ZBYF Tangko Editorial (July & August 2012)

ZBYF Tangko Editorial (July 2012)

                November 6, 2012 a US Presidential Election dingah party nihte campaign nasia semsem a, Democratic Party pan president semlai Barack Obama leh Republican Party pan Massachusetts Governor lui Mitt Romney-te in gualzawhna ngah sawmin panla mahmah uh hi.

Candidate nihte in a malaksawmdan,geelna, a ngaihsutzia uh leh saanzia uh tampi pulakkhia uh a, tuate lakah Obama in neih kibang(nu le nu, pa le pa) kiteena (gay marriage) hoih lo a saklohna thu gen hi.

Hun khat lai panin Presbyterian Church of USA in neih kibang kiteenna pen a pawlpi sung uah phal uh a, tunaiin tua bang mite siampi za nadong ngahsak uh ahih manin a pawlpi sung kibuai-in, Mizoram Presbyterian Synod nuaia vaihawmna sangpen i zom Synod Executive Committee in PCUSA tawh kizop nawnloh hoih sa uh hi.

Lai Siangtho sungah, Pasian na a sem lo minam leh kumpi gam beimang ding a, tua minamte kisia maimang ding ahihna thu kimu hi (Isaiah 60:12).  Tua laitakin, Pasian pen Pasian-a a nei minamte pen thupha ngah minam ahihna thu zong na gen hi (Late 33:12).

A zuau ngei lo Lai Siangtho sunga kigelh bangin, hun khat laia leitung a gam khangto - USSR, UK, USA i et ciangin, Pasian a neite mah a khantohna uh zong kipzaw hi. Hun khat laia Hitler makaihna nuaia Germany thahatdan leh Japan kumpi Hirohito nuaia Japan thahatdan khawng i ngaihsut ciang, tua huna Pasian nei lo leh zahtak lo-a a kalsuanna uh pen amau ading a siatna hizaw hi. Tua ahih manin tuhun ciangin hih gam nihte pen kilemna a deihpenpen gam suak mawk uh hi.

Tuhun a gam khangto penpen nih, India leh China zong mihing in sep a theih ciang tawh a kalsuanna pen Pasian lungkimna bang ahih kei leh, gam sungah kikhenzakna leh a hoih lo tuamtuam om ding a, puksia maimang veve ding hi.

USA zong, hun paisa in Pasian lungkim semin, Pasian a nei minam hi uh a, Ama deihna tawh kituakin na sem uh ahih manin leitung a gam hat leh mite teennopna pen gam suak hi. Ahih hangin, tua khantohna leh thupinate pen Pasian deihloh nasepna leh Pasian lungkimlohna nasep tawh a kizop khak leh Pasian in sepmawh nei lo hi.

ZBYF Tangko Editorial (August 2012)

Pasian kithuahpihna tawh ZBYF Tangko a hunhunin kisuaksak thei zel ahih manin lungdam mahmah hi. Laibu / magazine pen a bawl ding mi a kisap mah bangin a sim ding mipi zong kisam a, a bawlte leh a simte manphatna kikim lian hi.

ZBC - E.C vaihawmna thu ka muh ciangin lamdang ka sa hi. Bang hiam cih leh, ‘ZBYF Tangko late (subcriber) tawh kisai khua pawlkhatah a la zah sangin copy tamzaw kikhak’ cih thu hi a, lamdang ka sakna hang zong bang dang hi loin E.C ciang liang tut kul loin vensak theih luat khat ahih man ahi hi.

Tukum sungin a la thak kibehlap bangzah hiam om a, lungdam hi. Tua kawmkalah hih bang thu hong om pen dahhhuai mahmah hi. Lai nasepna pen uk luat man leh sepnop luat mana sep theih pongmawk hi lo a, a sim dingin zong sawlzawh thu tawh sim theih hi lo hi. I gensa mah bangin, minam khat lai lam a khantoh nadingin a lailam saite leh a mipite sungah thalawpna leh kipiakzawhna kikim lian ding hi. Tua bang hi lo a, laibu bawl tam mahmah, a sim om lo leh, lai sim nuam mahmah, sim ding om lo cih pen ahi thei lo thu ahi hi. 

Ahihna takah Zolai khantoh nading bel khatveivei lamethuai het lo hi. Zolai tawh kigelh monthly magazine khat le nih (a thu a hoih kei zongin) bek om zong copy tawmcik bek zong kihawmkhia zo lo cih zong bel i milip ngaihsutin a dahhuai mahmah hi pah hi.

Tuhun ciangin lai siam, degree sang pipi nei napi, lai sim uk het lo tam mahmah hi. Tua pen bang hang hiam cih leh, i lai sim laiin laisimbu (text book) bekbek kisim a, a dang sim ding nu leh pate in hong ngaihsutsak lo uh ahih man hi kha ding hi.

Deihsak tak leh thalawp taka (a lawp lua lote zong) Zolai itna leh meetna khat beek ngah ding lametna tawh hong simsak khempeuhte tungah lungdam thu kong puak a, i gensa banga copy hawm zawhloh liang ding hong kikhak leh hehpihna tawh editor-te, ahih kei leh Youth Secretary tungah kizaksak theih hi leh lungdam mahmah ding hi. A/C in budget bawla a ngaihsut ahih manin, vaihawm kik theih lua peuhmah ding hi.