ZBYF Tangko Editorial (April 2013)

March 16, 2013, Nino ni; Kiteen zawh kum 50 cin pawi a bawl ding om ahih manin lai hawma ka vakna mun inn khata ka om laitakin ka phone hong ging a, ‘kua hi peuhmah ding hiam’ ciin ka lak leh,“Na laibu ding Sia Job Thawngno in hong puasakin, nong la man diam?” hong ci hi. Ka lametlohpi a lungdamhuai thu ka za vat hi.

Ciahin, ka kithawi khit ciangin ka pai pah vingveng a, laibu hoih nono 5 leh ZOLUS Award a ngahna ama tangthu tom, a nuntakzia leh a nasepzia kigelhna hi a, tua zahzah hong khak mawk pen lamdang ka sa hi.

Inn ka tun ciangin a khihna buangnai phelin, ka veel pah samsam a, tua hong laibu khakte lakah, laimai 505 a pha - Cope Topa Leh Mission, laimai 200 a pha - Dr. Enno’ Sermon & Thusun, laimai 312 a pha - Topa Lenggah Huanah Kum 43 Sung Prof. Rev. Dr. Simon Pau Khan En, Ph. D.. cihte pen a thu mapi ka sim pah samsam hi. Tua ciang ‘Sia Enno’ tangthu pan sim kipan ning’ ciin Sia Enno tangthu ka lumlet pah a, tha hong pia mahmahin, ka meetpih mahmah pah hi.

Sia Job Thawngno pen Zomi, Tedim kama zangte lakah Laibu tam bawl pen cih pahtawina nihvei a ngahna thu pen mi tampi theih ahi hi. Amah in hih bang laibu hoih hong bawl laitakin, a pilpen man, a hauhpen man, hun awng a neih pen man hi het lo cih ka thei a, mi citak, mi kuhkal, minam a it mahmah ahihna thu ka phawk hi.

Sia Simon Pau Khan En’ tangthu leh sermon bu nihte’ thumapi leh a laibu sung ka sim ciangin hih laibu hong piankhiat nadinga a mapang Dr. Go Chin Zam’ manphatna ka phawk hi. Amah in hih laibu nihte’ bawl nading a sum bei teng sikh ahih manin hih bang laibu manpha hong piang thei ahi hi. Laibu nihvei ka bawlna lakah, deihsakna tawh hong leisakte, hong zuaksakte zong manpha veve napi’n, a khetkhiat nadinga hong panpihte  hanga bawlzo ka hihna ka ngaihsut ciang, Sia Zambawi manphatna leh a tungah Sia Job Thawngno lungdam ding dan ka theihpih a, Zomibup in lungdamkoh dingin kilawm ahi hi. Keima mimal in zong lungdam ka ko pah hi.

Zomite kikhangto mahmah ta hi. Zomi leh Zomi, makai masa leh mipil misiamte pahtawidan i siam ta hi. Tua ding mah ahi hi. Hun khat laiin Dr. Neng Ngaih Lian in phamsa Rev. Khup Za Go tangthu laibu in bawl ngei a, Rev. Suan Khen Mung in Rev. Dr. Kam Khaw Thang tangthu mah laibu in bawlkhin hi.

Siapa laibu hong khakte lakah minambup adinga mipil leh siam khat mah ahi, Myanmar Baptist Convention sunga Zomite laka General Secretary a sem masa pen, lai hilh dinga mipil gamte’ in sap zelzel uh, Myanmar Institute of Theology a Principal a semsa, Zomi Baptist Convention ah General Secretary a semsa, Serampore College (University) ah B.D a sin laia a sinna University a mark tam a ngahpen a kiciamteh - Dr. Ennno tangthu, a haksatna tuahte, a lai simna leh a nasepzia kician taka Zomibup sim theih dinga laibu hong bawl mawk pen, a thupina tuhuna mite in i tel kei leh zong tuzawh a sawt loin a kipilsak ahi lo, mi pil taktak khangthakte in manpha hong sa mahmah ding uh hi.

Zomite in a bucing khantohna i neih nadingin, ei Zomite mah a kisam i hi hi. I mipil misiamte thu leh la i zuihsiam kisam hi. Amau mah i pahtawi a, i thupi ngahsut kisam hi. Tua mah bangin, i ngeina, i pau i ham, i zia i tongte i kepbit, eimah mahmah in i zat, i zuun kul hi. Bawlhuai lua Dr. Enno’ tangthu bu leh sermon & thusun bu hong kibawl khiat pen mainawtna khatin ka tuat a, mailamah zong a sermonte kaikhawmin laibu a bawl ding maban om lai cih thu Sia Job Thawngno in a gelhna ka muh ciangin, Zomite zong kipahtawidan siamta, ki-itdan leh sepkhop dan siam ta ciin ka ngaihsun a, Dr. Hau Za Cin, Phuitong Liim kammal kawm pak leng, “Zomite maban limci semsem!”