Lai Siangtho a i muh mah bangin Job pen Pasian a zahtak mahmah mi hi a, gamtat hoih lo peuhmah tawh a kipel mi ahi hi. Hih bang zahta a mihoih himah leh Pasian in ama tungah a muanhuaina a kitel nadingin ze-etna, Satan bawlsiatna thuak phal hi. Job haksatna thuakte pen leitung mite’ ngaihsutna panin thuakzawh ding zong hi kei mahleh, Job in hih a thuakna/gimnate hangin Pasian tungah a muanhuaina kidawksak a, ze-etna thuak zo hi.
J. Malsawma, Mizo Writer khatin, “Haksatna pen mihing nuntakna tel nading in ahoih pen ahi hi,” na ci hi. Amahmah in, “Haksatna zawhdan pen thuak ahi hi,” na ci sawnsawn hi. Tua mah bangin Job in haksatna, ze-etna a thuak pen ama nuntakna/muanhuaina theih nading a ahoih pen hi a, tua haksatna pen thuakna tawh zo hi.Hih Job nuntakna pan sin ding tampi tak om a, tua laka pawlkhat kong gelhkhia hi :
A neih leh lam, atate Pasian piak ahihna Job in phawk
Job pen Nisuahna gam sungah a haupen khat ahi hi. Amah in tapa sagih leh tanu thum nei a, tuu tul sagih, kalaoh tul thum, bawngtal kap zanga, leh nasem tampi nei hi. Tuabang a neih leh lam, a tate thakhatthua hong sih khit uh ciangin Job in, “Ka nu sung panin guaktangin ka suak a, guaktang mahin ka ciah kik ding hi. Topa in hong pia a, Topa mahin hong la kik hi. Topa’ min kiphat ta hen,(1:21)” ci thei lai hi. Hih a neih leh lam, a it mahmah atate Job khialhna hanga a si hi lo a, ahi zongin Job in Topa mawhsak lo hi. Hih i leitung nuntakna-ah i innkuan sung, i neih leh lam, i sanggam, i tanau, meltheih te’n hong paisan ciangin Job nuntakna panin cihtakna sinin, kip tak leh muanhuai taka Pasian mawhsak lo a i zuih theih nadinga lam hong lak, etteh ding (model) hoih mahmah ahi hi.
Job in mihing nuntakna tel
Job in a neih a lam leh a it mahmah a tate’n a sihsan khit ciangin Pasian taisan lo ahih manin Satan tung pan ze-etna lian mahmah thuak kik hi. A khetul pan a luzang dongin a kihhuai meima thuak hi. Job in, “Zan thapai-in ka guh sung na a, hong pet tawntung natna dai ngei peuhmah lo hi, (30:17)” na ci hi. Tua ahih ciangin hih a thuak meima natna pen na mahmah ding cih kithei hi. Tua banah hih bang pumpi natna a neih banah, zana a ihmut ciangin zong mang hoih lo pipi man a, “ ‘Lum leng nuam ding a, ihmu leng phatuam ding hi’ ci leng lah, a lauhuai mang nong mansak a, a lauhuai maangmuhna tawh nong lausak hi, (7:13-14)” na ci hi. Hih bang zah donga haksatna thuak pen haksa mahmah ding hi. Tua bang a thuak laitakin a tel mahmah om hi; tua pen mihing nuntakna tom mahmah a, lungkhamna tawh kidim, paak bang a a vul kik pah leh, ni liim banga a pai hanhan ahihna ahi hi.
Kaphleia in, “Haksatna i tuak ciangin ‘ka ui ka ak’ hong ci nuam zong om kei” acih mah bangin, Job in zong haksatna a thuak ciangin a sanggamten taisan a, amah a theisate kiangah khualmi suak a, a beh leh a lawmte beimang a, a inn a tungzel a zin te’n zong manggilh uh hi. A zi nangawn in a gimnam thuak zo lo a, a sanggamte in zong naih nuam lo in, naupangte nangawnin simmawh uh a, mi in a muh uh ciangin nuihsan uh hi. A it alawmte in zong mudahin langbawl uh hi. Tua bang teng leitungah om ahih lam Job in tel mahmah hi. Haksatna a thuak ciangin, amah a panpih ding mi a om loh lam leh, amah a panpih ding Pasian a om lam tel a, Pasian bek muan tak ahih zia phawk kikkik hi.
Job in ama hoihna pulak
Hih bang haksatna Job in a thuak ciangin bang hanga hih bang liang thuak a, sep khialh, bawl khialh bangmah a neih loh thu Pasian kiang ah pulak ngam hi. Pasian kiangah a dahnate pulak a, leitungah hih zahta a a thuaknate na sa lua ahih manin a sisain a piankhiat loh na sa mahmah hi. Pasian kiangah, “Ka mawhna ka khialhna bangzah pha ahi hiam? ka mawhna ka khialna teng hong thei sak in,(13:23)” ciin dong hi. Tulai i Khristian nuntakna ah Pasian in mimawhte ngai cih manin mi pawlkhat in mawhna bawl sawm hi. Pasian kiangah i hoihnate pulak ding hi leng, bang zah pulak ding i nei ding hiam? Hoih lohna teng gengen a, hoih a sawm tuan lo i hih ding lauhuai hi.
Job lawmte Elifaz, Bildad leh Zofar in a thuakna pen tanglai amau’ biakna lungsim puakzia tawh kizuiin na genpih uh a, Job mawhsak in, Pasian a seelna leh mawh a kisak lohnate tawng uh hi. Job in hih a lawmte’ mawhsakna na sa mahmah a, “Leitung aw, aman loin kei hong kibawlna selcip kei in! Thuman deihin ka kikona ka aw ging daicip sak kei in,(16:18)” na ci hi. Thuman a deih mahmah ahihna zong hong kilang hi. Job in ama hoihnate pulakin thei hi. Mite mawhsakna leh Pasian tungah a phun hangin, “Kei adingin ading ding a hong panpih ding mi khat vantungah om hi,(16:19)” na ci veve hi. Tua hi a, Job in ama nuntakna-ah hoih lohna gen ding a om lo zah dongin nungta a, Pasian deihna leh Pasian muang takin nungta hi.
Job a upna-ah kip hi
Job in aneih a lam, a it mahmah a tate a taan khit ciangin, ama pumpi mahmah-ah haksatna lianpi a thuak ciangin ama zi mahmah in a Pasian samsia a, si mai dingin na hanthawn hi. Tua bang ahih laiin Job in a zi kiangah numei haite bang a pau lo ding leh, Pasian tung pan hoihna tampi sang a, siatna zong a san ding ahih thu hilh thei lailai hi.
A lawm thum te’n Job mawhsak a, ahoih lohna gen sawm uh a, haksatna a thuakte pen ama mawhna hang hi, na ci uh hi. Tua bangin amah a mawhsaknate uh a man lohna Job in a tel banah, a lawmte tawh a kiselna a ngai a kiang vua om Elihu in zong na tel mahmah hi. Tua bang a a lawm thum te’n Job a mawhsakna hangun amaute tungah Pasian heh a, amaute mawhsak hi. Job pen a lawmte cihna lamlamah suk-hoi to-hoi lo a, a upna kip hi. Tulai i Khristian nuntakna-ah haksatna/natna i thuak ciang, ahih kei leh buaina bang hiam i thuak ciang, tua bang na cih loh man hi, tua ci bangin ci le cin dam ding hi teh.... cih bangte panin Job nuntakna ah etteh ding tampi tak om hi.
Thukhupna
Job nuntakna, haksatna a thuak laitaka a lunggim ding dan pen ngaihsut pak sangin nasia zaw ding hi. Hih haksatna a thuak laia Job nuntakna pen Sehnel gam keuna mun, tui om lohna mun a dangtak/tuiduh a nakpi a kiko hangin tui a om thei lo tawh kibang ding hi. Haksatna a thuak ciangin a kikona Topa in dawng pah lo a, thuakna tawh zo hi. William Shakespere in “Haksatna/kamsiatna Uiphuk banga melsia in zong suangmanpha na kem thei veve hi,” a cih a maanna hong kilang a, ze-etna pen ama ading a suangmanpha ahi hi. Tua bang teng a thuak khit ciangin, “Nidangin mi genin nang kong thei a, tuin a takin kong mu ta hi, (42:5)” na ci thei lailai hi. A upna kip takin len ahih manin Satan in susia zo lo a, Pasian in ama a a neihzah nih, neih leh lam guan hi. Tuu tul sawm leh tul li, kalaoh tul guk, bawngtal kap tul khat, leh a la a pi tul khat leh, tapa sagih leh tanu thum mah nei kik a, a tanute zaha melhoih leitungah numei dang khat zong om lo hi. Job bangin haksatna, ze-etna i thuak ciangin a kip dingin Topa’n a simkha mimal kim thupha hong pia ta hen! AMEN
No comments:
Post a Comment