HALLO ZOGAM – 4

HALLO ZOGAM – 4

(My imagination)

Gun panin dingkhia kikin, nidang hun hi leh a kikah to pah ding kimlai, lampi thumvei a kivial khit ciangin Lamzang kitung a, Lamzang khua sunga hai kungte zong gol thei mahmah ta hi. Lamzang khua sunga lampi zong lian mahmah ta-in, a suk lua leh a to lua om lo hi. Lamzang khua-ah Zomite adinga mi thupi khat phawkden nadingin innpi kilam pen lampi panin kigalmuh thei a, ‘T’ kician taka kigelh a kimu pen bang cihna ahi diam cih ka ngaihsun a, ‘H’ pen Hall cihna hi dingin ka ngaihsun hi. Nidang huna Zomite adinga nasem taktakte pahtawi nadingin hih bang a kibawl pen thupi ka sa hi. Zomite zong khantohna maan takin kikhangto ahih manin hih bang thu lianpi kivaihawm thei ahi cih ka phawk a, kiselselna leh kithutuaklohna hangin minam sungah meetna bangmah om loin, hih innpi in a khangto minam dangte mah bangin Zomite lakah kipahtawi siamna om ta hi, cih kilangsak ka sa hi.

Lamzang panin zong to kah veva loin, khatvei a kivial khit ciangin Gawng khuasungah mawtaw lampi paita a, a dim tekin mawtaw in van a puak hangin zo mahmah lel hi. Gawng khua sung panin to kah hiaihiai kik a, Sakollam ah suakto hi. Lamdung tengah inn om zihziah a, lampi leh nidanga Tedim khuapi kikal tengah inn dim zihziahin, suah lam mah bangin tum lamah zong inn na tam mahmah ta hi. A mual kimvelin Zomite inn bekbek om zihziah a, zan bangin a kipai hi leh, tang ziahziah ding a, etlawm mahmah ding hi; suna muh pak sangin!

Ka tun nading Sakollam a hotelah ka tuanpihnu tawh kumin, amau inn zong ka tun nading panin gamla lo ahih manin khe tawh hong paisan a, ‘business card’ ahi zongin, kithuzak kik nading bangmah ka ngaihsutloh lam ka nung phawk a, tua bang ‘mood’ ah om man nawn loin Zogam khuapi’ Tedim ii khantohna in ka ngaihsutna liansak zaw ahih ding ka lamen hi. Kei zong hotel ah lutin, ka kisil khit ciangin khuadak dingin inn tungah ka kah to a, ka tunna inn pen tua kiima innte lakah a sangpen ahih manin muh theih ding tampi om hi. Khua ka hek kawikawi leh Tedim khuapi ii khantoh dan leh, innte zong a thak sitset tawh kibangin zong (colour) hoih takin kizut sitset hi. Kumpi hoihin, mipite itna tak tawh makaih uh ahih manin leh, a sepkhop siamna uh hangin hih bang khantohna om hi dingin ka ngaihsun a, pankhop pen hatna ahihna leh, pankhop a siam minam pen leitungah mite in zahtakin, gualtung tuang ding uh hi, cih kilang ka sa hi.

Tedim khuapi sung pen Kawlpi leh Ciau lampi in tawnsuak ahih manin lampi kianga innte zong hoih thei mahmah a, inn khempeuh pen vanzuakna leh niangtui zuakna pan kipan, ann leh giahna ciang dongin kizang khin hi. Ciau tawna India gama lama van lut ding khempeuh pen Tedim-ah khawl uh ahih manin tua zin le lengte hangin hamphatna lianpi Tedim mipite in ngah uh a, a lang lamah a hoih het lo pumpi kizuakna nadongin om kha ding hi! Bangbang ahi zongin, khantohna  a om ciangin mihingte lakah sepdan (impact) nihta om zel hi. A meetpih, a hauh lawh, a phattuampih tampi a om mah bangin a sia lama amau tungah tua khantohna-in na a sep zong om veve hi.

Tedim khualai zanga galkapte omna leh huang zapi a nei lutolte omna tengah Zogam kumpi zum tuamtuam om zihziah a, Zomi mipil misiam tampi takin Zogam khantoh semsem nadingin na sem ziahziah uh hi. Zogam kumpi nuaia Art & Culture Department zumpi-ah ka vak leh, tanglai van tuamtuam leh Zomite van-gilte a kikoihna-ah nasemte khatin hong vakpih a, Zomite van-gil tuamtuam ka muh ngeiloh tampi na om hi. Zogam sunga thupiang tuamtuamte tawh kisai-in a thu leh maan tampi na om a, ka etet leh Cope Kum Za Pawi, 2010 maan leh a khatveina Zosuan Tuailai Khawmpi, 2013 maante lakah ka kimu kha citciat a, aw, hua hun lai khawngin naupang lai sing maw, ciin hong paipih siapa kiangah keimah ka hihna ka maan etna-ah ka hilh hi. Tangthu leh hun manpha a hunzatzia kepcinna pen a manphatna i theih kei a, i mawk beisaksak leh nidang ciangin i tu, i tate in hong mawhsak ding uh hi, ciin hih huna hun zatzia kician taka a kicepteh manin, tua hun laia vaisaite pil ka sa mahmah hi.

Art & Culture department nasep tuamtuam hong kithuahpihpa in hong gen a, Cultural Meet ci-in Zomite ngeina lam leh thu le la tawh kidemna limci takin khua tuamtuamah Zogam kumpi in a saina thu-uh ahi zongin, Tuipi gal dongah Zomite ngeina laam hoih nonote Zogam kumpi sawlna tawh Zomi lia leh tangte in lakkhia zelzel uh ahihna, Zogam a mun minthang leh min neite kemcing dinga a mapannate uh ahi zong, ngeina vante leh van-gilte nakpi takin kaikhawmin, a thei nai lo Zomi khangthakte in a muh theih nading un a hanciamna uh hong gen hi. Zomite nidang laia a nuntakzia uh khangthakte in a theih nadinga hih banga van-gil leh thu le la hoih a vaihawmna uh thupi ka sa hi.

Art & Culture nuaia misiamte in Zomite tangthu a kanna uh laibu in a kibawlte zong honpi khat na kem uh a, tua banga a kan ngiat dingin Zomi mipil bangzah hiam in tua deparment ah sem uh hi. Hun khat laia Mizogam lama Art & Culture departmentte kalsuan bangin, Publication Board om a, tuate in laibu hoih nono, sum le pai haksatna hanga a bawl zo lote in a bawl theih nadingun hanciampih uh ahih manin laibu zong tam mahmah ta hi. Tua banah, Zogam kumpi sum tawh laibu manpha tampi a lomlomin lei uh a, tuapen khua tuamtuama laibusal (library) adingin a khawnkhongin hawm uh ahih manin laibu bawlte adingin manpha mahmah hi. Tua banah Zogam sungah laibu om zihziah ahih manin, tuate tungtawnin Zomite in nek le tak zonna-ah phattuamna tampi ngah uh a, kampau-mukpau kilawm, leh thu theihna tampi ngah uh hi. Laibu manphatna leh lai nasep theihzia kitheician mahmah ahih manin a nasepna uh thupi mahmah hi. Zolai hangin Zogam sungah Zomi, mipil misiamte in kumpi-ah nasepna ngah theita ahih manin khangthakte lungsimah Zolai siam ding a hanciamna lianpi a om ding ka lamen hi.

Hun khat lai-a a kilunggulh mahmah, nisima thupiangte mipite in a sim pahpah theih nadingun nisima suak thukizakna (daily newspaper) bangzah hiam Tedim ah om ahih manin lungdamhuai sa ing. Tua banga laihawm a saite adingin kumpi in zong hanciampih mahmah a, advertisement pan kipan, a sem a bawlte adingin hamphatna lianpipi bawlsak uh hi. Zogam Journalist Association ci-in kipawlna kician tak, Zogam sunga khua tuamtuam a lai lam saite’ kipawlkhopna om a, Zogam sung leh leitung mun tuamtuama thupiangte kihilhtuahin, amaute pankhop siamna hangin Zogam sunga Zomite in thuthak leh theihhuai thu manpha nonote za pahpah hi.

Sport Ministry lamin zong nakpi takin hanciam uh a, Zogam sunga Zomi, talent nei hoih mahmah, kimawl siam mahmahte zongkhia-in, leitungbup-ah a kidawk dingin nakpi takin hanciam uh hi. Kam Hau Stadium kici, Sakollam-a pen tungkhuh a nei, a kiim a kiangah mipite tut nading lianpi in kibawl a, a tualpi sungah kiak lem (artificial turf) kiphah ahih manin khangthak tukpeng uukte adingin nuam mahmah ding hi.

Zogam galkapte zong tha lian, pil tuak mahmah uh a, US Navy Seals Team 6 mah bangin om gemgam uh ahih manin hopih ding zong nuam ka sa kei hi. Thahatlai hun hi leh, tha le ngal sit loin, ka thagui-thatangte hih mite tawh Zogam adingin zang nuam sing e, ciin ka ngaihsun hi.

Ka vak kawikawi leh, ka upmawh sangin Tedim khua sungah hotel na tam zaw hi. Mihing zong tam mahmah mawk hi. Bang hang hi ding hiam cih ka dot leh, Tedim-ah inntekte leh zin le leng mahmah tam hi. Zogam huihsiang dik ding bekbekin zong mun gamla pipan mi hong pai mawk uh hi, ciin dawnna ka za hi. “Aw, Pasian hong piaksa huih siangtho bekbekin zong, Zogam adingin sum tampi hong muhsak hi mawk veh e” ciin, lungdam na mel a thei lo, huih siangtho hanga mi hau tampi a om ding ka dah mahmah hi. Lamdang mahmah hi. Mi pawlkhat pen, amau nekzonna leh nekmuhna ahi, nuamsa taka a nuntak theihna uh Pasian bawlsa tui siangthote, huih siangthote leh singkung lopate zong itna mel thei loin om mawk uh hi.

Tedim khua lai zangah inn lianpi khat om a, bang inn hiam cih thei nuamin a kiangah ka pai leh Cope topa phawkdenna innpi na hi hi. Gol mahmah a, a sungah ka lut leh siangtho sitsetin, tutna nuam nono na dim zihziah a, khuasung mite kimuhkhopna khatpeuh a om ciangin kilimzat mahmah hi, cih kilang hi. Cope topa hong pai zawh kum za cin pawi, 2010 November kha-a a kizat hunin, tutna zong om lo, Coat Suit tawh leilakah tut ding lah hi lo, a gimhuai dan ka ngaihsut kik ciangin, khawmpi khatpeuh om leh, nuam leh tawldam takin kitu thei ding hi tah, ka ci hi.

Hun khat lai bang loin biakinn tam zeizai nawn lo a, a omsunte lian thei mahmah hi. Upzia leh paizia kibangte pawlpi khatah kigawmkhawm uh ahih manin biakinn lian thei mahmah hi. Khristian taktak, upna maan tak tawh Zomite nungta uh a, makai hih utman peuh, makaite tawh kilemloh man peuh ahih kei leh, pawlpi sunga mi khat tawh kilemlohna hanga pawl tuam sat om nawn lo hi. Mi a tamzawte in Jesu tawh a kizopna uh thupingaihsut uh ahih manin, leitung nuntakna-ah thupina, vangliatna, leh gualzawhna sawm luatin nei lo uh hi. Tua in ki-itna leh kilemna, kithutuakna piangsakin, Zomite thu-upzia zong nakpi takin a hoih manin kilamdangsak hi. Ki-itna tak tawh nuntakkhop diamdiamna munah, khantoh baih a, mipite in nuamsa uh hi.

Pawlpi tuamtuam bel bangzah hiam om lai veve hi. Ahi zongin, pawlpi tuamtuamte in amau pawlpi milip tam nading lam sangin, pawlpite sep ding tak Kha mangthangte awlmawhzaw ta uh ahih manin pawlpi hanga buaina tam lo hi. ‘Pawlpi milip tam nading deihna hanga kamsang kineih peuh, thungen lawhcing thei a kineih peuh om lo ahih manin Zogam sungah a kisam het lo a kisiansuahna peuh, gan gawhna cih peuh om nawn loin, Jesu sisanin a umte mawhsa siangsak khin zo a, a dang sisan kisam nawn lo hi, cih kitheician mahmah hi’. Tua banah, gammial nasepna lamah, pawlpi tuamtuamte panghuanin nasemkhawm thei ta uh ahih manin na lianpi sem thei hi. Hizaha kipumkhatna manphatna thei baihin, pawlpite sep ding tak semkhawm diamdiam hi leng manpha zen si’n teh, i kalsuanna sa-a i kithutuaklohna hunte pammaih lua, ci-in mi tampi in gen hi.

Lai Siangtho sungah, thukham lianpi nih a gen, lungsim khempeuh, ngaihsutna khempeuh, leh pilna khempeuh tawh Pasian it ding leh, eimah i ki-it bangin i vengte it ding, cih pana piangkhia thukham tuamtuamte pen a taktakin kizang ahihna muh theihin om hi. Bang hang hiam cih leh, Zomite in itna nei hi. Itna nei napi’n kua’n midangte siatna bawl ding, i it mahmahte van kuan gu ding, kua’n i it mahmahte that ding, kua i it mahmahte tawh kikhenkhen ding….. tua ahih manin a huampi-in, Zomite’ thu-upzia pen hoih mahmah hi, cih ding hi. Nidang huna siatna tuamtuam hong tungte pen itna i neihloh man hi a, khat le khat in lungsim takpi tawh itna a neihna munah Pasian lim le mel kilang a, nuntak nuam hi, cih kimu thei hi.

Zoplai ding………………….