ZOMITE’ PHUAK LATE MAH

                Zomi i itdan a kikimloh mah bangin, i itzia leh i itdan zong kibang lo hi. ‘It mah ing’ a ci khempeuh in zong it tuan lo thei a, a gengen khol lote in zong it mahmah thei hi.

                Kawlgam sunga state leh division teng lakah a zawngpen Zomite tenna Chin state hi a, tua lakah zong Zomi (a kici diak) Tedim leh Tonzang township sunga tengte pen a haupen hi lo lai hi. India gam sungah gawlvak state tawmcik lakah Mizoram kihel a, tua state sunga a khangto lo (backward) pen munah Zomite teeng a, tua banah Manipur gam sungah zong meitha (electricity), nek le tak zonna (economic), kikawmtuahna (communication) a hoihlohna penpen district ah Zomite teng hi.

                Tua ahih manin, bang hangin ei Zomite mi neih bang nei lo, mi pil bangin pil lo, mi hauh bangin hau lo, mi siam bangin siam lo, mi namdangte zahin khangto lo mawk i hi hiam? cih pen a ngaihsuthuai mahmah ahi hi. A dawnna tampi om kha ding a, tu tungin ahih leh i minam aa mahmah i thupisimloh man hi, ciin i dawng phot ding hi.

                Kum 1904 kumin Khuasak khua pan Pu Pau Suan leh Pu Thuam Hang in Lungdamna thu na saang uh a, sangmangte khaici tuh Zomite lakah hong pokhia hi. Tua hun pan kipan Zomite, Pasian thu leh leitung nuntakna-ah i khantoh nadingin nakpi takin thasanin, i sangmangte mahmah in zong nakpi takin hong pantah uh hi.

                Sangmangte in Labu hong bawlsak uh a, Lai Siangtho pawlkhat hong teisak uh hi. Lai hong sinsak uh a, nuntak khuasakzia hong hilhin, ei leh ei a kivak, a kidon, a kikem thei ding leh a khangto dingin hong makaih uh hi. Tua banga hong makaih uh ciangin amau tui buahte hong khangin, amau maban zom a Lai Siangtho a tei ding mi bang hong piang a, Mikang kam pana kitei la i saksakna panin Zomite tualsuak la sak theih dingin pilna siamna Pasian in Zomite tungah hong pia hi. Thu leh la-ah, sangmangte a omnawnloh hangin ei leh ei a kivakzo, kizik so dingin hong pantah uh hi.

                Zogam khanlawhna hangin Zomite lakah laphuak siam, Pasian mizat bangzah hiam hong omin, tuate  in Zomite ading, Zopau leh Zolai mah tawh la hong phuak ziahziah uh a, minam khangto dangte mah bangin tualsuak la hoih nono i nei uh hi.

                Ahih hangin, hih late in Zomite sungah teek tang taktak lo hi. Bang hangin hih Zomite in a phuak la hoih nonote in Zomite lakah teek tang lo hiam? Ei zat ding, ei sak ding, ei puah ding, i thangahpih ding hi lo ding hiam? Mi namdangte sak ding leh minamdangte laam pih dingin ngaihsun zaw i hiam?

                Zomibup in labu zatkhop ding i gengen hangin, bang hangin i minambup in labu zang khawm thei lo i hi hiam? A hang khatpen ei’ aa, Zomite phuakte mahmah a kihelloh man khawng hi thei hi. Mi pawlkhat in gen uh ciang, ‘Mikangte mahmah in zong a sak nop nawnloh phial uh late tawh Zomi Khristiante in tha ngah sawm mahmah hi,’ ci uh hi. Maan dingin ka lamen pong hi.

                Tedim labu gensia sese! hong ci om kik zel! Kician takin gen vet ni; Hih la kiteite pen labu sungah koihloh ding, sak vetloh ding a ci zong ka hi kei hi. Zomite sak dinga kibawl Labu sungah Zomite phuak Late in innteek tang leh a ci ka hi lel hi. Kei bang hoh in ka la deih diak lakah Tedim Labu sunga La tampi om a, Nang Na Lian Hi, Hong Hehpihna Lamdang, Hong Sem Kik  In Topa, Zangkuam Unok Paak, Pasian Kiang Pan Gamla Ka Pial, Lungdamna Ni, Ka Nuntakna Kong Pia, Nang Tawh Naizaw Nuam Ing, I Lawm Hoihpen Jesu, Jesu Bek In, Amah’n Ka Mawhna Teng Lakhia Zo, Topa Tawh Tonkhawm In, Jesu Va Ko Ning.. (eh tam lua maw mawk in ciai) cih bang om hi.

                La pen a hoih naak leh Mikang, Kawl, Vaite la zong tei luat ding hi. Khangnote bangin tulai la suak thak leh la hoih nono tawh Pasian phat nuamsa uh hi. Tuate zong phamawh kei. Ahi zongin tua mite’ phuakte i sakna hangin Zomite phuaksa late dap koih kei ni. Zomite lakah zong Pasian in thupha hong pia a, Sia Thawng Kim, Sia David Kham, Sia Kappu, Sia Do Khup, Sia T. S. Khai, Pu S.B Tual Dal etc. la hoih nono a phuaksiam i nei uh a, a kin deuh, a dak/ol deuh, ki-ap hun a sak ding, piakkhiat hun a sak ding, cih bangin a kicingin i nei uh hi. Tuate mah sa-in, biakinn sung leh i minam sungah teek tangsak ta ni.

                Mipil misiam ci-a i gengen mite pen a minam ngeina, zia le tong, a pau a ham, leh a minam tualsuak thu hoihte a zang, a zui, a zeek, a manphasakte ahi uh hi. Degree thuap li le nga nei phial mah leh, ama minam a simmawh a, ama pianna minam a thupisim kei a, ama minam zia le tong, pau le ham, ngeina leh minam tualsuak thu le late a thupisim kei leh tua degree pen amah in pilna a sak hangin midangte in pilna ci-in saang khol lo ding hi.

                I kiang nai a om i sanggam Mizote en lehang, amau leh amau mah ki-it masa uh a, a minam mahmah uh itin, a pau leh ham, a ngeina, a zia le tong uh it uh hi. Tua banah, mite zong amau zaha it dingin lawhzo mawk uh hi! Lungdamna thu hanga hong piang tualsuak la, amau minamte mahin kum 1930 kiim-a a phuakte mah uh sak nuamsa in sasa mawk uh hi. Tua hang zong hi kha ding hi, Zosuante lakah Mizote pen a khangto pen pah uh hi.

                Bangbang ahi zongin, Zomi a hi lo mite in Zomite phuaksa late a sak nop kei a, a thupisim kei uh leh zong  khial kei uh. Tua banah, pilna siamna a nei lo mite in midangte’ aa a thupisim zawk uh leh zong ahi thei mah hi (cim mai ni!). Lai siam, mipil leh khuamuzaw ciangciang bangin limtakin ngaihsut a, eima tualsuak thu le late mah i thupibawl hun peuhmah ta hi.

                Khua khat a pawlpi khangnote in a mau hunzatna (worship service) ah Zomite phuak khanlawhna la bek sak ding ci uh a, khua khat leulleuin a kitei tawm late sak ding ci uh hi. Tuate nuntakzia ka ngaihsut ciangin minam a itzaw leh pau le ham a kembit zaw pen Zomite phuaksa la a itte mah na hizaw mawk a, zong kithutuakin khangtozaw mawk uh hi.

               

                Zomite’ phuak Late mah Zomite sungah inntek sak ni; puah ni; zuun ni; zang ni; kemcing  ni. Mi namdangte in hong sakpih kei zongin ei mahmah in sa ni, thupibawl ni.

                I minam khanmawh bawk, Pasian thu lamah i hat theih hetlohna, pawlpi khawng i kikhenkhenna leh i leitung nuntak khuasakzia i khantoh theih hetlohna hang pen i Pasian thu zuihdan leh i minam i itdan maan lo a, eima tualsuak thu leh late i kepcinloh, i zatloh, i zuunloh man khong hi gige kha ding hi. Ngaihsut huai hi.

16.3.2013 || Daihna Cabin

MAINAWT NI

(Filippi 3:13-16)

            Mainawt nadingin i omna mun theihcian a kisapna leh, tua mun panin taikhiat a kisapna thu tampi i genkhin hi. Tua banah, i paikhiat khit ciangin zong i khawl a, i paisan sate i lunggulh a i nungkik a, mai i nawt kei leh tua munah sihna om veve ahihna thu zong i gen khin hi. Tua ahih manin leitungah nungtakna i neih sung teng mai i nawt den kisam a, i hat a i hat kei zongin mai i nawt den ding ahi hi.

A kisam mainawtna

            Martin Luther King in, “Leng in, na len theih kei leh zong tai in. Na tai theih kei leh pai in. Na pai theih kei lai leh bokvak lel in. A thupi pen in mai i nawt ciat ding ahi hi” ci hi.

            Leitung pilna leh siamna lamah mainawt i kisam hi. Zomite i omomna-ah pilna siamna, neih le lam, sum le pai, leh Pasian thu-ah mainawt a kisam penpente i hi hi. Kum 2012 kum tawp ciangah Mizogam sungah laisiam sepna nei lo mi 50,255 Employment Exchage ah ki-registered hi. Tua lakah M.A leh a kikimpih - 2,278, B.A leh a kikimpih - 30,735, Hindi siam - 2,193, Technical lam siamna nei - 4,232 om hi1. Lai siam nasep zong laitak tua zah lakah i siam mahmah kei leh nasep hoih kingah ngei lo ding hi. Tua ahih manin Zomi khangnote in pilna siamna lamah zong mai i nawt ding kisam mahmah hi.

            Tui cingden, a luangkhia lo pen namsia hi. Dawn dingin siangtho lo hi. Kha nuntakna leh Pasian thu a mainawt a sawm lo, mainawt kisam a sa lo mite pen a pianthak ciil un a lawp mahmah uh hangin sawt khom lo uh hi. Pasian thu a kantel nuam lo, a sin nuam lo mite pen ‘hawhaw policy’ tawh amau pumpi nopsakna bangin om uh a, Pasian thu ah citak lo uh hi. Zomite, i Pasian thu-upzia ah mainawt sawm loin, Nipi sang a thusin ding khawng ut loin ki-om mawk hi. I khial hi! Nipi sang thusinna ah bang thu kisin hiam? Lai Siangtho sungthu mah hi a, tua zong a sin nuam lo, a langbawl Khristian pen Khristian maan taktak ahih ding ka um ngei kei hi. I kisin noploh manin Pasian thugil leh thutak kithei lo a, i upna-ah kip loin pawlpi kikhenna Zomite sungah tam pah hi.

Mainawt nadinga a kisamte

            a) Bul kipatna leh a tawpna : Mainawt nadingin i kipatna mun leh i tun nading mun i theih kisam hi. Khual i zin ding ciangin i kipatna leh i tun sawmna i thei hi.  I kipatna thei-in, i tun nading thei kei leng lampi zuih ding kithei lo ding hi. Tua mah bangin i tun nading mun thei-in, tuhunin koiah om i hiam cih i theih kei leh tua mun i tun nading lampi kithei lo ding hi. Paunak khatah, “Bulpat hoih pen a kimkhat zawhsa bang hi” ci a, Lai Siangtho in, “Thu khatpeuh a kipatna sangin a tawpna hoihzaw a (Thna. 7:8a) ci hi. Tua ahih manin kipatna leh a tawpna pen a kikhen thei lo mainawt nadingin a kisam masa ahi hi.

            b) Mainawt nadingin a neu lua om lo : Na lawhcin, na mainawt nadingin nang tungah tha hong pia, hatna hong guan pen neu cika na ngaihsut zong hi thei hi. Kum zolom 14 na a Mongol kumpi minthang Tamerlane pen mainawt-a a lawhcinna hang pen a galte lak pana a kibuksimna muna miksi hanciamna a muh hang hi leltak hi, kici hi2.

            c) Ngaihsutna maan nei in : Ngaihsutna maan lo tawh si taak-a a kingaihsun mite kiguiawkin si ziau uh a, nungta taak-a a kingaihsunte in sih theihna a lauhuai, gilkialna, gentheihna, natna tampi a thuak uh hangin nawksuak zo uh hi. I nisim nuntakna ah ngaihsutna maan lo i neihna hangin kimainawt thei lo a, kilawhsam zel hi. Lo khote nuntakzia panin kician mahmah hi. Papi khat in lo vat a, hal in, a hal khit ciangin bangmah tuh nuam lo hi. “Na lo halna ah buh beek tuh lo na hiam?” a cih uh leh, “Ni sa lua-in khua khal-in guah zu kei leh buh pen i tuh hangin a kimanna om lo ding hi” ci hi. “Tua ahih leh vaimin beek ciing lo maw?” a cih uh leh “Vasate in hong nekbeisak ding hi” ciin bangmah a ciin lohna hang gen a, tua mah bangin kum tawp ciangin a gah lak ding bangmah nei lo takpi hi. Ngaihsutna maan lo a neih man ahi hi. Mite in zong tua bang haksatna hong tung thei hi, cih thei veve uh a, ahih hangin mainawtin sem veve uh ahih manin kum tawp ciangin a gah tampi la hi. Sumbawlna leh sangkahna khawngah zong tua bang mahin ngaihsutna maan lo in i lawhcin ding bang, i mainawt ding bangin mai hong nawtsak lo thei hi.

            Pawlpi sung kimakaihzia khawngah zong ngaihsutna maan i neih kisam hi. Mi nih le thum omkhopnaah ngaihsutzia a kibang lo om thei hi. Tua pen i sansiam kisam hi. Makaite hatlohna khawng ngaihsutna maan tak tawh ngaihsun leng mipite adingin ‘hatna’ hi thei a, mipite hatlohna pen makaite hat nading zong hi thei hi. Makaite a hat kei leh, “E, i makaite hat kei in, eite in i tawsawn kul hi” cih bang ngaihsutna i neih ding kisam hi. Tua hi lo a, “I makaite tuabang.. tua bang, inn hong veh kei, hong it kei, thu hong ngetsak kei..” i cihcih leh ei mahmah zong i thanem thei ding hi. A ngah ding bekbek, mite in hong sepsak ding bekbek a ngaihsutna i neih pen Zomite in i paihkhiat hun ta hi. Mite sang a pilzaw, mite thu a ngetsak, mite etteh dinga nungta, mite piak sanga tamzaw a pia i hih theih nadingin i sila lungsim hoih lo i paihkhiat hun hi. Koikoiah i om zongin, i hihna bangbang tawh mainawt theih hi.

            d) Ki-ukzawhna nei ding : Lai Siangtho sungah ki-ukzawhna pen a kisapna thu tampi gen a, ...khuapi khat ukzawhna sangin eimah ki-ukzawhna hoihzaw (Pau. 16:32b), Kha Siangtho’ sawlna bangin gamtatna (Gal. 5:22), Pasian in Khristiante tungah hong guan (2 Tim. 1:7), thutheihna pen pumpi ki-ukzawhna tawh behlap ding (2 Pet. 1:6) ahihna leh a manphatna gen hi.

            Mi minthang, a mainawt, a lawhcingte pen ki-ukzawhna a neite ahi uh hi. Josef leh Daniel pen pumpi ki-ukzawhna a nei lo mi hi leh a dinmun sangpi tung lo ding hi. Tua ahih manin eite in zong, mainawt a khangtoh i sawm leh i pumpi ki-ukzawh ding kisam hi.

            e) Hangsan in : A meidawi mite in mainawt taktak thei lo uh hi. Na khet peuhpeuh sem dingin sep ngamna kisam a, haksatna leh lawhsapna zong thuak ngam kisam hi. Polist Pianist minthang Ignace Pederewiski pen piano a sin ding ciangin a sia in, “Na khutbom neu lua, piano sin thei lo ding hi teh” ci hi. Italian tenor minthang Enrico Caruso zong la a sin ciilin a sia in, “Na aw pen tawhlet a dakhiat a saisit sangin zong hoih kei zaw” ci hi3. Ahih hangin amaute in hangsan takin, mite ngaihsutna bang hi loin tha hong saan uh ciangin mi minthang suak uh hi.

Mainawt nading a khak theite

            a) Gensiatna : Mainawt nading a khak lianpi khat pen gensiatna ahi hi. Ahih hangin mi lawhcing leh mi thupite pen gensiatna a thuakzote hi citciat uh hi. Mite in gensiatna pen bangci bangin ngaihsun uh hiam? En dih ni :

            “Gensiatna na pelh nop leh bangmah sem kei inla, bangmah gen kei in. Tua hi leh bangmah na hi kei ding hi” - E. M Foster.

            “Mi’n i hihlohnapi hong gensiat leh i hihlohna hi lel hiven heh huai lo hi. I hihna hong kigensiat leh zong i hihna hi lel hiven, heh tuan kei ni” – Rev. Dr. J.M Paupu

            “Kua ten bangbang hong gen ta leh maitai takin sang inla, na maban lim takin sem in” - Mother Teresa

            “Gensiatna, kona, mawhsakna cihte pen mi hai khempeuh in seem thei lel a, mi haite’ nasep hi zaw hi” - Dale Carnegie

            Hih atunga mite in gensiatna pen a hoih lamin ngaihsun uh a, tua pen amau mainawt nading a khak dingin zang nuam lo uh hi. Tua mah bangin gensiatna kizosak lo uh ahih manin mi thupi leh ettehhuai suak uh hi.

            Mainawt na sawm laitakin mite in hong gensiat a, na lampi hong khak a sawm uh leh bang hangin tua bangin hong gen uh hiam, cih ngaihsun inla, na maanloh hang leh na ginatlohna hang ahih leh kibawlpha in. Na nasep hoih hong hazat man leh na lawhcin ding a launa hang ahih leh tang takin mainawt veve in. Makaihna leh gensiatna pen kizom den, tonkhawm den hi. Makai khat na hih a, gensiatna na thuak ngam kei leh makai sem kei mai in. Jesu zong gensiatna a kihta hi leh leitungah hong pai khol lo ding hi!

            b) Thadahna : Mi tampi i mainawt theihlohna leh i lawhcin theihlohna pen thadahna hang ahi hi. Thadahna hangin bul kipan napi a dawn dong kitung thei lo zel hi. Kum 1667 pekin John Milton Paradise Lost kici, mihangsante a phuakna uh la (epic) a gelh laiin zing nai 4 in tho den a, Webster’s Dictionary bawl dingin Noah Webster in kum 36 sung hahkat takin sem hi4. Sawltak Paul leh Jesu zong nakpi taka nasem ahihna thu kimu hi.

            c) Lawhsapna : Mihingte kammal lakah a deihuai lopenpente laka khat pen lawhsapna hi a, ahih hangin i laka omden khat ahi hi! Mainawt nading a khak lianpen hi ci leng kikhial lo ding hi. Mikangte in, “Lawhsapna pen lawhcinna khuam hi” (Failure is the pillar of success) ci uh hi. Lawhsapna pan a lawhcing Henry Ford nuntakna en leng, mawtaw bawl nading mun nihvei a bawl ciang zong lawhsam a, a thumveina ah lawhcing pan hi. Galpi nihna laia general minthang Douglas Mac Arthur pen US Military Academy ah lut a sawm a thumveina ciang lut thei pan ahi hi5. Abraham Lincoln pen sumbawlna ah nihvei lawhsam a, a lawmnu in sihsanin, US President ahih nadingin kuavei tak kiteelna ah lawhsam hi6.  Mainawt zelzel dingin lawhsapna kizawhsak ding hi lo hi.

            d) Haksatna / thuakna : Mi thupi, mi minthang leh mite zahtakte pen haksatna a kizosak lo mite ahi uh hi. British Evangelist minthang George Whitefield pen Pasian thu a gencil lamin thu a gen ciang mite in suang leh aktui tawh deng uh a, thah naleng sawm uh hi. Sawltak Paul in Pasian na semin mai a nawtna hangin - sawmthum le kua vei a satna 8 vei thuak a, suangtawh denna, tembaw siatna, lauhuaina, gilkialna, lungkimna tampi thuak hi (2 Kor. 11:24-29). Ahih hangin Paul in tua a thuaknate pen, ‘Pasian in a hong piakding minthanna tawh a ngaihsut khawm ciangin, a thuaknate gentham sa lo’ (Rom 8:18) a, haksatna tampi a thuak hangin mainawt veve hi. Tua mah bangin Job in haksatna tampi a thuak ciangin zong Pasian taisan tuan loin kip takin om a, Pasian in nidanga a neihzah sanga tamzaw thupha pia mawk hi.

            e) Haksatna a hoih lamin sang in : Leitung i nuntak sung teng haksatna in hong buaisak den ding hi. Na upmawhloh pipi zong na ma  hong khak hi thei hi. Tua pen a hoih lamin sang in!.Kumpi David in haksatna leh gimna a thuak pen ama adinga Pasian a zuihna leh kham leh ngun tul tampi sangin ama adingin hoihzaw ahihna thu pulak hi (Late 119:67-72). Mi pawlkhatte in a hoihzaw nuntakna-ah a thawhkik theihna dingun leitungah suahtak ding ut tuan loin bawlsiatna tuamtuam thuakin, genthei takin sihna ciang dong thuak uh hi (Heb. 11:35b-37). Haksatna i tuakte pen i saan dan tawh kizuiin ei tungah nasem hi. Haksatna na tuak ciangin na lung a kiat leh a gina lo mi na hi hi (Pau. 24:10) a cih mah bangin, haksatna pen i kizawhsak ding hi lo a, hong sinsak sia hi, ciin i saan ding ahi hi. Billy Graham in, “Lungnopna leh hamphatnate in haksatna zahin hong seek taktak lo hi” ci hi.

Nungkik kei in

            Leitung thu hi ta leh, Pasian thu hi leh nungkik lo a, mai a nawt tantante mah lawhcing uh hi. Nungkikna pen Pasian in zong mudah a, tua mite tungah a lungkim lo ding hi (Heb. 10:38).

            Na sepna khatpeuhah -lawhsapna, maizumna, mindaina, sihna-natna, mite simmawh leh langbawlna hangin na lungkiat hun, haksa na sak hun om tham ding hi. Ahi zongin nungkik kei in. Bang hang hiam cih leh, ‘Pasian in meidawina lungsim hong guan lo a, thahatna, ki-itna leh pumpi ki-ukzawhna lungsim hong guan a, amah in hong koppih peuh leh kua in hong zozo ding hiam? (2 Tim. 1:7; Rom 8:31). Tua hi a, Ama hangin a gualzopente i hi hi (Rom. 8:37).

Thuhialna

            I nuntakna sungah a kisam mahmah mainawtna pen a kisapna leh a thupina i mangngilh hetloh ding thupi hi. Tuni in koih munah om na hiam? Nek le taak zonna ah koi munah mainawt ding, geelna na nei hiam? Pasian biakna pawlpi sungah koi dinmun ah om na hiam? Biakpiakna, mite itna, piakkhiatna, thungetna leh nangma sep theih ciangciangah mainawt nading tampi nei lai ding hi teh. Tua ahih manin mainawt sawm inla, hong dal thei tampi om mah leh, tuate tungah zawhna la a sa thei dingin na lungsim khauhsak in.

            I Lai Siangtho simna sungah, a thupi pen kha lamah mainawt ahi hi. Nang hoihna leh hoihlohna hi loin, tuhuna na omna mun panin mainawt in, pumpi leh kha lamah a picing leh mite zuihtak, Khris lim leh meel a kilangsak a tano suak dingin mikim Topa’n mainawt nopna lungsim hong pia hen.

A MAWKNAPI PAN NA KHEMPEUH

(Thna. 7:15a;  Rom 14:8)

            A kisapte a nei mi pen mi hampha hi a, thu a thei mahmah mite pen mi pil ahi hi. A kiim a kianga om nate manpha taka a zangsiam mite pen mi enhuai hi a, Pasian zahtakna tawh ama hanciamna leh sep theih ciangah a lungkim den zo pen mi hampha penpen hi kha ding hi. Tua lungkimna pen mihingte kisap penpen hia, tua lungkimna i cih pen tawlngakna leh mainawt sawm nawn lo a khawlcipna hi lo hi. Tua lungkimna pen bangcih muh ding? Leitung a mucian mahmah, hauhna sum le pai, neih le lam, sila leh nasem a hau mahmah mi pil Solomon’ tangthu, leitung a muhzia leh a ngaihsutziate panin i gen ding hi.

Solomon’ tangthu

            Solomon pen David leh Bathsheba ta ahi hi. BC 970 - 931 sung kumpi sem hi1. Gebeon mual tungah Pasian biakpiakna pia a, tua munah Pasian in a mang sungah, “Nang kong piak ding hong gen in,” ci hi. Solomon in naupang no khat ahih manin bangci gamtat ding cih thei lo a, a lian, a phazah a kisim zo lo, a tamna a kiseh thei lo, Pasian in a teelsa mite lakah vaihawm dingin sia le pha a theihtheih nadingin, ‘thu theihtelna lungsim’ pia dingin ngen hi (I Kum. 3:5-15). Pasian in deih a teelsak ngiat kumpi hi a, a hampha mahmah kumpi ahi hi. Min dang khat nei a, ‘Jedidiah’ kici hi (2 Sam. 12:24-25). A min pen ‘kilemna’ (peace)2  cihna ahi hi. Zi a hauhna, a pa in a lam theihloh Pasian biakbuk a lamna, sum le pai, neih le lam a huahna leh a pilna pen a minthanna ahi hi.

Solomon’ pilna

            Solomon zah a mi enhuai leh thupi tam lo ding hi. Pasian in a it mahmah hi a, ‘tehzawhloh a thuk mahmah pilna leh theihna, genzawhloh lungsim zaina’ pia hi. Solomon’ pilna in nisuahna lam mi khempeuh leh Izipt pilna khempeuh ‘khumlet’ hi. Paunak 3000 genkhia a, la dawng 1005 phuak hi. Leitung kumpi khempeuh sung panin Solomon’ pilna thu a ngai dingin ama pilna thu ‘a zasate’ pai zel uh hi (1 Kum. 4:29-34). A zasate in zakik nuam mahmah uh ahih manin pil mahmah cihna hi.

            A pilna a ze-et dingin Jerusalem ah Sheba gam kumpinu pai a, thu haksa tuamtuam dong hi. Ahih hangin kumpipa in ama tungah a gentel theihloh, haksa lua a sak bangmah nei lo hi. Sheba kumpinu in Solomon’ pilna, ama lamsa a inn, sabuai-a a ann, a uliante’ omzia, leh a nasemte, a puante uh, a ann piate, leh Topa’ biakinn-ah a piak meihal biaknate khempeuh a muh khit ciangin lamdang a sa mahmah hi. Amau gam pana a zak thute um loin, a mit mahmah tawh a muh ciangin, “A lang zong kei tungah hong kigen lo a, na pilna leh na daupaina in ka zak thute vuknelh hi” ci hi. A zite leh a mai a ding tawntung mite in a pilna za ahih manin hampha sa zawzen hi (1 Kum. 10:1-8).

Solomon’ hauhna

            Kumpi Solomon in vanpua ding mi 70,000, mual tungah suang a to ding mi 80,000 leh mite nasep a van dingin mi 3,600, a vekpi’n nasem mi 1,23,600 nei zen hi! Nikhat-a a neekbei uh pen ann neel lawh 30, ann lawh 60, bawngtal 30, tuu 100 hi a, sakhitalte, syria sakhite, sanangte, leh a thau vasate a kisim lo hi. A gamsung khempeuhah daihna om a, mi khempeuh lungnuam takin om hi. Sakol 40,000 leh sakol tung tuang 12,000 zong nei hi. Solomon inn sung vante pen ngun vive hi phial a, amah in suang bangin Jerusalem ah ngun olsak hi (I Kum. 10:27; I Khg. 1:15; 2 Khang 9:27).

Leitung nuntakna a muhzia

            I gensa mah bangin Solomon pen pilna-simna lamah hi taleh, neih le lamah hi taleh hau lua mahmah hi. A duh bangbang ne thei, a deih bangbang nei thei hi. Zomite lakah, “Pasian kisam keng, ka ut bangbang in om ning” ci a kihisak mahmahte khawng, Solomon’ pilna leh siamna tawh ngaihsun leng kihihsak nading bangmah om lo hi.

            Tua banga a ututin omin, a deihdeih nei-in, a duh bangbang a nek hangin Solomon in tuate khempeuh pen ‘a mawkna hi’ ci hi. Thuhilhna sung i sim ciangin amawkna/a mawknapi cih 35 vei valtak gelh mawk hi. Tua a mawknapi a cihte pawlkhat en dih ni :

a)   Leitunga kisem khempeuh a mawknapi hi a, huihpi nung tawh kibang lel hi (1:14)

b) Mit in a muh cim thei lo a, bil in a zak cim thei lo hi (1:8).

c)   Jerusalem a uk dang khempeuh sangin pilzaw. Pilna leh theihna khempeuh a theihloh om lo, ahih hangin tuate pen a mawknapi hi a, tuate in lunghimawhsakin, gimsak semsem hi (1:16-18)

d)   Lungdamna zongin a ut bangbangin om ding a ngaihsut hang a mawknapi hi (2:1)

e)   Na lian tampi tak semin, inn tampi tak lamin, huan bawlin, singno suanin, tuikhuk bawlin, sila tampi neiin, tuu honte, bawng honte nei-in, Jerusalem a om ngeite sangin hauzaw a, a zawhsate tung panin ngun le kham tampi lain, lungnop nadingin lasiam numei leh pasal a deih zahzah a neihangin a nasepna pen a mawknapi leh bangmah phattuamna om lo (2:4-11).

f)   Mipilte in a pai nading mu thei a, mihaite in a thei lo hi. Ahi zongin tuate tun nading kibang a, pilna leh theihna bangmah a phattuamna om lo hi (2:14&15)

g)   Sepna khatpeuhin lungkhamna cihloh hong piak theih dang bangmah om lo (2:17)

h) Pilna, siamna, leh theihnate siit loin na kisem a, themkhat zong a gimpih het lo khat adingin nusiat ding hi zenzen (2:21)

i)    A hinglai mite sangin a si mite hampha sa a (4:2), nopsakna a ngah lo mipa kum 2000 a dam zongin, a sisa a suak naungek mah tawh a tunna uh kibang (6:6)

j)    Midikte in migi lote thuak ding teng thuak zawsop a, migi lote in midikte ngah ding teng a ngah sawsopna leitung (8:14).

Solomon in ngaihsutna thak nei

            Solomon in leitung nate pen amau bekin bangmah hi lo, a mawknapi hi a, ahih hangin Pasian tawh tua a mawknapite i neihkhop, i zatkhop, i nuntakkhop ciangin thupi hi cih phawk khia hi. La phuakpa khat in, “Khris kihel lo nuntakna, mulkimhuai lua a lampi mial” a cih pen Solomon in mucian mahmah hi. Tua ahih manin, Pasian kihel loin kuama’n ann ne-in nuam sa lo (2:25), Amah a lungdamsakte pilna, theihna leh lungdamna pia a, mi mawhte ahih leh a sepna beisakin, a thalawh sate amah a lungdamsakte pia hi (2:26). Pasian’ sep khempeuh a kip tawntung ding, behlap theih ding leh paihkhiat ding zong om lo, Amah i zahtak theihna dingin a bawl (3:14). Pasian hang a hauhna, gentheihna, leh pilna pen lungdamna ahihna (5:18-20) gen hi. Solomon piangthak hi! A lungsim ngaihsutna leh a muhzia hong kilamdang hi. Tua ciangin mihing a kipiansakna bulpi ahi - Pasian zahtakna leh a thupiakte manna, i sepna thu kikhen ding hi cih theihna (12:13-14) ahihzia tawh thu hial hi.

            Solomon in a leitung muhzia pen kilamdang hi. Hauhna leh liatna, sum le pai pen lungnopna leh lungdamna hi masa lo ahihna phawk hi. Sawltak Paul in, cihmawhna leh cihtheihna, hauhna leh zawnna, vahna leh kialnate ah a lungkim thei ding ahihna (Fil. 4:12) leh Pasian biakna hangin a neihsa teng tawh a lungkim mite pen biakna in mihau a suaksak takpi mah ahi hi (1 Tim. 6:6) ci-a a gen bangin Solomon in hauna, pilna leh siamnate-ah Pasian a kihel leh manpha a, lungkimna om ahihna mucian mahmah hi.

Paikhiat i kisam hi

            Hizah a mi pil leh mi hau Solomon in leitung nate, amau bekin bangmah kimanna om lo hi, a cih bangin eite in zong i ngaihsutna i pilsak kisam hi. Hih i leitung nate pen amah bekin a mawknapi hi a, i hau a i zawng zongin, i vah a i kial zongin, i pil a i mawl ta zongin Pasian tawh i neihkhop, i zatkhop, i nuntakkhop kisam hi. Tua ahih kei leh tua leitung nate in lunggimna leh buaina hong tun ding hi.

            Sawltak Paul in Pasian tawh a neihkhoploh pilna, Jerusalem a Gamaliel khut sung pan a sin pen a mawkna ahihna theiin Pasian lam zuanin a nasep thupi leh hauhnate panin taikhia hi. Israel mite a suahtak nading un Izipt panin paikhia uh hi. Abraham in thupha a ngah nadingin a it a innkuan, a khua, a gam panin paikhiat kisam hi. A hoih lo, a kihhuai munah omden loin, i nuntak nadingin leitung nate i paikhiatsan kisam hi.

            Tapa taimang bangin leitung mite Pasian panin tai mangin, a kihhuai vok kuang gei bangin a hoih lo leitung nate lunggulhna salah i tang uh hi. Tua mun panin a taikhia dingin Pasian in hong sam den hi. Lotte omna Sodom khua mah bangin tuhun i leitung siata hi. Leitung nate bek lunggulhin i neih leh tuate tawh kisi khawm ding hi. Tua manin mawhna-khialhna leh leitung nate lunggulhna panin i suaktak nadingin i paikhiat kisam hi. Tua hi leh..

            3Amah in ka mawhna khempeuh

                        hong maisak a,ka natna

                        khempeuh hong damsak hi.

            4Hankhuk tung ding kimlai

                        hong suaktasak a, itna leh

                        hehpihna tampi hong pia hi.

            5Muvanlai bangin

                        ka tha a hat theihna dingin

                        thupha namkim hong pia hi             (Late 103:3-5) ciin lungdam takin i pulak thei ding hi.

Mainawt zel in

            Pasian kihel lo leitung nate nusia-in, i paisan laitakin, mainawt loin i khawl a, i paisansa lunggulh a i nungheihei leh tua munah zong sihna om hi. Piangthak sa a nungkikte pen Pasian lamah mainawt sawm lo a, a nuntakna lui a lunggulhte ahi uh hi. Ama kiang i tunmaloh, citak taka nunghei lo leh kuam sungah zong khawl lo dingin hong sam den hi.

            Nidangin bangzahta in mawhin i khial zongin, kisikin khial nawn kei ni; Tua pen Jesu deih ahi hi (Joh. 8:11).

            “Phawkin nei nawn peuhmah kei ning,”

            Zuau lo Pasian in ci;

            “Na mawhna teng maisak nading,

            Ka ta’ si luang khin,” ci (TD-136)

Thuhialna    

            Pasian kihel lo nate a tam nak leh a mawkna tam semsem hi. Tua leitung nate pen Pasian tawh i neihkhop ciangin manpha pan ding hi. I teenna leitung pen hun nunung hi a, leitung nate muan le suan ding, leh kingakna taak om lo hi. Laphuak siam khat in :

Na nu zong muang ken, na pa zong muang ken,

Na u zong muang ken, na nau zong muang ken,

Tuate hong bei ding a, bei cih om ngei lo Jesu suangpi beel in, ci hi

            Mawhna leh leitung bek lungngulhna panin Pasian in paikhia dingin hong sam hi. I mawhnate puansan a bat hangin vuk bangin hong ngo ding a, si bangin a san hangin tuumul bangin hong kang ding hi (Isai. 1:18; James 5:15; Sawl. 3:19-20). Mimawh-mikhialte kisikna ah Pasian lungdamna lian hi (Luk. 15:7). Tua ahih manin kisikin, Sawltak Paul in, “I nuntak leh Topa adingin a nungta i hi a, i sih leh zong Topa-ading mahin a si i hi hi. Tua ahih manin i si a, i hing zongin Topa a i hi hi” (Rom. 14:8) a cih bangin, ei te’n zong i cih theih nadingin Pasian tungah ki-apin, amah bek lungmuanna leh lungkimna bucing hong pia thei hi, cih a phawk den dingin a sim mimal kim Pasian in thupha hong pia hen.

1. (http://en.wikipedia.org/wiki/Solomon).

2. (http://www.behindthename.com/name/solomon)