BANG HANGIN ZU NGAWL DING KA HIAM?

BANG HANGIN ZU NGAWL DING KA HIAM?

             Leitung a bei maloh a bei ngei lo ding, a sunga om nate lakah zu zong kihel kha ding hi. Kumpite leh kipawlna tuamtuamte in nak takpi-in a kham uh hangin bei ngei lo ding hi, cih ka um hi. Tua ahih manin, a omden ding hi mawk ahih manin keimah mahmah ka kikhel kei leh hoih lo ding hi, ciin ngaihsutna thak ka nei a, zu ka ngawl nading a hang bangzah hiam ka mukhia hi.

1. Zu hanga samsiatna

                Lai Siangtho sungah, Noah in zu a nekna hangin a zahmawh na dongin sel zo lo a, tua banga guaktanga a lupna pen a tapate laka khatin mu masa hi. Tua a muhna hangin a pa in ‘samsia’ hi. Nu leh pate samsiatna pen tate adingin a sia pen kammal hi a, tua ahih manin Noah bangin bangmah thei lo ding zah dongin zu kham-in, keima omdan a hoihloh manin ka tate ka samsiat khak ding lau ka hih manin zu ka dawn nawn kei ding hi.

2. Khristian ka hihna hangin

                Khristian khat ka hih manin, ka upna a bulpi ahi Lai Siangtho sungah zu dawnna tawh kisai tampi kigelhte lakah, zu dawndawn pen a hoihna a kigelh mu nai lo ka hih manin ka ngawl ding hi. Zu dawn a hoihlohna tampi lak panin – Zu in hong kitawngsak a, zu khamna pen haina hi (Pau. 20:1), mi a puksak nek le dawnte panin kidawm ding (Rom 14:21), zu nek a hatte’ kiphatsakna kumpi lukhu pen khenuaiah kituancil ding (Isai. 28:3), zu mun delhin a tutkho, zu dawn a hatte in gimna ngah hen (Isai. 5:11, 22&23) ci mawk hi. Zu khamte tawh zong kikhol lo dingin thu hong pia a, bang hang hiam cih leh tuate zawng ding uh a, a ne beka nitumte in puansia belk silh zo ding uh hi (Pau. 23 : 20 & 21) ci-in gen hi. Tua banah, Sun khuavak sunga om mite bangin a kilawmin gamta ding leh gualnopna leh zukhamna, mawhna leh thangtatna, kitotna leh kihazatnate-in hun beisak lo dingin Sawltak Paul in hong vaikhak hi (Rom. 13:13).

3. Pasian deihna hi

                Zu ka dawn a, zu ka kham ciangin ka pumpi ki-ukzo loin ka om a, numei-pasal thantatna, huaihamna, gitlohna lungsim nei thei zel ka hih manin tua pen ‘kei hong bawlpa’ deihna hi lo hi, cih kician takin ka thei hi. Lai Siangtho sungah zong, khuapi khat ukzawhna sangin pumpi ki-ukzawhna hoihzaw hi (Pau. 16:32) ci ahih manin, keimah ka ki-ukzawhloh nadingin hih zu pen ka dawn nawnloh kei adingin hoih hi.

4. Mi thupite in zu dawn lo

                Mi thupi leh lawhcing hi-a ka theihte lakah zu dawn a, zu kham luailuai mu ngei lo ka hih manin zu dawnna hangin mi picing leh zattak kisuak ngei lo ding hi cih ka um hi. Pasian mizat thupite leh gam le nam adinga na thupi a semte’ tangthu ka simte lakah, zu dawndawn ka thei kei hi. Ahi zongin, mi thupi ding leh a lawhcing ding tampi, zu dawnna hanga mi zattak lo a suak pen laibu a sim zong kul loin ka mit tawh tampi ka mu a, “zu dawn kei leh aw” ci-in ka pahtak mahmah ding mi tampi zu in a buaisak ka mu hi.

5. Ka pumpi ka it hi

                Lai Siangtho in, nangmah na ki-it bangin na vengte na it in, hong ci a, midangte ka itna pen keima pumpi ka itna panin kipan ding ahih manin singtung kah ding a lek panin kumsuk sawm loin, a bul pan ka kahtoh kisam hi. Pasian in hoih sa mahmah-a a bawl ka pumpi sungah Amah ka zahtakloh nading leh, Amah ka phawkloh nadinga zu ka thunthun pen a kilawm het lo ahi hi. Tua banah, midangte tungah pumpi itna leh, pumpi a siasak thei nate zang lo dinga ka hilh theih nadingin zu ka ngawl pen kei adingin kisam hi.

6. Hong maizumsak hi

                Zu ka dawn ciangin lam pai hoih thei loin, mite maiah gen ding leh genloh ding zong ka khentel thei nawn kei hi. Ka lungsim a om khempeuh khatvei… eh... nihvei… oh… thumvei bang ka gen kikkik a, ka kianga omte theihnop zah val ka gen zel hi. Tua bek tham loin, lam pai zong ka siam nawn kei gawp a, tang taka pai ding cih thadah, lamsak lamkhangah ka lengkhia thei hi. Khatveivei lam geia tui lampi ah kia-in, tho zo nawn loin tua munah nuamsakna hang hi het loin ka giak a, khatveivei silh ding kician a omlohna leh zun hing lakah palikte in hong khumcip uh hi. Tua ahih manin tua banga hong maizumsak leh, zu ka dawnloh a zong a gentheih mahmah kei adingin, ka gentheihna hong behlapsak zu pen ka dawn nawn kei ding hi.

7. A mawkna in sum beisak hi

                A lamdang het lo, ka zu dawnpih a tamzawte in keimah bangin zu a dawn uh ciangin a sum uh itna meel thei lo hi. Nei lopi in zong hangsan mahmahin, sum muhna kician zong nei lopi’n a ba-in zu kidawn ziahziah ngam hi. Tua bang ‘hansanna’ pen leitung nuntakna suangah a kisam lo penpente laka khat ahi hi. Tua manin tate sang fee ding, laibu man ding, uniform man ding banah, innkuan kisap tuamtuam lei nading sum ka nei ngei kei uh hi. Mi kiangah sum leitawi ngen a ka pai uh ciangin zong ka piakkik nading uh a ngaihsut uh ciangin, leitawi sangin huhna dana hong piakvet a utna thu uh hong gen zel uh a, ko (leitawi) dingin sum nei ngei lo uh hi. Huhna piak cih zong a kamsiam uh hi lel hi. Tua bangin keima nuntakna hangin ka it ka innkuanpihte zong midangte adingin hehpih zong hehpih taakloh ahihna uh thei ta ka hih manin zu ka dawn nawn kei ding hi.

8. Midangte adingin haksatna

                Zu ka dawn ciangin, khuasunga om numei naupangte adingin mi manpha ka hi ngei kei hi. Zukham a mawtaw ka hawl ciangin ka tai hat leh hatloh zong theician meel loin mawk tai gawp ka hih manin tamveipi haksatna ka tuak a, kei bek zong hi loin ka mawtaw tunga hong tuangte in zong haksatna lianpi tuak zel uh hi. Zu ka dawnna hangin ka innkuan sung uah thu hoih a piansak lam ka thei ngei kei a, zu ka kham ciangin keimah, ka innkuanpite, ka vengte leh ka khua adingin mi gina lo khat ka hih manin zu pen ka ngawl ding hi.

9. Hong etteh kha uh leh

                Sawltak Paul in, ‘Keima nuntak bangin nungta un’ a cih bangin midangte kiangah ci kei mah leng, ka zu dawn hong etteh om kha leh, tuate nuntakzia pen hoih ka sa ding hiam? cih ka ngaihsun a, hoih sa lo ding ka hih manin zu ka dawnloh pen kisam ka sa hi.

                Ka tu ka tate in ka zu nek bangin ne-in, ka kham cianga ka omdan bangin innkuan hong buaisak leh ka lungdam het kei ding hi. Ka tate tungah thuman leh thu hoih ka hilh theih nadingin amau etteh theih dingin ka nuntak kisam a, zu a dawn uh hoih sa lo a ka hilh theih nadingin keimah mahmah in zu ka dawnloh kisam hi.

Thuhialna

                A bei ngei lo ding zu, siatna bulpi a piangsak, a kiduh mahmah, a hoih het lo khat pen, tam mahmah napi’n ka dawnloh a manphatna lian ka sa a, ka  kim ka kiangah tampi om zihziah napi a tuate a zang lo ngam dinga hangsanna leh pumpi ki-ukzawhna pen thupi sa ka hih manin, zu tam mahmahna munah zong zu ka ngawl ta ding hi. Bangci hiamin, zu zang siamin, kei adingin a hoihzaw a tun ding ahih leh ka dawn ding a, tu ciang ka nuntakna-ah zu hanga phattuamna ka ngahna leh, zu dawnna hanga mi thupi a suak mu nai lo dih ka hih manin ka dawn nawn kei ding hi. ‘Zu kham lo-a zong zawn le hai kawmkalah, zawn le hai behlap nadingin zu dawn nawn buang lo e maw!’

Daihna Cabin || 11.7.2013