THUPHA NGAH MITE

                Zomite in i buaipih mahmah leh i deih mahmahte laka khat pen thupha hi, ci leng kikhial lua lawmlawm lo ding hi. Ahih hangin tua thupha pen koici ngah ding, koici saan ding cih leh koi bangin hong pai ding cih pen ngaihsut luatin kinei lo tawh kibang hi.

                Lai Siangtho sungah thupha a kigente pen nam nih in kikhen thei a,  tua pen, a kimu thei vat lo thupha, mihing sunga om a kilangkhia thei leh, a kimu thei, neih le lam, sum le paite  leh nek le dawn hauhnate ahi hi.

A kimu thei lo, a kilang khia thei thupha

                Matthai 5:3 – 12 sung i sim ciangin thupha tawh kisai tampi tak kigelh a, tua a kigente pen mihing sunga om, a gamtatzia uh pan a kimu thei, a kilangkhia thei thupha tuamtuam ahi hi. Tua a gen thupha ngah mite pen :

1.     Kha thu a zawngkhal a kisate

2.    Dahin thumin a tau mite

3.    A lungnem mite

4.    Pasian deih teng sep ding a hanciam mite

5.    Midang a hehpih mite

6.    Lungsim  takpi tawh Pasian a zong mite

7.    Kilem nading deihin a hanciam mite

8.    Pasian deihna bangin a gamtat manin bawlsiatna leh gensiatna thuak mite ahi uh hi.

                Hih atunga thupha ngah mite i et ciangin, Pasian deihna banga gamta mite ahi uh hi. Neih le lam, sum le pai, nek le dawn a hauhloh uh hangin hih banga gamta mite pen Lai Siangtho in ‘thupha ngah mi’ ci hi. Mihing ngaihsutna leh muhna panin a zawng mahmah tawh kibang uh a, ahih hangin Pasian muhna panin hau mahmah uh cihna hi. Thupi mahmah hi.

Thupha ngah minam

                Late 33:12 sungah, “Topa, Pasian-a a nei minam, ama luah ding teelna a ngah minam pen thupha ngah ahi hi” ci hi. Zomite pen Topa, Pasian-a a nei minam taktak i hi hiam? Pasian a nei miman i hih leh thupha i ngah taktak hiam?

                Zomite pen ‘thupha ngah minam’ kici gemgam napi, bang hangin Zomite teenna khempeuh mial hiam? Zawng mahmah i hiam? Lai thei lo tam i hiam? HIV/AIDS, bum leh dawi-ai i teenna mun peuhah tam mahmah mawk hiam? Tua bang pipi mah tawh thupha ngah minam kicici lai ding i hiam? Ngaihsuthuai hi.

                Lai Siangtho sunga, ‘thupha ngah minam’ a cih tawh i kibang diam? Kilem nading deihin a hanciam mite thupha ngah ci napi, Zomite lakah kilem nadingin a hanciam mi bangzah om? Kilem nading a bulpi pen hi leh a kilawm mahah pawlpi pen kilemlohna a piangsak pen hi mai lo hiam? Pawlpi kim ki-etphathuai lo hiam?

                Pasian a nei minamte sep ding bang i sem hiam? I minam sungah Khris lim le meel a kilang takpi mah hiam?  Sawma khat leh cit piakna tuamtuamah Ama mite sep ding leh bawl ding bangin i gamta hiam? I minam sungah Pasian adingin gammialah mi bangzah kuan a, pawlpi kimin Pasian adingin na bangzah sem i hiam? Pasian pawlpi kici napi, Pasian thu leh Pasian deihna a kan lo pawlpi bangzah i minam sungah a om tam? Tua banah bangzah a piang lai tam?

                Inn hoih lah nei lo, pilna siamna lamah cileng lah mi ban tuan lo, a kilem thei lo leh mi hehpihna a hau het lo minam khat in bangci thupha ngah minam kicici thei ding? Maizumhuai hi lo hiam? Tuate i neih nadinga sep le bawl ding omte i sep ngap, i bawl ngap takpi mah hiam?

Lametna thak

                I gam leh minam in thupha a ngah theih nadingin lametna om lai hi. Topa zongin, ama lamah kihei kik ni. I mawhna puansan a bat hangin vuk bangin hong ngo ding a, si bangin a san hangin tuu mul bangin hong kang ding hi (Isai. 1:18).

                Tua banga i mawhnate kisikin, amah i zuat kik a, utna lungsim neiin thu i man nak leh i gam hong damsak kik ding a, cihtheihna, neih le lam, hauhnate hong pia-in, i gam sung a piang na hoihte hong ne sak ding hi (Isai. 1:19).

                Pasian in thupha a piak mite a gam sung pana pian na hoihte nesak hi. Israel minamte en le hang, a teenna gam uh pen gam keu leh tui tamlohna ahi hi. Ahi zongin, Pasian in a leitang pana piangte ne dingin thupha pia hi. Nek le dawn ding kitasam lo bek tham lo, gamdangah khakkhia thei mawk uh hi. April, 2013 bei kuanin Israel gam sim lam tuipi nuaiah Gas tampi tak kimukhia thak cih thu kiza hi (Sournce : Chanchinthar fb). Tua Gas in Israel gam pen kum 70 sung vaak zo ding kici hi. Tua banah misiamte in a gen uh ciangin, hih banga Gas omna munah peel loin Oil leh petroleum om hamtang ding hi-in gen zawmah lai uh hi.

                Israel mite, Pasian in thupha pia a, a gam uh a leitang a hoih lo tawh a kibat hangin a minam uh adinga kicing tua munah om hi. Tuate tawh kivaak-in, nuamsa takin khuasa uh hi.

                Zomite zong, Pasian thupha piak taak a i nuntak ciangin, i gamsung pana piang na hoih leh manphate pen Pasian in hong zeek sak lua mahmah ding hi cih ka um hi. Gullu Mual khawng Zomite adingin hong zangsak ding a, Lamka gama Oil & Gas om a kicicite ii manphatna khawng zong Zomite mah hong zeeksak ding hi.

                Tua banah, i gam sunga etlawm mahmah Len Nupa khawng gamdang khualzin mite muhnop dingin mipil misiamte zangin hong zemsak in, tuate tungtawnin Zomite tungah thupha hong tung ziahziah ding hi. Tua banah, tuhun a kimu nai lo, leitang hauhna, oil & gas tuamtuam zong Zogam leinuai dimin a om phitphetna zong theihloh hi.

                Pawlpi leh kipawlna pawlkhat in, Zomite a bucing khantohna i neih theih nading leh thupha ngah minam suah thei nadingin leitung mun tuamtuam panin nakpi takin mapang uh ahih manin  lungdamhuai a, lametna thak hong neisak hi.

Kingaihsun kik dih ni

                Tu globalization hunah minam khat pen gam khat sung bekah omkhop theih hi lo a, mun tuamtuamah nasepna tuamtuam nei a kikhen pen a kul mah ahi hi. Kumpi nasem, Pasian nasem leh na dang tuamtuam semin minamdangte kiang leh gamdangah pailoh theihloh hi. Tua pen tuhun ciangin a hi ding mah ahi hi.

                Tua laitakin i phawk mahmah dingah, mi lakah i om ciangin i minam hihna, i ngeina, zia le tong mangngilhin minam dangte aa i zui pah pen hoih lo a, Pasian deihna zong hi lo ding hi. Gitta khat nangawn lei lakah a kiat a thei Pa leh, i sammal zah nangawn a ciamteh Pa (Mat. 10:29-31) in i minam mangthan ding pen phal het lo dingin ka um hi.

                Pasian in thupha a piak Israel mite pen, a omomnna uah mite tungah leeng uh a, mite simmawh luat dingin om lo uh hi. Hazatna hangin a langbawl mi a om hangin, a minam uh khangto semsem hi. USA gam sunga om Israel minamte hangin USA in Israel gampen hut cihtakin hun mawk hi. USA President kiteelna-ah zong hih Israel mite deih lamlam cing hi, cih zah dongin amau gam hi lo ah zong nasem thei uh hi.

                Tua pen thupha taktak ahi hi. Tuni-in leitung gam tuamtuama om Zomite in i omomna munah, tua gam pana piang na hoihte i ngah theih nadingin hanciam ni. Israel mite mah bangin i omomna panin i minam khantoh nading, i gam khantoh nadingin puahin zuun ni. I minambup pangkhawm ni. Semkhawm ni. Tua ki-itna hangin Pa Pasian lungdam ding a, thupha hong piak behbeh ding hi.

Thuhialna

                Israel mite in Pasian thu a manloh uh ciangin minam dangte tungah Pasian salin puak kawikawi hi. Ahi zongin amah lamah a kihei kik uh a, amah a zuat kik uh ciangin thupha namkim tawh phungvuh zel hi. Tuni in Zomite zong Pasian in amah i zuat a, utna lungsim tawh ama thu i man leh thupha hong pia ding a, i gam hong damsak in, a sung pana piang na hoih nonote hong zeeksak ding hi. Tua thupha hong piak hun ciangin, nidanga a manphatna i theihloh na tuamtuamte zangin thupha hong pia ziahziah ding hi. Tua hi lo a, i lungsim i khauhsak a, amah i lehdo leh i minam pen hong vatmai lel ding hi. Pasian lungkimna banga na i sep a, i nuntak ciangin Pasian in i minam thupha hong pia ding a, i gam sunga piang thuphate hong zeek sakin, i gam sunga na hoih nonote ei khut sungah hong koih ding hi.

Daihna Cabin || 7.5.2013