LETTER TO EDITOR
To
Editor
Par Tlangpui Weekly
Newsletter
Vapar, Mizoram.
A zahtakhuai vaisaite,
June 5, 2013 in
Tedim khua-ah leitungbup Zomi khangnote kimukhop theih nading, Singapore Zomi
Innkuante leh Tedim khua-a Zomi khangnote vaihawmsiamna tawh “Zosuan Tuailai Khawmpi” ci-in khua 90
val pana khangno paikhawmte in Zomite khantoh nading kikupna hunah ka kihel
thei hi. Tua hun a man ciangin, Zomite khuapi khat ahi Kawlpi pha in ka paisuk
suak a, tua panin June 15, 2013 in Champhai ka tung kik hi.
Champhai ka tunkik
khit ciangin ka zinna thu khuapihte lakah a theinuam om kha ding hi, cih
ngaihsutna nei-in, ciah kong sawm hi. June 15 niin khuazing khit ciang hong tung
pan ka hih manin Nipi ni zat theih ding dan lampi om nawn lo hi. A Nipi kal
kik, June 23 ciang ciah kong sawm kik leh, Champhai ah ka khualzinna report
zong lamen uh ahi diam, Nipi zingsang hunpi (sermon) dingin hong kiseh ahih
manin kong ciah thei kei leuleu hi.
June 30 ni zat phei
kong sawm kik leh, Rev. G. K Nang in Fuller Theological Seminary, USA a Ph. D a
lakna dissertation) – Zomi Christianity and Cultural
Transformation kici pen Tuipi gal panin laibu-a a bawlsak ding omin, lep
(arrangement) pen kei tungah hong ap a, a laibu bawlsak dingte manlah uh ahih
manin ninoni zong tawlnga man loin, zing panin ka lai pah hi. Nipi kik July 7,
2013 pen zat kong sawm kik hi napi, Khangham Nipi Sang (Adult SS) thusinna pia
dingin hong seh uh ahih manin tua ni zong a piang thei lo ding suak hi.
Tua ahih manin, July
3 ni-in manlah takin kong giak phei a, lungdamna lianpi tawh ka ciah hi. Bang
hang hiam cih leh, Nipi kal sima suak ding laihawm (weekly newsletter) khat i
neihna ka mu hi. Lai Siangtho kigelh
khia kei leh tuhun Khristiante bangci bangin i om mawk tam? cih tawh lai
manphatna a tehkak ziau mipa adingin hih kaana thu lungdamhuai tam lo hi. Tua
zah mahin, lai/thugelh hoih lo in leitung mite a buaisak dan pen ‘communistte
bible’ a kici liang Karl Marx in a gelh ‘Das
Capital’ kici hanga leitung in buaina a tuakte panin, lai manphatna leh
kidopsiam a kisapna zong gen kul loin na theih sa uh ahih ding lamen ing.
Mipil masa Mascus
Tulius Cicero in, “Laibu omlohna khaan
(room) pen kha (soul) a nei lo pumpi bang bek hi” ciin a beisa kum 130 BC
kiim pek-a a gen pen a manphatna tuhun ciangin en thei dingin kithawithawi ta i
hih manin lungdamhuai hi.
No, a vaisaite sanga thu le la a theizaw tuan het
lote in hong gensia kha ding uh a, Ciau leh Tuivai gal a kai nailote khawng a
aw gingging hi thei kha ding uh hi. Sial khekhap sunga uiphuk om mah bangin
‘tapkual hansanna’ a nei pawlkhat tawh na kisuk zek hun uh zong om kha ding hi.
Mipite lakah zong sum le pai, thu le la tawh pankhoppih ding hi, cih a thei
bangzah hiam a om mah bangin, a thei lo pen a tamzaw hi lai ding hi. Bangbang
ahi zongin, thu hoih leh thu manpha khatpeuh pen a langpan om gige a, kitheih
mawh bawl a kisap hun om ding hi. Hangsan takin mainawt zel hong sawm un.
Internet genloh, telephone takpi zong hoih taka a
kizat theihlohna mun pana hih bang bawl ding pen na mailam uh baih lo ding cih
pen a theician mahmahte laka khat ka hi ding hi. Ahi zongin, mi in zong nei zo
a, bawlbawl thei uh ahih leh bang hangin en zong bawl thei lo ding? A sim nuam
a om sung teng bawl zawh ding hong hanciam mahmah un.
A tawpna dingin, hih ka lungdamna thu pen eimite
theih ding thu ahih manin ei’ pau in kong gelh hi. Tukum (2013) Zomi Nam Ni hun
hong tun dek ciangin ei pau a zang lote theih ding deih ka hih manin ei pau ahi
lo tawh zong Zomi Nam Ni thu na gelh veve ing. Eimite theih dingin, ei’ pau
tawh kong gelh zelzel ding pha nasak uh leh lungdam mahmah ding hi. Tua hi lo
a, ei pau tawh kong gelhna hanga sila lungsim a nei, sial khekhep sunga uiphuk
om banga a khuadak lo leh, ei pau a zat theih vetloh a sa, amau leh amau pil a
kisa tawm mahmah pawlkhat a om leh tuate thu leh deihna bangin lai gelh ngei lo
ding ka hih manin hih ka thugelh pen a bul patna zong hi thei, a tawpna zong hi
thei hi.
News Editorte pawl
tawh na tangval lai ua nungakte lai na khak uh ciang thuhial nadinga na zatzel
uh mah bangin, “Gennop tampi tawh hunsak phot ni”
Lungdamna leh deihsakna lianpi tawh
T. Sawm Lian
July 5, 2013, 7:00pm
No comments:
Post a Comment