Pawlpi Sung Thu
June 2013
* May
20 - 25, 2013 sungin Shillong BYF in Solfa sinna nei uh a, Sia David Hmar in sinsak zel cih thu kiza.
* May 22 -
26, 2013 sungin Aizawl ZBC in Rev. Pau Lian Mung, speaker a zangin
crusade nuam takin nei uh cih thu kiza hi.
* April 22
- 25, 2013 sungin Zokhawthar ZBC nuaia Mission Committee saina
tawh Nu Zen Lam Vung, speaker a zangin camping nuam takin zang uh a, May
29, 2013 in ZBC - E.C makaite tawh holimna leh thungetkhopna, vok khat go-in
nei uh cih thu kiza hi.
* Murlen
khua-a Primary School Siapi ahi Lia Ciang Ngaih Dim d/o Upa Thawng Khaw
Zam (L) in tunai-in bike (Pulsar) thak liklek lei thak ahih manin kilungdampih
mahmah hi.
* Champhai
Area Pastor Quarters a khuam a kigeel san laitak ahi hi.
* Hnahlan
Area Pastor Quarters a zat ding tuikuang a zaina 20ft. x 8ft., 4ft.
a thuk pen Rs. 30,000/- val deuh beiin kibawlkhin ta hi.
* Ngaizawl
ZBC in hun sawt pek pana a lam uh Naupang Sunday School Hall, a
zaina 36ft. x 18ft. pen zo siangta cih thu kiza hi.
* Pa Dai
Za Kam (56) h/o Nu Cin Ngaih Dim, Ngur khua in May 20, 2013 in leitung
nusia a, inn lamah P/P Lian Muan Kham in leh han lamah Rev. S. Chin Khan Tuang
in vuina hun zang hi.
Sept. 2013
Lungdampihna
1. Tg. Hau Khan Khup s/o
Rev. Suan Khan Thang in tunai-in Indira Gandhi National Open University (IGNOU)
nuaiah Semi Professional Assistant (SPA) sepna ngah a, Sept. 9, 2013 ciangin
nasep kipanin, Kerala state ah om ding hi.
2. Pa Thang Ngaih
Lian s/o Pa Nang Lian Do, Vapar khua pen, tunai-in Assam Regiment cing thak
a, tukha (September) sungin training dingin kuan ta ding hi.
3. Upa H. Thawng Pau
h/o Nu Niang Deih Lian, Aizawl in a sepna Mizoram Police-ah Assistant Sub
Inspector (ASI) za ngah thak hi.
4. Tg. Pau Sawm Lian
s/o Pa Khup Do Thang, Champhai pen Bachelor of Engineering (Computer Science)
sin dingin cing thak a, tu-in a sin nading mun Jorhat Engineering Collge,
Jorhat, Assam tung ta hi.
Revival Team khahkhiatna : August 7, 2013 (Nilaini) zanin, Champhai ZBC biakinn-ah ZBC Revival
Team Khahkhiatna hun kizang hi. Hih hunah Upa Cin Sian Thang, Chairman, ZBMB in
hun-ukin, Upa Kam Thang, Member, ZBMB in hun-apna nei a, Sianu Awi Ngaih Lun,
Secretary, ZBMB in thupulakna a neih khit ciangin khahkhiatna hun Rev. Suan
Khan Thang E.S, ZBC in nei hi. Hih hunah Champhai BYF leh Revival Team tung
panin lasakna kingaikhia hi.
Revival Team memberte pen - Evan Thang Lian Go (Speaker), Upa
Suan Tuang, Vapar, Pa John Lianpu, Leisenzo, Lia Ning Ngaih Lun, Ngur, Lia Ciin
Ngaih Mang, Vaparte ahi uh hi. Amaute in August kha sungin Aizawl, Thuampui,
leh Shillong pawlpite pha uh hi.
Sound System nei thak : Vengthar ZBC a LCC in hiang tuamtuamte tawh panghuanin sound system
hoih mahmah, Rs. 1,00,000 val man tunai-in lei thak uh cih thu kiza a, Pasian
minthan nading leh khangnote Pasian lamah a thalawp zawk semna ahih ding
kideihsak hi.
Pawlpi kigawm : Ngur khua-ah
ZBC pawlpi nih a om pen kigawmkik ding a lunggulhna uh tawh kizui-in, Champhai
Khawk makaite in holimna neihpih uh a, August 18, 2013 ni-in biakin nih-ah
kikhawm nawn loin biakinn khatah kikhop khop nading thukimna bawl uh hi. Topa
min i phat hi.
Aizawl BYF : Aizawl BYF in
kalsim thukizakna a bawl, Zaitha kici inntekna tawh August 31, 2013 in Siamsin
Pahtawina 2013 hun zang uh a, hih hunah Tan 10 zo thak - 2, Tan 12 zo thak
- 2, B.A zo thak - 2, Ph. D ngah thak - 1 leh zakhang (promotion) - 1 pahtawina
pia uh hi.
Shillong BYF : Sept. 7, 2013
ciangin Shillong BYFte Umdihar-ah Tour pai ding uh a, Sept. 13, 2013 ciangin
Montinagar Field-ah Sport nei ding uh hi.
Lai Siangtho Sim : Champhai
BYF in Lai Siangtho buppi simsuak sawmin August 1, 2013 panin zan simin Lai
Siangtho sim uh a, khangnote lawp thei mahmah uh cih thu kiza hi.
Mission Seminar : September 6
- 8, 2013 sungin Ngur Vengsang a ZBC biakinn-ah Mission Seminar om ding hi. Hih
hunah Rev. Chin Khan Tuang, Rev. P. S Za Tuang, P.P Lian Muan Kham, Rev. Thang
D. L Pau Mung, leh Evan. Zam Suan Paute in seminar pia ding uh a, Evan. Thang
Lian Go, Rev. Dai Do Thang leh Rev. Chin Khan Tuangte sermon ding uh hi.
ZBYF Tangko Award, 2013 : ZBYF Khangnote in laisinna lamah a hoih lama kidemna a neih nading uh
deihsakna tawh a kibawl, ZBYF Tangko Award 2013 pen Pasian in pha a sak leh
September 14, 2013 zan biakpiakna hunah ZBYF Tangko Editorial Board in
hawmkhiatna hun nei ding hi.
Tukum in Tan 10 zo thakte ading bekin kivaihawm zo a, mai lamah
a tung lam zong zop tohtoh kisawm hi. Ngetna omte Editorial Board in a
ki-etkhop ciangin Lia Niang Lam Cing d/o Upa Vial Khan Kap,
Hnahlan khua in ngah ding hi.
ZBYF Sunday : Tukum ZBYF Sunday
pen Central Committee member pawlkhat in hih anuaia khuate-ah zatpih ding uh hi
: K. Joseph - Ngur leh Ngur Vengsang, Robert N.K. Hau - Vapar, Upa
Kap Go Thang - Hiangmun, Kam Lam Thang - Teikhang, Z.L. Thang - Vaikhawtlang, Sing
Lian Mung & Dr.Kham Suan Pau - Thuampui, Nang Sian Mung - Aizawl.
Khawk Khawmpi : October 5
& 6, 2013 sungin ZBC gambup-ah Khawk Khawmpi kinei ding hi.
ZBYF A.C & Seminar : November 14 - 17, 2013 sungin Aizawl ZBC biakinn leh Aijal Club,
Aizawl ah ZBYF Annual Council leh Seminar om ding hi.
Hih hunah Pu Thang Lianmang, Member Secretary, Mizoram Legal
Services Authority in Legal Awareness (Dan lam tawh kisai), MSTC/NTCP
panin Tobacco Awareness (Za tawh kisai) leh Pu Vanneihtluanga, Editor,
Lengzem in Moral Reformation tawh kisai seminar pia ding uh a, P. P Lian
Muan Kham in Khangno leh Pasian Nasep, Rev. Thang D L Pau Mung in Khangno
leh Minam leh Dr. Kham Suan Paute in Khangno leh Pilna cih thulu
zangin thuhilhna (sermon) nei ding uh hi.
Hih Annual Council leh
Seminar hun-ah tun kim zan pen Cultural Nite
in kizang ding a, report ngaihkhiatna zong om ding hi. ZBYF makai thak
kiteelna zong om ding a, tua banah, Nov. 15, 2013 nitaklam hunah - Mizoram
University, AICS (Baptistte LST Sang), Solomon Temple, ATC (Presbyteriante LST
Sang), leh KV Paradise-te phak ding geelna om hi.
Zing le leng do leh nek le taak pen Aizawl ZBC in tavuan la
ding a, pai dinga a kisehte leh tavuan neite khempeuh pai kim ciat dingin
Aizawl ZBC in a deihna thu kiza hi. Thungetna-ah phawk ciat ni.
Oct. 2013
Lungdampihna
1. Sia Nang Sian Mung,
ZBYF Preisident Elect, Aizawl khua-in tunai in mawtaw liante (1109) thak liklek
nei thak hi.
2. Upa Khai Za Dal, Murlen
khuate innkuan in tunai in car (Wagon R) nei thak uh hi.
3. Ngaizawl ZBC in Naupang
Sunday School building hoih tak nei thak uh a, a zaina 36x22 hi a, Rs. 3,50,000
kiim bei uh hi.
ZBYF Sunday Report @ Hiangmun : ZBYF - CC vaihawm siamna tawh Hiangmun BYF pha dingin Sept., 12, 2013
in K. L Thang (Teikhang pha ding) tawh Vapar panin Pa Thangthang sumo-ah
tuangin Vaikhawtlang-ah ka giak uh a, Sept., 13 zing nai 5 in khe tawh pai-in,
Tuisa gun khang ahih manin Upa Kamtawng, BRTF Santiry kiangah, “Hong kha in” ka
cih uh leh thalawp takin hong kha a, ka nuam mahmah uh hi. Tuisa tui pen diip
ciang pha-in, khauh sim ahih manin laam 10 phial hong taaisuk mawk hi.
Tuisa
pan paito-in, nai 10 in Kawlbem ka tung uh a, Pa Piangdote innah ann ka nek uh
leh ka mit uh hong vaak pah hi. Nai 11 in dingkhia kikin, khe mah tawh pai
ngekngekin, nitak nai 7 in Hiangmun ka tung uh hi.
Hiangmun
BYFte in Sept. 14 ni suhun pen ciamnuih leh kimawlna tuamtuam tawh hun nuam
takin zang uh a, zan hun pen guah tam lua mahmah ahih manin ka kikhawm thei kei
uh hi.
Sept.
15 Nipini zing biakpiakna nuam takin ka nei thei uh hi. BYFte in lapawl sa-in,
solo nih om hi. Nitak biakpiakna hunah zong mi li in la sa-in siam thei mahmah
uh hi. Kikhop tawp ciangin holimna kinei a, khangnote vei thu pawlkhat pen :
1. A tuam vilvelin Youth
Secretary neih ding.
2. Khangno lai siamte’n Lai
Siangtho sin a lunglut nading un hunbit nasemte khasum pen pawlpi dangte a tawh
kikhia lua kei leh.
3. Makaite in mun dang a pha kei
zongin Sialkal khawk pen kum khatin nihvei bang hong pha leh, cihte ahi hi.
Sept.,
16 zing nai 6 in mawtaw tawh hong dingkhia-in nitak nai 6 in champhai ka tung
hi. Hih Hiangmun ka phakna-ah Hiangmun BYF in Rs. 500 hong pia a, Hiangmun BYF
member galkap ahi Tg. Dal Kap Mung in Kawlkulh-ah ann nekman hong piaksak ahih
manin ka lungdam mahmah hi.
- Upa Kap Go Thang, ZBYF - CC member, Vapar
Vapar : Amasa-in Pasian
hehpihna leh hong makaihna tawh ZBYF Nipi a 25-veina nuam takin zang thei i hih
manin lungdam a, makaite geelsiamna hangin ko kiangah Pa Robert N. K Hau, ZBYF
Secy. Senior in hun hong zang thei ahih manin, ama tung leh vawihawmte tungah
lungdam hi.
Sept.
15, 2013 biakpiakna hunah BYF in lapawl sa ziahziah a, mipite in zong tha ngah
mahmah hi. Naupang Nipi Sang lam panin Lai Siangtho lotngah hong gen uh a, tua
bek tham loin Nupite in zong la ngaih mahmah tawh hong uap uh hi. Pa Robert
N. K Hau in “Khangno leh tuhun” cih thulu tawh hanthotna hong
nei a, tuhun khantohzia, tuhun siatna, thu leh la tawh kisai kizaksakna
tuamtuamte khantohzia khawng hong genin, a sia lamin zong zat theih ahih manin
kidop a kisapna thu lim takin hong gen a, tha kingah mahmah hi.Kikhop tawp
ciangin niangtui leh moh lim tak kine khawm a, nuam kisa sem hi.
Sun
hun ciangin Pa N. K Hau tawh ZBC leh khangnote khantoh nading leh thu tuamtuam
genkhopna kinei a, mailamah khangnote kalsuanzia ding zong kikupna nasia takin
kinei hi.
Zan
hun biakpiakna pen nuam takin kizang kik a, mimal lasakna zong omin, Pa Hau
tung panin “Khangnote leh hun” cih thulu tawh, hun manphatzia,
zatsiam a kisapna, khangno hun lai-a Pasian phawk a kisapna thu limci nono
kingaikhia a, hong deihsaknate thupi kisa-in, ngaihnop zong kisa hi. Mai lamah
zong hih bang hun manpha hong zatpih kik ding zong ka lamen uh hi. Pasian in a
sim khempeuh thupha hong pia ta hen.
- Pa Vial Sawm Piang, Secy., Vapar BYF
Mun dang : ZBYF Nipi pen Aizawl
ah Sia Nang Sian Mung, President Elect, ZBYF in zat pih a, Thuampui-ah Dr.
Kham Suan Pau, President ZBYF, Vaikhawtlang-ah Sia Z. L Thang, C.C
Member, ZBYF, Teikhang-ah K. L Thang, C.C Member, ZBYF, Hnahlan-ah T.
Sawm Lian, Editor, ZBYF Tangko in zatpih cih thu kiza hi.
ZBYF Tangko Award : Pasian in
mihingte geelna hong tangtungsakin, Sept. 14, 2013 zanin Hnahlan ZBC biakinn-ah
ZBYF Tangko Award, 2013 piakhiatna hun nuam takin kizang a, a ngah Lia
Niang Lam Cing, Upa Vial Khan Kap’ tanu zong hih hunah kihel thei hi.
Hih
hun zang dingin Joint Editor Robert N. K Hau tawh Hnahlan ka pha thei uh a,
Hnahlan BYF makaite in Upa Vial Khan Kapte inn-ah hong dawnin, nitak ann hong
nekpih uh a, gilvahin lungdam mahmah hi.
Zan
biakpiakna-ah Pa Kap Suan Thang, BYF President in hun-uk a, Pa Suan Za Mung in
hun-ap-in, Upa Thang Ro Siam in sumpi ap hi. ZBYF Tangko Award (Lai Siangtho,
Pahtawina Laipi leh India sum 3000) piakhiatna hun Editor in zangin, hanthotna
Robert N. K Hau, Jt. Ed., in zang hi.
Hih
bang Award a kihawmkhiat theih nadingin - Pahtawina Laipi bawl nading leh Lai
Siangtho lei nading Rs. 600/- hong pia - Upa Khai Za Dalte innkuan, Rs. 1,000
tek hong pia - K. Joseph (News Editor, ZBYF Tangko), Robert N. K Hau (Jt.
Editor, ZBYF Tangko) leh T. Sawm Lian (Editor, ZBYF Tangko) tungah nakpi takin
lungdam hi.
Hih ZBYF Tangko Award pen ZBC khangnote
in lai sinna-ah a hoih lama kidemna a neih ding deihna tawh a kibawl hi a,
haksatna lian lua a om kei leh mai kum ciangin maban zop ding hanciamna om
hi. - Editor
Mission Seminar : A 4-veina
ZBC Mission Seminar pen Sept. 6 - 8, 2013 sungin Ngur khua-ah kizang a, Rev. S.
Chin Khan Tuang, Rev. P. S Za Tuang, P.P Lian Muan Kham, Rev. Thang D. L Pau
Mung leh Evan. Zam Suan Paute in seminar pia a, Evan. Thang Lian Go, Rev. Dai
Do Thang leh Rev. S. Chin Khan Tuang tung panin sermon kingaikhia hi.
Nov. 2013
Lungdampihna
1. Singapore a om Dr. Hau Za Cin h/o Siamah Vung Deih Cing in
tunai-in SIM University, Singapore panin Master of Social Work (MSW) zo
thak hi.
2. Rev. Gin Lam Thang tapa, Tg.
Thang Khan Lian, Shillong in tunai in NEHU panin Bachelor of Law (LLB)
hong zo thak hi.
2. ZBC Accountant Sia N. Chin Thangte innkuan in Car (Alto)
thak leh Hnahlan khua a Upa Cin Khen Khamte innkuan in Car (Maruti 800)
nei thak uh hi.
Pa J. K Cin in ZBC Pha : Lamka khua sunga ZBYF Tangko Agent ahi Pa J. K Cinpu, Pangzawl
in Rom 12:1na bangin, ‘Hingtang a kipiakna’ ci-in a pumpi mahmah
kuankhia-in, “Pasian Agent” hih ding a thupina thu bulphuhin
Sept. 31 - Oct. 24, 2013 sungin ZBC gam sung - Vaikhawtlang, Murlen, New
Champhai, Ngur, Vengthar, Champhai, Sesih, Leizenzo, Zokhawthar ZBC pawlpite
pha kawikawi a, khua pawlkhat zong phaksawm lai hi. Upa Dam Khan Go, New
Champhai in khua 7 ah kithuahpih hi.
Pa J. K Cinpu in ZBC khantohna tuamtuam, Pasian thu duhin,
Pasian a zahtakna uh hanga ama nasemte a thupi bawlna uh, biakpiakzia mahmah
zong khangto ahihna thu gen a, a phak pawlpite in zin limtak do-in, sunsiah a
tunte leh, ann a nekpih khempeuhte tungah nakpi takin a lungdamna thu genin,
amaute Pasian in thupha a piak ding deihsak hi. Ama sum le pai tawh hih
banga Pasian ading a kalsuan khiat pen thupi kisa mahmah hi.
Signboard suang : ZBYF - CC
in Aizawl lampi, thungetna munah Lai Siangtho Joshua 24:15 suan ding a cih mah
bangin October 19, 2013 in Champhai leh New Champhai BYF memberte in suang khin
uh hi.
Camping : October 17-20,
2013 sungin Vapar ZBC biakinn-ah Naupang Camping om a, Speaker in Evan. Thang
Lian Go kizang hi. Hih hunah naupang 52 kihel a, nuamsa mahmah uh cih thu kiza
hi.
Crusade : October 9-13, 2013
in Hiangmun ZBC biakinn Hiangmun ZBC Mission Committee inntekna tawh crusade om
a, Speaker in Rev. Thang D. L Pau Mung pangin nuam sa mahmah uh cih thu kiza
hi.
October 16-19, 2013 sungin Shillong ZBC pawlpi in Rev. Nang
Khan Mung, Sakhangyi (CCOC palai lui) zangin crusade nuam takin zang uh cih thu
kiza hi.
Joint Sport : Aizawl khua
sunga Zomi kampau a zang pawlpi 3 - EBC, ZBC leh AG sung a khangnote in October
26, 2013 in Brigade Field, Bawngkawn, Aizawl ah kimawlna tuamtuam zangkhawm uh
hi.
Council & Commt. : ZBYF A. C - Nov. 15-17, ZBWS A.C - Nov. 19-21, E.C
- Nov. 29, G.C - Dec. 5 -8. Thungetna-ah phawk ni.
Dec. 2013
Lungdampihna
1. Tg. S. Kap Khan Do s/o
Upa Hau Za Nang, Murlen leh Lia C. Lalruatkimi d/o Upa C. Vanlalvela,
Melbukte, Nov. 14, 2013 in Murlen ZBC biakinn-ah Rev. S. Chin Khan Tuang in
siangtho pumkhat suaksak hi.
2. Tg. Zam Sian Muan
s/o Pa Pau Sian Khup, Hnahlan leh Lia Lalveni d/o Pa Tawkrawla,
Aizawlte, Nov. 29, 2013 in Hnahlan ZBC biakinn-ah Rev. S. Chin Khan Tuang in
siangtho pumkhat suaksak hi.
3. Tg. Lian Sian Ding s/o Pa Zam Khan Thang, Aizawl leh Lia
Zonunmawii, West Phailengte, Sept. 27, 2013 in Aizawl ZBC biakinn ah
siangtho pumkhat suak uh hi.
4. Upa H. Thawng Pau
h/o Nu Niang Deih Liante innkuan, Aizawl in tunai in Car (Hyundai Eon Magna+)
nei thak uh hi. Upa H. Thawng Pau pen ZBYF Secretary Senior leh ZBYF Tangko
News Editor Tg. K. Joseph’ pa ahi hi.
5. Upa Gin Deih Piang h/o Nu
Cing Deih Niang, Murlen/Champhaite in tunai in Auto Rickshaw nei thak uh hi.
6. ZBC nuaia naupang
tawh kisai project khat ahi, Bethel Veng Child Development Center a zat
dingin sound system (Combo 2 & Keyboard 1 - PSR 550) leh Projector hoih
mahmah, a vekpi’n Rs. 1,50,000 man tunai-in lei thak uh hi.
ZBYF : Zomi Baptist Youth
Fellowship (ZBYF) Annual Council 21veina leh Seminar pen Aizawl ZBC biakinn leh
I&PR Conference hall-ah Nov. 14 - 17, 2013 sungin nuam takin kizang hi.
Hih hunah ZBYF makai ding kiteelna om hi. Kum 2014-16 sung ZBYF
makai dingte : President - Nang Sian Mung, Aizawl; President Elect
- Z. L Thang, Vapar; Secretary Senior - K. Joseph, Aizawl; Secretary
Junior - Robert N. K Hau, Ngaizawl; Members
-Sing Lian Mung, Sesih; K. Lang Kap, Champhai; Dal Suan Mang, New Champhai; P.
L Mang, Vengthar; Kap Sang, Hiangmun.
ZBWS : Zomi Baptist Women
Society (ZBWS) Annual Council leh Seminar pen Champhai ZBC biakinnah Nov.
19-21, 2013 sungin kizang hi.
Hih hunah kum 2014 - 16 sunga ZBWS makai ding kiteelna zong om
a, makaite pen : President - Nu Cing Go Niang, Champhai; President
Elect - Nu Niang Deih Lian, Aizawl; Secretary Senior - Nu Hau Don
Kim, Hnahlan; Secretary Junior -
Nu Cing Sian Niang, Champhai; Members - Nu Cing Ngaih Ning,
Champhai; Nu Cing Ngaih Zen, Zokhawthar; Nu Man Ngaih Lian, Vapar; Nu Niang Lam
Cing, Hiangmun; Nu Vung NgaihThang, Ngaizawl.
Letsong Pia : ZBYF makaite
thusiamna tawh Aizawl khua sunga Zomite in singtang lama om sanggamte lungdambawl
letsong dingin - numei leh pasal khedap bulh 117 leh numei bag 18 piakhia uh a,
Aizawl BYF in a kaihkhop tavuan semin, Pa Lian Suan Thangte innkuan, Bawngkawn,
Aizawl in a khonkhong (free) in Aizawl pan Champhai dong puato ahih manin
lungdamna kiciamteh hi.
Hih khedap leh bagte pen khua nga-ah hih bangin kihawm hi : 1.
Vaikhawtlang : Khedap - 42 & bag - 5; 2.Teikhang : Khedap - 42
& bag - 4; 3. Murlen : Khedap - 31 & bag - 3; 4. Leisenzo
: Khedap - 31 & bag - 2; leh 5. Ngaizawl : Khedap - 31 & bag -
4.
Hiangmun BYF : Hiangmun BYF
member 30 val in Nov. 29, 2013 panin Champhai leh a kiim khua a ZBC pawlpite
pha kawikawi uh hi.
Shillong BYF : Dec. 1, 2013
in Shillong BYF in ‘Advance Christmas’ Shillong ZBC biakinn ah
nuam takin nei thei uh cih thu kiza hi.
General Council : A 29 veina
ZBC kumcin vaihawmna pen Dec. 5 - 8, 2013 sungin Champhai ZBC biakinn ah kizang
hi. Hih hunah pawlpi mailam kalsuan dingzia tuamtuam vaihawmna om a, tua banah
ZBC - Exe. Secy. a sem laitak Rev. Suan Khan Thang pensen hun ta ahih manin,
khakna hun zong Dec. 8 in kizang hi. Zindo pawlpi Champhai ZBC in zindo
nadingin Rs. 10,000/- pia cih thu kiza a, thupi kisa hi.
Zomi Musical Nite : Aizawl
khuapi sungah Zokam tawh biakpiakna pawlpi thum - Zomi Baptist Church (ZBC),
Evangelical Baptist Convention (EBC) leh Assembly of God (A.G) om a, hih pawlpi
thum sunga khangnote in Chanmari YMA Hall-ah Dec. 13, 2013 ciangin “Zomi
Musical Nite” zatkhop sawm uh hi. Hih hunah Zomi khangno lasiamte leh
talent tuamtuam neite ki-show in, thu manpha tom cikcik ngaihkhiatna zong nei
ding cih thu kiza hi.
Jan. 2014
Lungdampihna
1. Tg. Mangbawi Suante leh Lia
Thang Ngaih Cingte, Dec. 14, 2013 in Aizawl ZBC Biakinnah Rev. Dai Do Thang
in siangtho pumkhat suaksak hi
2. Tg. Kam Luah Thang
s/o Upa B. Mang, Champhai in Shillong panin Bachelor of Computer Application
(BCA) zo thak hi.
3. Tg. Zam Sian Ding s/o Upa Nang Lam Cin, Murlen khua pen India
galkap (Para Regiment) dingin cing thak a, training zong Bangalore-ah kipan ta
hi.
4. Upa Dr. Kham Suan
Pau, Aizawlte innkuan in tunai in car (i20) thak liklek lei thak uh hi.
5. Upa K. Mang, Vapar khuate
innkuan in tunai in Scooty thak liklek lei thak uh hi.
6. Upa Bawi Thang, Bethel
Veng, Champhaite innkuan in tunai in Scooty lei thak uh hi.
7. Pa Cin Ngaih Thang, Kanan veng, Champhaite innkuan in tunai in
Scooty thak liklek lei thak uh hi.
8. Pa Vung Za Kap, Bethel Veng,
Champhaite innkuanin tunai in Car (Maruti 800) lei thak uh hi.
Zum Hong : Kum 2014 adingin ZBC zum honna, tavuan ki-apna leh
E.C meeting 2-veina pen January 8, 2014 in ZBC zumah E.C Members, ZBC Workers,
CDC Workers leh Lydia Project Wokerte in nuam takin zangkhawm a, ZBC President
Upa Z. K Dong in makaihin, E.S pension Rev. Suan Khan Thang leh ZBC President
Elect Upa H. Thawng Pau in hanthotna hun zang hi. Hih hunah E.S thak Rev. Gin
Lam Thang, Pastorte leh Departmental Secretaryte in tavuan apna leh saanna hun
zang uh hi.
ABYF Meet : Hnahlan Pastor Area sunga khangno, Area Baptist
Youth Fellowship (ABYF) makaite hanciamna tawh Hnahlan khawk sunga khangnote in
Jan. 10 - 12, 2014 sungin Vapar khua-ah A 3-veina ABYF Meet, 2014
zang uh a, kimawlna tuamtuam - volleyball, football, tug of war, Zola aw kaih,
Bible quiz, group song leh solo kidemna nei uh a, ‘Zo Nite’ zong
zang uh hi. Evan. Thang Lian Go in hih huna kihel mite Pasian thu hilh hi.
Ngur ZBC : I lunggulh leh i ngaklah mahmah, Ngur ZBC in
biakinn mun hoih tak nei thei ta uh ahih manin kilungdam mahmah hi.
Tavuan thak : A 29-veina ZBC -
G.C in hih anuaia bangin hunbit nasem - Pastorte leh Secretaryte tavuan thak
guan hi :
1. Rev.
Gin Lam Thang Exe.
Secy., Laitai Editor, R.D. & ZBE&LB Secy., CDC Director.
2. Rev.
Dai Do Thang Shillong
Area Pastor
3. Rev.
Chin Khan Tuang Aizawl Area
Pastor
4. Evan.
Thang Lian Go Sialkal
Area i/c
5. Rev.
P. S Za Tuang Champhai
Area Pastor
6. Rev.
Thang D.L Pau Mung Hnahlan Area
Pastor
7. Sianu
Awi Ngaih Lun Women,
Youth & Mission Secy.
ZBYF Budget : Kum 2014 sunga ZBYF budget pen Rs. 80,350/- hi a,
tua lakah ZBYF Tangko pana muh ding lamet zah pen 16,000/- ahi hi. Member tawh
i tuat ciangin member khat ii budget pen pawlpi dangte tawh i tuat ciangin
lungkimhuai mahmah hi.
Keyboard Training : ZBYF ngetna bangin ZBC- GC in
Keyboard training nadingin Rs. 30,000/- phalsak ahih manin, tukum 2014 sungin
Keyboard training om ding hi.
Shillong BYF : Shillong BYF makai thakte :
President : Tg. Thang Khan Lian
Vice President : Tg. Gin Suan Thang
Secretary : Tg. Samuel Nang Sian Khual
Asst. Secy. : Lia Sang Rou Kim
Tresurer : Tg. Kap Thang
Finance Secy. : Tg. Samuel Thang Khan Muan
Ngaizawl BYF : Ngaizawl BYF makai thakte :
President : John Thang Khen Cin
Vice President : Vai Za Lam
Secretary : Robert N. K Hau
Asst. Secy. : Dal Gin Pau
Tresurer : Cing Sian Don
Finance Secy. : Khup Don Kim
New Champhai BYF : New Champhai BYF makai thakte
:
President : Dal Deih Pau
Vice President : Kai Lian Kap
Secretary : Dal Suan Mang
Asst. Secy . : Thang Gin Pau
Tresurer : Tuang Sian Muang
Finance Secy. : Suan Sian Lian
(ZBYF Tangko, Editor)
No comments:
Post a Comment