ZBYF Tangko Editorial (Nov. & Dec. 2012)

ZBYF Tangko Editorial (November 2012)

Leitung a mihing om masate pan kipan, tuhuna mihingte dongin geelkhop, sepkhop, kithuhilh, kisinsak, leh kimakaih kisam tawntung a, la phuakte in, “Mihingte lobuang sinsak kul lo hi” a cih pen maan mahmah hi.

Ahih hangin tuhunah mi pawlkhat pen Arabic paunak a, “A genpa lamah na bil dawh inla, a genpa hi se kei in” a cih tawh kiletngatin, midangte thugen peuhmah za nuam loin, mi hilh theih leh mite hilh phakloh hi a kithei in, midangte a hilh ding bekbekin kingaihsun pongmawk uh hi.

Tua bang mite pen tuhun ciang a kibuaipih leh a cimtakhuai hi nuam mahmah uh hi. Thugen ding a kilawm leh lawm lo, gen nading mun leh hun zong ngaihsun lo a, thu a mot gente hi nuam uh a, amau lamah dimlet hi a kithei-in, a dimletna uh hong pulakkhiat dan tawh kisaiin ciamtakhuai mahmah thei zawmah lai hi.

Lawm le gual kamkumna-ah a kam tam pen maw na hih, a kam tawm pen? A kam tampen na hih leh na thugen pen na lawm le gualte in thupingaihsut maw thupingaihsut lo? Genkhia dingin na lawm le gualte in hong lamen uh hiam? Na thugen na theician taktak hiam? cihte pen ngaihsuthuai mahmah hi.

Misi inn, mo pawi, lungdamkohna hun, kikhopna leh hun zatna khatpeuhah la sak a nop mahmah laitaka thugen ding a thalawp sese mi bangzah hiam om a, tuate hangin hunzatzia nuam lo gawp thei hi.

Tuhun ciangin vai bek a hawm tam lua a, a zui ding kimu zo nawn lo hi. Tua mah bangin, thugen mi tam mahmah napi a zui dinga thu a ngai tam lo hi. Tua in innkuan sung, khua sung, pawlpi sung leh gambup nadong buaisak mawk hi.

Bang bang ahi zongin, thugen na thalawp mahmah a, vaihawm na thanuam mahmah laitakin, tua na veina pen na lawhcinsakna-in bang manphatna nei, na thugen hangin mite in phattuamna a nei takpi mah uh diam? cih pen na ngaihsut phat mahmah ding ahi hi. Tua ahih manin na thugen ding pen; tua munah gen dingin na kilawm mah hiam? Gen nadingin hun hoih ahi hiam?

ZBYF Tangko Editorial (December 2012)

Hunte pai hanhanin, kumbul a i ki-apna bang lian leh i deih bang lianin hun i zatloh hangin, kum 2012 a beina kha mu thei a Pasian in hong kepna hangin mi hampha khat bel kihi limlim hi.

Kum nih (Jan. 2011 - Dec. 2012) sung tawntung tatsat loin khasimin Pasian leh note kithuahpihna tawh ZBYF Tangko vaisaite (vei lamate) in a hunhunin ZBYF Tangko hong hawmkhiaden thei ka hih manun ‘lungdam’  cih lohngal gen ding tam lo hi.

ZBYF Tangko a kipatcil pana a gimpih, a tawlpihte khempeuh zahtakna ka pia a, khua tuamtuama ‘agent’ khempeuhte kipiakzawhna leh hanciamna zong thupi-in, a sep gah uh tung lama Pa in ciamtehin, thaman a piak ding ka lamen hi. Tua banah ZBYF Tangko hih ciang a kalsuan theihna pen sum le pai tawh a hanciam mite hang leh, thului, thuthak, leh thugelh tuamtuam a puakte hang hi a, a picin semsem nadingin laigelh mite in gelh zelzel-in, a gelh nai lote in zong mailamah i hanciam kisam mahmah hi.

Kum thakah Editorial Board thak tawh ZBYF Tangko a kalsuan ding ka lamen hi. A laidal leh a kihawmkhiazah a khantoh mah bangin, mai lamah (tuate zong khangto veve in) a kawm (cover) a etlawmzaw a bawl ding zong ZBYF Tangko khantoh nading a thupi khat in ka tuat hi.

Editor kum nih ka sep sungin - gelhkhialh, sepkhialh, a kilawm lo kammal tampi om (ding) a, tua banah mi’ heh nading a thu kigelh kha a om leh tua a sukkhak mite’ in nong maisak ding uh kong ngen pah hi Tua banah, ‘tua ci zaw leh hoih ding hi’ ci-a deihsakna tak tawh a kilawmzaw ding thu hong hilhte, thului leh thuthak hong puakte, hong hawmkhiat sakte khempeuh tungah lungdam kong ko hi. Pasian in na gim na tawlna uh thupha tampi tawh hong phungvuh ta hen..