ZOLAI KHANTOH NADING

ZOLAI KHANTOH NADING

‘Laibu manphatna’ cih ding a kilawm mahmah ahih hangin Zolai tawh kigelh laibu tam leh Zolai khantohna khat suak veve ding ahih manin a thulu pen khial lua sam lo dingin ngaihsun ing. Tua ahih manin Zolai khantoh nading pawlkhat kikum dih ni :

Laibu

Minam khantohna leh lai lam khantohna pen tonkhawmden a, lai tawh a khangkhawm lo minam pen khantohna langbai tawh a khangto ahi uh hi. Mi pil leh minam pil peuhpeuh in laibu/lai manphatna thei uh hi. Tua i gen laibu pen - thumal tuamtuam lepkho, omzia nei a kigelh, tua thu omzia nei a laidal tunga kigelhte kilhkhop ci ziau leng kitel thei ding hi. Laibu kici pen a hoih leh hoih lo omin, laibu hoihin nakpi takin mihing a puahphat thei laiin, laibu hoih loin zong nakpi takin siasak thei veve hi. “Sum meet tam na ngah nop leh sumbul (capital) tam nei masa in” a kici pen “Lai lam khantoh nadingin laibu tam kisam” cihna tawh kibang hi.

Minam khangto te’n laibu tam bawl uh hi

Mikang pau (English) tawh kigelh laibu a tamdan pen gen kul loin i theihsa ciat ahi hi. Tua laibute hangin Mikang pau in leitung zeel a, a thei nai lote in thei nuamin, a theizaw deuhte in theihbeh semsem sawm uh hi. Tua lam tam gen loin, i kianga Luseite en pak leng; tu-a Senate of Serampore Principal thak Dr. Laltluangliana Khiangte in a genna-ah, kum simin Lusei pau tawh kibawl laibu 150 - 200 omden a, tua zah mah kiteikhiaden hi, ci hi. Tua banah a kikhensa a kikhenkik zong bangzah hiam omden ahihna thu gelh hi. Tua zahta-in Luseite in lai manphatna leh laibu manphatna na phawk uh hi.

Kum 2010 a kikhen “Vaihna Vartian” kici bang kha khat sungin 3 vei tak khenkikin, copies 10,000 val kikhen mawk hi! Zomi sungah, Zangkong pan Prof. Dr. C Thang Za Tuan leh a lawmte in ZOLUS kici laibu manpha mahmah kum simin hong suahkhia thei zel uh a, Sia Job. Thawngno leh mi phattuamngai pawlkhat in zong laibu hong bawl thei zel ahih manin, puksi loin kiallap khom ding laibu hong om thei suak hi. Ahih hangin, a milip tawh i et ciangin lungkimhuai nai peuhmah lo hi. Mipil, misiam a tamna lakah mi in laibu bawl nading leh lei nadingin sum it khol lo uh hi.

Mipil, misiam, mihaute kiphal uh hi

Minam khangtote in laibu pen mimal kibawlhoihna leh minam khantohna ahihna thu tel uh ahih manin, a pilna uh, a ngaihsutna hoihte uh, ngeina leh ciindan hoihte laibu sungah khum pahpah uh hi. Mipite in lai lam a kiva leh lunglutte panpih dan siam uh ahih manin laibu kibawlbawl hi.

Laibu hoih manpha

Khuai in paak a bop ciangin ama tupna/sawmna hang hi het loin ci (seeds) a piansak mah bangin, laibu in pilna hawmzak a, a simte lamet zah sanga tamzaw pilna guan hi. Laibu sungah leitung pilna-siamna, thu laigil leh thu manpha khempeuh omkhin hi. Tua pen nak tel lua mahmah ahih min kum 130 BC kiim a mipil Mascus Tulius Cicero in, “Laibu omlohna khaan (room) pen kha (soul) a nei lo pumpi bang bek hi” ci zen hi. 

Mihaite pilsakin, a gilo mite bawlhoih a, mi hoihte a hoihzawk sem nadingin a makaih pen laibu ahi hi. Thuhilh a kisamte hilhin, tai a kisapna munah tai a, phat a kulte phatin, huh a kisamte huh a, lampi maan lo a tawnte lampi maan lamlakin, amah leh amah a kitheihtel theih nadingin mihingte sungah thuthuk pilna guan hi. Tua thu a theician American mipil leh minthang Thomas Jefferson in, “Laibu om loin nungta thei ke’ng” ci zawzen hi. 

Laibu leh makai kizom den hi. “Leaders are the readers” a kici pen maan mahmah hi. Makai hoihte pen laibu a lim sim mi hi hamtang uh hi. Mite makaih siam nading, mite lungsim zawh nading, mite tawh kikholhkhop siam nading .. cihte pen laibu sungah kikhum khin a, tua bang laibu a simte in a theihna uh tungtawnin mi makaihin, lawhcing uh hi. Zomi sungah makai hoih leh siamte pen laibu a lim sim leh laisimna tungtawna pilna sang pipi a neite na hi uh hi. 

Na ngaihsun ngei hiam, laibu in mihing lungsim a zawhdan. Laibu dang gen loin, Khristiante thu-up leh kingakna Lai Siangtho (Bible) en pak leng kitel pah hi. Leitung a laibu kizuakhia tampen leh pau nam tuamtuam tawh a kiteikhia tampen hi pah hi. Hih Lai Siangtho in mi lungsim a zawhdan panin laibu manphatna tampi kitheithei ding hi. Lai Siangtho pen laibu in kibawl lo hi leh, thu-upna lamah leh i Khristian nuntakna bang ciangah i om tam? I biakpiak zia leh Pasian i upna zia koi ciangah a om tam? Laibu in hoih takin kikem ahih manin kum 2000 paisa a Jesu leh a nungzuite omdan leh ngaihsutnate kithei-in, amau lim le meel sun thei pen dingin kinungta hi. Tua zahin laibu hoih in mihing lungsim zo hi. Tua bang mahin laibu hoih lo in zong mi lungsim zo thei veve hi.

Laibu hoih lo pan kidophuai

Laibu cih pong hangin a hoih lo leh a lauhuai om thei veve hi. Nuntakna lam maan lo hong tawnsak thei, ngaihsutna hoih lo hong ngaihsunsak a, gam sung, pawlpi sung leh innkuan sung buaina hong tun thei om veve hi. Kidophuai hi. 

Mi lungsim ngaihsutna a zo mahmah laibu khat pen Karl Marx (1818 - 1881) in a gelh, ‘Communist Bible’ kici lianga minthang “Das Capital’’ ahi hi. Lai Siangtho zomah mi lungsim a zo pen hi-in kiciamteh hi. Tua laibu sungah mi gentheite laptoh nading, mikim tan kikim nading, leh suakta taka nuntakkhop theih nading thu kigelh a, ‘Mi gentheite nuntakna laibu’ (Bible of working class) kici zawzen hi. Hih laibu in biakna kici langdo a, Khristian biakna bang nakpi’n do hi. Tua laibu in nakpi’n mihing lungsim zo mawk a, gam tampi in kimakaih nadingin zang uh hi.

Tangthu maan lo leh thu gina lo a kigelhna laibu leh, mihing nuntakna a buaisak thei thu tuamtuam a kigelhna laibu zong om thei veve hi. Tua bang laibute in mite lungsim siasak thei ahih manin gam le nam adingin a lauhuai om thei a, kumpite in suahkhiat/zuakkhiat a phalloh uh zong om veve hi. I gensa mah bangin, laisimna in lungsim hoihsak thei napi’n, a sia lamah zong nakpi’n lungsim zo thei ahih manin laisim ding hoih leh hoih lo zong pilvanhuai mahmah hi.

Gam le minam vai tawh laibu kizom hi

India in suahtakna a ngah theih nadinga makai lianpi khat pen laibu hi, kici hi. India in suahtak nading a vaihawm laitakin, makaite in suahtakna ngah theih ahihna thu tangthu luite panin sim uh hi. French Revolution hun laia thupiangte, gam neucik Japan gamin China gam a zawh theihna thute khawng India makaite in sim uh a, tuate bangin lawhcing thei hi, cih kithei uh ahih manin hangsan takin nasem thei uh hi.

Kum 1966 a Mizogam in India gama pana suahtakna lametna tawh kiphinna a nasep lianpi a sem khat pen lai (thu le la) mah ahi hi. Kum 1938 kiim pana Mizo laphuaksiam leh thugelh siamte in mi lungsim sungah minam itna, khantoh nopna, hangsanna, nuntak hoihzaw a nuntak theih nading tawh na vakvak, na pantahtah uh ahih manin tuate hong puakkhap taktak ciang, tuni hunin minam zahtakhuai leh etteh takte lakah kihel mawk hi.

Pau le ham, ngeina kepbitna hi

Leitung mun tuamtuama kithehthang Zomite in bang hangin i omna gamte pau le ham, ngeinate kizui pahpah mawk hiam? Kawlgama omte in Kawlpau, Kalagama omte in Kalapau, Mizogama omte in Mizopau, Mikang gama omte in Mikangpau etc. Dawnna tampi om thei lakah media lamah i hatloh man zong kihel pelmawh ding hi.

Mun tuamtuama i omna munah, ei pau tawh sim ding laibu, ei pau tawh kibawl khui (film) tam lo (a kibawl sunsun zong lei nuam lo lai) ahih manin, i muh theih a om mi lai tawh kigelh laibute simin, mi pau le ham tawh kibawl khuite i en uh a, ki-suai (addict) mawk hi. Ei lai tawh kigelh laibu tam sim lo i hih manin ei pau nangawn i siam kei a, tua manin ei lai mahmah zong itna i nei kei pah hi. Ei pau tawh kibawl khuite i etnoploh manin a bawlte in suplawh uh a, bawlkik pah thei lo uh hi. Tua bang dinmunah i din laitakun, i kim i kiangate in thasanin hong zozo lai mawk uh hi. 

Mi thugelh khawng, mi khui bawl khawng (a mau sep bang a sem thei lote in) i gensiasia uh hi. “Na thak khat bawlkhiat sangin mi bawlsa na zakhat gensiat baihzaw” cih pen tuhun i nuntakna ah maan mahmah hi.

Ahih hangin, tua banga i gen ciangin Zomite khempeuh a siacip cihna hi pah sam lo hi. A lunglut mahmah, neih le lam, sum le pai a it het lo mi bangzah hiam om sam a, tuate hangin tuni ciang i thu i la, i pau i ham, i ngeinate a kikemciang thei lai suak hi.

Midang tawh i kilamdanna

Meel puakzia, pau le ham, lai leh ngeina minam dangte tawh kibat nading a gen i hi kei a, amau khantohna banga khantoh ding lam a gen i hi hi. I gensa gen kik leng, minam dangte in minam khantoh nading ahih lam thei uh ahih manin mass media lama khantohna uangbawl uh hi. Lusei kam a zangte genkik pak leng, kum sim laibu nam tuamtuam 400 val banah khasim suak (monthly magazine) bekbek zong copy 10,000/ 20,000 a kikhen bangzah hiam om a, nisim suak Vanglaini kici bang copy 30,000 val kikhenkhia mawk hi! Zomi sungah khasim suak tam lo kawmkalah copy 2,000 a pha tam het lo hi. Copy 500/ 1,000 cih bang bek khawng kihawmkhia zo hi. Tua mah bangin i nuntak-khuasakzia (living standard) zong niam mahmah lai mawk a, i thu theihna zong toi mahmah lai hi.

Mite bangin en zong laibu/khui manphatna thei-in thupi ngaihsut hizen leng, ei pau tawh kibawl laibu pen copy 5,000 ciangciang baih takin kibawl thei ding hi. Tua hi a, i theihloh mana khangto lo kihi lel hi! ‘Zomite khangto thei lo ding,’ cih thu om sam lo ahih ciangin, mainawtna lampi mah i ngaihsut kisam mahmah mawk hi.

Tua ahih leh ...

Laibu hoih manphatna leh mimal leh minam khantohna tawh a kizom ahihna thu tampi i gen khinta hi. Mi pil misiamte, lai simte, kumpi nasemte bek i ngaihsut dinga i tuat mawk leh i khial ding hi. Mi kim in sep theih leh mawkpuakna i neih lam i kiphawk ciangin i thu le la, i minam hong khangto thei pan ding hi. 

Zomi sungah zong laipil, lai siam, thuthei leh thunei hunkhop mah om ta hi. Laigelh mi leh thu le la siam bangzah hiam om hi. Tuate in mipite vaak theih nading ann limci hong ngaihsut uh a, thu le la hoih, mite phattuampih theih ding thute hong luikhiat uh kisam hi. Mi a thalawpsak thei dingin thugelh hoih leh manpha hong gelhkhiat uh kisam a, a lunglut nai lote a zawh theih nading un thu tuamtuam hong gelh uh kisam hi. Amau hun ciang bek a kisim thei ding hi loin, khangsawn bangzah hiam ciang zong a et theih ding a manpha thute ‘laibu’ in hong bawlkhat uh kisam hi. 

A tunga i gensa mah bangin a lunglut khatin laibu hong bawl pongmawk hangin kuamah in simsakin, leisak kei leh a mawkna mah ahi hi. “Vokpi maia suangmanpha koih” kici bangin, i maia om suangmanpha pen ei ading manpha ahih lam mipite in i theih hun ciangin suangmanpha in ‘manphatna’ nei thei pan ding a, midangin hong laksak ma-in lak kisawm thei pan ding hi.

Siansan Labu kici a kibawl laiin, khua khat a khangnote in a khahkhiat (release) ni a zuak theih pah dingin la khol uh a, tua ni-in tampi zuakkhia uh hi. Amau adingin sum muhna hoih khat suak a, aman phatna a thei lian lote zong leisak uh ahih manin ‘na hoih sem’ ahi uh hi. Tua bangin panlak/mabun theihna tuamtuam om hi. Zomite sungah laibu pen ‘ankam zuaka zuak’ phot kul lai hi!

Laibu bawl pen thubaih lo hi. A thu (a hoih leh hoihloh lam gen keng) ngaihsut nadinga tha le zung, hun beite pan kipan, a thu le la kicin zawh ciang kua khensak ding, koi laiah khensak ding, a khet nading sum koipan (neihsa a om kei leh), a khetkhiat khit ciang koici zuak ding, a sumpi beek i mukik diam?.. cih bangin ngaihsutna tampi mah hong om lai hi. Tua ahih manin, tuate theihpih kawma mipite in thapiakna tawh (a manphatna i theikei phial zongin) i leisak tangtang ding pen a kisam mahmah ahi hi. A laibu bawlte in a tawmpen sum 30,000/40,000 bei ngam uh a, tua bang tawh a kibawl laibu khat sum 80/100 man bek zong i lei ngamloh mawk pen, kua hiamte pau leh ‘a na mah hi’ cih lohngal gen ding dang om lo hi. Mi pawlkhat pen Stanley Jones in, “Laibu sim ding na neihloh sangin na silhlai na puan zuak inla laibu lei in” a cipa tawh i ngaihsutna kilehnget hilhel hi. Haksa mahmah taleh, en sem kei leng kuan sem ding a, en zun kei leng kuan zun ding hiam?

Thukhupna

A baihvet lo ka thugelh khup nuam ka hih manin, tuhun galvan lauhuai pen khat leh a muibun mahmah khat ahi thu le la lama khantoh nading, nuntak khuasakzia khantoh nading, minam ngeinate kepbit nadingin laibu leh khui (film) hoih i kisam hi. Lai Siangtho om kei mawk leh tuhun Khristiante bangzahta in i paikhial tam? cih khawng ngaihsun leng, tua sung bekbek ah zong (kamsiamte adingin) i pautheih ciil pan i sihni ciang dong laibu manphatna gen ding om kha ding hi. 

Sia Do Khup (Khitui Gospel) leh a lawmte in a bawl Japan gama kizaih “Ngaih Anglai” cihte pawl hangin Zopau nakpi’n khangto a, “Topa Thupha maw le” cih bang zong hong thang mahmah hi (a dang zong tampi om lai ding). Tua ahih manin, minam a bucing a khantohna a om theih nadingin, thu le la lamah zong i khantoh a, i pau le ham a kizelh theih nadinga lampi tuamtuam tawh i sep kisam mahmah ta hi. I kaai dektak hi. Kibawlpha lehang hun hoih bei nai sam lo hi.

Daihna Cabin || June 2012

MAKAI SIAM LE NUNGZUI HOIH

Zomite sungah bang hangin kiphinna, kipumkhatlohna, leh kithutuaklohna om den a, biakna pawlpi, paidan leh thu-up kibangte lakah zong bang hangin pawl kikhenna piang hiam, cih i ngaihsut ciangin tom cikin dawn theih a, “Makai siam le nungzui hoih a tamloh man” ahi hi. Makaite in ‘Bangci bangin mipite makaihin hi leng kithutuakin, khangto thei ding hiam’, cih ngaihsut penin nei lo a, mipite in zong makaite makaihna zui siam lo hi. Makai te’n mipite khualna leh itna taktak tawh a makaih mipite phattuam nading leh hoih zawk nading ngaihsunin, mipite in zong makaite makaihna bangin zuisiam leng nuntak hong nuamin, gengen kul loin kipumkhatna piang tawm lel ding hi. Tua ahih manin, makaihna leh nungzuihna pen a kizomden, a kikhen thei lo ahi hi.

I. Makai leh nungzui :

Leitung-ah a neu mahmah ganhing Miksite leh a lian mahmah Saite pan kipan, Pasian bawl nate laka a thupi pen mihingte ciang dongin – innkuan, khua, pawlpi, minam leh gam adingin kisap lianpen in – kimakaihna hoih, khantohna, hong susia thei tuamtuamte lak pana kikepbit nading leh suahtak nadingin amaute lakah vaihawm ding a telkhiat / sehkhiat / om kul a, tua pen ‘makai’ kici hi. Tua makaite pil leh pilloh, a kivak leh kivaklohin pawl sung nop leh noploh, khantohna leh niamkiatna sai mahmah hi.

Makai a om theih nadingin makai a seh, a teelkhia om a, tua pen ‘nungzui’ kici hi. Makai a om theih nadingin nungzui om pelmawh hi.

II. Makaih siam, makai hoih i cih kuate hiam? :

Harry S. Truman (1884 – 1972), US President (1945 – 53) in, “Makai siam i cih pen mipite in a sepnoploh uh na khatpeuh, thanuam tak leh lawp taka semsak thei dinga makaih siamna a neite ahi hi” ci hi. Peter G. Wiwcharuck in, “Makai siam i cihte pen mipite leh a upna, ngaihsutna, hun, neihsa leh thatangte siam taka zanga nasep a lawhcingsakte ahi hi” na ci hi. Ted W. Enstrom in, “Makai omzia bulpi pen hih leitunga a hoih na khat peuhpeuh seppihte zang a tangtunsak / picinsak ahi hi,” na ci hi. Victor Manogram in, “Makai omzia in, pawl tup le ngimte tel a, a lawhcin theih nadinga mite thapiak a siamte ahi hi,” na ci hi. Lord Montgomery in, “Makai i cihin kipawlna hoih dangte bangin tup le ngim kician nei ding a, tua pawl’ tup le ngim-ah mipite a lunglut theih nadingin kaihkhop, thapiak siam ding hi” ci hi.

Hih a tunga mite genna panin makaite sep ding leh, makai hoihte hihna hong kitel mahmah hi. A tunga mite genna panin makai hoih in –

1. A makaihte tha pia-in lawpsak ding a, mipite upna, ngaihsutna, hun le neihsate zang siam ding hi.
2. Tup le ngim kician nei-in, theician ding a, mipite in a thukimpih theih nadingin thapiak, hanthawn siam ding a, tua pawl’ tup le ngim tawh kituakin mipite lamlakin, a thu bek gengen loin sem ding hi.
3. Midangte in bangci makai uh hiam, cih thei-in, pawl dangte hatna leh hatlohna panin pawl hoih nadingin makaih dan kisin ding hi.
4. A makaih mite khantohsak ding tup le ngim penin nei ding hi.

Tua banah makai hoih in, pawl in haksatna a tuak hun ciangin manlang leh kician takin thukhensatna (decision) bawl siam ding hi. “America President 16thna Abraham Lincoln (1909 – 1865) pen a minthanna tuamtuamte lakah vaihawm siam-in, mi lungsim nasak het lo, leh midangte lungkim nadinga thukhensat a siamna hang hi,” kici hi. Ahih hangin, mi khempeuh lungkim nadingin kuamah in vaihawmin thu khen thei lo ding hi, cih phawk kisam hi.

III. Makaihzia nam tuamtuamte :

Leitungah mihingte – lungsim puakzia, pau, ngeina, khua, minam, leh gam a kibatloh mah bangin makaite makaihzia zong nam tuamtuam om hi. Tuate pawlkhat en dih ni :

1. Judge leader : Mite nasep encik kawm-a a hoihlohnate muh sawm a, tua a muhna pana mite zawh a sawm makaite genna ahi hi.
2. Democratic leader : Mi tamzawte deihna leh hoihsak bang a vaihawm makaite hi.
3. Consultant leader : Midangte thu dong kawma makaite hi.
4. Contextual leader : A hun leh mun tawh kituaka lungsim puak siam makaite hi.
5. Skillful leader : Mite muhna sanga tangzaizaw a gelsiamna le muhkholhna(vision) nei makaite.
6. Spontaneous leader : A kulna-in a phut khak hun ciangin makai a, hun dang cianga awlmawhna nei lo makaite hi.
7. Expert leader : Midangte sanga siamtuam deuh, makaihna tawh kisai talent a neite hi.
8. Autocratic leader : Ama thu bek thu sa a, midangte gen thupi sim lo, bangmaha ngaihsun lo, ama thu leh deihna a tun masiah lungkim ngei lo makaite hi.
9. Laissez - faire leader : Midangte muanga amaute ngaihsutna hoih pen hi cih um, a cih bangbang uh hoihsa kawikawi leh mi a muang pahpah makaite hi.

IV. Makaite cinna (qualifications) leh makai hoih, makai siam hih nading :

Zomite makaihna tawh kisai i gen laitakin, Zomibup phial Khristian kihi ta ahih manin Khristian kimakaihna tawh kisai i tam gen ding hi. Makaite cinna leh makai hoih hih nadingin :

1. A piangthak mi : Kipawlna dangte lakah zong kisam mahmah napi’n, biakna pawlpi sung diakah makaite pen a piangthak, Pasian a zahtak, Pasian in sem dinga a seh (I Thes. 5:12) ahihna phawkin a zahtak, thunget a hat, leh a kiniamkhiat mi ahih kisam pha mahmah hi. Bang hang hiam cih leh, mi mangthang, mi kibang lo, leh a gi lo mahmah zong makaih ding uh ahih manin, mi piangthak lote in tua bang mite makaih zo lo uh hi. Zeisu in mittaw leh mittaw a kimakaih theihloh ding thu na gen hi (Luka 6:39).

2. Mi citak leh muanhuai : Mipite lutang ding ahih manin makai pen a makaihte etteh tak dingin citak-in muanhuai ding hi. A makaihte a lungkiat hun uh ciangin zong tha a ngah kik theih nadingun a nuntakna-ah cihtak ding a, haksatna lauhuaipen a tuak uh ciangin zong kibelhna taak dingin muanhuai ding hi. Sum leh nu le pa (sex) thu-ah a citak mi hi ding hi.

3. A ettehtak mi : Makai ahih manin ama nuntakna leh a innkuan nuntakna pen mite in etteh den hi. Tua ahih manin a makaihte’ ettehtak dingin ama nuntakna leh innkuan kemzo-in, ukzo ding hi. Pawl nasep nadingin a hun leh a neihsa sum le pai kipiakhia ngam ding hi.

4. Midangte a pahtawi siam : Mihingte eima hihna leh sepna ciangciangah pahtawi nuam kisa-in, ki-ut ciat hi. Makai hoih, mipite tawh kithutuak hih nadingin mi phat siam, pahtawi siam kisam a, mi pahtawi a siamte in a pahtawite tha a piapia ahi hi. A makaih mite a kibangin en kimin deihsak tuam aneih leh zong kilangkhiasak lua lo ding hi.

5. Thuakzawhna nei : Kipawlna khat peuhpeuhah haksatna leh buaina, makaite hawmthawhna leh gensiatna om teitei a, makai hoih in tua bang hun ciangin kiniamkhiatna leh lungduaina tawh thuak zo hi. Thu hoih mahmah zong a makaihte in ahoihna tel pak lo thei a, a saan theih nadingun hanciamin, kinawh tengtung loin ngakzo ding hi.

6. Pil ding : Mite makai ding, mipite maiah pai ding ahih manin na khat peuhpeuhah a makaihte sangin theizaw, siamzaw, pilzaw-in, thudik leh zuau thu khentel thei ding a, a hun leh mun tawh kituakin kampau leh gamtatdan ding khentel ding hi. Ama khantohna ding bek ngaihsun loin, a makaih mite’ khantoh nading zong gelpihin lamlak ding hi. Mi lungsim nasak het loin a hoihlohna leh kicinlohna hilh siamin, a thalawp theih nadingin hanthawn siam ding hi. Tua banah haksatna leh buaina a om ciangin kician takin thukhensatna bawl thei ding hi. Mipil tawh a kithuahte pil hi.

7. Ciamnuih gen siam : J. Oswald Sanders in, “Makai ciamnuih siam lote lawhcing thei taktak lo hi” na ci hi. A makaih te’n a mai-ngap theih nadingin ciamnuih a gen zong a kisap hun om hi.

8. A kiva mi : A makaihte in haksatna leh nopna a tuak uh ciangin a kidawk masapente lakah kihel ding hi. Vaihawmna tungtawna sep le bawl ding kipiate leh, ama tunga kisuante lawp tak leh a theihna tawpin sem ding a, mawhpuakna awlmawh ding hi. A gen bekbek hi loin a takin semkhia ding a, thuak a kul leh zong thuak masapen ding hi.

9. Amah a kimuangngam mi : Makai hoih hi dingin amah leh amah kimuan-ngamna (self confidence) a neih kisam hi. Midangte a muan theih nading leh lawp taka sem a pulak / genkhia thei dingin amah leh amah kimuanngamin hangsan (courage) ding hi. Mi lakah zahkai den makai pen makai hoih hi ngei lo a, mipite in zong muangzo lo pah hi. Amah a kimuan laitakin, ama pilna le siamna bek suang lo a, Pasian leh mipi deihna bang hi hiam, cih kantel ding hi.

10. A huaiham lo mi : A makai hihna suangin, nekguk takguk theihna leh ama phattuam nading bek ngaihsun lo ding hi. Ngah ding bekbek a lamen hi loin, a piakhia hizaw ding hi (not greedy, but giving).

11. Theihsiamna nei mi : A makaih mipite cinlohna leh hatlohna theisiam ding hi. A haksatna uh leh cinlohna panin bangci hotkhiat ding, cih a ngaihsun mi hi ding a, a makaihte utdan, lawpdan, leh lungsim ngaihsutnate theisiamin tua tungtawnin na semin vaihawm ding hi. A makaih mipite pen mihing mah ahihna uh thei ding a, semkhial, bawlkhial, leh ngaihsunkhial thei ahihna uh phawk ding hi.

12. Sapna a ngah mi : Khristian makaihna pen thubaih hi lo hi. Sapna a za/ngah lote adingin cimtakhuai mahmah thei hi. Bang hang hiam cih leh, sapna in a sappa/nu tha piaden a, tua-in na hoih sem dingin huh hi.

V. Makai hoih hihna tawh kisai i telkhialh theih thu pawl khat om hi. Makai hoih i cih pen:

1. Hihna (position) hi lo : Makai hoih i cih ciangin hihna (position) genna hi lo hi. Makaih a siam mahmah, ahi zongin pawlpi leh organization tuamtuamah dinmun poimawh a luah lo om thei a, tuamah bangin, dinmun poimawh tampi a lente khempeuh zong makai hoih hi khin tuan lo hi. Moses tutphahah Laigelhte leh Farisaite a tut uh hangin makai hoih ahihloh zia uh Zeisu in gen hi (Matt. 23:1,2).

2. Mimal pianzia(personality) hoihna bek hi lo : Makai hoih i cih ciangin mihing migitna leh pianzia (personality) hoih genna hi lo a, personality hoih neite zong makai hoih hi khin tuan lo hi. Ama nuntakna pen mite etteh ding ahih laitakin, makaihna lamah a lawhsap leh a makaih mite adingin a khiatna tam lo thei hi. Farisaite hoih gamtat mahmah tase leh mipite lampi maan tawnsak tuan lo uh hi (Matt. 23:1-12; Mk.12:39).

3. Thuneihna (authority) hi lo : Makai i cih ciangin thuneihna (authority) genna hi lo hi. Lungdamna Thu Johan 13 sung i et ciangin Zeisu in a nungzuite khe a silsak thu i mu hi. Makaihna pen kiliatsakna, kithupitsakna hi loin, midangte ading a nasepsakna hi zaw a, mite taanga sem, mite deih banga gamta ‘sila’ hizaw hi.

VI. Makaite puk theihna tampi om a, makai hoih hi dingin hih anuaiate panin kidophuai hi :

1. Kisaktheihna (pride) : Sep le bawlna-ah lawhcinna hang leh makai kum tam sepna hangin kisaktheihna piang thei hi. Makai in kisaktheihna leh kiphatsakna a neih leh, tua in pukna piangsak hi (Pau. 16:18).

2. Minthanna (popularity) : Minthanna pen ahoih mahmah ahih laitakin tua-in kisaktheihna leh hi kisakna piangsak thei a, a hoih lo lamin mihingah nasem thei hi. William Penn in, “Avoid popularity; it has many snares and no real benefits” na ci hi. Meetna pi om lo, thaang (trap/snare) lauhuai mahmah hi thei hi.

3. Lawhsapna (failure) : Mikang te’n, “Lawhsapna pen lawhcinna khuam muanhuai ahi hi (Failure is the pillar of success)” na ci uh hi. Makai te’n makaihna-ah lawhsapna tuak teitei uh a, makai hoih lote pukin, lungkia thei uh hi. Joshua in Ai khua a zawhloh hangin a makai hihna panin kitawp lo hi.

4. Huaihamna (greed) : Amau phattuam nading bek a ngaihsun, a huaiham makai pen makai hoih hi ngei lo hi. Lai Siangtho in huaihamna pen, ‘milim biakna zahin sia’ (Efesa 5:5); ‘Enna leh huaihamna a om nak leh buaina leh siatna nam khempeuh tawh kizom pahpah hi’ (James 3:16) na ci hi. A huaiham makai pen a puk, a kisia makai ahi hi.

5. Hazatna (jealousy) : Makai pawlkhat amah sanga mi a siamzawk, pilzawk leh neihzawk ding a lau om thei hi. Hazatna pen – guh a muatsak natna hi a (Pau. 14:30b), hehna leh sin-sona siahuai a, tua sangin zong siahuaizaw lai hi (Pau. 27 :4).

6. Lungkiatna (discouragement) : Makai hoihte a lungkia pahpah lote ahi hi. Haksatna leh galte tamna lakah Joshua lungkia lo dingin Topa’n ci hi (Joshua 1:9). Ai khua a zawhloh na panin lungkia lo a paikik dingin Topa’n hilh hi (Joshua 8:1). Cidamlohna, gensiatna, lawhsapna, mipite thadahna, sum haksatna etc. hangin lungkiat theih hi.

7. Gensiatna (criticism) : Leitungah mihingte a paubang lo (perfect) om lo hi. Mi khat in na a sepna gensiat nading a zong teitei pawl om hi. Gensiatna pen nam nihin kikhen a, kibawlphat nadinga gensiatna (constructive criticism) leh siat semsem nadinga gensiatna (destructive criticism) kici hi. Mi pawlkhat tua bang gensiatna hangin puk thei hi.

VII. Nungzui :

“Makai hoih peuh leh nungzuih siam lo om ding hiam?” a ci pawl om hi. Ahih hangin hih thu pen maan khin lo hi.

Bang ci bangin nungzui hoih, nungzuih siam hi thei ding hiam cih leh, “Makaite thu zuih siam” ci ziau leng kikhial lo ding hi. Makai ding kiseh buang a, a sehkhiate leh a nungzuite mahin a thu uh i man kei leh kitel/kisehna pen a mawkna suak ding hi. 

Zomite nuntakna-ah makaite mawhpuakna liat mahmah hangin, nungzuite in tawdom siamin, lampi man a tot theih nadingun tha piak siam, zahtak siam kisam mahmah hi. Makaite lawhcina pen nungzuite cihtakna leh kipiakna hang ahi hi.

Thu-um masate nungzuih na siam mahmah uh a, ‘Nungzuite’ kici zawzen hi. Zeisu in a paisan khit ciangin amau a zuite zong cihtakin, makaite zahtak siam uh a, bawlsiatna leh gimna a thuak uh ciangin zong muanhuai-in citak mahmah uh hi.

X. Nungzui hoih hi dingin :

1. Makaite pen Pasian in a seh (I Thes. 5:12) ahihna phawkin zahtak ding hi.
2. Amah’n vaihawm leh a nungzuite omdan dinga a ut dan bangin nungta ding hi.
3. Pawl sungah haksatna leh buaina a om ciangin daipih, zumpih-in, thuak ngam ding hi.
4. Awlmawh leh vei hau lua loin, ama tunga sem ding a kipia bangbang muanhuai tak leh citak takin sem ding a, thu mang mahmah lel ding hi.
5. Amah pen ni khat ni ciangin makai hi pelmawh ding ahih manin, tua a makaih hun cianga kisamte kisin khol ding hi.

IX. Makaihna le Khristian-na :

Pawlpi leh Christian Organization tuamtuam makaihna pen Kha lam thu ahih manin tua pawl-a makaite pen Kha-lam-makai (Spiritual Leader) hi ding hi. Zogam leh Zomite sungah Pasian nasemte (ministers) leh Upate lakah Kha-lam-makai ahihna uh sangin vaihawm makai (administrative leader) a kisa, na khempeuh a sai nuam, a sai ding peuh a sa pawlkhat om a, pawlpi kilem lai a khenkham leh thusia a bawl zawsop makai a om zel pen awlmawhhuai a, tua bang mite in Pawlpi leh Pasian gam tangzaisak lo bek tham loin, amaute hangin mi tampi in tha kiamna neih lawh zawsop hi.

J. Oswald Sander in makaihna tawh kisai nam nih – Pianpih makai (Natural leaders) leh Kha-mina tawh makai (Spiritual leader) in khen a, hih bangin na genkak (compared) hi :

Natural Leader Spiritual Leader

1 Amah bek kimuang, midangte muang lo hi. 1 Pasian muang a, midangte zong muang hi.

2 Amah bekin thukhensatna(decision) bawl hi. 2 Pasian deihdan ngaihsun kawmin nasem hi.

3 Thupiak (order) nuam sa hi. 3 Pasian etteh in nasem hi.

4 Ama hamphat nading bek ngaihsun hi. 4 Pasian leh mihing it hi.

5 Amah bekin tang din hi. 5 Pasian tung bekah kinga hi.

6 Mi theitel hi. 6 Pasian theitel hi.

7 Sep ding amah leh amah kizonkhia hi. 7 Pasian in sep ding pia hi.

Thukhupna :

Tu hun Zomite nuntakna – innkuan, khua, minam, pawlpi, leh gam sungah buaina tampi a pianna hang pen makaihna leh nungzuihna a kisiamloh man ahi hi. Tua bang a pianna hang tampite lakah makaite leh nungzuite pen ‘Pasian seh’ ahihna i theihcianloh man ahi hi. Makai pawlkhat in Pasian seh ahihna thei loin amau pilna, amau thu bek suang thei uh a, pawlkhatte leuleu in ahihna uh a thupina phawk loin omsan maimai thei uh hi. Zomi Khristiante sungah buaina tampen in makai kituhna hi a, tua pen makai siam, makai hoih a tamloh man ahi hi. Makai siam, makai cingte in makai hihna pen ut masa lo uh a, ahih hangin amau tungah tua mawhpuakna kisuan pen zo takin semkhia-in, makai kum tam sepna sangin nasepkhiatte (achievements) thupi ngaihsutzaw uh hi. Makai siam le nungzuih hoih hi dingin Pasian zahtak a, haksat hun leh nop hunah ki-uap, thu kimanna, kithutuahna, sepkhopna, ki-itna, kikhualna, thudik thuman tawh kimakaihna, leh cihtakna kisam mahmah hi.

Etkakte :

1. Rev. Dr. Kh. Khaizakham : “Responsibilities of Church Leaders”, CBA Seminar, 12/12/2001

2. M. Hoihnu : “Makai tawh kisai thusinna” AG Biakinn, Zarkawt, Aizawl; May 25 – 26, 2002

3. T. Sawm Lian : “Leadership”, Laitai ; April 2008

June 6, 2011

Zomi Nam Ni, 2012

A 64 veina Zomi Nam Ni pen January 20, 2012 in leitung mun tuamtuamah haksatna leh buaina om loin kizang thei hi. Mun tuamtuama Zomi Nam Ni kizatna pawlkhat kong gelhkhia a, hihte pen phone pan hi ta leh, internet pana ka kaihkhop ahi hi.

Kuala Lumpur : Malaysia

Malaysia gam pen Kawlgam leh India gam lo a Zomite tamna pen hi kha ding hi. Tukum Zomi Nam Ni pen Malaysia gama omte in Kuala Lumpur khuapi a Chinwoo Stadium ah zinglam nai 11 pan nitak nai 6 sung nuam takin bawl thei uh hi. Hih hunah Zomi film leh la khui DVD tuamtuam - 1) The First Zomi Action Film & Kungfu Show, 2) Sinlai Hong Phawng, 3) Zogam Oasis Vol. 1, 4) Ciampel lo, 5) Lungtup by Kamseen, 6) A Vangliatna, 7) A Lianpen Itna, 8) Na Ma Hong Vang Ding Hi, 9). CCJ Malaysia leh laibu tuamtuam - 1) Laukha' Lungdeih by Zokhai, 2) Zomite' Thu leh Angeina Uh by Dr. Cin Sian Pau, 3) Zolai Paunam Khenna leh Kampau Luanzia by Dr. Cin Sian Pau, leh 4) The 64th Anniversary ZOMI NATIONAL DAY laibu neu lei theih dingin kikoihin kilei ziahziah a, Zomi Culture Uplift Society (ZOCUS) leh Zomi Adventist Church (ZAC) te tungpan Zomi ngeina lam Sawngsik lahna nei uh hi.

Singapore

Singapore a om Zomite in zong Zomi Innkuan, Singapore makaihna tawh Zomi Nam Ni nuam takin zang thei uh hi. Pawi zangte Pu Pau Khan Khupte innkuan in vaimin lim tak tawh vak uh hi. Singapore a Zomi Nam Ni zatna hunah Zomi sunga lasiam, Zomi leh Zogam a it mahmah Thawn Kham, Cingsan leh a pasal John Thangneu leh Khaipi (Banzaal) zong kihel thei hi. Pa Hang Khan Lian, Zomi Innkuan, Singapore makaipi in Zomi leh…. Cih thulu tawh thugenna nei hi. Hun nunung lamah Thangho leh Liando lam tawh mipite lam ngeingai-in, Rev. Vungh Suan Kham in thupha piakna tawh hun hial bawl hi.

Imphal, Manipur

Tukum Zomi Nam Ni pen Zomi Students' Federation (ZFS) saina tawh 'Cultural Conformity' cih thulu zangin Imphal khuapi a Bheigyachandra Open Air Theatre ah kizang a, Manipur Chief Minister Okram Ibobi Singh in chief guest hihna tawh uapin, Manipur kumpi ulian tampi in zong uap a, Mizo lasiam leh melhoih Mami Varte leh Tangkhul lasiam Guru Rewben Mashangva-te in zong la sa uh hi. Hih hunah Pu L. B Sona, Chairman, Zomi Council in Zomi Nam Ni pen leitung mun tuamtuam Singapore, Japan, Malaysia, Thailand, Rangoon, Londaon, New Delhi, Melbourne, Shillong etc. ah kizang ahihna thu gen a, Zomite pen daihna (peace) leh khantohna(development) a deih minam ahihna thu zong gen hi.

Shillong, Meghalaya

Shillong khuapi a om Zomite in Asom Kristi Kendra ah Zomi Nam Ni nuam takin zang uh hi. Hih hun zatna ah Pu Chin Khenthang (IAS Retd) in khuaneu cik khat pan IAS Officer ciang dong a tun theihna a sepgimna leh a kipiakkhiatna thu leh tua in tuhun a Zomi khangnote adingin tona ahihna thu gen a, Zomi khangnote ki-ukzo a, thuman leh amau tunga sep dinga kipiate zo taka sem dingin hanthawn hi.

Churachandpur Autonomous District Council a executive member Pu Mangchinkhup in North East mite in eima dikna (human rights) ahi ding bang a I neih theih nadinga panlak a kisapna leh, galkapte in a ut bangbang a mipite tungah a gamtatna uh pan talkhiat a kisapna thu gen a, mailamah Zomite adingin state tuam khat Manipur gam pana piang dinga a deihna thu zong gen hi. 

Chief guest Patrica Mukhim, Editor, The Shillong Times in Shillong khua sungah Zomi 10,000 val omdente in Shillong khua adingin a sepna uh hangin lungdam thu gen a, Shillong khua pen a khuasunga tengte leh nasemte a ahihna leh pangkhawma khua sung khantoh nadingin sepkhoppih dingin zawn hi. Zomite in state tuam ngah theih nadingin thagum kihel lo a sep a kisapna leh Meghalaya zong sisan luang lo a state ngah ahih na thu gen hi. Hih hunah lasiam bangzah hiamin la sain, Zomi ngeina lam tuamtuam lahna zong om hi.

Melbourne, Australia

A khatvei nadingin Melbourne khuapi Australia ah Zomi Association of Australia makaihna tawh Zomi Nam Ni nuam takin kizang thei hi. Hih hunah - Gualnop La, Zogam Ngaih La, Nomi Ngaina Lam, ZAA Youth pan Zomi ngeina puante tawh fashion lahna, Drama lahna, leh Australia gama om Zomi doctor (siavuan - 3 leh Ph. D. - 1) pahtawina kipia a, Melbourne khua a om Dr. Judith Go Lun Niang pen minam adinga a kipiakna leh sepna hangin pahtawina in Zomi Puandum silhsakna Nu Ciin Vung, ZAA Numei makai in nei hi.

Hih hunah drama - 'Kawlgam nuntakdan, tua pan gamdang Thailand/Malaysia tundan leh tuate gamtat nuntakzia leh tua pan Australia gam Melbourne a tundan' kim takin Somosis (Sawm Thang Suante), Pa Zen Mung, Tg. Khualtawng leh Lia Niangnote makaihna tawh siam takin nei uh a, mipi in muhnopsain, thangah mahmah uh hi.

Hih hunah sumpi donna om a, tua sumte pen sehnih suahin sehkhat pen CNF/A deihlohna hanga gim a tawl TYF leh Pu Vum Nangte nasep nading leh sehkhat pen nung deuh a gamvai (politics) hanga thong kia hong suakta Zomi khangno nih tungah pia ding uh hi.

Pa Peter Lian, ZAA President in Zomi Nam Ni honna leh vaimuak thugenna nei a, Pa Zen Lian, Vice President in lungdamkoh thugenna nei hi. Nu Ciang Za Dim in Zomi khangtangthu sutna nei a, Zo suante i hihna kuama nial theih ding hi lo hi, cih gen hi. Pa Nangkhankhup, ZAA Secretary in Zomi Nam Ni thu, Pu Cin Sian Thang leh Pu J. Thang Lian Paute gennate siksan genna nei hi.

Manila, Philippines

Manila khuapi ah zong Zomi nam tuamtuamte in Zomi Nam Ni nuam takin zang thei uh hi. Chief guest Philippines Christian University President in thugenna hun hoih tak zang thei hi. Hih hunah Falam, Hakha leh Tedim ngeina lam tuamtuam lahna om a, Bangladesh Zomite in zong Zomi ngeina lam lahna nei uh hi. Zomi Innkuan, Philippines nungakte in "Zomi Hip Hop" leh tulai lam muhnop takin lak thei uh hi.

Phaitu, Zogam

Tonzang khua gei Phaitu khua ah zong Zomi Nam Ni pen February 18 - 20, 2012 sungin sial 6 tawh nop takin bawl thei uh hi. Hih hunah Zomi ngeina lam tuamtuam lahna om a, a nawnkaisak dinga ki-um palikte in security sem zawsop uh ahih manin mipite in suakta tak leh nuam takin zang thei uh hi. February 21, 2012 ni in mailam hunah Zomi Nam Ni pen koici bangin a nopci zawin bawl ding cih kikupkhopna nasia tak nei uh a, mailam hunah a thupi theithei a bawlzawh nading hanciam ciat ding lunggulh uh hi.

New Delhi, India

India gam khuapi New Delhi ah Zomi Innkuan, New Delhi vaihawmna tawh Zomi Church Delhi (ZCD) biakinnah nuam takin zang thei uh hi. Hih hunah chief guest Pu Kham Chin Pau (K. Zou), Advocate hi a, United Zou Organization (UZO), Manipur a makaipi Pu Gin Suan Hau zong kihelin, pawi ann Rs. 20,000/- beiin mipi vak a, lasa teng hawm dingin letsong Rs. 5,000/- a piak banah hanthawnna hun limci tak nei thei hi. Autonomous District Council, Churachandpur Chairman Pu Langkhanpau Guite zong kihel a, Rs. 10,000 tawh huh hi. Pu Thang Za Lun, Rajya Sabha a Assistant Director a sem leh Pu Go Za Mang, Autonomous District Council a executive memberte in zong uap thei uh hi. Zomi Nam Ni tawh kisai thugenna Pu J. Thang Lian Pau in nei thei hi.

Aizawl, Mizoram

Aizawl ah zong Zomi Nam Ni pen Chanmari YMA hall ah 11:00 a.m panin nuam takin kizang hi. Hih hunah Mizogam pana Leitungbup Zomi Kipawlna (Global Zomi Alliance/GZA) a member nih Rev. Suan Khan Thang leh Sianu Elizabeth Hau Sawm Vungte tungah Zomi Cultural Society (ZCS) in pahtawina laipi pia uh a, ZCS Adviser Pu Suan Za Lang, Conservator of Forest, Government of Mizoram in piakhia hi. "Zomi Customary Laws & Traditions” leh “Zomi Cultural Society Byelaw” khahkhiatna Rev. Zam Sian Lal in nei a, Pa Gin Za Go, President, ZCS, Pa Go Siam, President, MPCS leh Sia Dal Gote in thugenna nei uh hi. Hih hunah Zomi ngeina lam tuamtuam - Sangsik, Lamgui, Khawkhai lam, leh buhtuh lam lahna zong om hi. Rev. Kham Khan Thang in lungdamkohna tawh hun hial bawl hi.

Sunnung lam ciang Zomi Cultural Society, Mizoram makai ding teelna om a, President - Pa Gin Za Go, Aizawl, Vice President - Pa T. Thang, Champhai, General Secretary - Sia Nang Sian Mung, Aizawl, Asst. Secretary - Sia Kham Suan Pau, Aizawl, Information Secretary - Pa Patrick Piang, Aizawl, Treasurer - Pa Hang Thawn Tuang, Aizawl, Finance Secretary - Pa N. Khup Mung, Aizawlte telcinin om hi.

Kawlpi khua sungah zong Zomi Youth Association (ZYA) makaihna tawh ZBCM huang sungah kizang thei hi. Rihkhuadarah zong tukpeng kidemna hun zong neiin nuam takin zang uh a, Atlanta (USA), Chennai, Bangalore leh khuapi tuamtuama Zomite in amau omna mun ciatah nuam takin zang thei uh hi. Mun tuamtuam a Zomi Nam Ni zatna ah pau nam tuamtuam Zopua, Kawlpau, Mangpau, Mizopau, Khalkhapau etc. kizang ziahziah a, ahih hangin i minam Zomi ahi hi. - Editor. (T. Sawm Lian, ZBYF Tangko March 2012)

62nd ZOMI NAM NI, 2010 A.D.

Shillong, Meghalaya :

A - 62 veina Zomi Nam Ni pen Shillong khuapi sung a om Zomite in nuam takin Zomi Baptist Church biakinn ah zing nai 10:30 pan nitak nai 3:00 ciang hun nuam takin zang thei uh hi. Lia Khan Cing leh Tg. Suan Ngaih Cin te in siam takin makaih uh hi. Upa Gin Khan Mang, Chairman, Shillong ZBC in hun-apna a neih khit ciang la siamte in lasakna nei uh hi. Hih hunah Dr. Hau Za Cin in “Zomi Nam Ni hong pianna thu” cih thulu zang in thu gen a, makai leh Upa bangzah hiamin zong thugenna hun nei uh hi. Hunzawh lungdam kohna Rev. Cin Kam in a neih khit ciang kham lopiin kikhen uh hi.

Vapar, Mizogam :

Vapar khua ah A 62-veina Zomi Nam Ni pen Pawlpi tuamtuam kigawmkhopna Zomi Christian Fellowship(ZCF), Vapar makaihna tawh nei thei uh hi. 19.2.2010 zanin VCP, Upa Zam Sian Pau Zinmangin zangin, Solo competition nei uh hi. 20.2.2010, sun hunin Champhai DC Office a Superintendent a sem ahi, Zomi Ulian Pu B. Zam Khaw Nang Zinmangin zang in, aman va uap thei hi. Zo lam Mizoram Upa Pawl(MUP), Vapar Unit ten nei uh hi. Hun man khit ciangin Niangtui lim mahmah hawpkhopna nei uh hi. Hih hunah Mipi 250 - 300 kim kihel uh hi.

Lamka, Manipur :

Lamka khuapi sungah Zomi Youth Association makaihna tawh Zomi Nam Ni thupi takin zang uh hi. Kumpi Ulian Pu Phung Za Thang, Minister (Power, Hort& Soil conservation, Sc.& Tech.) banah MLA pawl khat in zatpih hi. Chief Minister in huhna Rs.1,00,000 pia hi. Galkap lam Parade group 6 in nei a, minam lam tuamtuan lam hi. Bawllung kidemna nei uh a, khatna Zomi Football Club (Jiribam) in sum Rs.1,00,000 ngahin nihna United Football Club (Ukhrul) in Rs.50,000 ngah. Cikha leh Tedim panin zong bawlung sui pai uh a, minam lam zong lak uh hi. Lamka bawlung tualpi dimin mi kikhawm a, Zomi Nam Ni a kizatna laka tu kumin mihing tampen dingin ki-um a, mipi 20,000 val khawng kihel uh hi.

Mualnuam, Manipur :

Mizogam leh Lamka kikal a Zomite khua khat ahi Mualnuam khua-ah zong Zomi Nam Ni thupi takin bawl uh a, Mizogam panin ulian Pu Rohlun, Minister of Food and Civil Supply, Forest, zinmang hi a, Khawdungsei khua panin YMA leh lasa siam zong va kihel uh hi. Champhai panin Vanlalsawm IFS (DFO), Lalhmingliana DCSO (Supply), Ramdingliana PS leh Ngopa SDO sem lai Rolungmuan zong va kihel thei uh hi. Pu Rohlun, Pu Rolungmuan leh Pu Vanlalsawmte Zomi vive ahi uh hi.

Lawngtlai, Mizoram :

Mizogam Lawngtlai khua-ah Young Lai Association makaihna tawh YLA Hall ah thupi takin Zomi Nam Ni zang uh a, Lai Autonomous District Council a makaipi Ngunlianchung,(CEM) in zinmang hihna tawh thugenna nei. Falam panin lam pawl pai-in minam lam tuamtuam lahna zong nei uh hi. Hih Lawngtlai khua-ah Zomi Nam Ni a kizat a khatveina ahi hi.

Delhi, India :

February 20, 2010 ni in Delhi ah a 62 veina Zomi Nam Ni nopci takin bawl thei uh hi. Atawmpen mi 1500 bang kihel thei hi. Tutung Zomi Nam Ni pen kum dangte tawh kibang loin kum 10 nuai siah naupangte ngeina puante tawh Fashion Show lahna leh kidemna kinei-in, tua sung panin ei ZOMI Mungsan (U.S.A) in akhatna ngah hi.Lucky Draw sawkna zong nei in mipi in tha ngah mahmah hi.Buaina bangmah om loin nopci takin hun zang uh hi.

Chennai, India :

Tukum Zomi Nam Ni pen kamsiatna tawh Vengnuam, New Lamka a teng pasal khatin nusia mah leh Chennai a Zomi ten nuam takin bawl thei uh hi. Hih hun ah Thahdola ,Vaipheila, Mizo la zong kisa ziahziah ahih manin ZOMI ten minam ni bawlkhawm thei ta cih hong phawksak hi.

Bangalore, India :

Bangalore a om Zomi ten zong Feb 20 Zomi Nam Ni pen Bangalore Zomi Welfare Department le Laizom Tongsuah Bi-Monthly News Letters Editorial Board makaih na tawh zang thei uh hi.

Tulsa, USA :

Tulsa khua-ah Oklahoma Zomi Innkuan makaihna tawh thupi takin Zomi Nam Ni zang uh a, Rev. Dr. Ngul Khan Pau zinmang hi-in, minam khantohna ding thu manpha tampi gen hi. Thu leh la lamah tai mahmah uh a, lam leh fashion show akipan lasakna tuamtuam om hi. Hih hunah Mautam kial huhna dong uh a, US $ 2000 val ngah uh hi. Oklahama state sungah Zomi 1200 val om ta hi.

Texas, USA :

Texas State sung a Dumas city, Amarillo city, Cactus city sung a om Zomite kigawm in DUMAS CITY ah Zomi Nam Ni in bawng gol mahmah khat goin nuam takin bawl uh hi. Zomi ngeina puante silhin, a neu a lian in Zo lapi sain Zo lamin lamin nuamsa mahmah uh hi. Zomite bek tham lo Mexicante bang zong kihel in kikawi kawmin Zo lamin lam uh a, nuamsa mahmah uh hi.

Massachusetts, USA :

Massachusetts Chin Community(MCC) , USA te makaihna tawh A 62-veina Zomi Nam Ni nuamtakin bawl thei uh hi. Zomi Nam Ni kibawl na sungah mimal gawm in 122 bang pha thei uh hi. Nek leh dawn MCC kipawlna in Dollar 2000 bei in bawl a, Hall pi khat Dollar 450 in kawmin Zomi Nam Ni nuamtakin zang thei uh hi.

Florida, USA :

Florida gam Fort Lauderdale vengah Florida Zomi Innkuan makaihna tawh thupi takin zang uh a, lim lahna (drama) leh la siam tuamtuam in a sak banah Zogam kial huhna ding sum donna zong nei pah uh hi. Zomi Nam Ni pen midang adinga thupha ngahna suaksak uh hi. Tua hunah Zonet Award for Writer of the year 2009 Rev. G.K Nang tungah Certificate piakna hun Rev.Dr. Chin Khua Khai in zang hi. A pai khempeuh mi 100 val bang pha uh hi.

Portland, USA :

Portland khua (Oregon) ah Portland Zomi Innkuan makaihna tawh hun siangtho takin zang uh a, Zomite adinga thungetna leh Zomite UN ah min khum zawhna ding hanciamna nei uh hi. Zomi Nam Ni pen minam kip khat suah theihna dingin zang uh hi.

Suangzang, Myanmar :

A(62) vei na Zomi nam ni- in, Tedim gam Suangzang khua in, sun hun in Zomite tangthu tuamtuam leh nitaak in, Zo lapi tawh Zongeina laamvuui kaai-in, nopcitak in pawipi bawl cihthu kiza hi.

Kalaymyo, Myanmar :

Kum 62 cin Zomi Nam Ni pen Kawlpi ZBCM huang ah Chin Sangnaupangte mahkaihna tawh sun 11:00 pan 2:30 sung bawl uh hi. 

Hunpi sung ah hun hon thugenna, tangthu genna, lungdam kohna le Zomi Makai te pahtawina nei uh hi. Hun nihna ah ngeina lam tuamtuam lahna nei in, hun thumna ah lasakna tuamtuam hi a, Zomi Siamsinte in “Tun sung khat pan piang hi ngeingei hang e” cih la a group in sa uh hi.

London, U.K. :

20.2.2010 niin Welsh Association Hall, London ah Zomi Nam Ni nasia takin U.K a om Zomi te makaihna tawh bawl thei uh hi. Zomi bek hi loin minam dangte zong tampi kihel uh a, tha ngah thei mahmah uh hi. Mipi 300-400 bang pha in nuamsa mahmah uh a, hih Pawi sungah Zomi Innkuan UK pan khangno ten Zogamnuam cih la pen lam kawmin sa uh a, etlawm mahmah in mipi in zong siam sain thangah thei mahmah uh hi. Thugenna tuamtuamte a bei khit phet in UK gam sung aa om Zomi Musicians te makaihna tawh Lasakna, nasia takin nei uh a, London a kibawl 2010 Zomi Nam Ni pen nung kum lam mah bangin lawhcing mahmah hi.

Norway :

Norway gam a om Zomi ten zong a omna tek uhah kikaikhawm in 62th Zomi Nam Ni nuam takin muak thei uh cih thu kiza hi. Nordland Norway a om Zomite in zong Sortland khua ah mi 60 val in nuam takin bawl uh a Media lampan Radio saite, Vesteråland thukante leh Hadsel sang siapinu zong kihel thei uh hi. Zomi nam tuamtuam teng leh Kawl, Rakhine, Shan, Kachin, Mon, Chinese minamte zong kihel thei uh a, Ålesund, Oslo, Froland leh Stavanger ah zong nuam takin hih hun zang thei uh hi.

Ottawa, Canada :

Zomi Nam Ni pen 20 February 2010, 6pm – 9pm hunin Branson Ave (Branson Centre) ah zang uh hi. Hih hun pen hun nih in khen uh a, a hun khatna ah thugenna hun leh a hun nihna ah Ngeina lam leh lasakna hunin zang uh hi.

Japan :

Tukum 62-veina Zomi Nam Ni, Japan Zomite in zong nasia takin na bawl thei uh hi. Zogam lasa siam Lia Sung Tin Par in va uap thei-in, nuamsa mahmah uh hi. Pu Nang Lian Thang thugenpi (Main speaker) in pangin thugenna nei hi.

Yangon, Myanmar:

Yangon ah Thakhin Than Pe inn ah Zomi Nam Ni kibawl a, Chief of Staff Army ( Ex) leh NLD Makaipi a hi, Tin Oo in zong hih hun zatpih thei hi.

Sweden :

Zomi Innkuan Sweden in zong Sweden gam Ljusdal khua ah A 62 veina Zo Minam Ni nuamtakin bawl thei uh a, Kachin, Karen leh Shan minam te zong kihelthei uh hi.

Philippines :

A 62-veina Zomi Nam Ni (or) Chin National Day pen Philippines ah Feb 20 ni tak 1:00am - 5:00pm sung Kowloon (Sen Ann sai lian mahmah) khat ah bawl in minam kim ciat in ngeina leh la sakna tawh Zomi Nam Ni muak uh hi. Tualaiah Zomi Innkuan Philippines innkuan sung panin Rev. Langh Khan Thang in kipatna thungetna nei in Rev. Vumpi in Welcome Remark pia in, Dr. Khup Lian Pau @ Paubawi in Unity in Diversity bulpuh in thugenna nei hi.

Mun danga Zomi Nam Ni a kizatnate hong kisuah kim thei lo ahih manin nong theih siamna uh kong ngen hi.

- A kaikhawm : Tg. T. Sawm Lian (Laitai April 2010)

NUNTAKNA LAMLAK - 4

NUNTAK NGAMNA

Mihingte a si dinga nungta i hi a, a nungta dinga si bangzah hiam om hi. Tua nuntakna pen nopsakna, lungnopna, lungdamna, haksatna, lunggimna, buaina, natna, leh sihna tawh kidiah tawntung a, kipelh thei lo, a kimakhelhden, i nuntakna sunga kiphumcip ahi hi.

Leitungah i nuntak sungin, hihna, sepna, nuntakzia, leh kalsuandan tuamtuamah i nei uh a, tua i kihelna, i nuntakna sungah khatveivei thu limci, lungnop nading, leh thu sia la sia, liam le bai theihna leh a siahuai mahmah sih theihnate in hong nawk a, eima nuntak nading, i innkuan kepbit nading, i minam mailam khantoh nading leh mi hong simmawh-bawlsiatloh nadingin si ngam a panlak a kul hun om thei hi.

Mi in i omna pawlpi leh minam a gensiat uh, a thusimloh uh ciangin i omna pawlpi leh i minam a daisakte tungah phu lak nopna leh, i hihna humbit nopna hangin khuttum leng liang a kitotna leh thusiazaw piang thei a, tua bang hunah tua pawlpi leh minam adinga a si ngam tampi om hi.

Zomite nuntakna sungah, mite in hong simmawhna leh bawlsiatna hanga nam kal buaina hong omin, tua bang hunah Zomi adinga si gam nungak-tangval, nupi-papi tampi om hi. Tuate pen loh theihloh a minam humbit dinga hong kuankhia a om laitakin, mai lam kalsuan zelna dingah Zomi pen mite sila-a a om maimai ding lauhna leh mite pampaih hih ding lauhna tawh a kuankhia tampi mah om veve hi.

Sih ngam nuntakna pen hoih mahmah, thupi mahmah hi. Tua sih ngam nuntakna hong tun taktak ciang bekin a hihna uh a kilangkhiasak pawlkhat om thei hi. Tua sih ngamna sangin a thupizaw khat om a, tua pen hun hoih leh hum manpha a om lai a innkuan, pawlpi, khua, minam leh gam adinga ‘nuntak ngamna’ ahi hi.

Innkuan sungah, innkuanpihte phattuam nading ngaihsun mahmah lo a, nasep ding leh khantoh nading lam a ngaihsun lo, a hun manpha leh limci teng a mawk beisak, innkuan a buaisak mahmahte khawng pen pua lam pan innkuan siat nading hong tun hun ciangin a si masapen ding, sih ngam nuntakna a nei bangzah hiam om hi.

Pawlpi sungah zong, biakinn a Pasian bia dinga hun a ngah man lo(!), biakpiakna a thusim lo, pawlpi in sep le bawl ding a geelte uh zong a thupisim lo leh kipawl nadinga nuntakna leh hun a piakhia ngei lote khawng pen, midangte in tua pawl gensia-in suksiat sawm hi leh a zadah pen, a kitom masapen khawng peuh hi thei uh hi. Tua bang mite in pawl adingin sih ngam nuntakna a nei taktak mah ahi uh diam?

Minam adinga si ngam mahmahte minam adingin a nungta ngam hi khin lo uh hi. Cihnopna ah a hun hoih uh, a thatang hat lai uh pen kiim le kiang, khuapih-tuipihte tawh kilai nading maimai a zang a, zu le sa tawh kidiahin, naupang leh piteek-puteekte a linglawngsak, mite cimtak mahmah a nuntakna a zang bangzah hiam om thei hi. Tuate pen khua dangte in a khua uh suksiat sawm leh a si ngam masa pen khawng hi zawsop leuleu uh hi. Minam hihna tawh kizuiin - pau le ham, ngeina, zia le tong, nuntakzia zong a thupi sim lo leh, minam khantoh nadinga sem nuam lo, minamdangte laka kibubu mite khawng pen minamin haksatna a tuak ciangin a si ngam mahmah khawng hi thei bilbel uh hi.

I gennop bang hiam? Sih ngamna zong a sia khin hi lo a, nuntak ngamna a om kei leh phatuam taktak lo hi, cih ahi hi. Mahatma Gandhi, Nelson Mandela, Abraham Lincoln, Mother Teresa, Aung San Su Kyi-te pen a gam, a minam leh a nasepna uh dingin singam uh a, a nuntakna uah tuate zangkhiain, a nuntakna uh pen a itte uh adingin a hoih theipen leh a meet thei pena a zat uh ciangin lawhcingin, mi thupi leh mite zahtak ahi uh hi.

‘Zomi ka it’ ci-a gengente khempeuh Zomi adingin nungta ngam tuan lo uh a, ‘Pasian ka it’, a cici khempeuh Pasian adingin nungta tuan lo uh hi. I itte phattuam nadinga nuntak pen sih ngamna sanga manphazaw hi. Innkuante adinga si ngam napi, innkuanpihte’ phattuam nading bangmah a sem nuam lo, innkuan khantohna ding bangmah a ngaihsun lo khawng, pawlpi leh minam it ci-a tua a itte adinga a nungta ngam lo a tam leh, mailam kalsuanna-ah tua a ki-itsak mite hangin pawl in phattuamna ngah lo ding a, si ngam zaha pawl khantoh nadinga hong nuntak uh ciangin innkuan, pawlpi, khua, minam leh gam khangto thei pan ding hi. Tua banga nungta ngam lote, kingaihsut nading hun hoih nei uh leh tuate adingin a singam takpi mah diam?

~ T. Sawm Lian, Daihna Cabin, 20/4/12

Career Guidance : LAW

ZBYF makaite in ZBYF Tangko sungah Career Guidance a tam theipen suaksak ding hoih sa uh a, ahih hangin ei’ tot ngeilohna lampi leh muh ngeiloh lampi midang hilh sawm pen baih het lo hi. A theizaw leh a siamzawte in lah hong gelh tuan lo uh ahih manin sanggam te’n “Ar khawthim dai” a cih uh bangin theician lopi in i gelhsuk gawp mai ding a, a meetpih i om khak zenzen leh lungdamhuai ci ni.

‘Law’ i cih pen Mikangpau hi a, ei pauin ‘thukhun’ ahih kei leh ‘ngeina’ ci leng kitel pen ding hi. Tuhun leitungah ngeina leh thukhun theihlohna hanga thuakna nasia mahmah a, hih thukhun leh ngeinate pen ahih nading bang taka theihna in buaina leh siatna tampi lak panin hong hung thei hi. 

Law a kisin dan :

Law i cih pen sin kisam a, Bachelor of Law (LLB) leh Master of Law (ML/LLM) kici hi. LLB sin theihna nam nih om a, kum 3 course leh kum 5 course ahi hi. LLB degree kum thum course sin dingin bachelor degree (subject khat peuhpeuhah) neih masak kul hi. University pawlkhat ah entrance test nei uh a, a tamzaw ah entrance test nei masa sese loin sin theih hi.

LLB degree kum 5 course sin thei dingin 10+2/PUC zawh masak kisam hi. Suject khat peuhpeuh (Science, Arts,Commerce) panin sin theih hi. A tangpi thuin LLB kum 5 course sin thei dingin marks 55% muh kisam a, mun pawlkhatah minam neu/ singtang mi (tribal) te adingin tawmsak zaw uh hi. Hih course sin dingin entrance test neih kisam a, tua test-ah a tangpi thupi in papaer 2 pan 4 om hi. Tuate pen : English, Mathematics, GK, Aptitude for Legal Studies ahi hi. 

Kum 2012 CLAT entance exam a marks leh paper : English - 40 Marks, GK - 50 Marks, Mathematics - 20 Marks, Legal Aptitude - 50 Marks, Reasoning - 40 Marks ahi hi. National Law University in entrance a paper a bawl uhah : English - 35 Marks, G K - 35 Marks, Current Affairs (General Science, History, Geography, Economics, Civics) - 35 Marks, Legal Aptitude - 35 Marks, Reasoning - 35 Marks, Mathematics - 10 Marks ahi hi. 

Entrance test-ah eima ngaihsutna leh upmawh thu (gelh ding a akicih kei leh) phuaktawm gawp sangin hih lama misiamte makaihna banga dawn pen manpha mahmah hi. Law lam tawh kisai coaching/admission a bawl nuamte in www.lawentrance.com leh www.paradygmlaw.com panin theihtheih ding hi. A sin nading mun Aizawl leh Shillong ah zong om hi.

Law sin pen thubaih lo hi. Cihtak, kuhkal, kipiakzawh kul hi. Lai sim ding a tam mahmah banah, a taktak bang a sep (practical traning) ci tuamtuam, court-ah paia na tuamtuam va sep, court taktak banga kinialna leh legal research work tampi kihel hi. Law College pana kum 5 sinkhit zawh cianga graduate-te pen mi thupi, mipil misiam, mite zahtak ahi uh hi. 

LLB pass khit ciangin master degree (ML/LLM) a sin nuamte ading sin theih hi. Master degree pen kum nih sung kisin hi. Paper tuamtuam, a taktak a zat (applied) hipen hi. University pawlkhat Diploma Course a hong (offer) zong om hi.

Na sepna

Law siamte in sepdan leh sep ding tuamtuam nei uh a, tawmkhat en dih ni :

a) Advocate : Advocate nasep pen court a thusia neite a dinpih/panpih ahi hi. Advocate siamte in a hunzatna uh tawh kizuiin a guaite kiangah sum ngen uh a, a case baih leh haksatna tawh kizuiin sum ngen tangpi uh hi. Court maia kilah ciang zong a thusia neite in bangmah pi gen lo uh a, advocate in gensakin, amau tangin dinsak hi.

b) Solicitators : Advocate-te in hoih tak leh amau a guaite adingin pan a lak theih nadingin solicitatorte in a kisam khempeuh na vansak masa uh a, Solicitator-te’ ngaihsutpiakna tawh thusia neite in advocate guai zel uh hi. Law sinte in a zawh phet un socilitators firm ah ‘junior’ ahih kei leh ‘articled clerk’ in sem phot uh a, tua pan socilitator assistant-ah sem uh hi.

c) Judge : Lawyer kum sawtpi a sem khin sate court makaih dingin kikoih a, judge kici hi. Judgete pen a thuman, a citak, a sia a pha ahihna bangbanga vaihawm, gup tuam nei lo mi hi ding hi. A sepna un mawhpuakna lianpi neisak ahih manun khua-hek gamtat kidop mahmah, pilvan mahmah kisam hi.

Law Branches

Law career tuamtuam pen anuaia bang hi a, ei lunglutna lam leh kivakna lamah pai ding hi :

i) Corporate law : Hih line-ah company liante sepkhopna leh midang tawh a kikal uha kitanauna, kitheihsiamna ding leh, vaihaksa khat peuhpeuh a om cianga a kisapna banga panpih ahi hi.

ii) Tax law : Hih line ah taxation tuamtuamah specialised na hi a, Income Tax, Custom Law, Central Excise Law, Service Tax Law, Value Added Tax etc.. huamkhin hi.

iii) Civil Law : Hih line ah mimal dikna (human rights) lam hi pen hi. Thusia tuamtuam - gamh luah ding vai, inn mun lo gam tawh kisai, mimal nuntakna kizahtak lo luatna, leh nisim i tuahkhak thu tampi kihel hi.

iv) Criminal Law : Hih pen mimal, pawl, khua, gam leh a tuamtuam thusia - mi van guk, mi thah, mi buan, mi ading buaina bawl etc.. hipen hi. Hih lama thukhun/ngeina a theite criminal lawyer kici a, a panpihte uh pen client kici hi.

v) Patent Law : Patent law pen tunaiin kithei-in kilim zat hi. Hih pen mi in ama siamna leh pilna tawh muhkhiat thak bang hiam nei leh, tua pen ama aituam dingin kepbitna lam tawh kisai hi a, tua bang mite in ‘patent right’ nei thei uh hi. Kua hiam in a kitheihpih khinsa pen a neite theihlohin amau a bangin kem, ahih kei leh amau a bangin en uh leh ‘patent law’ zangin court case bawlsak theih ahi hi.

vi) International law : Tulai leitung khantohna tawh kizuiin gam khat leh gam khat kimeltheihna, kikawm-tuahna leh sepkhopna hong tam deuhdeuh hi. Tua bang a sepkhopna lamah tax treay, custom, leh sumbawlna lamah hih international law siamte in sep zawhloh ding nasep om hi.

(LLB a sinlai Tg. Thang Khan Lian @ Pate of Shillong-te pawl in lah gelh sawm lo, ken lah ngen tuan lo. Tua manin a kicingzaw a thei nuam i om khak zenzen leh ama tungah dot theih dingin ngaihsun ni, hong hilh thadahloh ding lametna tawh! - Ed.)(ZBYF Tangko May 2012)