MISSIONARY TAWH KIHOLIMNA

MISSIONARY

LIA CING DEIH KIM TAWH KIHOLIMNA

India gam sunga ZBC khangnote laka missionary a kuankhia masapen Lia Cing Deih Kim, Upa Cin Sian Thang’ tanu, Vapar khua tawh kiholimna hun nuam takin Upa Z. L Thang leh Upa Kap Go Thang tawh July 4, 2013 (7:15 a.m) in ka nei uh a, manpha ka sa hi. Holimna anuaia bang ahi hi. – T. Sawm Lian, Daihna Cabin

Dotna     :   Amasa-in na nu leh pa, na pianna leh na pian ni leh kha nong gen thei diam?

Kim         : Ka nu min pen Nu Man Ngaih Lian hi a, ka pa min pen Upa Cin Sian Thang hi. February 9, 1994 in Vapar khua-ah suak ing.

Dotna     :   Sangkahna lam tawh kisai e leh?

Kim         :   Vapar khua-ah tan 6 ciang kah ing. Champhai ah tan 10 ciang. Tua ciang kum 2012 in Mission for Christ ah missionary dingin June sung ka training hi.

Dotna     :   Na missionary paina tawh kisai a tom kimin nong gen thei diam?

Kim         :   Kum 2012 February in Mission for Christ ah lai ka khia uh a, March kha ciangin interview omin, hong la pah uh hi. June kha sung ka training khit uh ciangin July, 2012 ciangin Varanasi, Uttar Pradesh ah hong paisak uh a, om nading om pak lo ahih manin mi inn khat saapin mi 12 ka omkhawm phot uh hi. Tua Varanasi khua panin km. 23 a gamla Puara ah om dingin thuneite in hong theisak uh a, tua munah pastor khat in inn saap ding hong zonsak in mi thum (3) ka om uh hi.

Dotna     :   Mision for Christ tawh kisaiin theih dinga kilawm pawlkhat hong gen ve?

Kim         :   Mission for Christ kici pen pawlpi deidan om lo-a gammial nasepna hi. A nasemte leh a vaisaite zong pawlpi tuamtuam Presbyterian, Salvation, Baptist etc. kigawmkhawm hi. Durtlang, Aizawl ah phualpi (headquarters) om a, tua panin a kisam bangbangin vaihawm uh hi.

Dotna     :   Puara khua sunga na nasepzia uh..

Kim         :   Pizing (Monday) pen mission holiday hi a, pithai (Tuesday) pan Nipini (Sunday) dong a khua sunga nasemte (local workers)  in hong makaihin ka vak kual zel uh hi. Mun tuamtuamah kikhopna nei-in, kikhop ka man uh ciangin hong kikhawm mite a lutung uah khut nga-in thu ka ngetsak zel uh hi.Tua ciang Pizing pan ninoni dong nitak lamin naupangte lai hilh kawmin pau ka sin uh hi.

Dotna     :   Na nasepna munah haksa na sak pen bang hiam?

Kim         :   Veina tawh kisem ahih manin a haksa lua cih bang om thei mel kei. Ahih hangin, RSS kici, Hindute in thugina lo a zak uh ciangin buaihuai thei zel. Mun gamla zaw deuh, singtang khuate-ah pasalte lungdamna thu genin pai thei zel uh a, thugina lo a zak uh ciangin RSS-te in na pangin, vua gawp thei uh hi. Ahi zongin, Pasian in hong kemin tu ciangciangah tua banga bawlsiatna hanga si ko kiangah om nai lo hi.

Dotna     :   Na nasepna sungah nuam na sak tampi laka khat le nih hong gen ve maw..

Kim         :   Nasepna munah bel nopsakna tampi kingah mah hi. Tuate lak panin khat bekbek hong gen leng, ko omna muna mite pen, nakpi taka a damloh uh ciang, dam zo nawn lo dinga a ngaihsut uh ciangin dawi ii mat ci-in inn pua lamah koih thei mawkmawk uh hi. Tua bang mite tungah  lungdamna thu hilhin, nakpi taka thu i ngetsak ciang Pasian vangliatna amau tungah kilangin hong damkik uh nuam sa pen ing.

Dotna     :   Ahih leh mai lamah bangci bangin kalsuan sawm na hiam?

Kim         : Pasian deihna bangbang hi. Pasian in pha a sak leh Merut ah kha 6 sung training dingin, tua khit ciangin eima deihtelna tawh kizui-in mission centre tuamtuamah sep nading tam mahmah hi.

Dotna     :   Khua sung vaksuk vaktohna lam e leh?

Kim         :   Ka omna uh pen mun zaang hi a, siksakol (cycle) zangin ka vakzel uh hi. Cycle khat pen a tawm mante Rs. 3500 bang hi. Tua pen komau lohkik dingin la-in vak nadingin ka zang uh hi.

Dotna     :   Nong dawng nuam diam, khasum lam tawh kisai..

Kim         :   Khasum cih dan zong hi meel kei. Lungdamman/lawmman cih dan hizaw. Ko pawlin bel kha khatin Rs.  4000 ngah ung. Pastorte bel tamzaw deuh in teh.

Dotna     :   Aw, siksakol khat lei le uh cin nek ding lei nading tam nawn lo ding dan ai ve maw. Ahih leh tua na sepna uh pen kum bangzah sung sep ding cih a om hiam?

Kim         :   Sep hun sung ding tawh kisai-in ciangtan om tuan kei. Eimah in i sep zawh sung teng sep theih hi. Sih dong i sep nop leh zong sep theih cihna hi.

Dotna     :   Ei ZBC pawlpi sunga khangnote lakah ka theihkhialh kei leh missionary masapen hi-in kong thei a, kong lungdampih hi. I pawlpi (ZBC) mission nasepna tawh kisai hici zaw leh cihna na nei hia?

Kim         :   I pawlpi in mission field or mission centre kician khat neizo-in, tua munah ei a pawlpi sunga omte leh eimite mahin sem leng, Jesu in mi khempeuh tungah nasem dinga hong sawlna a lawhcingsak i suak ding hi. Tua hi leh, ei pawlpi sung leh eimite sunga veina a nei, a lampi thei lote adingin phatuam mahmah dingin um ing. I pawlpi’ mission nasepna zong tu sangin tangzaizaw ding hi.

Dotna     :   Na innkuanpihte lam panin phallohna hiam, mun gamla pek a pai kul a sa lo leh na pai nadingah haksatna a om hiam?

Kim         :   Pasian huhna tawh tua banga haksatna leh lungnoploh nading ka innkuanpihte panin bangmah om lo hi. Sum le pai ahi a, thungetna tawh ahi zongin hong panpih uh a, amaute thungetsakna leh panpihna hangin zong nasep mazangin kithei ing.

                                Biakna dangte hanga ka omna kiim uah haksatna a om ciangin zong ann tangin thu hong ngetpih zel uh a, hong thapiakna uh leh panpihna pen thupi ka sa mahmah hi.

Dotna     :   Nang nungak lai ci leng, pasal dingin bangmi hoih na sa. Ei Zomi mah ci tentan maw, ahi kei leh khatpeuh phamawh kei ci..

Kim         :   Hi thei hi leh bel eimi mah hoih sa pen ing. Bangbang ahi zongin Khristian innkuan bawlpih theih ding, Pasian a zahtak mah deihpen ing.

Dotna     :   I thu nunung dingin, khangnote lakah vaikhaknop hiam, gennop na nei hiam?

Kim         :   Gennop bel tam mahmahin, tuate lak panin – Pasian nasep leh Pasian adinga kipiakkhiat pen kisiik nading bangmah om ngei lo hi. Jesu in leitung khempeuhah pai kawikawi a, lungdamna thu gen dingin hong ci hi. Tua hong sawlna banga, i pilna i siamna, i hun hoih leh i thahatnate zang leng Pasian a lungdam ding hi. Ko sepna Mission for Christ sung bangah sep nading tampi om a, a mi kicing lo zaw hi. Tua ahih manin khangnote lakah Pasian nasep nopna lungsim a neite adingin mun tampi awng lai hi.