SIAMSIN PAHTAWINA

SIAMSIN PAHTAWINA

Amasain hun hoih hong pia Topa Pasian tungah lungdam ka ko a, Vapar Students’ Union (VSU) makaite, khuasung makaite leh hih huna hong kihel mipite tungah lungdam kong ko hi. Hih bang hun hoih leh manpha hong gel V.S.U makaite thusiam ka sa a, pahtawi ding kilawmte pahtawina hun 2-veina bang zang theita i hih manin khantohna lianpi-in ka tuat hi. Deihsakna tawh thugen dinga hong kisehna ka zahtak a, thu tam lo tawh tha kipiakna leh ngetna, mi nam li tungah kong nei nuam hi.

1. Sangnaupangte : Siamsin sangnaupang hih hunah pahtawina a ngahte leh hong kihelte, hih ciang i tun theihna pen Pasian hong kepna ahih lam mangngilh kei ni. 

Amasa penin Topa zahtakna pen pilna kipatna (Pau. 9:10; 15:33) ahih lam mangngilh kei un. Pasian kiangah pilna ngen un, mi khempeuh adingin amah dikin cingh hi (James 1:5).

Bang hanga sanginn-ah haksapi, nei lo pipi in kipai hiam? cih ngaihsut kisam hi. Pilna a kideih man hi. Tua pilna nei dinga na sin laiun, mi lakah gamtat luhek, nuntak kampau kidawmin, mipil gamtat bangin gamtain, gen dinga kilawm leh kilawm lo khentel un. A hun leh mun tawh kituakin gamtat siamin, nasep hun cianga kizem zetzat a zumhuaina thei un. A kizem mi hi loin, pumpi leh lungsim a siangtho hih ding hanciam belin nei un. Kumpi leh pumpi in a deihloh zu dawn, za tep, tuibuk muam etc. ahih lo, a zang lo dingin hanciam un.

Khuapi sunga omte aw, khuapi sungah mi hoihlote hoihlohna teng khua-ah hong ciahpih kei un. Mite bangci bangin khangto a, bangci bangin nungta uh hiam? cih kanin, mihoihte nuntakna panin khua sung khantoh nading, i minam leh gam khantoh nading hong geel un.

Nu leh pa te’n vok kuang tung liang a, a duh uh ne ngam loin, a deih uh zong nei thei loin pilna hong deihsakna uh hanga hong vaakna uh mawksuaksakloh ding hanciam penin nei un. Tua hong sum piakte zuu leh drugs addict nading peuhin zang kei un. Sumin a cit lohpi’n mi neih bang deih manin leiba liangin mobile phone peuh lei mawkmawk kei un.

Mi tawh kitot, kisel pelh sawm unla, lamdung kawngah la peuh sa-in awng lualua kei un.

Kawlgam, Vaigam leh muntuamah na pai uh ciangin minamdangte lakah na hihna (identity) ahi min, minam zia le tong, pau le ham, lai zahpih ngei kei unla, Zomi nam a minphat theih nading hanciam un. Na mipih na sapihte zongkhia unla, tuate tawh kithuahin, zingvai nitakvai hawmkhawm un. Tua hi leh, na dahni leh na lungdam niin na buai kei ding hi.

Haksatna a om lo dingin ngaihsun ngei kei un la, tuate panin cihtakna, kuhkalna, leh thanuamna nei un.

Mi zakta thei lote hi loin, a zakta lo theite hih ding hanciam un. Mipi vante (public properties) na kep zawh kei uh leh zong a siasak mi pa/nu hi sese kei un.

Ngimna tupna kician nei-in, tua tungtawnin na innkuan, na minam, na gam a khantoh theih nading geelna kician nei un.

Lai sim a thanuamte hih ding hanciam un la, ‘lai tam sim lua ing’ ci ngei kei in. Mipil te’n lai tam sim mahmah uh hi. Thu leh la, lai leh laibu manphatna theiin, Zopau, Zolai khantoh nading hong hanciam unla, zuih ding a hoih, sep ding a kilawmte hong gelhkhia zelzel un.

Mi’ na deihgawh kei unla, a kilawmlopi a sum muhna lunggulhin nei kei un. Mi huanah lutin mi khai suksiat, guksak a kilawmlohna leh Pasian in a deihlohna phawk un.

Mikang leh Korea film na etna uh panin a kizemna uh leh kammal hoih lote bek ciing (copy) loin, nu leh pa a zahtak siam dan uh, u leh nau a ki-itdan uh leh a hanciamnate ciin-in nei zaw un. 

Na pilna, na siamnate uh haksapi a hongvakna uh hang hi cih phawkin, na nu na pa simmawhna in zang ngei kei un. Amaute hanga hih ciang a tung na hih lamuh mangngilh kei un. 

Pilna pen -- Kham tawh kilei zolo, ngun tawh aman seh theih hi lo hi (Job 28:15, Pau. 3:14), Pilna nei-in, thu a thei mipa a lungdam mi hi (Pau. 3:13), Neih khempeuh beilawh zongin zon ding hi (Pau. 4:7), Anei nuamte kithuhilh ut a, kitai utlohna pen haina hi (Pau. 12:1), Hinna tuinak hi (Pau. 16:22), Thahatna sangin hoihzaw hi (Pau. 24:5), Khuaizu tawh kibang hi (Pau. 24:14), Adeih mi in a pa lungdamsak hi (Pau. 29:3).

Pilna in -- Khan sausak a, huahna & pahtawina zong pia thuah hi (Pau. 3:16, 9:11), Nuntakna nuamsak, lungmuang takin omsak den hi (Pau. 3:17), Siatna pan hong hu ding a, lungmuang takin omsak ding hi (Pau. 4:6), Mi lianin bawl ding, pahtawina ngahsak hi (Pau. 4:8), Pahtawina leh minthanna tun ding hi (Pau. 4:9), Inn lam hi (Pau 9:1), Lung duaisak hi (Pau. 19:11), Lungmuangsak hi (Thna. 7:12). Tua ahih manin, Pilna siamna pen zon ding, i neih theih nadingin neih khempeuh a beilawh zong a zon ding ahi hi. 

2. Nu leh pate : Nu leh pate aw, ta hong nei buang na hih manun ka pil, ka siam, ka theih nadinguh hanciam belin hong nei unla, thankhik ta neih bangin hong nei zelzul kei un.

Sanginn hoihah ka kah theih nading uh hong vaihawmsak unla, lai ka sim uh ciangin lungsim a pialsak thei thu tuamtuam tawh ka kipelh theih nading uh hong hanciampih un.

Na zu dawn ding uh a lei dingin hong sawl ngei kei unla, za tep pan ding leh tuibuuk muam ding la ding peuhin hong sawl ngei kei un. Tuate ko zat dingin na deih kei uh leh etteh theih dingin hong kipuahpha un.

Sanginn a ka nuntakzia uh na theihtheih nading u’n siate langbawl kei unla, amau tawh semkhawmin pilna ka neih nading uh hong vaihawm un.

3. Khua sung makaite : Khua makai na hih uh mah bangun hih khua sungah mite sang a kah nop nadingin sanginn hoih neih ding hong hanciam un. Na thuneihna ciang uh theiin, hangsan takin nung leh ma khual kawmin na hong sem un. Sanginn manphatna hong kimang-ngilh bawl kei unla, mailamah khua, pawlpi, minam, leh gam a makai dingte hong makaih khial het kei un.

4. Sangsiate : Siate aw, a kisin cil sangnaupangte pen na tu na ta, na sanggamte vive hi uh a, a mawlna, haina, leh theihlohnate hangin hong simmawhsak loin, pilna, siamna, theihna a neih nadingun lungduai takin hong hilhsak un. Leitung pen a dik leh dik lo, a sia leh a pha omkhopna ahih lam hong hilhsakin, cihtakna, muanhuaina, lungduaina, kuhkalna leh thanuamnate a neih theih nadingun na siamnate uh siit loin hong zang un.

Guallehna leh dahna pen mi khempeuh in a thuak uh hi a, a thuaksiam dingin leh, gualzawhna leh lungdam hun cianga lungdam a siam dingin hong hilhsak unla, pahtawi dinga kilawmte pahtawi siam dingin sinsak un. Mi van deihgawh luatna, huaihamna, mi simmawhna, mi elna lungsim a neihloh nadingun hong hilhsak unla, Laibu manphatna hong hilhsak pha mahmah un.

Ama hih theih ciangah a lungkim ding leh, amah leh amah kineu-et lo a kimuanna tawh kiniamkhiat dingin sinsak un. Amah leh amah kimuanngamna lungsim hong guatsak un, tua hi leh mite muang thei pan ding hi.

Upa zawte thu man ding leh zahtaksiam a kisapna hong hilhsak unla, a lungkiat ni a zong a maitai theih dingin hong pattahsak un. Lungnem takin hilh unla, ahih hangin ngekbawl kha kei un. Na tate sang kahna sanginn a siate’n naupangte a makaih dan dinga na deih uh bangin hong makaihsak un. 

Na nasep uh pen nasep thupi hi a, khantohna tawh kizom ahih manin a semte zong mi thupi na hi uh hi. Tua ahih manin citakin, a kilawm ciang bek hi loin itna tak tawh hong sem un. Note nasep hoih hangin innkuan, khua, minam leh gam in khantohna kingah hi. Tha hong san unla, hong hanciam kikik un.

Thukhupna :

Khanglui te’n, “Mi bawlin kisia lo a, ei leh ei kibawlin kisia” a cih mah bangin, nu leh pa, leh siate’n hong deihsak mahmah hangin a lawhcing-sak ding sangnaupangte i hi hi. Kuama’n eisep tang hong sepsak lo ding a, ei seploh manin kuamah sumh tuan lo ding hi. Tua ahih manin, lai simna-ah lawhcin nadingin eimah mahmah a kisam pen i hi hi. “Rom khuapi ni khat sung beka kilam hi lo” a kicih mah bangin, kum bul pan a i sepna hangin kum tawp ciangin lawhcinna kingah thei pan hi. Pilna a nei khin mihing leitungah om ngei lo a, sih donga kisin nading leitungah i tunna ciangciang panin mainawt ni.

Pahtawi dinga kilawmte pahtawi ni. Ei leh ei kipahtawi kei leng kuan hong pahtawi ding hiam? Ei leh ei i kipahtawi ciang etlawmin, namtui mahmah hi. Lungdam.

(Hih thu Dt. 28.12.2010 zan a Siamsin Pawhtawina, Vapar khua-a a kizatna-ah Tg. T. Sawm Lian, Adviser, VSU in a gen hi. Hih hunah kum 2010 sunga lai simna-ah Distiction a pass 28 leh Board Exam a pass mi 4 tungah pahtawina kipia hi.)