LEADERSHIP

“Leadership” cih kammal pen a kitam zat mahmah leh i kisap mahmah thu hi a, “makaihna” ci-in a kigen thei ding hi. Tua lai takin “Leadership” i cih ciang a kician zaw tawh kibang hi. Leadership i cih ciang kithei pian napi ahihna tak genkhiat ding haksa hi. Peter G.Wiwcharuck in hih bangin hilhcianna bawl hi.

i Leadership pen mipite zanga nasep lawhcinna hi.
ii Leadership pen mipi, hun, upna, ngaihsutna leh a dangte siam taka zang a nasep lawhcinna ahi hi.

Makaite in amau nung a zui ding mipi (followers) kisam a, tua mipite a zat siam ding ahi hi. Ama mimal nuntakna bekin bangmah hih zo lo ahih manin, mipite hamphatna ding leh khantohna dingin amau tha mah a zat siam ding kisam hi. A makaih mipite lungsim leh ngaihsutna, a pil a siamnate uh leh a hatnate uh a manpha a a zat siam ding ahi hi.

Harry S.Truman in a genna ah, “makaite pen mipite in a sep nop loh na khat peuh thanuam tak leh lawp taka semsak thei dinga makaih siamna ahi hi” ci hi. Hih thu in makaite dinmun ding tampi hong lak hi.

Leadership a hilo, leadership banga i ngaihsut pawlkhat om ahih manin tuate i tel khen theihna dingin tomno in kikum ni. Leadership i cih ciangin -

i. Position hi lo: Leadership i cih ciangin hihna(Position) genna hi lo hi. Leadership nei hoih mahmah ahi zong pawlpi sung leh organization tuamtuam ah dinmun poimawh a luahlo om thei hi. Tuamah bangin dinmun poimawh a lente in zong leadership nei khin tuan lo hi. Laigelhte leh Farisaite Moses tutphah ah a tut uh hangin makai hoih a hihlo zia uh Jesu in gen hi(Matt. 23:1,2).

ii. Personality hoih hi lo: Leadership i cih ciangin mihing hoihna, migitna (Personality) genna hi lo hi. Tua ahih manin Personality hoih neite zong makai hoih hi khin tuan lo hi. Farisaite hoih gamtat mahmah tase mah leh mipite lampi man tawnsak tuan lo uh hi(Matt.23:1-12; Mk.12:39).

iii Authority hi lo : Leadership i cih ciangin thuneihna (authority) genna hi lo hi. Lai Siangtho Lungdamna Johan sung i et ciangin Jesu in a nungzuite khe a silsak thu i mu hi. makai i hih leh kiletsakna, kithupitsakna hi loin, midangte ading a nasepsakna hi zaw hi.

Leadership Functions: Leadership hoih neite in mipite kaikhawm siam ding hi. Mimal khat peuh pawl hoihna dinga tha piak leh lawpsak pen a mawhpuakna ahi hi. Pawl pai dan ding leh malak dan ding hoih taka geelin, tua tawh kituakin mipite lam lak ding hi. Malakna ah vai nawngkai leh buaina a om ciang tuate a suk ven siam ding kisam hi. Decision (Thupukna) hoih a bawl thei makai pen makai hoih khat hi in kiciamteh hi. Makai hoih in a makaih mipite khantoh theihna dinga a hanciam ding a mawhpuakna ahi hi. Mi muhna bek hi loin a taktak khantohna a bawl ding kisam hi.

Khristian Leadership: Pawlpi leh Khristian organization tuamtuam makaihna pen khalam thu ahih manin makaite pen Khalam Pa (Spiritual Leader) hi ding hi. Zogam sung leh Zomite sungah minister (Pasian nasem) te leh para-church organization makai khen khatte Spiritual Leader ahihna uh sangin Administrative Leader ahihna uh a kidawk zaw( a lim zat zaw) pawlkhat om thei zel pen a awlmawh huai khat hi.

J.Oswald Sanders in Natural Leader leh Spiritual Leader hih bangin na genkak(compared) hi.

Natural Leader :

(1) Amah bek mah kimuang a, midangte muang lo hi.
(2) Amah bekin thupukna bawl a, thupiak nuamsa hi.
(3) Ama hamphatna ding ngaihsun a, amah bekin ding hi.

Spiritual Leader :

(1) Pasian muang a, midangte zong muang ngam hi.
(2) Pasian deih dan ngaihsun kawmin nasem a, Pasian etteh hi.
(3) Pasian leh mihing it a, Pasian tung bekah kinga hi.

Thukhupna : Makai sepna Pawlpi ah ahi zong Association tuamtuam ah ahi zongin Leadership hoih a nei makai omna pen nuamin khangto hi. Makai hi a, a makaihte tha a zawmsak hih ding lauhuai hi. Makai hoih in a makaih mipite khangto sak hi. Tu ni a makai hoih i neih leh Pawlpi, khua, gam khangto ding a, tu ni a makai hoih in zing ciang ading a i khuavak ahi hi. (Laitai : April, 2008)