PIANGTHAKTE LEH MINAM ITNA

PIANGTHAKTE LEH MINAM ITNA

Ngaihsutdan, muhdan leh sandan kibang het lo mihing omkhawmte i hih manin, hih piangthak/suakkikte leh minam itna thu tawh kisai zong ngaihsutzia leh sandan kibang het lo hi. Ahi zongin, thu khatpeuhpeuh pen mihing ngaihsut tawmna leh hoihsakna bek pan dik/maan kim lo thei ahih manin Khristiante in i kingakna Lai Siangtho mah panin et ding hi a, kuate piangthak hi a, piangthak mite in minam a it uh hiam cih leh, bangci bangin minam it ding hiam cih hih thului in a pulaknop ahi hi.

Namkim Bu – Lai Siangtho

            Lai Siangtho pen mihingte kisap khempeuh kim takin a kigelhna hi a, leitung nuntakna sung bek zong hi lo, sih nung cianga nuntakzia ding hong hilhin, tawntung nuntakna lampi hong lak ahih manin laibu dangte sangin manphazaw, vanglianzaw hi. Leitung leh vangtung a om nate piandan kigelh a, vantunggam, hell, aksi, sihna, minamte tangthu, mawhna, vantungmi, Pasian, Satan, pilna thu, nuntakzia ding leh a manpha thu tampi kigelh hi. Tua bang ahih lai takin, Lai Siangtho i sim ciangin a sunga kigelh tampi pen (Israelte) minam tangthu ahi hi. Gentehna in, Piancilna panin i simtoh ciangin Pasian in leitung leh vantung a bawlna pan mihing hong piansakna, minam a teelna leh tuate tangthu tawh hong kizomto daudau hi.

Minam leh Piangthak

            Minam i cih bang ciang huam ding? Ngaihsutna kibang lo leh sandan kibang het lo hi. Hih munah minam cih hilhcian sawm lo hing. Minam cih kammal na sim ciang, “eimi, ei pau, ei lai” cih a na ngaihsut theih, “hihte ka minampihte hi” cih na saan theihte pen minam hi mai phot hi. Sisan (suan le khak) bulphuh maw, pau maw, mun bulphuh maw; tua bel sandan kibang lo ahih manin tua sandan kibang lo gawmkhop ka sawm kei phot hi. Ahi zongin, ‘keima minam,’ ci a i pom/saan panin tua i pom/saan minam leh eima Khristian nuntakna pen bangci bangin kalsuan ding hiam, cih a gennuam ka hizaw hi.

            Piangthak cih kammal sangin suakkik cih kammal a zang nuamzaw om hi. Hih munah hih kammal nihte pen gennop/deihna kibang in kizang hi. Lai Siangtho sungah suahkikna/pianthakna pen kician takin kigelh hi. Jesu leh Nikodemas kihona panin en lehang Jesu in, Mihing Tapa (amah Jesu Khris) pen sing tungah kikhai ding a, a um mite in tawntung nuntakna nei ding ahihna leh, Pasian in a Tapa (Jesu Khris) letung mite hong it manin hong pia a, singlamteh tungah mihingte mawhna hangin kikhai hi. Ni thumni in sihna panin thokik a, tua a um mite in tawntung nuntakna ngah (Pasian ta suak) uh a, tua mite pen mi piangthak/suakkik i cihte ahi hi (John 3:1-21; 1:13; Rom 6:4; 10:9-13; 2 Kor 5:16,17; Gal 6:15; Eph 2:8; 4:24; 1 John 4:7; 5:1). Peter piangthak mite pen, “A sithei nu le pate sung pan hi loin a sithei lo nu le pate sung panin a nungta tawntung Pasian’ thu tawh naungek bangin a suakkik” (1 Pet 1:23) ciin na gen hi.

Kingaihsun Khial Zel

Minam itna thu i gen ciangin minamdangte huatna thu a gen bang-a a ngaihsun om thei zel mawk a, dahhuai mahmah hi. Tua bang ngaihsutzia dik lo a nei tamlua lai ahih manin minam itna thu a gente pen ‘mihai’ ci-a hong kingaihsut hun tam mahmah hi. A taktakin minam itna, minam khantoh ding deihna pen minam dangte huatna leh minamdangte ukcip nopna hang hi loin, Pasian in ama lim le meel sun leh minam khat a hong bawlte, midangte mah bangin khangto in, Pasian thu leh, leitung pilna siamna ah mite tawh liangko kikim a paikhop, nuntakkhop ding deihna hang hizaw hi.

            Amau pau tawh thu ngen thei lo, la sa thei lo (nei lo ahih leh bel thu tuam), maizumna sang a kiletsakna a zang, niman dang Kawl, Vai, Mangpau, etc. bek tawh Pasian phat leh la sak nuam a sa tam mahmah ta mawk hi. Sakloh ding, siamloh ding a ci hi loin, ‘ka pau, ka lai’ ci a i gen tawh Pasian phat thei lo, thu ngen thei lo cih pen thupina sangin haina lam hizaw hi. Pawlkhat in, “Ei pau tawh thunget hak lua, la lah kisiam lo, sak haksa lua” ci uh hi. Tuate kiangah ka gennop mahmah (ka gen ngei nai kholloh) pen, “Tua nuam nasakte na zat zah un ei pau in thungenin, ei la sa le uh cin na siamlohna ding uh om kei, nuam na saklohna ding uh a hang om lo ding hi” cih ahi hi.

            Kingaihsun khial zel hi. Bangbang thu-up (doctrine) i zui a, bang pawlpi leh biakna ah i om zong tua bel upna thu ahih manin gen theih luat hi kei; ahi zongin biakna pawlpi hang hiam, thu-up hang hiam a ‘minam taisan leh minam itna’ nei thei lo dana kingaihsutna pen paihkhiat hun mahmah ta hi. Ahi zongin, minamdang, ei pau a theilote tawh kikholhna, biakpiakkhopn ah bel ei pau a theih kei uh leh en zong i theihpih pau, Kawlpau, Mangpau, Vaipau, bangbang i zang zongin zat ding bel phamawh lo hi.

            Minam itna pen namdang tawh kikhenna nopna hang hi lo hi. Ahi zongin minamdang tawh kilem sawm lua in amau omdan bangbanga om sawmna pen lampi dik hi lo mai thei hi. I hihna bangbangin om ding hang a, tua i hihna bangbang tawh kipumkhat ding hizaw hi.  

Tua ahih manin, Minam itna pen minamdang huatna hi lo a, minam khantohna ding deihna pen minamdang ukcip sawmna leh bawlsiatnopna hang hi lo ding hi.

Piangthakte leh Minam Itna

            Nangma ngaihsutna sung a ‘ka minam’ na cih, it ding mah hiam? Minam itna (mipihte itna) pen Lai Siangtho tawh a kituak mah hiam? Mi tampi in piangthakte in minam it kul lo, minam vai gengen lo ding, a ci om hi. Takpi mah hiam?

            Minam vai a ngaihsun lo leh a kin het lo, kisam a sa lo (banga omte) pen – Pasian leh a bawlsa nate leh tuate kalsuanzia a kan ngei lo, minam dang (‘ei’ a cihlohte) a thupingaihsut pahpah, amaute gen peuhpeuh dik/maan hi, ci-a a ngaihsun, sila lungsim a nei leh, Pasian thu ngaihsun khial mahmahte hi nuam uh hi.

            Piangthak mite in minam it lo ding maw? Pasian thu leh minam thu kikalh/kikelki hiam? Kikalh zenzen lo hi. Pasian in a bawl minam hi a, minam sunga pau le ham, zia le tong/ngeina, leh thu tuamtuamte pen Pasian thukimna tawh a zang thei ding a leitungah piansak mihingte i hi hi. Lai Siangtho sung i sim ciangin minam a it mahmah mi tampi i mu a tuate laka mi nih ii nuntakzia tawmkhat i en ding hi.

            Amasa in Moses nuntakna en leng, kumpi inn sungah omin, pilna khempeuh kihilh a, milian khat ahi hi (Sawl 7:22). Izipt nopsakna teng zang thei kim lai, a minam itna hangin tuate khempeuh nusia hi. Haksatna tampi a thuak khit ciangin a minamte Pasian sehna tawh Izipt gam panin paikhiatpih hi. Sinai mual a tun uh ciangin Pasian thuciamna la dingin Moses mualtungah kahto hi. A omloh sungin a mipihte in Pasian in a deih hetloh milim biakna ding bawngno lim bawlin pasian in bia uh hi. Pasian heh lua ahih manin thah khit a utna leh Moses minam lianin a bawlna dingin gen hi (Pai 32:10). Pasian in a innkuan sung thupha a tuam piak ding nolh-in Moses in a mipihte adingin thuum ahih manin Pasian in a lungsim khel a, Israel mite tungah siatna tungsak lo hi (n. 14). Moses mualtung panin kumsukin, a mipihte kiang a tun ciangin heh lua ahih manin a suangpeek tawh bawngno deng-in, tua mite thah ding thu pia hi. Ahi zongin a zing ciangin a mipihte adingin Moses mualtungah kahto kik a, Pasian kiangah, “Ala, hih (Israel) mite in khialhna lianpi khat bawl uh hi. Amaute in amau adingin kham tawh pasian bawl tawm uh hi. Ahi zongin, hehpih takin a maute mawhna maisak in; tua ahih kei leh laibu sung a nong khumnasa panin hong lakhia in” (n. 31-32) ci hi. A minam (Israel mite) mawhna a maisak zawh kei leh a minamte thuak bangbang a thuakkhawm dingin kipia ngam hi.

            Paul nuntakna i et ciangin a nasepnate pen a mipihte kiang hi loin, Isrealte in a muhdah leh ganhing bang lel-a a sim uh minamdang (Gentail mite) kiangah ahi hi. Amah mahmah in zong Gentailte kianga sem ding a seh ahihna thu pulak hi (Gal 2:7-8; Efe 3:7-10). Tu thu theician mahmah napi, a mipihte in Khris thu a uplohna hangin nakpi takin dahin lunggim a, “Hih thei hi leh ka cipih, Israel mite adingin keimah in samsiatna thuakin, ka mipihte adingin Khris tawh ka kizopna beisak nangawn phamawh ka sa kei hi” (Rom 9:3) ci hi. Khris tawh a kizomsa pen a mipihte adingin a kizoppih a thupipen Khris tawh kikhen, kizopnawnloh nangawn ut tanghial hi.

            A tunga mi nih – Moses leh Sawltak Paul pen mi piangthak, Pasian tawh hoih taka kizom mite ahi uh hi. Tua zah mahin, a mipihte it cihtakin it uh a, a mipihte a kisamsiat ding, a mipihte leh Khris a kizoploh ding, a mipihte siatna ding phal het loin, amau ‘kha nuntakna’ nangawnin thuak leh phamawh sa lo zawzen uh hi.

Minam Itdan Thak

            Minam itna thu a kigen ciangin na lungsimah bang om hiam? Pasian thu leh minam thu pen a kisai kha lo danin na koih kha hiam?

Na khempeuh Pasian tawh kizom khin a, Pasian a masapen hiden ding hi. Minam itna zong pianthakna tawh a kikalh hizenzen lo a, piangthak mite in a minamte itin, a minamte adingin veina neih ding hizaw hi.

Minam it ding i cih ciangin ei minam sung bekah na semin, ei minam sung bekah Pasian thu gen ding, ei minam sung bekah khantohna lam sai ding, ei minam sung bekah cimawh huh ding cihna hi lo hi. Sawltak Paul mahmah zong a minam (Israelte) it mahmah napi in Gentailte kiangah na sem hi. Pasian hong sehna nasep pen a tuamtuam hi ding a, hong koihna zong a tuamtuam hi ding hi. Ahi zongin koikoi ah om le hang, i minam pen mangngilh theih hi lo ahihna, makai thupite nuntakna panin kisin thei hi.

Pasian thu leh na khempeuh kizom khin hi. Pasian thu leh minam itna kikalh zenzen lo a, Pasian thu bang a minam it ding hizaw hi. Paul leh Moses in a mipihte a itna uh hangin vantung minkhumna laibu panin a min uh phiat ding gen ngam zawzen uh hi. Hici bang minam itna a pianthak taktak Zomite in kisam hi.

Minam itna dik/maan taktak tawh piangthakte leh piangthak lote nangawnin minam i it ciangin: minamdangte simmawh theih dingin nuntak sawm loin, kampau, gamtat kidawm ding a, kumpi deihloh nasepna/sumbawlna tuamtuam sem loin, minam khantohna dingin a kisam taktak nate ngaihsunin, geel-in, sem-in, Pasian a thei nai lo minamdangte tungah Lungdamna Thu puak nasep thupi sem thei dingin kipumkhatin thahat-in, Pasian thu tawh kituakin pilna-siamna, cidamna, nek le dawn hoih le limci thupi bawlin, kihuh tuah diamdiam nopna lungsim hong khang ding a, Pasian a lungkimin, hong lamzang sak semsem ding hi.

Thukhupna

            Pianthakna leh minam thu pen a kikalh hi zenzen lo a, mi piangthak taktakte in a mipihte it ding hizaw hi. Mi pawlkhat in hong makaih khial gawp uh ahih manin, “Minam itna leh Pasian thu pen kizopna nei lo hi,” a ci mi tampi om ta hi. Papi khat in hong gen ka bil a mangmawh pen, “B. D. ciang a sinte in minam itna a neih kei leh a thusin theician lo hi” cih ahi hi. Ka ngaihsutsut ciangin dik ka sa semsem hi. Tua bang a Pasian thu a sin mite in Pasian thu taktak leh minam thu kihual takin thei-in a minam sung uah na a sep uh ciang gam zong khangto hi, cih ka muhdan ahi hi. Pasian sang a minam i thupisak zawk ding bel kidophuai mahmah a, amasapen ah Pasian mah koih a, Pasian deihna banga minam itna a nei tampi a om ciangin, minam zong khangto-in, midangte adingin thupha suak-in, Pasian gam zaina dingin na lianpi a sem minam kisuak ding hi.

            Mi namkim, pau namkimte tualleenna Vankhuapi (Mang 7:9-10, c.f 14:6 [leitung]) i tun ciang dong minam itna pen Pasian thu tawh a tonkhawmsak, Pasian thu leh Pasian deihna banga miman a it ngiat mi piangthak/suakkik ahi dingin Pasian in thupha hong pia hen, tua pen keima thungetna zong ahi hi.

~ T. Sawm Lian

Daihna Cabin, 31052016