tuang, Treasurer, ZCSM Hq. in thugenna hun hong neih khit ciangin, Zomi ngeina puan tuamtuam lahna, Zomi nungak leh tangvalte 30 gualin hong nei uh a, etlawmin, a silhte melhohna thutuam hi leh, Zopuan tawh a kizem zitzet mihing pen etlawm mahmah hi.

Tua khit ciangin live music show thupi takin hong zom a, Aizawl pana hong pai Project ZOMUS, Champhai Band leh Zovontawi Bandte in mipite bil cimsak man het loin tum theih ci tuamtuam tawh hong awi ziahziah uh hi. Zomi suang la siam tuamtuamte in hun hong zang uh a, mipite lawpin, lamin diang ziahziah hi. Rev. P. S Za Tuang in hunzawh lungdamkohna hong neih khit ciangin kham lo takin zan hun kizo hi.

October 2, 2013 sun hun pen nai 10:00 in kipan kik a, Master of Ceremony (MC) in T. Sawm Lian pang hi. Chief Guest in Champhai North Constituency MLA Pu T. T Zothansanga kizang a, amah hong tun ciangin Vengthar Unitte in Phiit Lam tawh in pua panin hong lutpih uh a, a tutna ciangah hong kha uh hi.

MC in Pawi pen minam tuamtuamin nei a, gualnopna, kilemna, ki-itna leh kideihsakna hun ahihna leh, tua dingin Pawi zangte khempeuh lungsim kihong takin om kisam hi, ciin, mipite, zingmangte leh tavuan nei ding tuamtuamte vaidawnna a neih khit ciangin Pu Pau Suan Gin, Treasurer, ZCSM Sib-Hq., Champhai in vaidawn thugenna nei hi. Rev. Suan Khan Thang in hun-apna a neih khit ciangin Vaidawnna la, Zomi Cultural Club (ZCC), Champhaite in siam takin …

1.             Tun sung khat piang Cimnuai tate,

                Kawlgam, Vaigam, Sim le Mal ah;

                Gibang khenin laizom melma

                I suak khin ta,

                Sing dang phung lian limbang belin,

                Na minam na ngeina thei lo,

                Na Topa zong phawk nawn loin

                Albang mang liang ding maw?

2.            Tun sung khat piang Cimnuai tate

                Kawlgam Vaigam Sim le Mal ah;

                Gibang khenin singta laiah,

                Saltang khin ta,

                Khangtheilo ni, taikhuaval ta,

                Tuibang gawm ni, laizom teng aw,

                Gual eng lel di’a mimbang a piang

                Sian laitan lah hi lo a.

Lunglau lo aw, Zogam lei aw, sawt nawn lo ding,

                                Sian in lumbang hong sung ding a, Ni hong taang ding;

                                Anbang kong itna ka luankhi, malbang kong kohna ka zaila,

                                Va leng in la, ka laizom teng, hambang va huai dih aw.

3.            Tun sung khat piang Cimnuai tate,

                Kawlgam Vaigam Sim le Mal ah;

                Gibang khenin gual in nuihciam

                Hong lel khin ta;

                Zo Phualva tawh kiciamtehte,

                Va-ak tang ding lungah lau veng,

                Han lungciamin mabang pangkhawm

                Tuibang luang khawm ve ni.

4.            Tun sung khat piang Cimnuai tate,

                Kawlgam Vaigam Sim le Mal ah;

                Gibang khenin mimbang pianna

                Zong phawk nawn lo;

                Sesum minthang leh ka Topa

                Min leh za lian leh ka minam,

                Khek thei kei ning zuak ngam kei ning

                Ka sisan mah gumzaw ning….  Cih la hong sa uh hi.

ZCCte in la a sak zawh uh ciangin thupulakna leh Singapore pan Khuado Pawi zatna tawh kisai hong phawk a, deihsakna lai Dr. Hau Za Cinte nupa in hong khak simkhiatna hong nei a, Khuado Drama lahna Ngur Unit in hong neih khiat ciangin Zomite hunzatna thupite-ah a kihel den Buhtuh laam, Aizawl unitte in hong nei uh hi.

Hall sungah mipi dim phitphet in kitu a, a pua lamah hall sunga zah sanga tamzaw omlaite zong lawp thei mahmah uh hi.

Pu T. T Zothansanga, Chief Guest in thugenna hun hong nei a, Lungdamkohna tawh bul hong panin, Zosuante pen i hihna tak thei loin, mangthang dekin i om uh hi. Tua ahih manin i ngeina, i pau i hamte kembitin, puah a, zuun a, khantohsak a kisapna thu lim takin gen a, Mizogam sungah ngeina a khahsuah pawlkhat om khin a, Zomite pen ngeina kician a neite lakah kihelin, a mangthang loh nading pen Zomite tavuan ahihna thu lim takin gen hi. Mahatma Gandhi in India gam pen huan lianpi sunga paak tuamtuam omkhawm hi, a cih mah bangin, eima ngeina leh pau le ham bit taka I kep leh tuate pen hong etlawm mahmah ding hi, cih thu gen hi. A genzelna-ah, laisinna thupi ngaihsut kisam ahihna thu gen hi. Pilna siamna lo tawh tuhun ciangin bangmah taktak sep theih loh a, tua ahih manin pilna siamna neih nading mah hanciam belin nei dingin a paikhawm mipite vaikhak hi. Minam mangthang tampi om ahih manin Zomite in ngeina khahsuah lo a, a khantoh ding a deihna thu gen belin nei hi.

Pu T.T. Zothansanga pen kum 2012 sunga Best Parliamentarian nominate mi 6 lakah kihel a, A MLA fund pen a bial sunga siikkang inn neilote in inntung khuh  nadinga siikkang lei nadingin zang a, “Bi inn beisakna programme” cih pankhia hi. Aman Pawi zatna hunah nek ding Bawngtal lei nadingin Rs. 30,000 hong pia hi.

Zinmang in thugenna a neih khit ciangin Champhai a la siamte laka khat Zoramthara Hnamte in Zopau ngiat tawh a kiphuak la hong sa a, mipite lungdamin, zakpih ziahziah uh hi. Tua khit ciangin Pa Gin Za Go, President, ZCSM HQ in Khuado Pawi tangthu leh Zomite kisap thu manpha tuamtuam hong gen a, tua pen Zomi Cultural Club in Khuakhai Lam tawh hong zomto uh hi.

ZCC in Khuakhai lam hong neih khit uh ciangin Zomi Innkuan Aizawl panin Vice President, Pa Hang Thawn Tuang in Zomi Innkuan nasepna, kalsuandan leh mai lama ngimna tuamtuam hong pulak a, Zomi Innkuan pen cimawh gentheite huh ding, a diakin meltheih leh u leh nau a nei lo Kawlgam lam pana hong pai, siat tuakte buaipih ding a kiphuan ahihna leh, Zomi Innkuan sum pen gualnopna lamah kizang vet loin, sihna-manna, dongtuakte huhna bekin kizang ahihna thu pulak a, ma a bung khawm a om leh lungdam takin kisang ding ahihna thu pulak hi.

Aksi Lam muhnop tak Aizawl unit in hong lak uh a, tua khit ciangin Paite Tribe Council (PTC)Hq. panin Pu C. Lawmkima, Vice President in PTC kalsuanzia, sep ding leh maban tuamtuam pulakna hun hong nei hi. Aman a genna-ah, PTC in hun sawt pek panin Autonomous District Council na ngen khin uh a, ahi zongin tu ciang kimu lo ahihna leh, i minam pen pangkhawma, a hatzaw sema kalsuan kisam a, tua dingin khangnote in makaite nung i thuap ngam diam? ciin tona bawl hi. A genzelna-ah, A diakin Zomite pen I omna gam tuamtuam-ah mite nuaiah i om uh a, Kawlgam hi ta leh, Manipur hi ta leh, Mizogam sungah mite nuaiah I om uh hi. Tua ahih manin, khantoh nadingin nakpi takin I hanciam kisam hi, ci hi. Tua khit ciangin Pu Dal Khen Khai, President, PTC Hq. in Delhi a zinna report uh, lai poimawh tuamtuam phualpi kumpi a kipiakna thu leh Delhi a tam sunga a kithuahpih mite tungah nakpi takin lungdam ahihna thu banah, sep ding bawl ding tampi om lai a, pankhawma  kisapna thu hong gen hi.

PTC lam pan thugenna hun a man ciangin Pu C. Vanlallawma (Thangkura Pu), Mim Kut Organising Secretary in hun tomcik sung hong zang a, Zopau tawh hong pau bualbualin, upmawh zah sangin siamzaw hi. Khuado Pawi huhna ka pia nuam, ci a, a sang dingin MC sam hi. MC a kiang a tun ciangin a ipte sawk kawikawi a, bangmah nei lo ahih manin piak ding nei lo kik hi. Tua bang mah dinga kilamen khat mah ahi hi. Tua bang ding maha lamet ahi hi.. ama nuntakzia panin….hehehe

Pa Nang Khaw Suan, Aizawl khua in Sahang lu kanna hong neih khit ciangin Hnahlan lam lasim Thangromawia Thomte in Zola tawh hong awi kik a, tua khit ciangin Pa T. Thang, President, Sub – Hq.,Champhai in thugenna hun hong zng hi. Minam tawh kisai, kepcin a kisapna, puah a kisapna, zuun a kisapna, leh thu manpha tampi hong gen hi.

Lungdamkohna, Pa Nang Sian Mung, General Secretary, ZCSM HQ. in hong neih khit ciangin mipite in ding kawmin ZCCte lasak, “Tun sung khat piang Ciimnuai tate…” cih la sa in, a sak khit uh ciangin Rev. V. S Tuang in hunzawh lungdamkohna nei hi.

Hun zawh lian cianga nek pah theih dingin Vaimim leh Bawngsa huankhop in hong ngak gige a, Zomi nungak tangvalte in hong hawmin, kuang nih, kuang thum a ne tawh, tua sanga tamzaw a ne tawh, lim sakna thu a kihilh-hilh tawh, mipi 1500 – 2000 kiim in Khuado Pawi 2013 Pawi ann kine ziahziah hi.

Pawi ann a kinek khit ciangin Ngeina Laam tuamtuam inn tual ah kinei kik a, Phiit Laam, Daak Laam, Sawngsiik Lam, Zangta Lam, leh Khuakhai Laamte Leisenzo, Vapar, New Champhai, Vengthar, Bethel leh ZCCte in hong neih uh a, hih hun man ciangin Mipi in Lamgui kai-in, nuam takin Bethel Community Hall mai kituancil a, khamlo takin hun kizo hi.

 

Hih Khuado Pawi hun tawh kisai a lungdamhuai mahmah pen, Zinmang (Chief Guest)te in hong thupi bawl mahmah uh hi. Zu kham ann khama a kilawm lo lua-a gamta om loin, gualnuam takin pawi kibawl a, Pa H. T Khup in khuadang pana mawtaw zang khempeuh a diesel / petrol siksak a sawm hi mah leh, Petrol Pump kisiatna hangin sikhsak thei lo a, ahi zongin hih banga a kipiakna thupi kisa mahmah hi.

Pawi zatma panin Champhai khua sunga Zomite biakna Pawlpi tuamtuam, ZCSM Unitte, ZCSM HQ leh mi phatuamngaite kipiakhiatna hangin nakpi takin pawi lawhcing a, Aizawl leh Mizogam khua tuamtuam pana hong paikhawm mipite hangin nuam kisa hi. Champhai khua sunga Daily Newspaper leh Cable TV Operatorte banah, DDK lam panin zong hun hong zatpih den uh ahih manin lungdamhuai a, khantohna khat ahi hi. Mai lamah hih banga Khuado Pawi leh Zomi Nam Ni-te zatkhop theih hi leh, cih mipite lunggulhna lianpi om lai hi……

Daihna Cabin | 3.10.2013