A MULKIMHUAI SIHNA

A MULKIMHUAI SIHNA

August 10, 2013 zan pana a hang kithei lo a mang K. Zohmangaihi (49) w/o Lalremruata Ralte, Zarkawt PWD Tlang, Aizawl, Mizoram tawh kisai a pasal Lalremruata Ralte in policete kiangah a zi pen ama thah ahihna thu gen hi.

Lalremruata in a genna-ah, a u tanu khat, Delhi-ah sang kah dingin paipih sawm a, ahi zongin a zi in phal lo ahih manin a nupa kal uh buai-in, a pasal in sek (hammer) tawh a zi lu ah khenin, a zi si a, a si luang pen zan nai 11 velin motor tawh pua-in niin paihna-ah pai hi.

Zingsang a thawh uh ciangin Lalremruata in ompih uh nungakno kiangah “Na ni (K. Zohmangaihi) tawh tuzanin kilungkimsak lo ka hih manun zan nai 11 kiimin vakkhia hi” ci-a, tuani in Delhi lamah pai san hi.

August 12 ciangin zong K. Zohmangaihi ciah nai lo, banah a mobile phone switch off ahih manin veng le pam, u le nau leh policete kiangah a thu zasak uh a, policete in room verification bawl sawmin a inn uah a pai uh leh a bed room chahbi (key) pen Lalremruata in Delhi ah pua ahih manin a room kongkhak hihsia in room sung a et uh leh a lupna uah bed sheet kiphah lo a, lukhap zong khat bek omin, rizai (zanpuan) zong a tuamna om lo hi.

August 18, 2013 ni-in Lalremruata pen Delhi pan Aizawl tung a, policete in la pahin, policete kiangah a zi pen ama thah ahihna thu pulak hi.

Lalremruata-te innkuan pen amau nupa leh a zi (K. Zohmangaihi) sanggampa tanu, nungak no khat tawh a om ahi uh.

Hih banga kithah nading liangin a thu pen neu kisa ciat a, a hang lianzaw zong om kha thei ding hi.

August 19, 2013, 2:00 p.m in a luang kimu hi.

(Source : Special Report)