TULAI MIZOGAM

TULAI MIZOGAM

·         July 3, 2013 in Champhai North constituency MLA T. T Zothansanga in Champhai District sunga Middle leh Primary sanginn 77te adingin computer khat tek, Venglai Community Hall, Champhai ah hawm hi. Hih computer a ngah sanginn a sangsiate zong computer zat dan kisinsak suak pah hi.

·         July 4, 2013 in Mizoram Excise & Narcotics Minister J. H Rothuama makaihna tawh Mizoram State Prohibition Council in Secretariat Conference Hall ah meeting nei uh a  Mizoram Liquor Total Prohibition Act, 1995 nuaia nasepdan leh hih Act tawh kisai a study groupte report leh hoih a sak thute uh kikupna nei uh hi. Hih hunah Excise & Narcotics Commissioner Lalbiakmawia Khiangte in January – June 2013 sungin zu Rs. 9,616,568 man mankhia uh a, a matsate uh auction-na panin Rs. 4,815,510 mu kik uh ahihna thu leh a sum muh khempeuh uh Rs. 14,695,968 ahihna thu gen hi.

·         Mizogam kumpi in Manipur state sunga butom Hmar Peoples Convention (Democracy) tawh kihona pen July 18 ciangin Aizawlah neih ahih nading thu pulak hi.

·         July 7, 2013 nitak in Aizawl Dawrpui venga Lalpianmawii w/o Nazir Uddin pen Mizo Zirlai Pawl (MZP) makai khatin khutkhia ahih manin zato innah kipuak hi. Hih banga amau vengsunga khut khia MZPte tungah Dawrpui khuasunga makai tuamtuamte heh mahmah uh a, sum Rs. 50,000 tawh thuum dingin a deihna thu pulak uh hi.

MZP in thupulakna panin hih banga thu namtui lo a om pen poi a sakna thu uh leh hih khut a khiapa pen MZP panin a hihna khempeuh kikhawlsak pah ahihna pulak uh hi. National Trade Union of Mizoram (NTUM) in hih banga mi khut thuaka Lalpianmawii a om pen a upmawh dan ahihna thu leh, minamdang pasal a nei ahih manin Mizogam paikhiatsan dingin a deihna thu uh pulak hi. Mi pawlkhat in a genna panin, unau tampite simawh bawlsia-in, a hawlkhia nuamte in, Vai pasal in a nei mite a panpih mahmah pen kilawm a saklohna thu pulak uh hi.

·         July 8, 2013 in Mizoram University (MZU) a Lower Division Clerk (LDC) 13 lakna tawh kisaiin MZU a nasemte in a deihsakte bek la uh, ciin Mizo Zirlai Pawl (MZP) in a cing leh siamte la a, deihsakte la lo dingin a deihna thu hangin MZU gate ah kikaikhawm uh a, tua hunah palikte tawh a kinawkna uh hangin mi 10 val in liamna thuak uh hi. MZU Vice Chancellor Prf. Lalthantluanga in hih MZU a nasem ding lakna tawh kisaiin Executive Council, tu kha ni 26 cianga neih ding hunah gen a sawmna thu pulak a, ahi zongin MZPte in MZU VC tanaute mahmah zong hih nasem ding lakna-ah kihel ahih manin ama sep theih ahih hangin nasem lak thakte cancel nuam lo hi, ciin gen uh hi.

·         Tuivol bial MLA R. L Pianmawia, Deputy Chief Whip, Government of Mizoram pen, Area Development Fund maan lo taka seal lem (fake seal) tawh a lakhiat manin K. Laldinthara, Khatla, Aizawl in Aizawl Police Station ah FIR khia a, tua hanga R. L Pianmawia in bail a ngetna pen Aizawl District & Session Judge K. L Liana court in July 10 in ngaihsun a, anticipatory bail a ngetna pen piak nading a hang om lo ciin court in sanglo (dismissed) hi. Hih banga a ngetna court in sang lo ahih manin palikte in July 11ni-in R. L Pianmawia manin Aizawl Central Jail ah koih uh hi.

·         July 10, 2012 in Mizoram University nuaia kum 2008, 2009 leh 2010 a degree course tuamtuam B.A/B.Sc./B.Com/B.Sc (H) result pulakkhiatna nei a, laivuan khempeuh 5,124 lak panin mi 3,059 (59.70%) in gualzawhna ngah uh hi. B.A leh a kikimpih mi 3,000 val Mizogamah kibehlap thak hi.

·         July 11, 2013 in Mizoram State Planning Board Vice Chairman Lalkhama in Champhai pha a, Champhai District sunga department tuamtuama uliante tawh holimna neikhawm hi. Hih hunah Mizogam kumpi flagship programme NLUP tawh kisai leh, Champhai khua a Helipad bawl ding, Champhai pana gamla lo Kelkang gama vanlengtual (airport) bawl ding, Champhai a cold storage manpha taka zat ahih nading, DC complex luia Auditorium sak nading, Tlangsam khua a Aisan hekna set koih nading leh, Indo-Myanmar Trade picing taka bawl a kisapna thu genkhawm uh hi.

Tua banah, lampi tawh kisaiin Seling to Zokhawthar via Champhai pen double lane highway a nasep a kipat pah nading, Zokhawthar to Falam leh Zokhawthar to Tedim lampi double lane a bawl ahih theih nadingin a hatzaw sema mapan a kisapna thu genkhawm uh hi. Hih hunah Champhai khua sunga department ulian 20 val paikhawm hi.

·         Laimal a kikhial a om leh hong theisiam un……