HALLO ZOGAM – 3
(My imagination)
“Niangtui maw na duh coffee, ahih kei leh theitui vot” ciin lungsim leh melhoih a thuah ka tutpihnu Hoihnu in dawn khoppih dingin ka duh hong dong a, ‘Ciau a i omna
sawt nai kei si e’ cih ngaihsun kawmin ka khaudak leh lampi kituntuahna mun
khatah niangtui dawn dingin a tawlnga ka hih lam uh ka phawk hi. Ka tutpihnu
dotna zong dawng man loin ka khuadak kawikawi leh Lentang khua a kitung na hi
ziau mawk hi. Ka mai lama lampi gei a lai kisuang ka et leh Kaptel lampi ahihna
ka thei a, ka nung lama lampi ka et leh Tuidil paina lampi ahi hi. Nidanga
mawtaw zong a pai hoih thei lo lampite kattaia (alkatra) tawh na kizutin, lampi
hoih lua mahmah ta hi. Kaptel lampi hoihdan ka muh ciangin, hih lampi tawnin
pai nading mun nuam leh thupi khat beek om ding hi, cih ka thei hi.
Sapna aw za napi
tua lam ngaihsun lo a lampi ka etna thu ka phawkkik vat a, tangval laia zong
nungak a vakpih ngei mel lo khat adingin bel ahi thei mah hi, cih ka ngaihsun
a, bang, ‘tuhun mi tampi in zong sapna
cih thadah, sawlna aw za napi’n,
Jonah bangin ahi lo lamah taitai uh hi lo maw’, ciin ahi thei thu ahihna
ngaihsun kawmin ka tutpihnu omna lam zuanin ka pai hi.
Niangtuisai sungah
lutin, niangtui lo deuh dawn ka sawm hi. A om nak leh Zogam pana piang theitui
pen dawn limlim dingin ka ngaihsun a, a man a tamzaw deuh phial zongin Zogam
sunga nasemte thapiak nadingin ngaihsun ka hih manin ka sum ka it kei hi.
Lenggah tui san kiuhkeuh thawl khat sabuai (table) tungah hong koih uh a, ka
tutpihnu in zong a sa sangin a vot duhzaw ahih manin ka kithutuak bilbel uh hi.
Ka dawn khit uh ciangin a man piak ka sawm leh ka tutpihnu in, “Ken pia khin” ci ziau hi. “Mawkmawk, kei piak dinga kilawm hizaw e” ka
cih leh, “Gamlapi khualzin lai ding na
hih manin hih pen kei hong taih (treat) danin ngaihsun inla, lungnuam takin om
in” hong ci hi. Ciau pana ka ngaihsutna hong tangtung mawk hi, Laitui tunma,
Lentang-ah! Lem in cia!
Hih nu hoh kamsang
ahi mai diam maw? Mi lungsim thei-thei ahi mai diam? Thei hi mawk leh Len Nupa
a vak hialhial dinga ka ngaihsutna khawng aw…… keipa aw…. Pasal khat pen numei
taih (treat) sa a om zong a maizumhuai kawmkalah, kamsang hi-in ka lungsim a
thei khin hi leh aw…. ciin ka ngaihsun a, hong taih nuam limlim hin teh, ciin ‘kamsang hi ing’ ci-a hangsan taktaka
thugente lakah zong Pasian tung pana a ngah taktak mah bangin amau upmawh thu
peuh a gen tampi om e... ciin ka kihehnem hi. Ka lungsim a thei hi leh zong
bang, vakkhop khawng leltak… mawtaw zong ka tuangkhawm uh veh….
Tua banah, bang
hangin ‘gamlapi khualzin lai ding’
hong ci ahi tam? Kawlpi ciang ka pai nading bek hilh ing a, ka ciah lam ciangin
Tamu lamah Moreh panin Lamka-ah paitoin, Guite Road tawnin Sinzawl pan Mimbung
lamah kileh ding ka hihna thu lah hilh lo, thei takpi ahi mai diam maw, ahih
kei leh kei adingin Kawlpi pen gamla sa mahmah ahi kha tam? Bangbang ahi zongin, amau upmawh banga mite
lungsim ding a tuatsak pawl zong tam mahmah e, ka hihloh napi zong hi banga
hong gen tam mahmah. Ka hihna banga mite gen khempeuh ka hihna hi khin tuan lo
a, hi lo ci-a hong genna uh zong ka hihlohna hi khin tuan lo hi, ciin ka
ngaihsun hi.
Lentang panin pai
kikin, lampi zong nop mahmah lel ahih ciang Laitui ka tungsuk pah uh a, Lentang-ah
khawlkhin ka hih manun ka taisuak uh hi. Laitui khua pen nidanga a khuasung
lampi neu ka sak mahmahte na kek ta uh ahih manin lampi zong lian mahmah a, lampi
a nop leh khuasung zong nuam hi, cih ka ngaihsut zel pen, Laituite in ciamkhata
ahih manin ka lungdampih hi. Nungak tangval kizem zitzetin lam geiah a kizuite
ka muh ciangin lamdang ka sa a, ka tutpihnu kiangah ka dot leh, “Laitui-ah college omta hiven, college a
siamsinte hi in teh” ci-in hong dawng a, zato inn zong lupna 100 ciang omta
ahihna leh, Zogam sungah gamdang panin company
tuamtuam hong lutta ahih manin tua munte a sem zong hi mai thei ahihna zong
hong hilh hi. Laitui khuapen tua bang dingin zong kilawm mahmah hi, a inn zong
tam, zong hoih, a mi mahmah zong tam ta ahih manin ahi thei ding mah hi, ciin
ka ngaihsun hi.
Laitui panin gunah
tuaksuk ding hi ta. Nidanga lampi tawh a kibang nawn vet lo lampi ka zuih thak pen,
hih mun takah a hoihna lian diak hi. India gam lam pana Indiate in amau meet
nadingin lampi a bawlsak tungah kitaitai ahih lam khawng mi tampi in thei lo;
tua mah bangin, Zogam sung mahmah a omte in zong hamphat pih ahih lam a thei lo
tampi om hi. Hamphatna leh meetna cih pen sepkhopna pana hong piang hi a, ‘gam khatin gam dang khat nakpi taka a panpih
leh tua gam panin bang hiam meetna a ngah nading zong hi thei hi’.
Ciau pana India
kumpi in lampi hoih mahmah, lamto lua leh suk lua a omlohna-ah mawtaw tawh
kipai ahih manin kilamzang mahmah a, a diakin Laitui leh Gun kikal leh Gun leh
Tedim kikal mahmah tuan nuam hi. Laitui panin suk nawk pah vingveng lo a, Muizawl
khua lamah kawi phei-in, lamsuk lamto a om luatloh nadingin livei a kivialh
khit ciangin Gun lei kitungsuk hi. Nidanga mawtaw tui sa lua ahih manin tui vot
thun dinga mawtaw nungzui (handyman)te a buai theih mahmah uh pen om nawn loin, tuhun
ciangin mawtaw lian mahmah, van puate bekah mawtaw nungzuite om uh hi.
Gun lui ka tunsuk
uh ciangin nidang tawh na kibang nawn vet lo hi. Hih Gun pen tui a cin theih
nadingin ‘dam’ kibawlin a tui kidal a,
tembaw pai ziahziah theih nadingin a tui tam ta hi. Tua tungah a muanhuai
mahmah in lei (bridge) a kibawl tungah ka pai uh hi. Gun lei kiang inn omte
zong na khangto mahmah a, a hang ka dot leh,
‘hih Gui lui tui a kidal ciangin tua a mu nuam leh ngasa beng dingin mi tampi
hong pai uh a, uliante in tawldam nadingin hong zang zelzel uh ahih manin
khangto mahmah hi’, ciin hong kidawng hi. Hih tui tampi kidal a dam a kibawlna panin tuitha tawh meitha (hydro-electricity)
kibawlkhia ahih manin mei zong deih bangbanga zat ding om ahih manin, sep le
bawl dingte baih takin kisem, kibawl thei a, nuntak nuam mahmah hi. Meitha hoih
takin kingah ahih manin ann huan nading leh a kisam tuamtuam in zong kizang a,
ann huan nadingin sing kilimlak nawn lo ahih manin gam sungah zong sing hong
tam tuam hi, ci uh hi.
Tua Gun khua-ah
tomcik ka tawlngak sungun hih Gun ah ‘dam’
a kibawlna hanga meetna tampi hong hilh uh a, Zogam sunga khua tampi in meetpih
uh ahih lam hong gen uh hi. Tuate lakah, ‘Dam’
a kibawlna hangin mun dang panin tembaw hong tung ziahziah a, van man pen hong
kiam mahmah hi. Mawtaw a puak sangin tembaw tawh kipuate a man tawmzaw hi. Tua
banah Tongsial, Tuicinlui, Lezang, Nakzang, Haipi, Senam ciang dongah tua khua
mite in meetpih mahmah uh a, ngasa mat bek tawh a nekzong zong tampi mah om
ahihna thu hong hilh uh hi. A vukcip sing le lopate a ithuai mahmah hangin, kikawm
tuahna a baihsak banah, nek zon nading tampi piangsakin, meitha kicing taka zat
ding kibawlkhia thei ahih manin manpha veve hi. ‘Meetna a om nadingin bang hiam sup a kisap hun zong om a, bangmah sum
ngam lopi-a meet sawmna pen a hoih het lo thu ahi hi. Sup ngamna cih hangin
sumh ding cihna hi tuan lo hi.’
No comments:
Post a Comment