ZBYF Tangko Editorial (June 2013)

            Tulai thugente lakah kammal a kizang mun mahmah khat pen, “Pasian in a pil a siam teel lo, ei a haite hong zang nuam zaw...” cih ahi hi.

               Lai Siangtho sungah, pilna kisapna thu tampi kigelh napi, bang hanga kisin sawm lo, pil sawm lo, leh i hihna ngeina pana mainawt sawm lo a, tua bang tawh Pasian in hong zang nuamzaw hi, cici i hiam? Awlmawhhuai hi.

                Tua banga kigengen ahih manin i Pasian thu-upzia maan lo a, kithutuak nadinga kilawm penpen, Pasian min suanga kipawlna sung pen a nuam lo pen kipawlna a suak dekdek hun om mawk hi. Tua hang zong ahi tam, i khuatang nuntakzia, siamsianna, nek le taak zonna leh Pasian thu-ah i niam mahmah. A kisin nuam, pilna a deih mite zong a khakcip nuam om zawmah lai!

                Pasian in a thupi diak munah mi a zat ciangin, a kisin mi, mainawt sawm a kalsuan, a lungduai mite na zang se hi. Noah hun lai pek pan kipan, Moses, Joshua, Daniel, Nehemiah, Samuel, David, Solomon, Jeptha, Jesu nungzuite, Sawltak Paul ahi zongin, Zogam leh gam tuamtuamah lungdamna thu puaka, na lianpipi a semte pen mi pil, mi siam, mi hat hi uh a, Pasian na a sepma un zong amau sepna ciatah ‘mi specialist’ ahi uh hi.

                Baih tak leh hun tomcik sunga na lianpi sep sawm a, Pasian mi zat thupi hih i sawmna ‘phuaktawm tualsuak theology’ pen paihkhiat hun ta hi.

                Pilna siamna i neihlohna pen pulpit tung panin ‘kisaktheihpih’ den keei nawn kei ni. Kisin nopna lungsim nei-in, ei’ haina tungtawnin pilna manphatna pen mite tungah i gengen ding hizaw hi. Lai Siangtho in Pasian tawh a kineikhawm lo pilna pen hoih a sa lo hi bek hi.

                “Mawhneite Jesu’n ngai hi” ci-a mawhna bawl-bawl sangin, mawhna pana ama kiang a zuan mite tungah Pasian a lungdamzaw a, na thupi semsakzaw hi.

                Pasian tawh neihkhop pilna, siamna, leh theihna pen tuhun Zomite kisap lianpite laka khat ahi hi.

LAWHSAPNA PAN LAWHCINNA-AH

             Mihingte in lawhsapna i maingat dan leh lawhcinna i lamet dan kibang het lo hi. Mi pawlkhat in lawhcinna pen nuam tak leh baih taka ngah sawm uh hi. Baih taka lawhcinna sangin haksatna leh lawhsapna tampi kal pana lawhcinna pen a ngahte adingin lungdamhuai zaw pekpek hi. Lawhcinna thupi tampi pen lawhsapna pana lungkia lo a sep tantanna-ah om ahihna hih anuaiate panin kithei hi.

1.   J. K Rowling - Novelist (Harry Potter)

            Harry Potter tangthu gelhnu Joanne ‘Jo’ J. K Rowling pen waitress na sem zel ahi hi. A laibu pen publishers 10 val in a nawlh khit uh ciang, a paina nunung pena a CEO’ tanu kum 8 mi bekin a pa kiangah tua laibu suahkhiatsak dingin ngen ahih manin a kisuahkhia bek ahi hi. Ahi zongin a laibu in leitung bup zeel a, kum 5 sung bekin Multi-millionaire hih lawh mawk hi! A laibu bawlna hangin kum 2008 in United Kingdom a numei hau pen 12-na hi liang hi.

2.   Abraham Lincoln - US President

                US President 16-na, Abraham Lincoln pen sing inn neu khat pana khangkhia ahi hi. USA President minthang khat hi-a kithei pa pen, tua bang a minthan nadingin a lampi tot pen baih lo ding hi. A sumbawlna ah nihvei lawhsam a, a zi in sihsan hi. State legislature pan USA President a tun nadingin 9-vei tak lawhsam a, a hanciamna, a kuhkalna leh a hangsanna hanga President minthang mahmah hi thei hi.

3.   Ludwig Van Beethoven - Composer & Pianist

            A violin tum siamloh luat manin a siapa lungkia lua a, Music leh laphuak lamah lametna nang tungah om vet lo hi” ci liang hi. Tua bang kawmkalah Beethoven in na ging peuhmah za thei nawn lo sawnsawn lai a, a dam sungin a bil in khua za thei nawn lo suak hi. Ahi zongin a khutsuakte laka thupi penpen 4te pen a bil in bangmah a zatnawn vetloh hun (completely deaf) khit cianga a bawl/phuak (composed) ni mawk hi!

4.   Henry Ford - Ford Company Founder

                “Lawhsapna pen pilzaw leh ciimzaw-a bulpat kik theih nadinga hun hoih ahi hi” a cipa leh leitungbup a mawtaw bawl company minthang Ford Company neipa leh a phuankhiapa Henry Ford in mawtaw bawl nading munpi bawlsawmin nihvei lawhsam a, lungkia loin a thumveina ciang lawhcing pan hi.

5.   Colonel Harland Sanders - Founder of KFC

            Sanders pen kum 65 mi ahih in, “Chicken Recipe, Kentucky Fried Chichken”  bawl zuak dingin mun tuamtuam 1000 valah pai a, lawhsam hi. Kum 10 val tua banga a sepsep zawh ciangin kum 75 mi ahih ciang a company phuatkhiat “Kentucky Fried Chicken” pen dollar 15 million in laisak leisak uh a, gam 120 ah sai 18,000 val nei man hi!

6.   Walt Disney - Co-founder Disneyland & Film Producer

            The Walt Disney Company (Disneyland) a kiditkhiat ma-in Walter Elias Disney pen a sepna Newspaper Editor in “idea nei vet lo hi” ciin tawng a, tawpsak hi. Sum le pai ah tamveipi lawhsam a, companyte in 302 vei tak a nasem dingun deih lo hi, kici hi. Tua bang pana lawhcinna a ngah ahi hi.

7.   Sir Charles Spencer Chaplin - British Comic Actor & Filmmaker

            Charlie Chaplin pen a naupan lai panin gentheihna leh haksatna lianpipi in tuam a, tagah kepna inn-ah zong kihoih hi. A tangthu gelhpa David Robinson in, “Leitunga mihingte lakah, gentheih luatna pana mi haupi a suak thei tangthu zaknop leh lungsim a lawng pen” ci liang hi. Kum 1975 in Knight Commander of the Most Excellent Order of the Britist Empire hihna kipia a, kum 1962 in University of Oxford leh University of Durham in Honorary Doctor of Letters pia liang uh hi.

8.  Jack Canfield ang Mark Victor Hansen - Chiken Soup for the Soul

            Chicken Soup for the Soul cih laibu a gelh uh pen suahkhiatsak dingin New York a publishers 33te in nawlh uh a, California a America Bookselleers Association-te laka 90 in zong nawlh uh hi. New York Publishers in simmawh takin, “Nobody wants to read a book of short little stories” ci sak liang uh hi. A tawpna-ah Health Communication Inc. in suahkhiatsak uh a, tuhunin pau tuamtuam 31 tawh kilet-in, 53 million copies val kizuakkhia ta hi. 

9.   Elvis Presley - King of Rock & Roll

            Kum 1954 in Jimmy Denny, Manager, Grand Ole Opry in Elvis Aaron Presley pen amau laka la sa taak lo hi ciin, “Siam nei lo na hih manin na nasep ngeina truck mah hawl kik in” ci a, ahih hangin Elvis Presley pen lungkia nuam tuan lo hi. Lungkia lo-a a hanciamna hangin King of Rock and Roll cih minphatna kipia a, kum zalom 20 sunga la siam mithang pen (one of the most popular musicians of the 20th century) kici liang hi.

10. Steven Spielberg - Film Director & Producer

            Steven Allan Spielberg pen University of Southern California (School of theater & film and television) ah sin dingin a ngetna pen, amah-ah lametna siate in nei lo ahih manin nihvei tak nawlh uh hi. Ahih hangin leitunga film muhnop penpente (biggest movie blockbusters in history) pen a khutsuak hi mawk hi. Film Industry in limpiahna huang sungah Steven Spielberg manphatna pen dollar 3.2 billion hi, ci uh! February 5, 1994 in nihvei taka a nawlh University of California in Honorary Doctor of Fin Arts pahtawina piakik uh hi. TIME Magazine in, “100 Greatest People of the Century” ci liang uh hi.

11. Stephenie Meyer - Novelist & Producer (The Twilight Series)

            Tulai film a thang mahmah Twilight tangthu gelhnu Stephenie Meyer in publishers 15 kiangah a tangthu gelh suahkhiatsak dingin ngen a, 9 in nawlh pah giap uh a, 5 in dawnkik (reply) taak in zong ngaihsun lo uh a, a lak ua khat, Jodi Reamer of Writers House in lametna neucik tawh ‘chance’ pia uh hi. A lamdanpi-in Twilight series 3 gelh dingin dollar 750,000 piak ciam uh hi. Kum 2010 in Forbes in a thugelhna panin dollar 40 million thalawh ta ciin gen uh hi. 

12. Michael Jordan - America Professional Basketball Player

            Michael Jordan pen mi tampi in lawhsapna thu a thei lo dingin i ngaihsun hi. Ama kipulakna pen hih bang hi; “Game 300 tak lelin, 26 vei tak tavuan poimawh mahmah ka tunga hong kisuanah ka lawhsam hi. Ka hun sungin tam veipi ka lawhsam kikkik a, tuate hangin ka lawhcing hi” ci hi.

          Na up, na muanngam zah nang aa hi. Lungkia loin lametna thak tawh na mai a paisa mi hangsante sulnung zui dingin hanciam in.

Daihna Cabin || 31.5.2013

THUCIN-THUTANG

Ø   May 12, 2013 in Lunglei district sunga Theiriat khua-a Baptist Church of Mizoram (BCM) Upa Pu C. Lalhmingthanga (67) PWD a S.A nasem laitak pen biakpiak kikhopna-ah chairman in sumpi-ap dingin sam a, sumpi-ap dinga a dingkhia pen tukin, tua munah leitung nusia suak pah cih thu kiza.

Ø   May 11, 2013 zingsangin Aizawl khua-a Laipuitlang veng a PWD quarters kicim ahih manin a nuaia omte delh a, Laipuitlang Presbyterian pawlpi jubilee building kihelin inn 11 sia hi. Hih inn cim hangin mi 17 si a, mawtaw two wheeler - 8, LMV - 8, leh tripper - 1 delhcip hi. Hih siatna thuakte pen kipawlna tuamtuam in huhna ` 3,200,000 val pia uh a, Mizogam kumpi in sihna thuakte ` 150,000/- teka gal ding ci hi. Tua banah Aizawl khua-a ‘3:16 Plan Solution’ kici sai neipa John Lalpeka in siattuak innkuan 14te adingin TV/Fridge khat tek pia a, misite ` 1,000/- tekin gal hi.

Ø   May 3, 2013 in Khampat Bungpui a kici, Mizo history a minthang mahmah, a hiang thumte laka khat kiciak hi.

Ø   May 14, 2013 in Mizogam sunga Sakawrdai khua-ah Hmar Leaders Conference om a, Mizogam sung a khua tuamtuam panin Hmar makaite paikhawm uh hi. Hih hunah Hmar minamte adingin a hatzaw sema sep ding thukim uh hi. May 15, 2013 in Sakawrdai khua mahah Mizoram Schedule Tribes Convention om a, tua hunah Mizoram Minorities Co-ordination Committee kiphuan pah hi. Hih Convention in, Mizogam sunga minam min tawh kipawlnate a zadah a om hangin zakdah ding om lo ahihna, ADCte in thuneihna lianzaw a neih nadinga Mizogam kumpi panlakna hanga lungdam kohna, Paite Tribe Council (PTC) in kum 1952 tu hun ciang dong Automonous District Council a nget uh Mizogam kumpi in ma lak pih dinga a deihna uh leh thu tuamtuam bangzah hiam thukimna (resolution) nei uh hi. Hih hunah Paite, Lai, Mara, Chakma, leh Hmar makaite in suaikai (signed) uh hi.

Ø   April 29, 2012 in Champhai district sunga om Saikhumphai khua pen Vaphai khuate in, biakinn leh aganwadi centre cih simloh teenna inn teng haltumsak uh hi. Hih a halna uh hang pen, Saikhumphai khua sunga omte pen Kawlgam mi ahihna uh hang hi, ci uh a, Guwahati High Court (Mizoram Bench) in Saikhumphai leh Vaphai khuate thusia a lepna-ah Saikhumphaite in gualzo ahih manin Vaphai khuate lungkimlohna hang a kihal ahi hi.

Ø   May 20, 2013 in Aizawl khua ah zu sia dawnna hangin mi 2 si a, mi 25 val zato inn ah kipuak hi.

Ø   Limpiah minthang Jackie Chan in a tapa neihsun Jaycee adingin a sum neihsa $ Then 130 (130 million) pen bangmah koihsak sawm lo a, charity ah piak sawm hi. “Ama sum ding pen amah mah in thalawh tawm hen” ci hi. Leitunga mi hau pawlkhat - Warren Buffet, Bill Gates, leh Ebay founder Peirre Omirdyarte in zong a tate uh adingin bangmah koihsak a sawmlohna thu leh charity ah piak a sawmna uh gen khin uh hi.

Ø   Mizoram sunga Football club khat ahi Aizawl FC in kum 2013 - 14 budget dingin ` 5,650,000/- sang uh hi. Tu kum sungin India gam sunga football tawh kimawlna sang pen ahi I Leaque ah kihel sawmin nak takpi in pan la uh hi.

Ø   May 22 - 24, 2013 sungin Integrated Councelling & Testing Centre (ICTC) a Councellorte nasepdan etkikna panin Mizogamah HIV/AIDS pen kibehlap hat mahmah ahihna leh, singtang lamah muhkhiat thak a tamna thu kigen hi. Kum 2012- 13 sungin sisan test 30,341 lakah HIV nei mi 1,022 om cih thu kipulak hi.

Ø   Business Consulting Firm, Frost & Sullivan in a kancianna panin Israel in 2005 - 11 sungin a hek om lo vanleng (unmanned aeriel vehicle/UAV), Drone kici a zuakna uh hangin US $ Sang 4.6 (4.6 trillion) mu uh cih pulak hi.

Ø   May 21, 2013 a kisuahkhia, Mizoram Statistical Hanbook 2012 pan Mizogam sungah 2011-12 academic sessionah sanginn - 3,927, sangsia 24,881 leh sangnaupang - 3,36,383 om hi. Sanginnte pen University - 2, College - 22, Higher Secondary - 113, High School - 543, Middle School - 1,383, Primary School - 1,855 leh siamsin theihna mun dang 9 om hi. Sangnaupangte lakah Primary sinlai tampen a - 1,64,272 pha hi. Middle School-ah - 87,726, High School-ah - 48,741, Higher Secondary-ah - 20,250, College-ah - 10,660, University-ah - 3,305 leh siamsinna dangah mi 1,429 om hi.

Ø   Champhai khua sunga kimawlna tualpi kizangpen, Changphut field ah sawt loin kiak-lem (artificial turf) kiphah ding ahihna thu Mizogam kumpi in May 2013 in pulak hi.

Ø   Mizoram Presbyterian Synod nuaia laibu zuakna Synod Bookroom in a baisa kum sungin budget 52,000,000 nei uh a, `  71,600,000 val mu uh a, a khupna uh pen ` 19,622,262 cih thu kiza hi. Tua lak panin ` 3,369,280 pen laibu suakna pana lep (profit) ahi hi. Lai nasepna lamah ettehhuai mahmah uh hi.

Ø   Central YMA in Phunchawng leh Rangvamuala om gamdangmi (foreigner) leh zu zuakte, tua khua pana paikhia dinga a cihna hangin May 17, 2013 ciangin Rangvamual panin inn 33 leh Phunchawng panin inn 95 paikhia cih thu kiza hi.

Ø   May 2013 in Tulsa, USA ah Zomi TV kici, Zopau leh English tawh kal sima thuthak pulakkhiat nading kibawl hi. Hih bang a kibawl pen Zomite adingin khantohna nam khat hi a, contact.zomitv@yahoo.com ah kizop theih hi.

Ø   Organisation for Economic Co-operation and Development in Better Life Index a bawlna uah leitunga gam lungdampen Australia hi a, Sweden, Canada, Switzerland, USA, Denmark, Netherlandsm Iceland leh Englandte in zom hi! (ZBYF Tangko, June 2013)