KHUA

                Khua thupina hang pen Tuuno ahihna thu la in gen a, lamdang mahmah hi. Tua a tawntunga thu maan omsa i gen ma-in, lei lama khuate bangin thupisak a, khua zahtakhuaina bangte hiam cih leh, bangci bangin khua om ding hiam cih na ngaihsun ngei hiam?

                Lungdambawl leh kum thak hong tun ciangin i delh tantan uh pen Lungdambawl leh kum thak hi lo hi. Koi mun peuhah om leng Lungdambawl leh kum thak om khin hi. Khua sunga car, T.V, leh biakinn cih lam zong hi lo hi. Tuate pen ei khua sangin mi’ khua-ah tamzaw a, ahih hangin ‘ei’ khua-ah zang dingin mun gamla pipi panin i delh tantan hi. Khua bekbek pen i delh hi lo-a, a mihing omte ahi i delh uh. Mihing leltak maw? Mihing bekbek a lunggulh hi leng, i khua sangin mi’ khuaah mihing tamzaw pek hi. Tuabang mihing tamzawkna munah i thawmhau/lungzuang uh a, tua manin i khua sese-ah zat i ut hi. Mihing tektek zong, i lungsim kibatpihte omkhopna muna tuate tawh zatkhop a ki-ut ahi hi.

Khangnote

                Tua i lungsim kinaipih mite lakah zong ciah a nuamsak mahmah pen a sunga om khangnote nuntakzia ahi hi. Khua pawlkhat, tangvalte in nuamsa diak uh a, kisap leh lunggulh dang nei lo bangin om uh a, amau bek hi loin a khua veng tangvalte tawh zong kithutuak uh hi. Nungakte in tangval zukham a thupisimlohna khua-ah tangvalte in zu kham ngei lo uh hi. Nidang lai hun pek panin tuhun ciang dongah nungakte in khuasung nuntakzia-ah nakpi’n mawhpuakna nei-in, thu genden uh hi. A khatvei nuih bekbek un zong khua nuamsak a, kikhawm dinga a kizawn uh leh, misi inn lam zuana kinawh taka a pai uh khawng, tangval genloh, naupang neucik pan kipan teeksia dongin khentuam nei lo-a a hopih nopna bek uh zong, sum a lei theihloh a manpha mahmah ahi hi. Tua bang nungak a omlohna munah tua muna tangvalte in khuadang nungak zi dingin nei nuam mahmah uh hi.

                Khua pen kibang kim thei lo a, khua dangin a neih khat uh pen khua pawlkhat in nei lo a, a omna mun tawh kisaiin a hampha deuh khua leh a hamsia deuh om lo theih lo hi. Ahih hangin lungnuam taka nungakte leh naupangte a nuih ziahziah theihna khua in, mi khua neih bang nei kim kei mahleh lungnopna, nopsakna leh khua kimakaihna hoih neiin, a sunga mite suakta cih kithei a, tua bang omna khua pen khantoh gim nam mahmah hi.

                Khua sungah bangci banga na thupi leh hoih omin, a sunga teeng mite a hauh mahmah uh hangin,  khua sungah tangval a kitot/kilai den a, zu leh guihtheih khamtheih tawh a kidiahna khua pen nuam ngei lo hi. Kisinsakna hoih om lo cih kilangsak mahmah a, gual-elna maan a nei lo khua ahihna kician mahmah hi. MLA pil leh pilloh sangin, i khua sunga tangvalte thukikup hoih leh hoihloh, thupi leh thupilohah i khua dinmun kilangkhiazaw hi. Tangval paikhawmte in mailam kalsuanzia ding kidemna maan, pilna leh khantohna thu a kikupna khua pen khangto a, tua khua sunga nungak melhoihte in khua dangah pasal nei lo hamtang hi. Tangval paikhawmte kithukup a thupi kei a, khantohna vai leh khuasung hoih nading a gen kei uh leh, khua sunga nungak melhoih, “Kei longal” a kicite, khua dang tangvalte in hong guksak nuam mahmah hi. Tua manin khangnote nuntakzia pen khua limlang poimawh penpen ahi hi.

Kum upate leh mi kaamsiate

                Kum upa, teekte leh mibang lote i etdan panin khua mel kilang mahmah hi. Teekte in zahtakna a ngahlohna, thupi ngaihsut a ngaihlohna, piteek puteekte, phawkna leh hehpihna a omlohna khuain thupha ngah ngei lo uh hi.  Tua mah bangin, mibang lo, mi poi simmawh a, ahihna ngeina uh sanga siazaw leh hoih lozaw ding a kiniam-etna mun pen zahtakhuai ngei lo hi. Biakinn sungah kum lam upate tut nading tuam bawlsak lo a, tuphah hoih lo-a a kitutsakna mun leh kum lama upate a kiphawklohna mun, a ngaihsutna uh leh hoihsakte a kizatlohna munah kithutuaklohna leh kilangbawlna om nuam a, Pasian nasepna thupi om thei lo hi.  Kum lama upate, tal kolhte, sam kangte, piteek puteek leh mittawte’ zat ciangkhutte pen bangci ngaihsut i hiam? Hihte pen eima deihna hanga khua-a om hi lo a, a kipelh thei lo, ama ut hunhuna innkuan khempeuh a pha ‘misi kuang’ tawh kibang hi. Misi kuang leh si luang ciang beka phatuamngai a, uzawte leh mibang lote a neu-et khua-in thupha ngah taktak lo hi.

Mi masate

                Uzawte zahtakna, mibang lote thupisimna, leh makai masate zahtakna lamah khanlawh kisam hi. I khua phutcilte kuate hiam? Bang lungsim pua-a khua na phut uh hiam? Tua lungsim pen khangthakte in a muban uh hiam? cihte pen i ngaihsun ngei hiam? Mikangte in, “Take it for granted” a cih uh, i ngah ding omsa a koih bangin i kingaihsun uh a, tua i ngah hamphatnate i ngah theih nadinga mi masate sep gimna leh kipiakna theihpih kisam hi. Zum le hiam, mihing leh sa lauhuai kalah, i khua-ah mei mit loin bul na pan uh a, a hai mahmah uh hangin a suan leh khakte uh buh le bal, neih le lamah kisikzo-in, nuntak nuamsa uh hi. Nuam taka khua sungah kilem taka i tenkhop theih nadinga a kipiakna uh thupi mahmah hi. Pawlpi zong a phutcilte ngaihsutna leh ngimna pen tuhun ciangin a kiphawk ban hiam? A kipiakkhiatna sate uh bangci bangin i ngaihsun hiam? Pawlpi phut cil mite suan le khakte pen a kilawm lo(!) zah dongin Pasian in thupha pia mawk hi. Mi masa, khua leh pawlpi phut cilte’ lametna leh lunggulhna a tangtungsak lo kua hiam? Khangluite kimawhsak thei lo ding a, tuhuna khangthakte mawhpuakna ahi hi. Mi masate sepkhiatsa tengah nuamsa-in, eima om munah nuam i sa khom mahmah uh a, om maimai leh neek lim lamah tai kidemin, tua banga nuntak pen khantohna danin i tuat uh hi. Tua lamah i kitaiteh lai takun, khua tampi pen khutdawh omkhopna, khua zahpihhuai leh mite pumvak khua kisuak mawk hi.

Khua nuntakzia

                Khua tampi minsiatna pen, eima khut sunga buhtang sang a khua dangte khut sunga buhtang lian muhzawkna hi nuam mahmah hi. Khua vengte ngahloh Pasian thupha i ngahte kimuhloh bawlin, khua vengte sanga i niamkiatna lai i uanggen uh hi. “Ko khua bel...” i cici uh a, i khua sunga mi hoih leh lawhcinna a ngahte bangmahin ngaihsun loin, i thupisim kei pongmawk uh a, khua dang mi ahih naak leh i thupi ngaihsutzaw pong uh hi. Pawlpi sungah nidanglai huna paidan ngeina bek thupi ngaihsutin, ciindan thak leh ngaihsutna thak om leh lungsim kawciik takin omin, suaktakna kikhakcip thei hi. Thakhat thu-a kalsuandan leh paidan laih pah saisai a hoihloh hangin, leitung khantohna tawh kituakin damdamin i kalsuanzia i heeksiam kisam a, a hoihzaw ding ngaihsutna tawh na khatpeuh a kigen ciangin lungsim tangzai tak tawh i maingat (response) kisam hi. Khantoh nading khatpeuh omin, bul kipan thak ding hi leh, “I khua nuntakzia hi kei; Nidanga i cihdan hi kei” ciin i phun pah uh a, khantoh nading nasep ding a om ciangin lungsim kihong taka om sangin, i kikhakcip uh a, khantohna in a kha zaakin hong lenmangsan zel a, mi kiban zo lo pah hi.

Kisap a theician khua

                Hun khat laiin singtang khua nuam mahmah khatah ka pai hi. A khua lut nading uh nuamin mun zaang, tawlngak nading a lem mahmah omin, a laiah sing lianpi khat om a, khuapi mite adingin tua sing nuaia tawldam a, huihvot nung hiauhiau diik pen nuamin khiatlahhuai mahmah a, tua khua pen phakden uthuai liang hi. Ahih hangin a khua neite in a manphatna leh kisapna thei lo uh a, tua sing pen phuk ding leh, tua munah community hall lam ding hoih sa uh a, kumpi tungah zong hall sak nading ngen uh hi.

                Khua tuakcil a tuabang mun nuam leh tawldam nading singliim a om pen tua khua mite in a khua-uh a nuamsak leh a thupisak ahih lam theiban lo uh hi. Community hall pen lam ding uh hileh, kumpi in tua ding sum a kisamzah pia pah thei lo ding a, kum 5 sungin zong zo khol lo ding uh hi. A sa zo phial uh zongin hoih loin, i gam sunga community hall sia pipite laka khat hi lel ding hi. Tua banah manpha takin a zang ding uh hiam? Hall a neihna uh hangin ging pipi a lasa leh politiciante zuau gen bek ngaikhia mai thei uh hi. A khua mipite in hall sangin a kisap zawk uh pen tuikhuk hoih, siavuan leh siamah banah, nuntak nadinga kisinsakna hoih ahi hi. Khua manphatna a dausak leh niamsakna (lama khantoh sawmna), leh khua kisap sangin khua vengte tawh kidemna cih bang maimai i buaipih gawp ding lauhuai mahmah hi. Khua kisap mahmah sanga block president meetpih theih ahihna hanga kisam lopi-a i ngah uh bangzah takin a tam tam?

                Khuasung leh pawl sung vaihawmte in mipi phattuam nading a theihcet uh kisam hi. Amau inn pan kigamla lo cih man hiam, amau veng dinga phatuam bek ding hiam a ngaihsun mi’ ukna nuaiah khantohna leh kithutuakna om thei lo hi. Amau innkuan, a mau bawng, amau beh bekbek a ngaihsun mite makaihna nuaiah kilemna om thei lo a, ko, no, nang, kei a ci makaite in amakaihte khantoh ding sangin kilemlohna piangsak zawsop hi. Kisap sanga khat le nih meet nading bek ngaihsutna tawh kimakaihna pen cimtakhuai hi.

                Hih leitungah zong Tuuno Kumpi’ omna mun peuhpeuh - mun nuam, mun thupi leh mun zahtakhuai hiden ding hi. Tuuno Kumpi omna khuapi tun ding lunggulh taktak i hih leh, hih leitunga eima khua tekah, Pasian zahtakna leh itna, a kineihtawm hi lo lungsim cihtakna taktak tawh eimau khua tek pen deihsakna pia thakin, puahin zuunin, a khantoh theih nadingin hanciam ciat ni.

(Hih thu pen Vanneihtluanga in a gelh, pawlkhat ka behlap ahi hi. Daihna Cabin || May 2012)

Na Khangno Lai-in NANG HONG PIANGSAKPA PHAWK IN

(Thna. 12:1, I Tim. 4:12)

 

                Thuhilhna gelhpa Solomon in khangnote bekin Pasian kisam hi, a ci hi zenzen lo a, khangno laia Pasian phawkloh pen a lauhuai mahmah leh nidang cianga kisikna tampi a piangsak ahihna thu a gennopna hi a, upat khit ciangin na khat peuhpeuh sep baih nawn lo ahih manin, khangno lai hunin a manphapen leh a thupipen Pasian phawk dingin hong hanthawn ahi hi.

Piangsak pa

            A kipat cilin Pasian in lei leh van bawl a... na dang tampi leh mihing zong bawl hi. Tua ahih manin, ei hong piangsakpa pen Pasian ahi hi. Tua banah, Evi leh Adam lo siah, nute sung pan, pate si le sa tungtawnin Pasian theihpina tawh nute sung panin a kisuakkhia ahi hi. Tua hi a, hih muahah eite hong piangsakpa cih pen, a bulpi-ah Pasian hi a, tua zomah leitunga i nu leh pate ahi cih i phawk ding kisam hi.

Khangno

                Henry Ford in, “Mi khatpeuh kisin nopna lungsim a nei mi pen khangno hi” ci ziau a, a maan na ciang om hi. Leitung mite in khangno ci-a a saan uh pen kum 15 - 40 kikal khawng hi ding hi. Tua hun pen lungsim leh ngaihsutna, pilna-siamna, leh thatang a hat lai pen hun ahi hi.

A manpha khangno lai hun

                Leitung mi lawhcing, mi thupi leh Pasian mizat thupi khempeuh pen a khangno lai hun uh a zang siamte hi uh a, ahih kei leh lampiala a kilehkikte ahi uh hi. Innkuan, khua, pawlpi leh gam khantohna pen khangnote siat leh hoih-ah kinga mahmah a, khangnote nuntakzia in mailam hun ding saupi lak hi.

                Tua ahih manin khangnote pen manpha mahmah a, Lai Siangtho sungah zong khangno laia neih tate pen galhangpa khut sunga thaltangte tawh kibang hi. A thallawng dimin tua bang thaltang a neipa pen mi lungdam ahihna leh guallel ngei lo ding ahihna leh zahhuai ngei lo ding (Late 127:4) ahihna thu gen hi. Tua ahih manin, khangno lai na hih leh a manpha mahmah khat hi teh cih kiphawk inla, na manphatna a kilatkhiat theih nadingin hanciam in.

Na khangno lai-in nuamsa in; ahih hangin.....

                Thuhilhna 11:9&10 sung i sim ciangin thu nih phawk ding om hi. A khatna-ah, Khangno lai hun pen nuamsa ding, lungdam ding, kilunggimsak lo ding leh pumpi gentheisak lo dingin hong hilh a; a nihna ah, Khangno lai hun pen sauvei lo ding ahihna leh, khangno lai huna i gamtatna tawh kizuiin Pasian in thu hong khen ding ahihna thu i mu hi.

                Hih munah, Pasain in i ut bangbanga gamtat ding hong phal tawh kibang napi, mai lamah tua thute zangin thu hong khen ding ahihna tawh i pumpi’ deihna, a hoih lo-a gamtat ding hong kham lingleng hi. Tua ahih manin, pilvan mahmah ding kisam hi. Nopsakna, lungdamna, lungnopna zonloh ding hi lo a, ahih hangin, tuate i zonna lamah Pasian a lungkim diam? Ama deihna tawh a kituak ding hiam? Tua i gamtatna banga thu hong kikhen ciang i lung a kim ding hiam? cih pen ngaihsut ding ahi hi. Tua ahih leh, i khangno lai hunin bangci nuntak ding?

               

Khangnote nuntakzia ding

                Timoti Masa 4:12 sungah khangnote nuntakzia ding nam nihin gen hi. A khatna-ah, Khangno lai hihna hanga mite simmawh dingin omloh ding hi a; a nihna-ah kampauna, gamtatna, itna, upna leh sianthona-ah thu-um mite etteh dingin om ding ahi hi. Hih muna thu nih omte pen a kikhen thei kikeuh lo, a tonkhawm den ding ahi hi.

                Hollywood a limpiahnu (actress) minthang Marilyn Monreo pen amau hun lai-in a meel hoihna hanga leitung a zeel numei ahi hi. Ahi zongin, aman, leitungah nopsakna a zon dan khial a, mi khat bek ii zi dingin pammaih kisa ahih manin a nuntakna pen a ut bangbanga a zat leh sawt zang man loin, kum 36 mi bek hi-in a khan (room) sungah sisa in kimu hi. Tua banah la siam a minthang Elvis Presley zong Pasian kiang zuan nuam mahmah a, amah bek-a a om ciangin room sungah Pasian la sa-in, Pasian kihel lo a leitung nuntakna pen cimtak mahmah hi. Ahih hangin a leitung minthanna leh leitung nate nusia ngam lo ahih manin kum 42 mi bek hi-in O.D in si hi, kici hi.

                Leitung nopsakna pen bei pak a, paak palh tawh kibang lel hi.

Thu-um mite etteh dingin om ding

                Thu-um lo mite etteh dingin om bel a nop khitloh hangin haksa lua lo hi. A hoih lo ahih manin kizo bilbel a, i upmawhlohpi in zong ki-om thei hi. Ahi zongin, Lai Siangtho in khangnote pen mi maimai zong ahi lo, Pasian thu-um mite etteh dinga om dingin hong hilh hi. A bucing lo omkhawm mihing i hih manin, i hatloh pipi mahin, i hoihloh pipi mahin, thu-um mite etteh dingin om i sawm hamtang ding ahi hi. Tua dingin bangci gamtat ding? I Tim. 4:12 sungah Khristian khangnote nuntakzia ding Sawltak Paul’ laikhak tungtawnin kithei hi.

a)    Kampauna : Kampauna hanga na khempeuh a pianna thu i thei hi (Pian. 1). “Kamsiam in sial man” cih khat Zomite in paunak i nei hi. I kampau hoihlohna hangin i thuakloh ding tampi i thuak uh a, i ngah ding hamphatna tampi i taan hi. Tua tawh a kilehngat lian, kamsiam hanga hamphatna lianpipi a ngah zong tampi mah om hi. Tua banah, “Mi poi leh mi bang lo gensiatloh ding, poina leh mibatlohna in kai hun nei lo hi” ci-in kampau kidop a kisapna thu kigen hi.

                        Mi pawlkhat pen mi dang khat tawh a omkhop ciangin amau kianga om lo mi dang leh pawlpi peuh gensia lo-a a om thei lo mi om hi; tua bang mite mi ettehtaak leh mi thupi om ngei lo hi. Kammal kilawm, kammal zaknuam genin, mite hong simmawh theih nading gen pen kidop mahmah ding ahi hi. Ihmut sung nangawna a mangpau buaibuaite in, i kampauna tungtawnin mite in hong it theihna leh hong mudah theihna pen kimangngilh bawl hetloh dingin hoih hi.

b) Gamtatna : Mite hong simmawhna / zahtakna pen in gamtatna tungtawnin ahi hi. Zu khamkham, zatui khamkham, a zulhzau, zua a gengen, a gi lo mahmah mite pen mi dangte in simmawhin, a kiang uah om dingin zong deih lo uh hi.

                        ‘Zo ta ing’, ‘ngap ta ing,’ ‘hong thuk thei ken teh’ cih mana mi tungah siatna bawl ding hi lo hi. A hatte hatden lo a, a haite hai den lo hi; a zawngte zawng den lo a, a thupite thupi den lo hi, cih pen phawk den ding ahi hi.

                        Zomite paunak hoih mahmah tampi lakah, “Thallam cil siat eima tung mahah tu” cih leh, “Mi’ bawlin kisia lo a, eimah le eimah kibawl in kisia” cih om hi. Maan hi. Tuhun a haksatna leh gimna i thuakte leh i gentheihna pen, nidanga i gamtat siatna hang hi thei hi. Tua ahih kei leh zong, tuhuna i gamtat hoihlohna hangin, mai lamah haksatna tampi kithuak thei lai a, kidophuai mahmah hi.

c)    Itna : Khangno lai hun pen lungsim suahtak hun pen ahih manin mite it siam ding kisam mahmah hi. It luat mana pumpi piak ding cihna lam hi loin, deihsakna tak tawh amau huh leh panpih a, a siat nading uh pan kep ding ahi hi.

                        Lai Siangtho in eima pumpi ki-itna mah bangin i vengte it dingin hong hilh hi (Luk. 10:27; Marka 12:30-31). Eimah ki-it masa ding hanga, tua ciang ‘tua mah bangin’ i vengte i it ding ahi hi. Mi pawlkhat in a minamte zong it ngei lo, minamdang peuh itzaw mawk uh hi. Mi namdang i it nop leh ei minam it masa ding hang a, gamdang i it nop leh ei gam mah it masa ding hi hang. Tua pen Pasian thu tawh kituak hi. Amau pawlpi, minam leh gam a it khangno a tamna munah khantohna om hi.

d)    Upna : “Upna lo tawh kuaman Pasian lungkimsak zo lo hi” (Heb. 11:6a). Pasian in Abel biakpiakna a sanna hang pen a upna hang hi a, Noah leh a innkuante suahtakna, Abraham in thupha a ngahna, Moses in Israel mite Izipt pana a pikhiatsakna leh leikeu tawnin Tuipi San a kan tanna uh, Jeriko kulhpi kicipna, Gideon, Barak, Samson, Jefthah, David, Samuel leh kamsangte gualzawhna leh mavanna pen upna hang hi a, Pasian hanga simmawh bawlsiatna a thuak masate zong a upna uh hang mah ahi hi (Heb. 11:1-40).

                        La phuakpa in, “Na up, na muanngam zah nang a” ci hi. Maan hi. Leitunga mi thupite pen a ngiimna uh, “Hi thei hi” cih a ‘um’ cinten mite ahi uh hi. Khangnote in mailam hun saupi nei lai i hih manin i mai lam hun ding pen lametna lianpi tawh Pasian in ei tungah na lianpi hong sem ding hi, cih up ding ahi hi.

e)    Sianthona : Lai Siangtho sungah Pasian in, “Kei siangtho ka hih manin note zong siangtho un” (Siam. 11:44&45; I Pet. 1:16) ci hi. Pumpi sianthona pen cidamna tawh kizom a, lungsim siangthona zong kha leh pumpi damna tawh kizom hi. Khristian innkuan hoih a bawl dingin siangtho taka bul kipat hoih a, kiteenna siangtho tawh zong bul i pat kisam hi.

                        Pasian mizat thupi nihte - Daniel leh Josef pen nek le dawn leh numei-pasal thangtatna-ah siangtho uh hi. Mihing deihna a ukzawhna uh hang leh, Pasian a zahtakna uh hang hi a, Pasian in zong thupha tampi pia pah hi.

                        Khangno lai-a ha san nianua, sam lang thelthal, nin neinai-a om leh numei pasalna-ah a thangtat, a zulhzau mite pen kuamah in etteh ngei lo hi.

Thuhialna

                Tuhun leitunga mi nuamsa, a lungdam, a pumpi a gimsak lo mite pen Pasian a zahtak, ama deihna bang hiam cih a kan mite leh, hatin hat kei mah leh, ama nung a zui tantante ahi hi. Leitung a lungnopna  zong mite pen a nuntak uh tom a, mite etteh taak om lo hi. Khangnote in i khangno lai hun i zatsiamna tawh kizui-in, i pawlpi, i minam, leh i gam hong khangto ding a, maban limci nei ding hi. Tua ahih manin, khangnote in a kisam masa pen hong piangsakte ahi i nu leh pate leh i biak Pasian phawk a, amau deihna banga i gamtatna zahzahin thupha kingahin, kikhangto thei ding hi.

ZBYF Tangko Editorial (May 2013)

I lunggulh leh i ngaklah, ZBWS & ZBYF Silver Jubilee Pawi pen April 5 - 7, 2013 sungin Champhai ZBC biakinn ah nuam takin i nei thei hi.

I lunggulhna bang ciatin i zat ding ka lamen a, pawi ann zong gilvah takin  a paite in i nek tek ding ka lamen hi. Bang hang hiam cih leh, pawlkhatte in tua bek mah hih jubilee i meetpihna hi thei ahih manin!

I pawi thulu, “Pasian Zattak Mi” (2 Tim. 2:21) siksana thugenna hong nei eima siate - Rev. Cin Khan Tuang, Rev. Gin Lam Thang, Rev. Suan Khan Thang, Rev. Dai Do Thang, leh Rev. Thang D. L Pau Mungte siam mahmah uh a, amau laka a naupangte in thugen tuak a sa zaw zong mi pawlkhat om leh kilawm, ka bil in za!.

Pawi zangte ZBWS & ZBYF ii ann vaak ding bek phal loin (sep le bawl bel thu tuam), innteek pawlpi in pawi ni-in a kuan lamte do kik nadingin Sial tal lianpi khat hong semnen uh a, inntek pawlpi upate’ thusiamna leh vaihawm siamna thupi hi. Tua banah, mipi gamtatzia ding leh nuntakzia ding hoih takin pulak in, zu kham lua, za teep vuauvuau leh a kilawm lo lua a gamtatna biakinn huang sungah a omlohna pen Champhai LCCte geelsiamna hang leh mipite thumanna hang ahi hi.

Hun zatzia pen kician a, lawp pakna hang tawh hun zang om loin, a kigingkhol vive in hun kizang ahih manin hoih lel cih ding hi. Makai masate pahtawina pen numeite in phawk lo hiam, ZBYF makaite a letsong a kipiak ciang, kei a sang lo ding khat in nuam ka sa kei pong hi.

Hun sawtpi pana kigingkhol Jubilee Choir-te zong aw huut pipi a nungta taka la hong sak ziahziah uh pen tha-ngahhuai mahmah hi.

Variety Programme mahmah hi, a kihelte in nuam a sak uh. Tua banah T.V pana ente in zong muhnop sa mahmah mawk uh ahih ciang hun zatna pen maimai lo, cih kitel hi. Amakai pa (a min gen vet mai ni) Tg. K. Joseph in makaih dan siam a, khua tuamtuam pana kigingkhol sitseta tavuan hong la diamdiamte etlawm hi.

Tg. Thang Muan Lian’ tuahsiatna i thuakpih a, a veh nadinga sum a kidon  pen thupi ka sa hi. Amah hong dam mengmeng leh cih i deihsak hi. Sepkhopna lo tawh lai lam nasepna pen lawhcing thei lo ahih manin hanciam khawm ciat dingin i kizawn hi.