NANG' BANG SEM?

Nang’ Bang Sem?

                Pasian mizat tuamtuamte i et ciangin, mi thadah leh mi om mawk-mawk, sep nei lo a vakvakte na hi lo uh a, amau san ciatah sep leh bawl ding a hau, a citak leh a kuhkal, amau sepna ciat maan tak leh hoih taka a sem mite ahi uh hi.

·     Moses pen Horeb mual tungah gan cingin a om laitakin Pasian in sam hi (Pai. 3)

·     Gedeon pen leenggah sukna-ah mangbuh cilin a om laitak Pasian in sam hi (Tkte 6:11)

·     Kumpi Saul pen a pa la mang a zonna lamah Pasian in sathau nilh hi (I Sam. 9)

·     David pen a pa tuu cingin gam lakah a om laitak kumpi dinga sathau nilh dingin kisam hi (I Sam. 16)

·     Elisha pen bawngtal tawh lo a kho laitak, Elijah in a puan tualpi lot hi (I Kum. 19)

·     Nehemiah in kumpi lenggahzu a piak laiin Jerusalem kulh ciang dingin kisawl hi (Neh. 2)

·     Amos pen tuu a cin laiin sam hi (Amos 7:14)

·     Saul (a nung ciang Paul) pen Jesu nungzui Khristiante a bawlsiat laitakin Pasian in ama nasem dingin sam hi.

·     Jesu nungzuite - Matthai pen siahdong hi a (Mat. 9:9), Luka pen siavuan hi. Peter, James leh Johante pen ngabeng ahi uh hi (Luk. 5:1-11). Tua banah Jesu in a nungzui ding-a a sap Levi zong siahdong mah ahi hi (Mar. 2:13-14).

                Bang na sem na hiam? Na sepna-ah hoih tak leh citak takin na sem hiam? ‘Nasep hau lua ing’ ciin Pasian thu lunggai man lo leh kikhawm man lo zah dongin buai na kisa hiam? Na buai mahmah zongin tua bang nuntakna pana Pasian in amah a phat dingin hong deih hi. Thanuam leh citak takin, mite leh Pasian adingin na hoih sep cimtak kei ni. Lungkia loin i sep nak leh a hun ciangin thaman i ngah ding hi (Gal. 6:9).        

                  

T. Sawm Lian || Daihna Cabin (ZBYF Tangko, Jan. 2014)