PHAWK IN

Mimal ah :
I nuntakna i tel ding kisam hi. Mihing i nuntakna ah i hihna, i sepding leh kalsuan zia ding i theih loh manin kimaizumsak in, kiniamkoih in miten hong simmawh ding zah dongin ki-om thei hi. Naupang khat in a pa khualai a Hakkol pua a nasem a muh ciangin a lawmte kiangah, “Hih pen ka pa hi,” zong ci ngam lo a, a kitheih mawhbawl hi. Tua in a ma hihna, bang ci bang innkuan pan khangkhia hiam cih kithei lo hi. Amah sang a hauzaw, a pilzawte bangin om sawm a, tua pen amau innkuan in hih thei lo ahih manin, mihaute bang a nuntak a sawm ciangin maizumna ngah lawh hi.

Mihing khat a i piankhiat ciangin hihna tuamtuam kinei ciat hi. Pawlkhat te’n kumpi na semin, khenkhat te’n sum zongin, lo nasepna leh atuamtuam i nei ciat hi. I hihna, i sep ding i manngngilh ciangin vai hong buai hi. Naupang khat a Siate’ thuhilhna ngai nuam loin, amah in a siate thu hilh sawm leh a hi thei lopi khat hi ding a, ama hih na thei-in hoih takin siate thu ngai leh, ama adingin a nahlawhpek zaw ding hi. Zum nasepna ah Choukidar in a tunga Director hiam Officer khat hiam a khut nuaiah koih sawm leh a hihna a thei lo hi ding a, mite’ nuihsan in om lel ding hi. Pastorte, pawlpi makai te’n zu khawng ne in, a maan lopi-in sum nekgukna khawng hong zang le uh ahihna uh thei lo hi ding a, Pasian sehna leh amau nuntakna kituak lo ahih manin mite gensiatna, nuihsanna leh mawhsakna thuak ding uh hi. Tua ahih manin, eima sepna bawlna ah “Bang tan hiam kei sep ding, Pasian hong sehna?” cih i ngaihsut kisam mahmah hi. Ei hihna thei cian tek leng nuntak hong nuam in hong tawldam mahmah ding hi. Na hihna phawk in.

Pawlpi ah :
Pawlpi khat hong dinkhiat ciangin bang hanga hong dingkhia a, bang a asep ding cih i phawk ding kisam hi. “Pawlpi pen Khris pumpi hi (Efe. 1:23)”. Tua in lungdamna thu tangko a, a thei nailote hilh a, Pasian ta suaksak pen a sep ding ahi hi. Pawlpi hong din ciangin kisap leh hih ding tampitak om a, pawlpi in a sep ding bang a sep loh ciangin pawlpi sungah vai nawngkai hong om thei zel hi. Pawlpi kisap leh sep ding tampi tak omte lakah tawm khat i phawk ding i gen nuam hi.

i) Thungetna : “Ngen un na nget uh leh hong pia ding hi (Mat. 7:7)”. Thungetna pen deih ngetna bek hi lo a, Pasian tawh i kizopna hi a, mimal, khua, miman leh pawlpi khan nading a kisam masa pen zong ahi hi. John Wesley in, “Thungetna pen Pawlpite sumgum/gamh manpha pen ahi hi,” ci hi. America hizahta a akhantohna hang uh pen Thungetna hang hi, ci uh hi. Thungetna tawh a kiphut khia gam leitungah America bek hi kici hi. Gam ki-uk zia ding Ngeina(Constitution) a bawl lai un makaite sung ah kithutuak lohna om a, tua hun laia makai khat ahi Benjamin Franklin in ‘Pasian dong ni,’ ciin thu ngen phot uh hi. Kum 1700 bei lama tua bang a thungetna tawh a kibawl pen a bawlna uh a sawt mahmah hangin tu ni dong leitung a Ngeina hoihpenpente laka khat ahi hi. Tua ahih manin thungetna pen manpha a pawlpi khan nadingin thungetna tawh nasep a kisapna i theih ciat ding kisam hi.

ii) Mission nasepna : COD dictionary in Mission pen “Mite’ tunga lungdamna thu tangko nasep” na ci hi. Mission nasepna pen pawlpi hong dinkhiatna hang khat leh a thupi pen ahi hi. “Minam dangte’ lakah ama minthanna genkhia un la, a lamdang ama septe mi khempeuh lakah gen un (I Kh. 16:24)”. Mission nasepna ah mimal khat ciat in sep theih nei ciat hi. A kuankhia pawl om a, tuate sum le pai leh thungetna tawh a panpih ki-om hi. Sep theih kibang lo a, zong kikim khin lo hi. Tua ahih manin eima sep theih ciat i gaihsut siam kisam hi. A kuankhiate zong a hoih hi a, tuate tha a piate zong tua a kuankhiate zah mahin hoih veve hi. Jesu in leitungah vak kawikawi a lungdamna thu a tangko ding in hong vaikhak hi (Mat. 28:19, Marka 16:15, Luka 24:47, Sawl. 1:8) Tua ahih manin lungdamna thu a tangko ding pawlpite, tua sung a mimal khat ciat in i mawh puakna uh i theih kisam hi. Tui pen a luankhiat loh ciangin uih in namsia a, a kiman na om lo hi. Tua mah bangin pawlpi zong tui bang a aluankhiat a, mission nasepna ah ma a lak kei leh hong uih in hong namsia ding a, a kiman na om lo ding a, a kiphuh na hang leh a tup leh ngim, Jesu hong thu vaikhakte tawh hong kituak lo ding ahih manin pawlpi pen hong beimang lel ding hi. Pawlpi hong din na hang i phawk ding kisam hi.

iii) Thusinna : Thusinnna pen pawlpi kisap mahmahte laka khat ahi hi. Pasian thu thuk theih nading, pawlpi a kip zawk nading leh a khan nadingin Camp, Crusade, Sunday School etc. cih bang kisam mahmah hi. Mi minthang Moses, Sawltak Pawl, Timoti, Joshua, Danielte pen a kisin mi vive hi uh hi. Kum zalom 7&8 hun kiim a Africa gama Khristian biakna a beina hang a kan uh ciangin tua pawlpi miten Lai Siangtho sim thei loin Pasian thu thuk na tel taktak lo uh a, a kim a pam uh a biaknaten hong tuam ciang in suk hoi to hoi in puk in bei mang uh hi, ci uh hi. Thusinna pen pawlpi kip na ahih lam phawk ni.

Minam ah :
Pasian in bang a deihna in minam bawl hiam? Zomite mun tuamtuamah ki-om koikoi in, minam dangte kawmkalah i kithehzak hi. Minam khat a piang hi gegu napi mi namdang i tenpihte minam suak i sawm pahpah pen hong bawlpa a lungkim dingin i ngaihsun hiam? Mi in a muhtheih a sanggamte it lopi in muhtheih loh Pasian ka it a cih leh ahi thei lopi khat ahih thu Lai Siangtho sungah kigelh hi ( I Johan 4:20). Minam dangte bang ci bangin bat i sawm a, i bang mahmah phial zong in BANG bek hi a, ahi hi tuan lo hi.

Mun tuamtuama a kithehzak Zomite i omna mun a nam dangte bat sawm ciat leng bang cik tan Zomi cih leitung ah om ding hiam? Pawlkhatte bang Zo lai a Lai Siangtho nangawn sim thei loin, maizumna mel theih lo, kiphatsak lawh zawsop lai, Zopau, ama pianpih pau tawh hong bawl Pasian tung a thunget siam loh khawng maizumna mel thei lo kipilsak in kisaktheih na in zang zawsop lai. Pasian in pau hoih tak hong pia a, Mipil misiamte tungtawnin lai hoih tak hong pia a, tuate kuate zat dingin koih i hiam? Zomi na hih leh nang zat dingin Pasian in hong piak ahih lam phawk in.

Thukhupna :
Hong bawlpa hong bawlna hang phawk in. Hong piak thupha, pilna siamnate zang siam ciat leng i miman khangtoin Pasian in zong thupha hong pia thuahin, minam lianin hong bawl ding hi. “Upna ah a kip minamte a lut theih nadingin kulh kongpite hong ta un (Isa. 26:2)”. Ama na a semte Pasian in thupha pia in lamto ahih lam phawk ni.Pasian in na a piankhiatsak ciangin deihna nei loin piangsak lo hi. Mihing i piankhiat ciangin ei a ding bekin a piangkhia a nungta ding kihi zenzen lo hi. Eima ading bek in piangkhia hi leng leitungah mihing/midang kisam lo ding hi. Na nuntakna na innkuan, na pawlpi, na minam, na gam ading leh hong bawl Pasian adingin zang kei le cin na nuntakna in bang kimanna nei ding hiam? A nungta khat na hihna phawk in la, hong bawlpa lungkim ding bangin gamta in.©