NATIONAL FOOD SECURITY BILL, 2013

India Kumpi’ thukhun thak

NATIONAL FOOD SECURITY BILL, 2013

         India gam pen mipite in amau adinga vawihawm ding kumpi a teelna/bawlna (democracy) gam khat ahihna tawh kizuiin, kumpi thuneite in mipite khual mahmah na ciang khat nei uh a, party tuamtuamte in mipite adingin na hoih sep sawmin, a hoih lamin nakpi takin kidem uh hi.

         India gam kiteelpi 15-veina, kum 2009 pan 2014 sunga India gambup vaihawm dinga kitelkhia, United Progressive Alliance (UPA) kici, India National Congress (INC) makaihna in India gam sunga mi genthei leh mi zawngte a khualna uh tawh kumpi nasem omlohna innkuante, a ut uh leh kum khata ni 100 sanga tawmzaw lo sum thalawh theih nadingin Mahatma Gandhi National Rural Guarantee Act, 2005 (kum 2009 ma lamin NREGA) ci-in, kum 2006 panin nasep hong kipan uh hi. Kumpite ngimna bangin kiphattuampih maw, kiphattuampih lo, cih bel mipite thukhensat dingin koih ni.

         July, 2013 sungin India phulpi a kumpite in India gama mi gentheite khualna in vaihawmna khat nei kik uh a, tua pen National Food Security Bill, 2013 ciin, Vaihawmna Innpi (Parliament) ah genkhawm loin, India President thuneihna (ordinance) tawh zat pha theih dingin kibawl hi.

         Leitung bitna (security) pen leitungbup in a buaipih mahmah khat ahi hi. Tua laiah mihingte bitan (human security) pen a thupingaihsutpen uh hi a, thau leh galvan zah mahin, gam sunga mihing nuntakna-ah lungmuan tak a nek le dawn hoih takin a ngah theih nading uh  pen a kisapna kiphawk pha mahmah hi.

         Tua bitna sungah, sum le pai lamah dinmun hoih (economic security), kim le pam pana siatna hong piang theite pana bitna (environmental security), minam neuzawte simmawh lo-a a bit nading uh (community security), cidamna hoihzaw neih nading (health security), politics lama suahtakna (political security), mihing mahmah ii bitna (personal security) leh a kithupisim pen nek le taak kicinna (food security) cihte pen a poimawh diakte ahi hi.

         Hih, Food Security Bill, 2013 pen July 3, 2013 a kumpite in a pulakkhiatna uh panin, India gam sunga mipi mun thuma khen mun nih in ann (buhtang, wheat, adang) mi khat in kha khatin kg. 5 ta, man tawmcik Rs. 3, 2, 1 in lei thei ding uh a, hih hamphatna pen singtang lamah 75% leh khuapi-ah 50% in zang ding uh hi.

         Buhtang pen India kumpi in Kg. 1 pen Rs. 18 in lei ding a, tua pen mipite tungah kg. 1 pen Rs. 3 in zuakkik ding hi. India kumpi in hih thukhun hangin kum khatin Rs. 1,250,000,000,000 (125,000.00 crore / Mizoram Budget 2013 – 14 pen Rs. 5,245.34 crore) zang ding a, leitungah food security tawh kisai a sum kitamzatna pen hi-in kigen hi. buhtang, wheat leh a dang (coarse cereals) pen Ton Then 62 (62 million) a lei kul ding a, hih thukun in a gendanin, buhtang pen a kipiak theih kei leh a ngah dingte pen a suma piak ding ahi hi. Tuhun (July 2013) laitakin Mizogam sungah bank account nei lo innkuante a kibawlsak saan laitak ahi hi.

         Ahi zongin, Mizoram CM Lal Thanhawla in July 23, 2013 in Mizogam sungah kizang pah lo ding ahihna thu gen a, FCSCA Minister H. Rohluna in kha 6 sunga zat ahih ding thu Assembly House session-ah gen hi. Mi pawlkhat in phualpi kumpi in a sum a sikh ding zong sem thei/nuam lo ciin, hih banga mi gentheite adinga thu hoih pen Mizogam ah a kizat pahloh ding pammaih a sakna uh leh, state pawlkhatte a lungdam mahmah lai-un Mizogam kumpi pen kalsuan ding zia zong thei loin om hi, ciin a mawhsakna thu uh pulak hi (Vl. July 23,2013, Rl. July 22, 24, 2013).

         India gam sungah, buhtang leh wheat ahi zong, khai leh theite pen a koih hoihna kician a omloh manin tampipi sia hi. Supreme Court of India in June 2011 in thupulakna a bawlna uah, Punjab state ah buhtang metric ton teng 90 pen sia ding ahih manin, mi gentheite kiangah a khawnkhongin pia dingin kumpi theisak a, state dangah zong a sia ding om ahih manin kumpite in a koih hoih nading leh mipite khut sung a tun theih nadingin vaihawm dingin gen hi (Zonet - June 23, 2011).

         A lang lamah, hih National Food Security Bill, 2013 pen thukhun hoih tak ahih hangin, a ngah dingte teel dingzia pen kician taka kigelhna om lo, hi-in misiamte in gen uh a, dotna tampi om pah hi. Tua banah, khuapi sunga mihaute in buhtang sum tawmcik tawh lei-in, lokho mi gentheite in a buhtang uh a tamzaw in a zuak theihloh ding uh patauhna om hi.

         Hih National Food Security Bill, 2013 pen ordinance tawh zatpah theih dingin kibawl ahih manin mi tampi in tuhuna India kumpi a semlai Congress makaih UPA in politics a meet nading ngaihsutna tawh kum 2014 kiteelpi mitsuan kawm a vaihawmna innpi pana thukimna om loin zatpah theih dinga a bawl uh hi, ci uh hi. Bangbang ahi zongin thusia hi lo ahih manin manpha takin a zangte a hampha hi ding uh hi.

Daihna Cabin || 29.07.2013 (Update)