ZBC LEH ZOLAI

ZBC LEH ZOLAI

                Pau khat a om leh tua pen a kigelh khiat nading lai a om kisam hi. Tua mah bangin ei Zomite in zong awsuah tuamtuam tawh pau i nei uh a, tuate gelh nadingin lai i nei uh hi. Zolai cih ciangin hih ka lai gelhna awsuah bek a huam hi zenzen lo a, Zomi sunga awsuah tuamtuam tawh a kigelh peuhpeuh pen kei’ ngaihsutnaah Zolai ahi hi.

                Kum 1982 kuma kiphuan India gam sunga Zomi Baptist Church (ZBC) om lo hi leh, a diakin ZBC omna mun/khuate-ah tuhun ciangin ei pau a gelh thei bangzah a om tam? Ei pau tawh thu a gen leh a ngen thei bangzah a om lai tam? cih ka ngaihsun zelzel a, keimah mahmah in zong ka Zomi pihte theih dingin thu gelh lo mai thei hi ing.

                ZBC leh Zolai ka cih hangin, Mizogam sungah ZBC bekin Zolai a zang ka cihna hi tuan lo hi. Ahi zongin ZBC in Zolai tawh kisai a mapanna sate leh mailamah Zolai khantoh nadingin bangci kalsuan leh hoih ding hiam? cih pen ka gennop ahi hi.

                Minam i cih bang? I ngaihsutna leh i khensatna kibang lo ding hi. Ahih leh Zomi pen minam khat hi hang, i ci hiam, minam khat hi kei hang, minam dang khat sunga namke (tribe) khat hi lel hang, i cizaw uh hiam? Kawlgam, vaigam leh leitung mun tuamtuama om pau le ham, zia le tong, ngeina leh lai a nei Zomite pen i omna mun ciata minam lianzawte nuaia namke khat bangin kingaihsun i hiam?

                Tua bang ngaihsutna a nei Zomite lakah tam lua lai mahmah a, sila lungsimin a ukcip, sai khekhap sunga om uiphuk mah bangin a khuadak khia hetlote hi nuam mahmah uh a, ‘bel hawmte a gin ngaih’ a cih mah bangin tua bang mite pen a aw ngaihngaih khawng hizaw-mah uh ahih manin a buaihuai hun tampi om hi.

                Nek le tak haksatna hang leh thu tuamtuam hangin tu globalization hunah Zomite gam tuamtuamah i teng kawikawita uh hi. Gam nuam leh gam thupi a i ngaihsutna munte ah suakta uh ahih manin tua muna om i pau le ham kibatpih, i min i puam kibatpih, i zia le tong kibatpih, Khuado pawi leh Sialsawm pawi a zang tangtangte in Zomi pen minam khat hi hang, ci-in kipulak uh a, a teenna gam thupi sunga teeng minamdang, mi pil mahmahte in “Zomi hi kei uh teh”, “Ko minam hi uh teh”, “Kituamlak, kihuihtuam, mi philhphit leh thu tuam a sat” ci tuan peuhmah lo uh a, ahihna bangbang uh, a deihdan bang lian un nungtasakin, tenkhoppihin, pom siam uh hi. 

                Ahi zongin, a suakta lo gama omte leh a min beka suahtakna a kitangkona muna om minam dangte in Zomi cih khawng a zakdah mahmah uh hangin, Zomi pen i hihlohna hi tuan lo hi. Ei i kilawhna min hangin midangte a buai nading om kilkel lo a, mite in a minam min uh a khelsuk a khelto uh a, a deihna khatpeuh uh tawh a kilawhna hangin zong ei’ buai nadingin themcik zong om tuan lo hi.

                Leitung nuntakna-ah deihtel ding a lompi-in nih bang om hi. Tua mah bangin, Zomite in zong deihtel ding lianpi nih (2) i nei hi. I minam pau le ham, i ngeinate leh i laite kembit ding maw, ahih kei leh minam lianzaw leh a khangto zawte beelin, amau pau le ham sinin, a mau lai tawh thu gelhin, amau ngeina zia le tong zangin, amau pawite-ah gualnuamin om ding i hi hiam?

                Tua pen leitung mun tuamtuam a om Zomite adingin deihtel ding nih (2) hi den a, hi den lai ding hi. Tua ahih manin, ei minam, i pau i ham, i lai, i ngeinate leh i zia le tongte kembit ni i cih leh, a mangthanloh nading leh a khantoh nadingin i hanciam kisam cihna hi. Tua hi lo a, Kawlgam a omte pen Kawlte lakah, India gama omte pen Indiate lakah, Germany a omte pen Germante lakah, Japan a omte Japante lakah, amau ngeina bangin nungta in, amau pau zangin, amau lai gelhin om leng, i lung a kim diam?

                I thulu gen taktak ma-in tampi kigen mawkin, a tunga i gen mah bangin, pau le ham leh lai khat nei sam a, tua pen mangthang dingin deih lo i hih leh i puah i zun, i khantohsak kisam hi.

                Mizoram context-ah, ei pau le ham a zang bangzah hiam om hi. Ahi zongin ei pau a sim siam lo leh a sim nuam lo mi pen a tamzaw hi kha ding hi. Tua ciangin ei pau tawh pau khawng haivai a sa, a hai tengin ei pau zat ding a sa khawng om zawmah lai hi. Ngaihsut kibang lo pipi omkhawm i hih manin a om thei mah hi (ci mai ni!).

                Mizogam sungah ei pau, ei lai tawh a kisuahkhia lai leh, ei lai khantoh nadingin hanciamna tam nai het lo hi. Hun maan (regular) taka a kisuah bang tam het lo hi. Biakna pawlpi pua lam panin mi nih le thum hanciamna tawh ‘Zolawkta’ leh ‘Khuaizu’ kisuah ngei a, tua banah Siamsin Pawlpi in khatveivei hawmkhia thei zel uh hi. Biakna lam panin amau khua pawlpi sung a lai a hawm khat le nih om sam hi.

                ZBC gambup in kum 1990 pan kha sima kihawmkhia, ‘Laitai’ leh kum 1997 pana khangnote hanciamna tawh kha sima kihawmkhia ‘ZBYF Tangko’ pen Mizogam sunga ei pau le ham tawh a kigelh, kician taka kihawmkhia omsun tawh kibang hi. Tua hi a, Zomite pen lai lam i hatloh zah mahin, khuatang nuntakzia (lifestyle) zong khantoh i kisam mahmah pah hi.

                Tua ahih manin Zolai khantoh nadingin ZBC vaipuak pen lian mahmah cihna hi thei ding hi. ZBC pen a thusim vet lo leh a langdo vilvel a om hangin, mi pil ciangte in a sungah a omloh uh hangin a manphatna thei veve sam uh hi.

                Ka thugelh a huam (scope) hong neusak kik leng (ka thulu bangin), tua banga eimite adinga tavuan lianpi a nei ZBC in bangci bangin Zolai khantoh nadingin nasem ding, cih pen a ngaihsuthuai leh i gennop lianpi khat hong hi kik hi. Tua dingin ZBC sepzia ding khat le nih gen pak leng :

                Amasapenin, ZBC in Zolai tawh kisai in a huam (scope) ciang a theih masak ding kisam hi. ZBC pawlpi mite bek adingin hi lo hi, cih a theih ding kisam a, Mizogam sunga Zomite sung pana a hun manmanin lai a hawmkhia omsun ahih manin, tua laihawmte tung panin mundang, gam danga omte in Mizogam sunga a mipihte uh lim le mel, ngaihsutna leh nuntakzia thei ding uh ahih manin a ngaihsutna a zaisak kisam hi.

                A thu lam a gen ding pastorte leh a vaihawm ding, E.C/Upate mun tuamtuamah om hi. Tua banah, thu le la, leitung thu leh vangtung thute lai tawh a hawmkhia ding mi kician, thu le la siam, hunbitin semsak ding hi. ZBC sunga board leh hiang tuamtuamte pen nau cidam puak bangin khatpeuh in a puak theih hi a, ahi zongin lai lam tawh kisai pen tua banga a man peuhpeuh i puak/sep theih hi lo a, a uk het lo khat i sep ding zong hi lo hi.

                Tua bangin lai lam tawh kisai thuvanpi (literature secretary) kician khat om ding a, lai kihawmkhiate sai-in, laibu bawl nuamte panpihin, eimite in Zolai gelh a uk nadingun thalawpsak (motivate) ding hi. Pau dang tawh a kigelh laibu hoihte ei pau tawh let/tei ding a, tua in Zolai tawh kigelh laibu tamsak ding hi. I inn sungah ei pau tawh a kigelh laibu tam photphot leh, ei lai manpha sakna leh itna om pan ding hi.

                A sumh (lost) nuam hi lo napi, sumh ngamin lai lam nasep pen hahkat bawl ding hi. Sum nei het lo, laihawm la nuam a om leh tuate in a ngah theih nading lampi ngaihsun ding hi. Hunbitin a sem om hi leh, ZBC pana lai kihawmkhiate zong a la nuam kibehlap lai dingin ka ngaihsun hi.

                Hunbit a lai lam tawh kisai a sem kinei bang hi leh, khua tuamtuamah seminar, workshop cih bangin Zolai gelhzia leh lai manphatna gen kawikawi thei ding a, thu le la lamah tu dinmun sangin i minam khangto zaw ding a, i nuntakzia zong hong kilamdang ding hi.

                Naupang leh khangham Nipi sang thusinbute (text books) bawl ding a, a etlawmzaw leh a kicianzaw in bawl ding hi. Naupang labu pan kipan, naupangte laisim theih ding zong bawl thei ding hi.

                ZBC sung a lai a uk, i mipil misiamte, Gtna. Sia Nang, Sia Suan, Sia Thangte cih bang pen, lai (literature) bek saisak hi leng pawlpi leh minam adingin a manphatna uh leh amau mahmah ii manphatna pen tu-a sangin lianzaw dingin ka ngaihsun hi. Cihnopna ah, khawksia (pastor) in koi lai hiamah om lo ding cihna hi tuan loin, zumah a tut hun uh ciangin department/board tuamtuam tawh lenkhawm sak nianua loin, literature bek len vilvel leh, tua bang mahin literature pen department/board dang tawh lenkhawm loin tuam om leh manpha mahmah dingin ka lamen hi. Department/Board dangte bel nih le thum a kipuakhawm zongin a dankhat om dingin ka ngaihsun hi.

                A lamdang ka sak mahmah leh Zolai khantoh theihlohna hi dinga ka ngaihsut pen Zomite biakna pawlpi sungah Executive Secretary or General Secretary post tawh literature secretary or Editor post pen i kikopsak ahi hi. EBCC (Lamka), CBA (Lamka), TBC (Tedim), ZBC (Champhai), ZCLS (Kawlpi)te in a laihawm – Khristian Thukizakna, Lungdamna Aw, Lungvakna, Laitai, Zolai Zunna-ah, E.S or G.S in Editor sem khin uh hi. Lai lamah i maia pai a i ngaihsut uh sanggam Lusei pau a zang Presbyterian Church of Mizoram, Baptist Church of Mizoramte in Moderator or General Secretary pen Editor in koih tuan sese lo uh a, lai lama kiva leh a sem thei ding mi seh zaw uh hi. ZBCM (Kawlpi) in a lai nasepna ZACC ah Secretary a tuamin nei a, tua in ZBCM in a hawmkhiat ZOMKA ah Editor sem pah hi. Tua banga lai lam tawh kisai a tuam vilvelin a sem om ahih manin pawlpi dangte sangin lai lam nasepna-ah ZBCM activities pen a tamzaw/lianzaw tawh kibang pah hi.

                A lang lamin ngaihsun leng, i makaipite (E.S /G.S) lo a sem thei om lo hiam ci leng, amau zong kilaihlaih veve a, khatpeuh in sem thei veve uh hi. Midangte muang zo lo a, E.S or G.S ahih uh ciang beka muang zo pan i hiam? cih bang ngaihsutna-ah om a, muan taak, muan theih ding om lo i cih leh bel, E.S or G.S a sep uh hangin kimuan taktak tuan lo ding cihna ahi hi. Tua ahih manin, Zolai mainawt nading leh khantoh nadingin kikhelna a om kisam hi.. We need Change!

                Zomi, Zolai, Zopau gen ciangin tua a zang lo minam dangte huat ding, minam dangte aa zatloh ding cihna hi tuan lo hi. Minam dangte pen amau hihna bangbang, a deihna leh hoih a sak bang uh-a a nuntak bangun i pomsiam ding hi a, amau nuntakna-ah i thuneih nading khat zong om lo hi. Tua mah bangin, minam dangte in zong ei pau i zatna hang, ei lai i zatna hanga hong simmawh a, hong niam-et uh leh, tua pen itna hi loin, kisimmawhna ahi hi. Tua ahih manin mi i it a, mi in hong it nadingin amau hihna bangbang leh eima hihna bangbang kitheisiam tuah kisam hi.

                Bangbang ahi zongin, Zolai tawh gelh nawn vet kei ni-in, i kiim i kiangate zui-in, i minam mangthang hen i cih leh thu tuam; tua hi lo a, ei pau mah zat i ut leh tua i zat pau le ham, thu le la (lai) pen a khantoh nadingin geelna nei lo ding i hiam?

                Tu dinmunah, pawlpi pua lam panin Zolai tawh kisai sep le bawl baih lo ahih manin pawlpite in tavuan lianpi nei hang, cih kiphawkin, hanciam ciat ni. Geelna om loin sepna pen manpha ngei lo a, sepna om loin khantohna om thei lo hi.

~ T. Sawm Lian

Daihna Cabin || 9.7.2013