ZBYF Tangko Editorial (Jan.-Feb. & March 2013)

ZBYF Tangko Editorial (Jan. & Feb. 2013)

 Kum 2013 ZBYF Tangko masapen a sim mimal kim na khut uh kong len hi.

Kum 2012 December kha in lametna lianpi tawh Tangko mangpha ka khak pianpian leh, lemetlohpi in kei tung mahah hong kisuan kik ahih manin kum 2013 sung pen i Tangko khawm kik ding hi.

Tukum sungin Tangko sungah, nidanga a kikoih ngei lo ZBYF makaite tangthu tom a banbanin (issue kik panin) suaksak kisawm a, ZBYF makaite in zong hong hanciampih dingin kingen pah hi.

Bible quiz/question (N. Ed.), puzzle (Jt. Ed.), paunak/thupil leh a khiatna (Ed.)... cih bang zong koih theih kisawm hi. Mihing geelna hi phot a, a tangtungsak ding Pasian bek ahi hi.

Kum danga i koih zel ahi - leitungbup thupiang tuamtuam, Zomite mapanna, cidamna, carrer guidance, leitung thu leh kha thua khantoh nading thu tuamtuam zong khasimin a omdenloh hangin kikoih zelzel ding hi.

Tua banah, kum danga a kikoih zel ahi ‘Kua te’n bang gen’ pen pawlpi sunga phattuam nading leh thu manpha ahih kei leh ‘kisuaksak nawn kei leh bang a ci tam?’ cih pen Tangko vaisaite ngaihsutna ahi hi.

April 5 - 7, 2013 sungin Champhai ZBC biakinn ah ZBYF & ZBWS Silver Jubilee pawi kikhaam ding hang a, tua hun tawh kituakin ZBYF Tangko zong nidanga bang loin ‘Special Issue’ bawl kisawm hi. Tua huna suaksak dingin thu khatpeuhpeuh a gelh nuam i om leh gelh theih den a, ahih hangin hong kikhak khempeuh kisuaksak ding cihna bel hi tuan lo hi.

ZBYF Tangko Editorial (March 2013)

Mi tuamtuam, ngaihsutzia kibang lo pipi, kamsiam dan leh khuamuhna kibang het lo, pilna leh siamna, theihna leh neihna kibang lopipite in kum 2000 val bang a genkhit uh, Lai Siangtho sung thu pen gen baih a sa het lo tampi laka khat ka hih ding kilamen ing.

Kigen tamluata in khawl bawl mai ni, ei sanga mi pil leh siamzawte in tam gen luata, cih theih hi lo a, leitung bei dong mah kigengen ding Lai Siangtho sung thu, Pasian thu pen eima theihsiamna leh thalawpna ciangciang tawh gengen ding hizaw hi.

Makaite deihsakna tawh January 25 - 27, 2013 sungin Vaikhawtlang khua ah Hnahlan Area BYF Meet ah thugenna hun li (4) vei ka zang thei a, baih ka sakloh hangin hampha ka kisa hi. Tua huna ka gen thute pen gelhkhia in, Tangko sungah kikoih leh ciin ka ngaihsun a, ka gen bangin ka gelh leh Tangko sungah dim dektak mawk ahih manin thului (article) bangin a tom thei bangpenin ka gelh a, a banbanin hong kisuaksak ding hi. A kician zo diam maw? Sim siam kisam kha ding hi!

Hnahlan Area sung BYF khangnote thupi ka sa a, khangto ka sa hi. Kimawlna tampi om a, tua kimawlna hun sungah panlak luatna hang leh khua lungsim liatsak luatna hang a buaina om vet lo hi. Lungsim picing tak tawh - a hat lote in lelhdan siam uh a, a zote in zawhdan siam uh hi. Mi pawlkhat in, “Zomite i kimuhkhop ciang buaina bawl omden ahih manin kimuhkhopna zong bawl thalawphuai lo hi” a cih uh pen, tutung ABYF meet zanga ka paina panin hih pen tuhun Zomite nuntakna ah maan nawn lo hi, ciin ka mit mahmah tawh ka mu hi. A khangnote hoih man maw, ahih kei leh khangno makaite in makaih siam..

Leitung mun tuamtuama A 65-veina Zomi Nam Ni zatna thu pen mai kha ciang kikoih leh hoihzaw dingin lamen ka hih manin mai kha cingin (ka mangngilh kei leh!) koih kong sawm ding hi.

Joint Editor leh News Editor in lunggulhna bangin tha hong saan uh ahih manin lungdam hi (puzzle & Bible quiz), paunak leh a khiatna bel ta nawn lo!