HALLO ZOGAM – 6

HALLO ZOGAM – 6

(My imagination)

Tedim khua kianga Thuamvum Industrial Estate ahi zongin, Zogam sung pana piang khai leh thei tuamtuamte a sia pah lo dinga kum khat sung bang a kikoih hoih theih nading Cold Storage, Vanleng tual (airport), pawlpi leh kumpi zum tuamtuam pen pha nuam mahmah nipi, hun lem a om cianga phak dingin ka koih phot a, lai lam tawh kisai-in Laibusal (library) nih le thum omte lakah a lianpen ka phak khit ciangin Zomite sunga la phuak siamte pahtawi nadinga kibawl Lamzang khua khunga ‘Peotic Square’ en dingin ka pai hi.

Sakollam panin lampi nuam mahmah tawnin Lawibual lam ka zuan a, khua sung pen a mi zong tamta ahih manin nidanga Sakkollam, Khualai veng (Myomah), leh Lawibual zong veng bangzah hiamin na kikhen ta a, lampi hoih nonote zong min tuamtuam – Penglam, Lengtonghoih, Galngam, Hangsai cih bangin min kiphuak dimdiam hi.  

Poetic Square pai nading lampi ah “Khup Cing leh Ngam Bawm’ Park” kici zong lampi pana gamla het lo-ah om a, a sungah pai pah nuam mahmah napi, ciah lam cianga phak dingin ka taisan hi. A kikhawh zetzet mawtaw tawh ka pai nopna mun ka tung pah hi. Kongpi geiah mawtaw koihin, mawtaw hawlpa tawh kongpi-ah ka lut uh hi. A min panin la phuaksiamte pahtawina leh phawkden nadingin kibawl ahih hangin, a mun le mual kicing lel ahih manin laigelh siam mi thupi tuamtuam phawk denna zong na om hi. Tua banah, Zogam adinga nuntakna a pia phamsa salphate pahtawina zong om hi.

Zomite minam khat i hihna a lak thu tuamtuamte lakah eima sung pana hong piangkhia thu le la siamte hangin, tuhun mite in sak ding la kinei-in, sim ding laibu kinei hi. Nidang huna Mikangte in zong a saknoploh mikang la kiteite pen sak belin kinei nawn lo a, Zomite phuaksa mah tawh Pasian kiphat ziahziahin, lungzuan kisial ziahziah ta a, tuabang late hong piankhiatna mite leh a phuaksa late uh manpha kisa theita ahih manin khantohna maan tawh Zomite kikhangto hi, cih kilang hi.

Zomi la phuaksiam mi 23te phawkna mualsuang a kibawl banah, behlap theih nadingin mun kibawl ahih manin thupi ka sa hi. Lai lamah Zomite madawk diakte zong tua bangmahin kipahtawi a, amaute thu le la hangin Zomite in thu manpha thei-in, sim ding laibu nei uh ahih manin leh, khangthakte in Zopau leh Zolai a theih nading un hih mite manphatna kiphawk ta a, Zogam sunga College leh University-ah Zolai a kisin theih manin, Zomite adinga hun leh ngaihsutna, thagui-thatang tampi a zang phamsate phawk nadinga hih banga kibawl pen a kilawm mahmah hi, ciin ka ngaihsun hi.

Zogam adinga nuntakna a pia ‘salphate’ phawkdenna leh pahtawina a kibawlte pen, khangthakte adingin manpha ka sa hi. Phamsa Salphate min, Zogam adinga nuntakna a piak hun leh a teenna khua uh a kigelh pen manpha ka sa a, khangthakte adingin manpha semsem lai ding hi. Sep ding neihloh man, inn le lo nuamsakloh man, zi le ta nei lo a inn lam ngaihsutloh man zong hi het lo a, mailamah Zomite leh Zogam a palhkhiat theih nadinga a kipiakna uh thupi mahmah hi. A nungtakna uh zong it mahmah napi, amau nuntakna ii nopsakna ding sangin Zogam adinga a kipiakna uh hanga nuntakna a beina pen, pahtawi tak mahmah a, inn lum lo lum nusia-in, zi le tate in zong ngai mahmah hi mahleh, Zogam adingin a nuntakna uh a piakna uh ka ngaihsut ciangin …..

When You Go Home,

Tell Them Of Us And Say,

For Their Tomorrow,

We Gave Our Today….

.. cih kammal, kum 1944 March kha a Japante in ‘Operation U-Go’ ci-a Kohima khuapi, Nagaland a Mikang leh a kipawlpih mite a dona hun a phamte phawkdenna a kibawlna muna kigelh pen ka phawk vat hi. Hih Zogam adinga phamsa mite in a pham ding uh ciangin a lawmte kiang uah bang thu a gen uh tam? “Maban hoihzaw leh thupizaw na neih nadingun, haksatna lianpipi zong a nuamsa mahmah bangin thuakin, nuntakna nadong ka pia uh hi, ci-in na gen in” a ci mah uh diam?

Hih mi manpha leh pahtawihuaite a kipahtawina munah ka pai ciangin ka lungdamna mahmah bel, hih banga pahtawihuaite a kipahtawi nadinga ngaihsutna leh thalawpna Zomite lungsimah a omna ahi hi. Na khatpeuhpeuh, a piankhiat nadinga ngaihsut masakna pen thupi hi. Minam sungah kithutuak a kisapna thu phawk mahmah lehang kithutuak pah ding hi hang. A kithutuakna sangin a kisapna in nasem masa zaw ahih manin a lek pan hi loin, a bul pan mahin dik photphot leh hoih diak hi. Tua mah bangin, Zogam sunga pahtawihuaite a kipahtawi nadinga geelna a om theih nadinga a ngaihsun masate pahtakhuai ka sa a, kithutuak taka sepkhopna in kipumkhatna dawkkhiasak ahih manin, pahtawina mualsuanga kigelhte bek tham lo, a vaisaite zong manpha mahmah uh a, hih banga mi pahtawi a siamte nidang ciangin amau zong mite in pahtawi-in, a min uh zong hih mi thupite kigelhna-ah kigelh kha mawh lo ding hi.

Tua mun panin ciah kikin, “Khup Cing leh Ngam Bawm’ Park” kici, mun nuam mahmahah ka khawl uh hi. Ka paini uh pen zum khakni (holiday) ahih manin kumpi uliante leh innkuan bangzah hiam tawldam dingin hih munah pai uh a, tui kipeek nading (swimming pool) zong omin, innkuana theitui/niangtui dawnkhop nading a hoih nono tampi a om banah, kimawlna tuamtuam kimawl theih ding om a, innkuan banah, nungak-tangvalte in zong nuamsa sem uh hi. Hih banga khuapi husa in a buaisakloh mun nuam pen khuapi adingin a kisam mahmah khat hi, ciin ka ngaihsun a, lungsim suahtakna khat om ahih manin nuam mahmah hi.

Hih Park sungah, innkuana kimawl a nuamsa mahmah khawng, niangtui dawn khawma holim khawng, maan a kilala tawh, mi kibang lo tampi om zeizai hi. A kawmlak deuhah, nungak leh tangval, hun pammaih a sa mahmah, lel nop deih sinthu za-in tam e, ci leh kilawm mahmahte ahi zongin, naungek gilkial nute in ann a mop uh banga sam sau khat leh sam tom khat ii lu a kizom khawng zong na om hi. Bangbang ahi zongin, leitung hi ven, amau nopsak dana om hi-in ei gen ding om kei, ciin ka ngaihsun hi. Ahi zongin, nungak-tangval lai a aam luate pen kisik hamtang uh ahih manin kidophuai mahmah a, tuhun pen tua thu hilh nading hun hi lo ahih manin a mit hema muh pak bek zong a kisuanhuaipi khat hi mawk hi.

Park panin ciahkikin, Tedim khua sunga laibu kizuakna khat-ah ka pai kik hi. Zogam sungah zong laihawm leh laibu tam mahmahta ahih manin laibu lei ding zong tam a, ka laibu deihte kumlui pian ahi diam, ka mu zo pak kei a, khangthakte in a bawl uh laibu thak, a hoih nonote tam lua mahmahta ahih manin kei zonte pawl pen muh a hak thei mah ding hi. Tulai mahmah leh, khangthakte ngaihsutna bang a ngaihsut ka kisak leh, ka thu theihte leh ka deihte pen, ‘outdate’ mahmahta ahih manin, keima kitheihna pen a maanloh hun om thei ding hi ka cih hi. Tua hi a, pil kisa mahmah a, ‘nidangin tuabang tuabangin na om ung, na deihdan bangin kuamah om ngei kei’, ci-a khangthak ngaihsutna hoih nono a nawlkhin makai kumlui pawlkhat hangin kipawlna sungah buaina om thei zel mah ding hi, ciin ka ngaihsun hi.

Tua ka paina laibu zuakna sai panin nikhatin kumpi nasem pawlkhat khasum zah valval a muhkhiatna uh hong gen uh ciangin, lai a thupi sak ngiat Zomite in, tua lai hangin phattuamna tampi ngah ding hi, cih ka ngaihsun hi. Amau bek laibu zuak hi lo lai ahih manin lai lam tawh kisai Zomite dinmun pen lungdamhuai ka sa hi. Laibu thak pawlkhat lei-in ka tunna lam ka zuan hi.

Ka tunna hotel ka tun ciangin ka kisil a, ann nek hong hun pah ahih manin Zo Ak, Zo huana kihuan, Zobuh tawh mehin, Zomi nungakte in ann hong lui gilvah pikpekin ka nek khit ciang ka khan sungah ka kah to kik hi. Zan dang mah bangin ka maanbu sunga sun lama ka maan lakte ka enkik a, a gamla deuh panin maan la leng Tedim hoihna pen kidawkcian semsem tawh kibang hi. Poetic Square a ka paina huna maan ka lakte pan ka ciah dong maante khat khit khat ka en kik a, a dangah mite kilawm thei mahmah napi, Khup Cing leh Ngam Bawm Park a ka paina uah nungak niksing teng vive om uh a, nupi-papi, a thungen ngen leh naupang tam mahmah hi lo maw, ciin ka maanbu hoih lo maw, a tawipa hoih lo zaw, hoih lua zaw maw, cih zong ka thei zo nawn kei hi.

Zoplai ding………