HALLO ZOGAM – 2

HALLO ZOGAM – 2

(My Imagination)

“Zogam sung pha lo mai-in, hih ka kianga liapal tawh Len Nupa khawngah vak hialhial leng nuam mah ding hi ven” cih ngaihsutna ka lungsimah hong lut vat a, tangval lai peuh ka kisa mawk hi! Tua bang ngaihsutna bel kua peuhin nei mai-in zong um ing, ngaihsut pak bel ngaihsut theih hi a, ahi zongin picingsak kei peuh leng bang phamawh, ci-in kuama theilohin siam ka kitangsak tawm hi. Ka kianga lianu in ka ngaihsutna thei zen leh, mawtaw dang sap ut phial in heh ding maw, a melhoihna ka pahtakna hangin Laitui ah niangtui hong taih (treat) ding? Zomi nungakte zong hai het lo uh ahih manin a nunungzaw a pen bang ka lametna lianzaw mawk hi!

Tua banga ka ngaihsutna a vak kawikawi lai, a kikhami sak lua pawlkhat adinga pawlpi pan khal taak phial a ngaihsut theih ding ka hih laitakin, mawtaw hong ding vat a, ‘bang thu om hi ding hiam’ ci-in ka ngaihsut laitak, “Thungetna tawh i pai nading leh i hun leh vaite Topa tungah a ap thei i om hiam?” ci-in mawtaw hekpa in hong pulak a, ‘hi mah hi, hoih leh hoihloh lam hi loin, Pasian tungah vai khat peuhpeuh pen ap ding mah hi,’ ciin ka ngaihsun a, ka tutna mai liana samkang papi khatin, “Keiman hong nei ning ei” ci-in thungetna tawh hong zom suak ziau hi.

Thungetna a zawh ciangin zun suak pawlkhatte in zun tha in, Ke’n bel Thuamvum Industrial Estate, Zogam pana kibawl moh nei-in, Zo Damtui Company pana kibawl tui siangtho ka dawn khit ciang, Tedim lam zuanin ka paikhia pah uh hi. Pasian tungah hun leh vai teng a ki-apkhitna mawtaw tungah kituang ahih manin, Pasian deihloh leh a bawlsa mite adinga nawngkai-in zu kham kuamah om lo a, za tep vuauvuau om lo ahih manin tawldam mahmah hi.

Sawt loin Haimual khuathak tungto pahin, a innte zong na hoih thei mahmah ta a, lampi zong a to lua om nawn loin, a sau zawk hangin phei ahih manin kitungbaih hi. Mualdungah lampi kibawl tunga mawtaw tuan bel nuam ka sak hetloh khatte lakah kihel ahih manin mawtaw tuan zong nuam ta hi. Haimual khuathak a palik omte zong kizen mahmah ta uh a, kum 2013 June kha-a ‘Zosuan Tuailai Khawmpi’ sima ka pai lai uh a naikal 3 bang receipt hong ngaksak uh bang nawn het lo hi. Tua ciang tua muna semte zong Zomite mah hi a, Zopau tawh pau setsetin, nuam mahmah ta hi. A lamdang khatah, kumpi zumte ah zong Zolai leh Mikang lai tawh kigelh khin a, mun tuamtuam pana khualzinte adingin nuam mahmah pah a, khangtohna lianpi in ka tuat hi. Kumpi zum leh mun khatpeuhah Zolai, Zopau a kizang thei lo banga ngaihsutna, sila lungsim panin kisuakta ta hi, ciin ka ngaihsun hi.

Ka tutpihnu Zomi ding maha kilawm Zo liapal zong hopih man nai loin, keima bauibuai-in buai ka hih manin kilawm ka kisa kei a, Haimual khuathak panin ka paikhiat uh ciangin a min, a khua, a sep leh a zinna hang ka dong hi. ‘Tedim Sakollam a om, Yangon ah siamah sin, sang khawl sung Ciau a zinpak’ ahihna thu leh, ‘Ciin Sian Hoih ahihna thu’ hong genkhit ciang, nui hiuhiau kawmin kua hiam cih hong theihnopna thu hong gen a, papi ka hihna hoh gen lo mai ding ka hiam aw, ciin ka ngaihsut laitak, Ciau khua kianga ka thungetna uh phawkkik vat ka hih manin ama theih dinga kilawm ciang ka hilh a, Zogam khantohna hong hilh thei ding misiam khat tawh ka tutkhop hampha ka kisakna tawh ka zomsuak hi. “Sian Hoih ding mahin kilawm ciai” ci-in a min leh a pumpi kituak ka sakna thu ama theihloh khomin ka gen hi.

Zogam mual le guam leh a nim dildial singteh lopate in mit cimsak vet lo a, Zogam khantohna tawh kizuiin lampite zong hoih lua mahmah ta ahih manin khua khat le khat kikal pai nadingin hun sauvei kizang het lo hi. Lampi in a nawkkhak khuateah inn hoih nono ding zihziah a, khualai a Vok vak muh ding zong om lo hi. Phone pen India gam lamate zong kizang thei ahih manin vai nuam tuam mahmah a, a sia lamin zong nakpi takin kizang thei ding hi, cih ka ngaihsun hi.

Zogam mual le guan kantanin mawtaw tungah ka tuan laitak, ka lungsim vak kawikawi a, Mikang lai a theite mah bangin John Lennon in, Imagine cih la a phuak sung a……

Imagine there’s no country

It isn’t hard to do

Nothing to kill or die for

And no religion too

Imagine all the people living life in peace

… a cih pen ka ngaihsutna-ah hong lut dihdih hi. Mihingte phuak tawm gamgi-in Zomite hong khenna hanga nakpi takin a buaihuai dan pan kipan, Zogam adinga sisan naisan tam a luanzia khawng pen etdan khat tawh John Lennon ngaihsut bangin ka ngaihsun ciangin, hi zong ka sa mai hi. Ahi zongin a gual lina-a biakna pawlpi kici limlim om lo dinga a ngaihsut mawk pen keimah mahmah in zong san haksa ka sa a, (a ki) kha-mi (sak) pawlkhat adingin, a lutungah thungetsak taak phial dingin a ngaihsut ding uh ka um hi.

Gam tampi om a, khawk tampi om hi. Minam tampi tak om a, biakna tampi omin, leitungah mihingte a om sung teng tuate om kha ding hi. Tua bang a minam leh biakna tuamtuamte om vetloh pen daihna (peace) bulpi in a tuat pen, John Lennon’ etna langlam pan ka et ciangin maan ka sa kei a, ka sang zo kei hi. Bang hang hiam cih leh, mihingte pen gamkhatah i omkhop manin a kilem kihi tuan zenzen lo a, biakna khatah i omkhop manin zong a kilem kihi tuan peuhmah lo hi.

Nupa kilem takte nuntakzia ka et ciangin, a pumpi ci le sa uh, a ngaihsutna uh, a deihna leh uk lam uh kibang vek tuan lo hi. Ahi zongin, tua a kibang lo nate pen kitheisiam uh a, khat zaw ii ngaihsutna tawh a kituak lo deuh zong kimaisak thei uh ahih manin a kilem na hi uh hi. Tua ahih manin Zomi leh Zogam zong a om ding mah hi a, biakna zong a om mah ding hi. Ahi zongin leitung gam tuamtuam a Zomite leh biakna tuamtuam a zui Zomite pen ki-itna, kitheihsiamna leh kimaisaktuahna tawh i nuntak ciangin Zomitelakah kilemna leh daihna pen a taktakin om ding hi, ciin ka ngaihsun hi.

Mawtaw tungah Zomi la siamte in a sak uh la tuamtuamte la kisa sak a, tawldamsak mahmah hi. A tul thei lo U Thawn Kham, U Lengtong Pauno, Muana Ngaihte, Thangboi Mangte, B. Muan, Nancy Biaklun, Cingpi leh adangte pan kipan, Pasian la sa tuamtuam Staven Vocal Bang, Ngabeng Lite, Kapno, Dove Quartet, Gloria, ETC Trio leh a danggangte banah, Zomi la siam khangthak tuamtuamte in mawtaw tuanna-ah zong zaila tawh hong awi den uh ahih manin nuam mah si e, cih lohngal gen ding tam lo hi.

A lungdamhuai mahmah pen, Haimual khuathak pana ka paina lampi in a nawkkhak khuate ah biakinn lian pipi na om a, ka tutpihnu kiangah, “Bangci a, biakin gol thei si e” ka cih leh, “Nungkum masa in Zogam sungah Kha Siangtho in na hong sem a, nidang huna Kha Siangtho tawh kibang lo ahi diam, nidanga Kha siangtho pen Kha Siangtho hi lo zong ci kengin, thukhensat dingin zong kei hong kiseh kei in, ahi zongin a nasep dan kibang lo a, nung kum masa a Kha Siangtho hong tun ciangin Zomite biakna pawlpi tampi kigawm hi. Lamdang mahmah, Pasian pen ki-itna Pasian hi a, Pasian it luatna hang ci-a nidanga pawlpi a kikhenkhen pen nungkum masa a Kha Siangtho in hong gawmkik a, Kha Siangtho maan taktak hi ding hi. Tuhun ciangin biakinn zong nidang bangin tam zeizai nawn lo a, mi tampi kikhop nadingin biakinn zong lianpipi in kilamzaw ta hi” ciin ka deih sanga tamzaw, theihsiam a hak simin hong gen hi.

“Hi mah hi. Jesu in ‘kilemna a piangsak dinga hong pai hi lo hing’ a cih pen amah a um leh a um lote kikal ading hi a, ahi zongin ei Zomite bel Jesu nung a zui ciatciat, Lai Siangtho a um tek hi napi, hun khat laiin, a umlote tawh kikhen ding Jesu in a gen bangin thu-um mite i kikhenkhen uh a, hoih ka sakloh, ka gen ngam mengmengloh thu, kei theihlohin Zogam ah hong tung khin maw, sawt na ihmu sing e, a lungdamhuai mahmah thu za ing ei” ciin ka pulak hi.

Makai utna hang peuh, makaite tawh kilemlohna hang peuhin pawlpi thak kiphuanphuan nawn lo cih thu ka zakna leh, a kiphuasate zong Jesu lungsim bangin kigawmkik thei ahih manin tunglama ‘Pa’ pen lungdam mahmah dingin ka tuat hi. New Eden zong na thupi gawp ta a, sai bang om zihziahin, van kizuak zihziah hi. Tua van kizuakna khuanawl a khat ka muh pen mehteh-mehgah zuakna hi a, a ngak kuamah om lo (man-less shop) ahi hi. A van kizuakte’ tungah a man zah (rate) kigelh ziau a, a deihte in a deih peuh uh la-in, a man pen bawm sungah khia ziau uh hi. Hih bang ciang dongin a khangto Zogam sungah, Zomite cihtakna leh thumaanna paak hong palhkhia mawk maw, ciin ka tutpihnu tawh nek dingin tangmai khat ka lei hi.

Zoplai ding…………………