CHAMPHAI KHAWK KHAWMPI MORNING DEVOTION – 2

CHAMPHAI KHAWK KHAWMPI MORNING DEVOTION – 2

Paul’ Kam Vaikhak leh Pasian Hang-a Hamphatna A Gente (Titus 3:1-7)

Paul’ kam vaikhakte… Krete pawlpi mite [leh tuhun a thu-ummite] tungah Paul in Titus tungtawna a kam a vaikhakte…

1. Gam-ukte leh thuneite thu nial lo ding, thu mang ding [n.1a] (Pasian thu tawh kihalh ahih kei leh… Peter leh Johan in zong nial uh, Sawl. 4:18-20; 5:29)

2. A hoih peuh sem dngin kigingkhol ding [n. 1b]. 

3. Kuamah gensia loin, mi tawh kilem ding [n. 2a]

4. Mi ading khual ding [n. 2b]

Mi khempeuh tungah kiniamkhiat taktak ding [n. 2c]

Pasian hang a thu-ummite’ hamphatna Pual in a gen…

1. Hamphatna a ngah hunma etkikna[n.3]… 

- A hai, thumang lo, mi khemsa, pumpi lunggulhna namkim leh noptatna sila, gitlohna leh hazatna tawh kidimin, mite muhdah leh khat le khat kimuhdahna tawh nungta…. 

Tua banah, Paul in ama nuntakna lui a genna – Pasian daisakpa, mi bawlsiapa, a ngongtatpa (1 Tim. 1:13; c.f 1 Pet. 4:3)

2. Hamphatna hun[n. 4, 5]… 

- Tua bang laitakin, Pasian migitna leh itna hong kilang [n. 4],

thumaana na i sep hang hi lo, ama lainatna hangin eite hong hon [n. 5a; c.f. Efe. 2:8ff].

- Pasian in ei (mimawhte) suahkikna a silsiangna leh a Kha Siangtho bawlphat thakna tungtawnin hong hon [n. 5b]

3. Hamphatna gah [n. 6, 7]…

- Jesu tungtawnin tua Kha Siangtho cingtakin eite tungah hong sungkhia [n.6]. Kha Siangtho tawh ciamteh (sealed) [Efe. 1:13; 4:20]; Kha Siangtho tawh baptaiz [1 Kor. 12:13] (Kha Siangtho baptaiz na leh Kha Siangtho tawh kidimna pen mi tampi in a kibang sa, ahi zong hi lo); Pasian kiang pana hong pai thummaanna a um mi khempeuh tungah tung [Rom 3:22], tua pen a khawnkhong a diksakna hi [Rom 3:24].

- Hehpihna hang a diktansakna (justification), nuntak tawntungna lametna a nei, gouluahte/gamhluahte i suahna ding ahi hi [n. 7]. A ummite adingin tawntung nuntakna [Jn. 3:16]; Pasian kha in a makaih mite Pasian tate, Pasian gou/gamh luahte, Khris tawh gouluahkhawm dingte [Rom 8:14-17]. 

#Kua hi hiam cih i kitheihcian kisam! Nidangin kua hi ka hiam? Bang thaman/samsiatna ngah dingin kilawm ka hi hiam? Tuate lak pana hong honkhia kua, bang hang a hong honkhia, bangci bangin, bangci bang a kalsuan dingin hong deih... cihte ngaihsutsut kisam hi.

#Eite sepna, hoihna, pilna leh siamna hang hi lo, Pasian hehpihna, Jesu Khris tungtawna hotkhiat i hihna ah kisuanna ding om lo hi. Pasian in ama mite [Jesu Khris a um mite], Kha Siangtho tawh ciamtehin baptaiz a, tua pen mi tuam, kua hiam, piakpiak ding hi lo hi. Kha Siangtho pen mi ading, pawlpi dang a omte ading a tuattuat ding zong hi lo. 

#Mihing lam pana diksakna (justification) a ngah hi loin, Pasian lam pan Jesu Khris sisan tungtawna diksakna ngah a, thummaanmi (righteous) a hong sang Pasian ahih manin, tua hehpihna tawh hong sang, hong honkhia, hong diksak Pasian pen liansakpen ding hi hang. Tua dingin thumanna, kilemna, midangte khualna, kiniamkhiatna, na hoih sem ding a kiginkhol leh na hoih sep cimtakloh ding thupi hi.