CHAMPHAI KHAWK KHAWMPI MORNING DEVOTION – 1

CHAMPHAI KHAWK KHAWMPI MORNING DEVOTION – 1

Pawlpi i cih pen…

1. Khris zi ding: “… Nungak leh tangval nupa dingin a kigawm mah bangin khat bek ahi Khris tawh a kigawm dingin nungak singtho bang na hi uh hi” (1 Kor 11:2; c.f. Efe. 5:22-24). 

2. Khris pumpi: Khis pen pawlpi lutang hi a, pawlpi pen Khris’ pumpi ahi hi (Efe. 1:22, 23; Col. 1:18).

3. Pasian innkuan: “…a nungta Pasian' pawlpi ahi Pasian' innkuan sungah bangci gamtat ding cih na theihna dingin hih ka hong laikhak in lam hong lak ding hi” (1 Tim 3:15). Pawlpi sung mite kipumkhat dingzia lahna hi.

Etsak leh sinkhiat ding…

1. Khris [leh Pa Pasian] in pawlpi a itzia a lahna hi. Nungak tangval, kingai, ki-it, a kigawm dingte a muanhuai, a cihtak, a siantho ding a kisap mah bangin, Khris zi ding pen Pasian in Jesu Khris sisan tawh a silsiangte i hih manin tua sianthona pen kepbit a, nitsak, siantholohsak loh ding ahi hi. Pasian thu lo nate i sep a, i ngaihsut ciang kininsak thei hi. 

2. Khris [leh Pa Pasian] leh pawlpi kizopna a hoihdan lahna hi. Pumpi leh lutang kikhen leh a kimanna om lo hi. Khris [pawlpi’ lutang] pen siangtho den, hoih den a, tua tawh kizopna hoih tak nei dingin pawlpi [a pumpi] zong amah i bat theihna dingin hanciam kisam hi. Mi khatpeuh in Khris [pawlpi lutang] a it leh pawlpi it a, Khris it ci a [a pumpi] pawlpi langbawl, a siatna ding a gamtata cih bang om thei lo hi. Lu siang sitset a, pumpi tung a ek bang nengnang pen hoih lo, muh nuam lo, kilawm lo, kituak lo hi. 

3. Innkuan sungah a thumang nuam vet lo, guihtheih-khamtheih a kibual den, van gu a, innsung haksatna a tun den a om ciang a noploh mah bangin, Pasian innkuan [pawlpi] sungah tua bang a pawlpi haksatna a tun den a om ciangin buaihuai mahmah thei hi. Tua bang i hi kha hiam, cih pen kisittelin, kidophuai mahmah hi.

Tua hi a....

Pawlpi pen - Khris zi ding, Khris pumpi, Pasian innkuan [adangte tuni in kigen man lo] ahih manin, pawlpi simmawh mahmah, pawlpi siatna ding a kalsuansuante mi daupai leh lawhcing lua om lo hi. Tua tawh kilehngat-in, siam leh siamloh, pil leh mawl, zawn leh hauh gen lo a, pawlpi ading a hanciam a, citak a, kuhkal mite Pasian in guaksuaksak lo hi.

~ Pro. Pr. T Sawm Lian

6.10.2018 @Leisenzo Biakinn