Minam liante khapi tungah kahin, ten a sawm laitakun, ei Zomi naupangte kimawlna ah, “Khapi aw, hong kia, hong kia” cici lai mawk i hih ciangin, tua pen kimawlna hi mah leh, i lungsim puakzia khat hong dawksak hi. Tua ahih manin, hih leitung thu luanzia, pilna, theihna, neihna, gimnate nakpi tak a khanna kawmkal ah i om manin tuate ahih thei, leh a nei thei dingin i lungsim puakzia khat i laih kisam a, tua bang lungsim i neih ciangin naupangte in zong ‘khapi aw hong kia hong kia’ cici nawn lo dingin ka lamen hi. Hih leitung pilna, siamna, neihna, hatna kidemna lakah om i hih manin, mite lakah a hat pen, a siam pen i hi zo kei zongin, a siam lo pen, a hat lo pen i hih loh ding thupi hi.
Tu hun leitung pen ; Computer Age, Space Age, Cibercentric Age etc. cih bangin a tuamtuamin kigen hi. Hih a kigenna sungah bang hun bang hun ahi zongin, khantoh nadinga a kisam pen, hih bang hun hong pian theihna pen khangnote ahi hi. Khangno i cih in kua teng huam ding? Hih dotna pen i dawndan kibang het lo ding hi. Kei dawnna panin khangno i cihte pen ; Henry Ford gendan zulzuiin, “Kum lam hi loin, a kisin nuam mi, a lungsim a naupangsakte,” ahi hi. Amah (Ford) in, “Any one who stops learning is old whether at twenty or eighty. Any one who keeps learning stays young. The greatest thing in life is to keep your mind young”, na ci hi. Tua hi a, ‘khangno i cihte pen a kisin nuam, a theibeh nuamte hi’ cih pen ka sandan hi pah hi.
Kum 1980s panin Globalization cih kammal hong gingkhia a, tua pen, ‘leitung khuata khatr bang lela a omna’ ci leng kikhial lo ding hi. Hih ahang pen leitungah Information Technology nakpi taka a khanna hang ahi hi. Kum 1980 malam khawngin gamdang paite a si ding, a kimu nawn lo ding danin kituat hi. Himah leh, leitung pilna siamnate hong khangin, a diakin Information Technology ah pilna hong khan ciangin nidang a gamdanga omte lai i kikhak ciang kha 3/4 khawng a bei pen, Internet tungtawngin email tawh khak leng minute khat zawng sawt nawn lo hi. Pilna siamna, theihna hong khangto taktak ciangin, leitung pen khuata khat bang hi lel a, a khangto gamte neu tektek hi. Tua banga a khangtoh nadingin mi tampi in ihmu lo leh, ngaihsutna tampi zang uh a, pil nuam leh theihbeh nuamin na naksep mahmah uh hi.
Jesu pianzawh kum tul khat zakua sawm kua leh kua kiim, tan 6/7 ka sim laiin, leitungah computer, mobile phone, internet etc. a om lam ka tam thei kei hi. T.V om cih bel kithei a, sawt loin kimu pah bilbel hi. Kum 2001 ciangin tan 8 sin nading ka khua vuah om lo ahih manin Champhai ah ka pai a, tua panin computer bang ka mu pan hi. Ka ngaihsut kik ciang, tua hun lai leh tu hun kikal a leitung khantoh dan : pilna, siamna, theihna a khandan, Champhai ka om cil a mobile phone om hi cih zong ka theih loh pen, tuin mi kiho theihna bek zong deih lo, la ngaih theihna, man lak theihna, email khak theihna cih bang kideih sawnsawn lai hi.
Keima tangthu hong kipholak khia muan ka hi kei a, leitung khantohzia ka gen nopna ahi hi. Hih kum 10 sung a leitung kilamdanzia ka ngahsut ciangin, tu zawh kum 10 ciangin leitung bangci bangin hong om ding a, bangci bangin tua khantohna nawk ding cih ka ngaihsut ciangin khatveivei ka lungkham hun bang om zel hi. Tu a kum 25 nuai lamte bang a tamzaw keimah bang a, kum 2000 malama computer vai a tam theih mel lo tampi a om ding ka lamen a, ahi zongin tuin a thei bek hi lo, a nei, a siam zong tampi tak mah om ding hi.
Leitung khantohna nasia mahmah a, i gensa mah bangin leitung pen khuata khat mah bangta hi. A khangto gamte neusemsem hi. Gentehna in, Laitai leh Taangko te pen Mizogam pan kikhen hi napi gamdanga om Zomiten na sim masa zaw zel uh hi. Ahangin, lai khensak dinga leikhetna ah i puak theih ciangin, internet tungtawnin kikhakkhia ziau a, tua minute mahin gamdanga omte in na sim ziau thei uh hi. Tua hi a, gam danga omte in a sim khit zawh kal 2/3 bang ciangin, a sim baih pawlin zong kisim pan zel hi. Ka gennop bang hiam cih leh, tuate ahang pen leitung khantohna hang ahi hi.
Leitung khantohna pen a zuanin zuan a, tu hun ciangin mobile sunga koih ding Lai Siangtho zong Zomiten kinei ta hi. Khual i zin ciang a van a giksak mahmah Lai Siangho leh Labu i puak zelte pen sawt loin, puak kul nawn loin, eima mobile pan ki-en ziauziau lel ding hi. Hih mobile sung a Lai Siangtho koih theih pen hoih mahmah a, Mikang kam leh Kawl kam in zong om hi.
Kumpi ten zong leitung khantohna tawh kizuiin hih tulai Information Technology te a manpha a zat ding hong ngaihsun ta uh hi. India kumpi in tua dingin programme lianpi khat bawl a, ‘National e-Governance Plant’ (NeGP) ci hi. Tua tungtawnin mipi te’n man tawmcik liauin kumpi pan information lakhia thei ding uh a, mipite phattuam nading nasep (service) ahi hi. Tua bangin, cidamna lam (e-health), laisimna lam (e- education) etc. cih bangin gam khangto ten na nei uh hi. Tulai ciang mi’n sang a kah nop leh sang hoihna, scholarship leh huhna tuamtuam omnate internet tungtawnin zong ziahziah ta uh hi.
Hih bang khantohna na kawmkalah Zomite khangnote zong kisin a, theih i sawm a, siam i sawm kisam hi. I ut a i ut kei zongin, hih pilna siamna, theihna, neihnate in hong nawk veve ding hi. Mimandang te’n pilna siamna zongin, a pil pen, a siam pen hih sawma a kalsuan laiun, i tut maimai leh, sawt loin tua te’n hong nengcip ding a, i thoh zawh nawn loh hun hong tun ding lauhuai hi. Nu leh pa neihsa teng tawh nuamsa-in, eimah a dinkhiat i sawm kei leh, i nu leh pa, i muan i suante hong bei leh bang lawh mawk ding? I nu leh pa a nei zaw deuh ahih leh zong, tuate hong pahtah theih laiin hanciamin, i mimal, i pawlpi, i minam leh i gam adinga suan leh muan tak hi thei dingin kisin kisam hi. I lungsim sangsakin, ‘mite hih theih bang hih thei hi ing’ cih lungtang tawh tulai leitung khantohna tawh kituaka i sep ding deihhuai hi.
8.4.2010
(Taangko Editor, Sianu Awi Ngaih Lun in article gelh dinga hong cialna tungtawna ka gelh hi. April 2010 Taangko.)
No comments:
Post a Comment