KHANGNOTE LEH TUHUN
Kum, nasep, gihna (weight)
leh pilna-siamna tawh a kikhentat theih lo, a kammal i theihcian zah-a a huam
ciang a kikhentel theih lo ‘khangno’ tawh kisai-in, Henry Ford in, “Anyone
who stops learning is old whether at twenty or eighty. Anyone who keeps
learning stays young. The greatest thing in life is to keep your mind young”,
ci-in, kum lam sangin kisin nopna lungsim lam pen khangno hihna hizaw ci
a, kipawlna pawlkhat in, ‘kum 14 pan 40 kikal teng’ khangno-in a san
laitakun, pawlkhatin, “Kum 14 pan a tungsiah a ut khempeuh khangno hi” ci
uh hi. Oxford Dictionary 10th Edition
in khangno (youth) pen, “The period between childhood and adult age” ci
ziau hi. Tua hi a, ngaihsutzia a kibang lo kammal a nei ‘khangno’ a
kicite leh tuhun tawh kisai gelh ding i hih manin a baih het lo thu hi mawk hi.
Tuhunin a kisap khangno
Kisapna sanga kisam zaw
leitungah om lo hi. Mihing leh nate manphatna pen hoih takin i ngaihsut ciangin
a kisapna zahzah un manpha mawk uh hi. Leitung buppi in a theih mi minthang, mi
thupi leh vangneite pen a kisapna uh a tamluat mana minthang, thupi leh vangnei
ahi uh hi. Gntna. Lasiam khat a minthan mahmahna hang, thupi a kisak mahmahna
hang pen, a la sak i ngaihnop man, a lasak pen ei adingin a manphtna hang hi
lel hi.
Na veng, na pawlpi, na
khua, na gam adingin a kisap uh sep theih na nei hiam? Bangmah na neih kei leh
na manphatna om het lo cihna hi kha ding hi. Leitung gam tuamtuamte in a
thupi-ngaihsut mahmah uh pen galkapte hi citciat hi. Bang hang hiam cihleh,
gamsung bitna leh mipite suak-ta taka a omsakna uh hang ahi hi.
Leitung khantohna hat taka
a pai laitakin tuate sungah sep theih na nei hiam? Tua khantohna in nang hong
kisam hiam? Kithalawh dingin mite kisap siamna na nei hiam? Mite kisap, tuhun
tawh kituak a siamna na neih kei leh nuntak haksa mahmah kha ding hi.
Hun manphatna a thei khangno
Leitung mihingte in nikhat
sungin hun zat ding a kibangin kinei hi. I omna, i nekzonna, i nuntakzia tawh kizui-in
sep theih, bawl theih kibang lo bek hi.
Leitungah mi lawhcing leh
mi thupite pen, hun manphatna a thei,
hun maan taka a zangte, leh mi ngeinate sep ban a sem, mite sanga hun a
zang siam zawte ahi uh hi. “Tuni bang sem ding na hia lawm?”, “Ka ngap
leh lum ning” cih bang maimai tawh khuasuak nading hun hi nawn lo hi.
Khangno lai hun a manphatna leh, tua hun pen na hoih sep nadingin a thupi pen
hun ahi cih pen tuhun khangnote theih ding thupi mahmah khat ahi hi.
Sangkah tektek, lo kho
tektek, sai bawl tektek bang hangin mi pawlkhat hau a, mi pawlkhat zawng, bang
hangin mi pawlkhat lawhcing a, mi pawlkhat lawhsam? Hun zatsiamloh man pen a
hang lian mahmah khat hi ding hi.
Manpha taka hun a zang khangno
Khua lakah na vakkhiat
ciang, mi dang tawh picnic a na pai ciang, khual na zin ciang, na lawmte tawh
ann nekkhopna na neih ciangin, khualai vak tektek, picnic tektek, khualzin
tektek, ann nekhawm tektek napi’n, amau sangin hun manpha taka na zatna hangin
pilna-siamna leh theihna a kibehlap na nei ngei hiam?
Galkap mangpi Napoleon in
a sangkah lai-a a picnic na uh pan, a lawmte hunzatzia ngeina bangin hun zang
veve nipi’n, a lawmte ngaihsut batloh tua munah a hun manpha takin zang a, a
kiim a paam a mual leh guamte omzia pen theihcian sawmin hanciam a, galkap a
sep ciangin tua pen manpha takin zang hi, kici hi.
A kimang thei lo ding, a
phattuamna om lo thute hangin i hun tam bei lua hi. Lungsim tawldamna hun bel a
om ding mah hi. Ahi zongin, cik lai peuha ngaihsut nei lo leh vei khat zong nei
lo-a om pen, mi bang lo leh a nungta lo mite omdan ahi hi.
Khangnote kisap ki-ukzawhna
Lai Siangtho in
ki-ukzawhna tawh kisai in a manphatna lim gen mahmah hi. A diakin khangnote
adingin manpha diak hi. Lai Siangtho sungah ki-ukzawhna pen – Khuapi khat
ukzawhna sangin hoihzaw (Pau. 16:32b), Kha Siangtho sawlna banga gamtatna (Gal.
5:22&23), Pasian in a mite tungah guan (2 Tim. 1:7), ahihna thu kimu
hi.
Lawhcinna leh lawhsapna,
minphat leh minsiatnate pen a hang tampi om thei dinga, tuate laka a lian khat
pen pumpi ki-ukzawhlohna hi kha ding hi. Leitunga mi thupite tangthu leh,
Lai Siangtho sunga Pasian mizat thupite nuntakna i etet ciangin, pumpi
ki-ukzawhna a nei, a nuam ahi zongin amau adingin a hoih lo nate a nial ngam
mite ahi uh hi.
“Ka nuntakna, ka
vanzatte, ka sepsep, ka dawndawn, ka teptep, ka muammuamte a hoihlohna thei mah
veng aw…. ahih hangin…” ci-in i gen thei zel hi. Tuate ngaihsun lo ding
cihna hi loin, sem lo, bawl lo dingin pumpi ki-ukzawhna neih ding cihna ahi hi.
Khangnote kisap hangsanna
Leitung pen nek le tak
zonna, khankhiatna, pilna-siamna, khua, minam, gam kibang lo mihingte omkhopna
ahi hi. Hauhna, pilna-siamna neih nading banah, mainawt a gualzawh nadingin ei
tawh a kibang lo pipi, ei sang a hauzaw, siamzaw, pilzaw leh thahatzaw tawh
zong i kimaingat a, i kinawk zek zong a kisap hun om thei hi.
Tuhun leitung pen “Survival
of the fittest” ciin gen uh a, a hathat, midangte sang-a a ki-fitzawte
khuasuakna cihna ahi hi. Khangno tampi in i hatna, i ki-fitna
zong thei loin, i meidawi luatna hangin na tampi i sumh (lost) uh a, hangsan
deuh leng na lianpi a sem ding kimlai, lam kimkhat panin i kileh kik zel uh hi.
Sia Pau Khai in khatvei, “Ko
(Burma) lamte pen, sum a nei zong hi tuan lo, India gamah lai sim ding khawngin
pai giap ngam, no (India) lamte pen a omsa tawh zong pai ngam lo” ci-in gen
ngei hi. A gen bang takin, sum le pai zong a nei hi tuan lo napi, Kawlgam lam
panin India gam sungah sangkah pen tam mahmah uh a, zong lawhcing uh hi. A
lawhcinna uh hang lianpi khat pen a hangsan man uh hi lel hi.
Hansanna lo tawh mainawt
taktak theihloh hi. Haksatna zong maingat ngam dingin hansan kisam hi. Leitung
pen a nuam bekbek tawh a kidim hi zenzen lo a, gah hoih gah a, na hoih sem
dingin haksatna thuak kisam thei zel hi. Tua hi a, a meidawi mite in a dawn/a
tupna (goal) a tunma un haksatna thuak ngam loin khawlsan thei zel uh hi.
Khangnote kisap lungduaina
Hangsan ding cih i gen
ciangin, i maia mi om peuhpeuh tum/sui pah ding cihna lam hi lo hi. Hangsan i
gen ciangin i ngaihsutzia (tup/suih, kilai hat) pen maan lo a, tua ngaihsutzia
pen i laih kisam ka sa hi.
Leitungah hansan dan maan
tawh a hangsan a ka ngaihsutte pen Mahatma Gandhi, Nelson Mandela, Martin
Luther ahi uh hi. Amaute hangsan ka sakna hang pen – itna leh veina tawh na sem
uh a, thuak a kul leh zong thuak, thong kiat a kisap leh thongkia, kosiatna a
thuak uh hangin phamawh sa loin ‘lungduaina’ tawh na a sep ‘ngamna’
uh ahi hi. Mite gensiat, pampaih, langdo, bawlsiatna thuak ngam dingin hangsan
uh hi.
Tua banah, lawhsapna,
lungkiatna i neih zelzelna hang pen i lungduailoh man khawng zong ahi hi. Siate
in khatvei-nihvei hong taiina hangin sang i kah nuam kei a, khatvei lawhsapna
hangin maban i zom nuam kei zel hi. Ahi zongin tuate a thuak taktak pen eimah
mahmah kihi ahih manin, lungduaina pen khangnote’ kisap lian mahmah ahi hi.
Khangnote kisap tupna kician
Tupna kician nei dingin
ngaihsutna maan neih kisam hi. Ngaihsutna maan a nei lo mi in tupna kician nei
thei lo hi. Nuntakna sungah haksatna, zawnna-ngauna, buaina bekbek a thuak
dingin i kingaihsut leh tupna kician neih theih hi lo hi.
Tupna (goal) neih pen mi
ngeina hihna ahi hi. Mi si, mi bang lo, zu lungvei, zatui lungveite in tupna
kician tak nei khol lo kha ding uh hi.
Tuhun pen mi pawlkhatin,
“Age of Anxiety” ci uh hi. Tuhun mihingte in lungkimna nei loin, lungnopna
bek zong uh a, tua a zon uh pen leitungah a bucing muh ding om lo ahih manin
lungkia-in, mah le mah kithat (suicide) tam mahmah a, USA bekbekah kum khatin
mah le mah kithat mi 46,000 val om hi, ciin kigen hi (Rl. 14/1/2013).
Bang hangin tua bang thute
piang hiam i cih leh, tupna kician nei loin, tuhun nopsakna bek zonna hang ahi
hi. Tupna a nei mi pen a tupna mun a tun ciang a lungdam nading thute in, a
lampi-a haksatnate zong nawk zo dingin thahatna neisak hi.
Khristiante in tupna
kician (Vangam) nei kei leng i nuntakzia pen kilamdang mahmah kha ding hi. Tua
ahih manin i kha nuntakna adingin tupna kician (Vangam) i neih mah bangin, i
nuntakna hong makaih ding leh thalawpna i neih nadingin tupna kician neih kisam
hi.
Khangnote kisap Pasian
Leitungah Pasian a kisam
lo om lo a, kisam lo a kitheite pen a kisam penpente hi zawsop hi. Khangnote
adingin a kisapna pen a lian diak tawh kibang hi. Bang hang hiam cih leh, pilna-siamna,
hauhna, liatna leh mai lam thu khempeuh phial i khangno hunah kinga ahih manin.
Pilna-siamna neih ding a
kisap laitakin, tuate zeeksiam, kepsiam nadingin kisam zaw sem lai hi. Solomon
in nasem bekbek 123,600 nei-in, zi leh zineu 1000 nei-in, nikhatin a inn sungah
– ann neel lawh 30, ann lawh 60, bawngtal 30, tuu 100 leh a dang tampi ne
bei-in, sakol 40,000 leh a tungtuang 12,000 nei-in, a innsung vante ngun vive
hi phialin, Jerusalem ah suang bangin ngun a olsak hangin nuntakna pen ‘a
mawknapi’ na ci hi.
Tua hi a, Solomon in,
Pasian hanga hauhna, gentheihna, leh pilnate pen lungdamna ahihna thu gen a
(Thna. 5:18-20), mihing a kipiansakna hang pen Amah (Pasian) zahtakna leh A
thupiakna man ding ahihna thu gen hi (12:13-14). I gensa bangin, tua zaha mihau
leh milian khatin Pasian a kisap leh eite in kisam zaw kan lai lo ding i hiam?
Hauhna, pilna, siamna,
cidamna i kisam uh hi; tuate hong pia thei pen Pasian ahi hi. Sum le pai, neih
le lam, cidamna i nei uh a, tuate hong kepsak ding Pasian mah ahi hi.
Khangno hun laia Pasian a
phawk lo, a zahtak lo, Ama deih banga a gamta lo mi pen mi enhuai tam lo hi.
Hat lopipi, hoih lo pipi-a a zui tantan mite pen mi enhuai leh Pasian a
lungkimsak mi ahi uh hi.
Thuhialna
Pasian in mihing a bawl
cil-in khangno-in na bawl a, tua manin khangnote manphatna pen lian mahmah hi.
Mihing hoihna leh siatna, mailam hun khempeuh pen khangno hunah kinga ahih
manin khangno lai hun zatsiam kisam mahmah hi. Tua ahih manin Solomon in zong, “Na
khangno lai-in nang a hong Piangsakpa pawk in” (Thna. 12:1) ci hi. Tuhun
leitung khantohna hat mahmah sungah, a manpha mi i suak theih nadingin - a
hoih lo nate pan a kikhel nuam khangno, a theihlohna pan a kisin nuam khangno,
tuhun leitung in a kisap i hih ding pen a thupi mahmah khat ahi hi. Tua
dingin, hun manphatna a thei, a zang siam, pumpi ki-ukzawhna, hangsanna,
lungduaina leh Pasian zahtakna a nei khangno i hih kisam hi.
Daihna Cabin || 20.8.2013
