Cope Centennial Jubilee Celebration

J. H Cope topate innkuan mission nasem taktak dingin Tedim gamah hong tun zawh kum 100 cinna Pawi pen a kingaklah mahmah bangin, a hun zang thei dinga hun hoih Pasian in hong pia ahih manin hampha ka kisa a, nuam zong ka sa mahmah hi. November 4 - 7, 2010 sunga zat dinga kigel pen, Kawlgam kitel tawh kituak ahih manin November 25-28, 2010 hunah kizang hi. Mizogam pan pawlkhat khe tawh paiin, adangte November 25, 2010 in Zokhawthar ah kituntuahin, tua ni mahin mawtaw tawh Tedim khua lam zuanin kipai a, zan kikhop a lap manlo pawlkhat zong om hi. Mizogam leh Manipur pana paite Pa Thang Za Singte inn thakah hong tungsak hi.

Hih pawi simna tawh kisai hun zatdan, hun zangte, leh ka muh khak thute panin tawmkhat kong gelhkhia hi :

I. Morning Bible Study : Zingsang 7-8 a.m. hunin Bible Study, Cope Memorial Baptist Church (CMBC) leh Bethel AG (BAG) biakinn-ah kinei hi. Hun zangte : Dr. Man Hau Cing, Rev. Dr. Mang Do Thang, Rev. Suan Khan Thang, Rev. Dr. Lam Cin Thangte ahi uh hi. Thulu kisehsa tawh thu gen uh a, manpha, zaknopin thupi thei mahmah hi.

II. Hunpi (Sermon) : Zomi mipil misiam, leitung bup, mi kang mi vomte lakah zong a maingal mahmah, pilna sang pipi a nei Zomite in Zomite phattuam nading thu gen uh hi. Mi pau, mi ham, mi ngeina a zang lo a, ei leh ei i thukihilhna-in manpha hi. Thugenna sungah hun paisa a kilemlohna, kisimmawhna, kithutuahlohnate pana pankhop a semkhop a kuldan leh sepkhop dingdan lam ki-uang gen a, Tapidaw suahzawh kum 100 khit ciang picin lungsim puaa, kalsuandan ding a gente uh thupi hi. Zomite minam lian, mite bangin pilna siamna, neih le lam zong a neite i hih lam a thei lo, khua dakkhia lo pawlkhat in, i minam zahpihin, pau le ham zumpih thei uh a, “Mi gen, mi cih peuhpeuha a suk-hoi, a to-hoi dingte hi lo hi hang,” cih ka ngaihsutna ah hong kilang hi. Hih hunah hunpi zangte : Rev. Dr. Dam Suan Mung, Rev. Dr. Gin Khan Khual, Rev. Dr. Do Suan Mung, Rev. Dr. Go Cin Zam, Rev. Dr. Cin Do Kham, Rev. Dr. Simon Pau Khan En leh Rev. Go Za Nangte ahi uh hi.

III. Lapawl kidemna : Hih Zomi bup lungdamkohna pawipi ah “Lamhilh Aksi” cih Lapawl kidemna om a, mi 100 sanga tawmzaw lo, Zopuan uniform a zang cingteng hong din a, la hongsak uh ciangin cimul bang tho keei-in, siam mahmah uh a, muhnopin zaknop mahmah hi. Hih lapawl kidemna-ah Lapawl Conductor tengin etdik na (Judge) sem uh a, solfa siamte ahih manun, a mat piakdan leh a thukhenna uh pen maan mahmah ding hi. Hih kidemna ah lapawl 11 kihel thei hi. Zomi Festival of Praise Lapawl kidemna a mi 70 - 99 kikal a khatna ahi Pydawtha Christian Fellowship in khatna ngah uh a, kidemna ding la a phuakpa J. K Kam in Ks. 5,00,000/- letsong sikin, amah hih hunah kihel thei lo ahih manin, ama nu in letsong pia hi.

IV. Zo ngeina tuamtuam : Tapidaw suah zawh cianga khangthakten a kithei nawn melmel lo, ngeina pawlkhat leh tuhun tawh kituak Zo ngeina lahna hun penin mit cimsak man lo hi. Khuai lak dan, misi vui dan, ngeina laam tuamtuam, khua tuamtuam in hong lak uh a, mipi in mit khup man lo zenin ki-en hi. Zo ngeina lamna khatah USA pana hong pai Rev. Ernest R. Flores lampih uh a, nuamsa-in nui hiuhiau kawmin lam hi. Hih huna Conductor Rev. Kai Khan Mung in mi lungsim a zawh siamdan, mi thalawpsak a siamdante ka ngaihsut ciangin lamdang sa liang ing!! Hih hun kallakah CCJ miss teelna zong om a, Zomi nungak melhoihte hong pai zialzial uh hi.

V. Zomi bup makai thak : Hun beisa-in pawlpi tuamtuamte ei paidan, ut dan, hoihsakdan bangbangin kalkisuanin, minam bup dinga mapankhopna tam het lo hi. Tua hangin i hih dinga kilawm i hihkhakloh tampi om hi. Tua pen i mipil misiamte in theiin, kipumkhat akisapna leh pankhop a kulna hangin makai ding kisehna 27.11.2010 nai 1:00p.m in EBC biakinn-ah pawl tuamtuam pana makai suan le muan mi 70 val paikhawmte in leitung bup Zomi makai ding telna nei uh hi. Tua a makai thakte : President : Rev. Dr. S. Pau Khan En (Yangon), Vice President : Bishop Felix Lian Khen Thang (Kalaymyo), Secretary : Rev. Dr. Cin Do Kham (USA), Assistant Secretary : Rev. Dr. Do Suan Mung (Yangon) leh Member : Rev. Dr. Gin Khan Khual (UK) ahi uh hi. Amaute tungah lametna lianpi kinei a, panpih a kulna-ah panpih a, thapiak a kulna-ah thapia dingin kiciamna 28.12.2010 sun kikhopna-ah mipite in kinei hi.

VI. Zomi Electronic Dictionary : Tu tung pawi-ah Zomite adingin mualsuang thak khat kiphut hi. Zomi Siamsin Kipawlnate hanciamna hang leh pawltuamtuam (ZCLS, ZOCIA, CLC etc.) panpihna tawh a mang nawn lo ding Zomi Electronic Dictionary, a setvan Taiwan pan lain Era Technology Campany Ltd.te tawh set mal 100 bawl a, khahkhiatna leh zuakna om pah hi. Adiakin Zomi khangthak siamsinte adingin manpha mahmah ding hi.

VII. Zolai Seminar : Zolai hong bawlsakpa hong tun zawh kum 100 pawi hunah Zolai tawh kisai seminar, CMBC biakinnah kinei hi. Rev. Khoi Lam Thang, General Secretary, Bible Society of Myanmar in hun zangin, theihhuai thu tampi kingaikhia a, hun kicing lo ahih manin, dotna leh dawnna hun tam kingah lo hi. Ahih hangin, hun zatna sunsunte manpha mahmah hi.

VIII. Pahtawina : Hih hunah Dr. Howaral Cin Khen Mangte innkuan (Yangon) in Hunbit Pasian nasem khangham pen Rev. Dr. Kam Khaw Thang leh Siama Cing Khaw Vung leh Ordained loh (layman) sung pan Pu Pum Khua Paul leh Nu Ngoih Khen Cingte pahtawina pia uh hi. Tua banah Rev. Khup Lian Mangte innkuan (Tangon) in Zomi sunga Honorary Doctorate degree ngah teng zong pahtawina pia hi.

IX. CCJ Logo : Pa Hang Lian Khup in a ngaihsut/bawl khiat CCJ logo pen thupi hi. Tapidaw i suah ma a Zomite lum le tei, thal tawh kivaiin, kido kithahna, gamsa mat uangbawlin, ton le aih ding bek kidemna tawh hun a zang, tuibuk, zatep leh a hoihlo tuamtuam zatna panin Lungdamna Thu i theihna tungtawnin pilna siamna kisinin, degree sang pipi la-in, lukhunelkai khu-in, laikung laidal tawh nekzongin, laptop computerte kizang ta hi. Tuate pen etkak theih ziau dingin a limin hong gelhkhia hi.

X. Siangtho Nekkhawmna : Zomi bup paikhawmte in, Jesu in amah theihden nadinga Tapidawte’n bawl den dinga hong vaikhak ahi “Siangtho Nekkhawmna” a kibawlkhop theih pen thupi a, vaihawmte vaihawm siam ka sa hi. Hih Siangtho Nekkhawmna Rev. Smith Ngulh Za Thawng in zang hi.

XI. Kithutuakna : CCJ pawi in kithutuakna honglah pen thupi hi. Upa te’n “Khut khat tawi, khe khat khei” a cih mah bangin pawl tuamtuamte in zindona, sumpi kaihkhopna, hunzatna etc. ah hun kizang khawm diamdiam a, tua pen kithutuakna nam khat ahi hi. Kamsiathuai takin Tonzang lam pan hong paite tuahsiatna a kuamah peuh kilungphamawh a, a diakin ZYA leh Zomi Siamsian Kipawlnate nasep thupi hi. Meltheih a kem a khoi ding a om lote panpihin, tuahsiatna munah va delh pah vingveng uh a, zato innah giakpihin, panpihna tuamtuam pia uh hi. Hih tuahsiatna a site galna leh natna thuaka zato inn a omte vehna 28.11.2010 in kikaikahwma, kikhawm mipite in neihsa sum le pai siit loin a piakkhiatna uh thupi ka sa hi. Tua banah hih tuahsiatna tawh kisai 28.11.2010 ni-in World Zomi Congress (WZC) EC in thukin kikupna (EC Emergency meeting) nei uh a, leitung bup a om Zomite’n panpih theih nading vaihawm uh a, amau vaisaina tawh mun tuamtuama Zomite in huhna a tawm a tam ciloin pia diamdiam uh hi.

XII. Laibu : Hih pawi hunah Laibu tuamtuam lei theih ding, cih thu kizaza a, laibu bangzah hiam lei ning ei, cih pen ka lunggulhna bangin bu 6 bang ka lei hi. Tuate lakah CCJ Lititerature Committee & Zomi Innkuan Singaporete bawl “Zogam Khristian Tangthu” leh Rev. Job Thawngno bawl “Cope topa leh Mission” cih bang bilpilhuai ka sa a, Rev. Nang Lyan Kap bawl “Systematic Theology” leh Rev. Job Thawngno’ gelh “Nungtakna An, Sermon Zakhat” zong sim thalawphuai mahmah vive hi. CCJ laigelh kidemna a khatna ahi Rev. Job Thawngno pen thupi sa ing. I minam in hih bang minister hoih a neih pen hamphathuai ka sa hi. Hih bang mi manpha Zomite sungah a om pen hamphathuai ka sa hi. A kisiikhuai lo tapa Zomi in a nei in ka tuat hi. A thu le la gelhte hangin mi tampi in sa lam kha lamah phattuamna ngahin, “A sih zawh ciang zong anungta den ding Rev. Job Thawngno hi,” ciin ka ngaihsun hi.

XIII. A khatveina hi : Ka pianzawh Sial gawh ka tuak khatveina ahih manin genloh phamawh ka sa hi. Sakollam venga Pu Suan Paute innkuan in Mizogam leh Manipur pana paite Sial hong gohin an hong nekpih a, Mizogam / Manipur a Zomite hanga Kawlgam a om Zomite in khualzin gamvakna, sumbawlna leh sangkahna-ah noptuamna neihnate leh gam kukna in hong khen Zomite in ki-itnate lenkip dingin a deihnate hong gen hi. Zing hun sauvei kizang deuh ahih manin, Pu Suang Pau in hong kankana kisuanlahhuai ka sa mahmah uh hi.

Tua banah kum 2007 a Tedim khua-a kizang Zomi Festival of Praise (ZOFOP) Magazine, ZOFOP Magazine Committee, Yangon bawl, laibu etlawm mahmah, ZOFOP Convenor & Director ahi Rev. David Suum in Nipi Ni zingin deihsakna tawh hong pia a, hih bang laibu hoih leh manpha hong kipiak khatveina ahih manin, lungdam mahmah hi.

XIV. A zahtakhuai thungetna : Kisin ding a ka deih khatin, Thungetna hun zahtak ding ahi hi. Hih pawi hunah thunget lai hun pen pusuak hun peuh a sa mi a tam tawh kibang ka sa a, kihilh mahmah ding ka deih hi. Thungetna pen i biak Pasian tawh i kiho hun ahih manin, tua pen zahtak siam kisin kul hi. A thungente i thupisim kei phial zong, a hopih Pasian i zahtakna beekin sungtum pusuakloh hoih hi. Mizogamah hih bang lamsang zahtak siam ding kisinsak uh a, biakna genloh YMA paikhopna-ah zong, thunget hun laia sungtum pusuak thei mite pen mi in koihdan khat, etdan khat nei uh hi.

XV. Gelhloh phamawh thu dangte : Nipi ni zing sangin ZBC & CBA ah pastor a semsa Rev. Cin Kam in niangtui hong dawnpih a, hun nei lo pipi-in Rev. Cin Do Kham, President, Leitung bup Zomi Innkuan Kipawlna hong pai-in, hun kizangkhawm hi. Dr. Kham pen a min ka zakzak hangin ka khatvei muhna hi a, hih bang mipil leh Zomi a it ngiat ka muhkhak manin zong hampha ka kisa hi.

Tedim khua sungah Sai(shop) min, Inn min, leh Signboard tuamtuamah Kawllai tawh kigelh tam mahmah a, tua pen khantohna maw, Zolai thupisimlohna, cih ka ngaihsunsun hi. Bangbang hi ta leh, Pa Thang Za Singte innkuan a kipan Tedim mite kiniamkhiatna, Pasian a zahtakna leh mi kholhpih a siamnate uh hangin maingal tak, tek tangtakin ki-om pah thei hi.

Innteekte thusiamna, mehlim tak tawh hong vakna, Cope Centennial Jubilee Hall a kilam a gol ka sakna, Rev. Job Thawngno in a bawl Zogam Sangmangte Poster etlawm mahmah tampi ZBCte hong letsongna, sanggam Kachinte in Zam leh laipi hong piakna, Hakha Baptist Churchte hong uapna leh lapawl, Steven Vocal Band leh Fishers Quartette lasak cianga mipi thalawp dan, kikhop cianga tut nading laidal muh a haksatna, CCJ Miss kidemna kician taka ka etloh pammaih ka sak kikna, Rev. Dr. Cin Do Kham in Tulsa, USA a Cope Centenary pawi a zatna uh C.D. hong piakna leh Rev. David Suum in ZOFOP C.D. hong piakna, leh CCJ Committee-te’n a lam uh Zo Inn zong gelhloh theihloh thu hi.

Thukhupna :

Hih pawi hunah hun kihawmthoh mahmah hi. Nisapi nuaiah sunkhua kitu-in, zan ciang zong tua bang mahin leilakah a kitut hangin kikham, kicimtaak peumah lo hi. Mi bengvak lo cihtakah hih pawi hun sung Tennis kidemna cih simloh Volleyball, Badminton, Table Tennis kidemna a om lam thei loin, letsong a kipiak ciang kidemna a om lam a thei pan hi zen ing ei!! A hih hangin, tuate en loin zong pawi nuam takin zang ka hih manin manpha ka sa veve hi. Cita dihdih leng, Zomi nungakte mah melhoih sa ing ei!!