ZBYF Tangko Editorial (Sept. & Oct. 2012)

ZBYF Tangko Editorial (September 2012)

Tulai leitungah siatna tuamtuam leh haksatna tuamtuam hong tam semsem tawh kibang a, tua bang kawmkalah mihingte in biakna thupingaihsut lo semsem, dau ngaihsut semsem tawh kibang hi.

Zogam sungah zong biakna in mainawt lam sangin kiam lam manawh hiaihiai tawh kibang hi. Pawlpi khat le khat kidona, pawlpi khat sungah zong kithutuaklohna leh kideidanna hong ki-uang bawl semsem tawh kibang hi. Pawlpi pawlkhatte bangin amau upna tawh a kituak lo peuhmah satan pawl bang suaksak nuam zawzenin paikhial lai uh!

Khanlawhna in Zogam hong tuam lai-in, Zomite sungah Pasian nasem dingin mi tampi kuankhia uh a, tuate hangin i minam zong hong nosuakin, Pasian maipha kingah hi ngel ding hi, neih le lam, sum le pai leh pilna siamna lamah naakpi.n kikhangto hi.

Bang hangin pawlpi sungah thanemna, pawlpi sung cidamlohna hong tam hiam? cih pen ngaihsut taak mahmah, ngaihsutsut ding ahi hi.

Pawlpi a khantoh leh a hat nadingin Pasian maipha ngah nadingin nasep mah kisam pen hi. Leitung khantohna pen i uang bawl luat khak ding lauhuai hi. Leitung thu-in leitung ciang bek hong tunpih ding a, Pasian thu in bei hun nei ngei loin, a tawntung ading nuntakna hong pia ding hi.

Tuhun mihingte in sunglam sangin pualam kithupingaihsutzaw a, a kidawk pak thei mel hoihna leh pumpi ci le sa hoihna bek ngaihsutin kinei hi. Ahihna taktakah i thupingaihsut ding taktak pen sunglam sianthona, muanhuaina leh cihtakna hizaw hi.

Pawlpi sung buaina tampi pen Pasian thu hang hi peuhmah lo a, eima mimal, eima innkuan, eima khua leh pawlpi ciang bek ngaihsutna hang leh, makai (zo lo napi a) hih ut luatna hang khawng hi lel hi. Mi pawlkhat pen kamzol tawh makai a sepna uh cing kisa lo-a pulpit tung pan, ‘Kei makai a cing lo khat...’ cici napi, makai in kiseh kei taktak leh pawlpi a taisan ngam khawng zong tuhun Khristiante lakah honpi khat mah om hi.

Tua hi a, a poimawh taktak zaw pen i sunglam nuntakzia ahi hi. Pualam kamzol leh kamsiam bek tawh gengen pen a ngaikhiate adingin cimtakhuai hi. Pasian tungah i hun le vai, ngaihsutnate ap ngamin na sem ni.

ZBYF Tangko Editorial (October 2012)

Pasian hehpihna tawh September 19, 2012 in Zomi Christian Literature Society (ZCLS) leh Zomi Baptist Literature Board (ZBLB) in Zolai Joint Consultation, Champhai ZBC zumah, “Biakna laibute a kicingin neih nading” cih thulu zangin holimna leh kamkumna kinei hi.

Hih kamkumna hunah biakna laibute tawh kisai a kicing, a man tawm leh a hoihzawin neih theih nading leh thu le la (literature) lamah i hatlohna leh khantoh i kisapna thu kilimgen mahmah hi.

Zomite pen a milip zong a tawm lua zong hi lo napi, i lai nasepna i et ciangin hawmthawhhuai mahmah hi. A diakin Zomi tamzawte teenna Kawlgam sunga i lai nasepzia pen i kipuah thak kei leh i minam pen mai lamah minamdangte nuaiah omin, mi nuihsan hi lel ding hi hang.

I kiim i kiangah i sanggamte pen lai lam tawh kisai a khantoh mahmah uh mah bangin khuasak-nuntakzia zong khangto pah uh hi. Minam khantohna leh lai pen a tonkhawm den hi a, minam dinmun a kitheihna pen lai lama a nasepna uh ahi hi. Lai lama i niam mah bangin Zogam sungah pawlpi kikhenna, upna ah kiplohna, nuntak khuasakzia ding (hoih) theihlohna, minam dangte nuntak khuasakzia hoihte zong kithei lo hi.

Zogam sunga i khanmawh bawkpen ‘theihlohna’ hi. Bang hangin thei lo? Lai kisin lo ahih manin a kithei lo hi lel hi. Lai sim a thadah tata a kipilsak hi zawmah lai! A theihlohzia, a theihna a tamlohzia zong a thei lote kisak theihna, thuneihna munah bangci bang mahin khantohna om thei lo hi.

I kiim i kianga i teenpihte, pawlpi khat in laihawm nih le thum nei a, tuate copy 20,000 val ciat bang a hawmkhiat theihden lai un, Zomibup lai lam kipawlna ZCLS in a hawmkhiat laibu pen bu 1,000 val deuh bek kihawmkhia hi. Tua zah bek a kihawmkhiatna pen kua hang ahi tam? Mipi mawhna maw ahih kei leh makaite mawhna? A mawhzaw zonkhiat sese a sawm ka hi kei a, ahih hangin i kietphat nading om hi, ka cihna hi.

Inn hoih pipi a neiin, mawtaw hoih pipi tungah tuangin, i ut bangbangin omin, i deih bangbang zong nei kha thei mah ni. Ahih hangin a bucing khantohna i minam in kisam hi. Tua dingin a kisam mahmah pen lai lama i nasepna tangzaisak a, khantohsak ding ahi hi. Tua liangko pen nang le kei tungah kinga ahih manin neihsa sum le pai, thu le la tawh lai lam khantoh nadingin nasem ciat ni.