MI PICINGTE NUNTAKZIA

MI PICINGTE NUNTAKZIA

                Mi picingte pen kizahtakin, thupi kisa hi. Kum tampi pha napi, a kum tawh kituak het lo a nungta om a, naupang cik hi napi, a kum tawh kituak lo-a picing mahmah zong om hi. Tua a picing nuntakzia pen bang teng hi mawk ding hiam? Tampi lak panin tawmkhat en dih ni :

1.     Mi picing taktakte pen a heh mahmah uh hangin kidawk khia sak pahpah loin ki-ukzo uh a, kam nem takin thu gen thei veve uh hi. Kitheihsiamlohna leh haksatna a om hun ciangin thatang hat thu-in nate siasak pah gamgam lo a, buaina pen thu tawh zawh hamtang sawm hi.

2.     Mi picingte in midangte muang ngam uh a, ama sep theih ahih hangin midangte tungah sep ding ap siam hi. A lawhcin uh ciangin amau bek lawhcing loin, a seppih dangte khempeuh zong lawhcing uh hi.

3.     Mi picingte in a nasep khatpeuh pen, a lawhcin ma-in midangte in a gensiatsak hangin, a lawhcin hun ciang manpha ding hi cih a theihcian manin lungkia loin sem veve hi.

4.     Mi picingte in, midangte in a sep dikloh leh hoihloh a gen uh ciangin leh, a maanzaw a lah uh ciangin guallelhna in ngaihsun lo a, kiniamkhiatna tak tawh, “Sem khial kha mah ing” ci ngam a, amah a maan zawk leh zong, “Ka gengen sa ahi mah ve le” cici se lo hi.

5.     Mi picingte in thukhensatna hoih tak bawl thei uh a, tua a thukhensatna kip takin len hi. Mi picing lote in ahih leh, na sep ding a hoih tampi mu/thei uh a, ahih hangin sep ding pen theician lo uh ahih manin a hun manpha tak uh a mawkna in beisak zel hi.

6.     Mi picingte in a hun leh a mun tawh kituakin kampau leh gamtat kidawm siamin, zang siam uh hi. Nuih a kul hun ciang nui-in, sep a kul hun ciang sem uh a, a hun le mun, a masa leh a nunung ding khensiam uh hi.

7.     Mi picingte pen a kibawlpha thei nawn lo nate hangin kilungkhamsak lo uh hi. A phattuamna om nawn lote hanga lunggimna leh midang mawhsakna pen hai huai sa uh hi.

8.     Mi picingte in bawlphat, bawl lem, leh bul kipat thak a kisap ciangin hangsan takin ma pang ngam hi.

9.     Mi picingte in nasep bul a kipat vanglak leh a tawp dongin muanhuai takin sep ut uh hi.

10.                  Mi picingte in amau pumpi leh kha adinga hoih lo tuamtuamte’ sila suak lo dingin hanciam uh a, tuate hong nai ciangin zong taisan ngam uh hi.

11.  Mi picingte pen makaih leh uk den kul loin, ama thu-in a sep dingte sem ngitnget a, makai leh a uk omlohna hanga lawhsapna pen ama nasepna munah om ngei lo hi.

12.   Mi picingte in sum tampi a ip sung uah a puak uh hangin, a zat nading zongzong lo uh a, a kisam om lopi-in mawk zat ngei lo uh hi. A deih uh hi loin, a kisap bek uh lei uh hi.

13.   Mi picingte pen zakta thei lo hi loin, zakta lo thei uh hi. A sep ngei nailoh ahihna hang leltak tawh mite lametna pen lawhsam sak ngei lo hi.

14.   Mi picingte in mai lam saupi ngaihsunkhol siam uh a, tomcik sung nopsakna hanga lawhsap sangin, ama adinga hoihzaw leh a lawhcin nadingin tua nopsakna pen pelh phot ngam hi.

15.  Mi picingte pen midangte adingin muanhuai uh hi. Ciampel ngei loin, mite in zong ‘mi muanhuai’ ciin thei uh hi. Ama tunga mite lametna bang pen lawhcinsak sawm hamtang hi.

16.   Mi picingte in kidemna munah a hat uh leh a lang lamate lungsim na sak dingin lungdam lo uh a, a leh uh leh zong a hat lamte lungdampih siam hi.

17.   Mi picingte in makai sep khawng ut pongmawk lo uh a, makai a seploh ciang tua kipawlna nuaksan/taisan tuan lo uh hi.

18.   Mi picingte in makai a sep uh ciang deihsak luat leh pampaih luat nei lo a, zong kilangkhia sak lua se lo uh hi.

19.   Mi picingte pen mite in a phat hangin tahlawp henhan tuan lo uh a, a gensiat hangin zong thanem pah tuan lo uh hi.

20.  Mi picingte in hun haksa-ah haksatna a thuakpihte makaih thei uh a, buaigawp loin haksat hun ciangin zong pilvang takin thukhensatna bawl thei uh hi.

                Leitung bei maloh ‘thupi hi’ ci-a kigen den ding picinna neih sawmin, i hih theih khomkhomin mainawt ni.

Daihna Cabin || 10.7.2013