HALLO ZOGAM – 7

HALLO ZOGAM – 7

(My imagination)

Zing khua hong vakin, huihdam hong nung hiauhiau a, sep le bawl kibang lo taktak, deihdan leh uk lam kibang lo taktakte in amau mai ciatah sep le bawl ding tuamtuam omte sem le bawl dingin phe biakbiak uh hi.

Zogam sunga mun minthang mahmah Len Nupa pha nuam ka hih manin thawh baih ka sawm hangin, kei sanga manlahzaw mite in a sep a bawl ding uh pan khin uh a, luplupna pen zawnna ahihna leh, bangmah sem nuam lo-a lim bek duhna pen mihing nuntak nadingin bangmah a kimanna om lo ahih lam kilang mahmah hi.

Ka pai nading mawtaw a hawlpa in hong tunpih khit ciang a kisam dinga ka ngaihsut van tuamtuamte tawh Len Nupa lam zuanin ka pai uh hi. Laitui khu-ah Gun pana kiman ngasa limci nono meh dinga kibawlte meh-in zing ann ka nek khit uh ciangin Kaptel lampi ah ka tai uh a, upmawh sangin mawtaw tam zaw hi. Ka mawtaw hawlpa kiangah, “Hici mah maw, mawtaw tam mah si e,” ka cih leh, Zogam kumpi leh gamdang a mihaute in Len Nupa pen Zogam kumpi sum muh nadingin nak takpi’n mi a hup dingin puah uh a, amun pen hoih lua, etlawm lua mahmah ahih manin tua mu nuam bekbek zong mi tampi gam dang panin pai ahihna thu hong gen hi.

Zogam kumpi sunga zin le leng a sai pawl, Tourism department lamte zong siam mahmah uh a, mite muhnop theih ding leh, mite in a phawk nop nadingin phat siam mahmah uh hi. A lim tuamtuam pen leitungbuppi a mi tuamtuamte muh theih dingin phokhia siam uh a, a mun le mual hoih taka a zem ban uah, a kiim a sing le lopate pen a kim apama om mite tawh panghuanin, mite’ muhnop leh mite in manpha a sak nadingin kemcing uh ahihna thu zong hong gen hi.

Len Nupa pen nakpi taka a kipuahna hangin Kaptel in zong phattuamna tampi ngah a, Kaptel khua sungah hotel hoih pipi tampi om hi. Tua in a khuasunga mite adingin nasepna tampi piangsak hi. Tua bek tham lo, zin le leng, Zopau a siam lote leh a mun le mual thei nailote a makaih dingin lampu (tourist guide) bangzah hiam om a, Zomi khangno, lai siam tampi in phattuampih ahih manin mahpha mahmah hi.

Kaptel khua-ah niangtui ka dawn zawh uh ciangin Len Nupa lamah ka pai suak uh hi. A lampi nuam mahmah a, lam geiah singteh nim dildial hi. Lamdang ka sa hi. Mun pawlkhatah lampi a omna hangin a kim a kianga singte kiphukin, zat val ding leh zuak ding nadongin sing kimot-lak hi. Tua hangin mun pawlkhat-ah lampi hangin kim le pam in nakpi takin thuak hi. Kaptel khua leh a kima omte in hih banga gamdang panin zong lunggulh theih ding khopa sing le lopate a kepcin zawhna uh pen thupha a sang taak mah ahihna uh leh, A bawlpa in hoihsa-a a bawl singkung lopate hoih taka a kepcingna uh hangin a bawlpa zong a lungdam mahmah ding ka um hi. Hih banga a bawlsa nate itna tawh lim taka a kemte pen kua-kua ahi zongin thupha a san uh leh ahi ding mah ahi hi, ka ci hi.

Len Nupa ka tun uh ciangin a mun pen nidanga maan sunga ka muh sangin na hoih zaw a, tua bang lawmlawma hoih dingin zong ka ngaihsun ngei kei hi. Mi zong na tam mahmah a, maan a kila tawh, video a kizah tawh, la a sasa tawh, lopa tungah bok hilhiala tong a ciamciam tawh, a lamlam tawh mi kicing bilbel hi. Ka upmawhlohpi in Sanggam Mizote zong honpi khat na om uh a, bang hih uh hiam ci-a ka dot leh music video bawl khawng na hi uh hi. Mun thupi leh etlawm nei-in, a puah, a zat, a kep dan siam photphot leng, e’n i gengen kei zongin, tua muna hong pai leitung pana mi tuamtuamte in na gensak kawikawi lai ding uh hi.

Len Nupa a tourist resort thupi mahmahte, swimming poolte banah, a thupi ka sak mahmah dang khat pen Zomite Inn, tanglai van tuamtuamte a kimuh theihna leh, nidang lai huna Zomite inn lamzia a kilangsak inn ahi hi. Hih inn kilamzia ka muh ciangin, Zomite pen nidang lai pek panin, ngeina kician tak a nei i hih inn lamzia panin zong kithei hi.

Mikang, Mivom, Kawl, Vai leh minam tuamtuamte in hih mun hong paina uh hangin, Zogam kumpi leh Len Nupa kim le pama mite in a phattuampihna uh ka ngaihsun a, a mapanna uh leh gim le tawl-a a sepna uh, singkung lopa kemcingin, mun le mual nuam takin a bawlna uh, huih siangtho a om theih nadinga a mapanna uh pen thupi ka sa mahmah hi. Tua bangin nak takpi’n a mapanna uh hangin, meetna leh phattuamna tampi a ngah uh zong kuama en theih leh kuama hazat thei dingin ka tuat kei hi.

Tua banah, Len Nupa leh a kiimate meetna, sum leh pai tampi tua muna a zangte pen, a lang lamin ngaihsun leng, hong paina sum bei uh pammaih mahmah hi. Ahi zongin, ahihna takah hih munah hong paina uh hangin, ei kianga sum a zat uh sanga tamzaw mu kik ding uh hi. Suma meetna a ngah lote in zong lungnopna beek ciahpih ding uh ahih manin, tua zong sum tampi in a lei theihloh ahi hi. Maan kilalate, video kizaihzaihte pen bang ding hiam i cih leh, tuate pen amau a sumbawlna uh na hi kik mawk!

Leitung pen eimah beka khuasak nadinga hong bawlpa in hong bawl hi lo hi. Supna khat tung pana meet ding khawng, gimna khatpeuh pana tawldamna ngah nading khawng, haksatna khat pana gualzawhna a ngah ding khawng zong hi thei hi. Tua hi a, Zogam sung a mual le guam hoih nonote leh huidam nung hiauhiau lunggulha hong paite in zong, sum le pai tampi a bei uh hangin, tua tungtawnin meetna bang hiam ngah ding uh a, tua pen leitung ngeina ahi hi.

Vai kiphamawh om vat ahih manin ka Zogam phakna hun zong tuni bek ka zang thei ding hi. Kawlpi pan Moreh lam tawnin Lamka pan Sinzawl lamah pai ka sawmna pen a piang thei lo ding hong suak hi. Tonzang tawnin Cikha ciang beek pai man leng maw, ciin ka ngaihsun a, mihing utna leh geelna pen vaihawmpa vaihawm dan hi lo ahih manin ka muhsa mun le mual, Zogam khantohnate pen thupi sa-in, ka pai nopna mun khempeuhah ka pai theihloh hangin ka lungdam veve hi.