ZOMITE NGEINA MAH

ZOMITE  NGEINA  MAH

Amau minam, ngeina, a zia le tong, leh a thu le la a it lo, 

a thupi bawl lo minam pen a mangthang uh hangin a lamdang lua hi lo hi!

                Minam itna thu a kigen ciangin, mi namdangte huat ding, do ding, langbawl ding thu a kigen sa a, a zadah pahpah mi a om mawk pen a nuam het lo thu hi. Ahi zongin, tua bang mi a tam nak leh tua minam’ nuntakna pen mial lai mahmah hi cih hong phawksak ahih manin, gengen dingin hoihzaw zel hi.

                Zomite phuaksa late mah sak a kisapna, minam dangte in hong sakpih kei leh zong phamawh lo, ei mahmah in i sak ding ahihna leh, Zomite sunga Pasian in a piak la phuaksiamte tungtawna late mah sa lehang, i minam in zong thupha kingahzaw dinga ka lametna thu leh i minamup kipumkhat nadingin zong hih i late in na lianpi sem ding hi, cih thu ka gelh khin hi. A manphatna a kitheihmawh bawl pawlkhat a om hangin, ‘hi mah hi’ a ci bangzah hiam om a, lungdam hi.

                Zomite in ngeina, zia le tong, leh pawi hoih mahmah, a kicing mahmah i nei uh hi. Tuate tu sangin a manphazaw in i puah thei tam? Minam khat hihna tawh kizuia kisam hih i ngeina tuamtuam, i thu leh late bangcih puah-in zuun ding?

                Khuado pawi, Sialsawm pawi leh Zomi Nam Ni khawng a kibawl hun zong thei lo napi’n, Kawlte tuibuahpawi (Zilawng puai?) khawng, Vaite Puja khawng nuam sa mahmah a, a kizat dan leh a kizat hun na theih mahmah hangin, tua theihna pen a langbai pilna ahi hi. Tua munte-ah na lamsuk, na lam toh hangin, mite in na nung lam panin hai sa lua-in hong nuihsansan lel ding uh hi.

                Zomite Khristian i suahma-in, pawi a kibawl ciangin, zu le sa tawh kibawl hi. Dawi kithoihin, lungkimsak kisawm hi. Tuhun ciangin dawi sangin a lauhuaizaw leh a vanglianzaw Pasian nei i hih manin, i sep i bawlna khempeuhah amah i kihelsak ding thupi hi. Pawi zong minam dangte mah bangin i nei uh a, hih i pawi neihte pen Pasian deihna tawh zat theih lua a, zang leng zong nuamzaw hi.

                Nidang hun lai pana Zomite i zat den uh, ‘Pute zu-kholh’ khawng zong a manpha mahmah ahi hi. Tuhun ciangin ‘zu’ i kholh kei zongin, niang bek tawh zong pute thupha dawh den ding hizaw hi. Tuhun ciangin, (a ki-kha-mi sak) pawlkhat in hih i ngeina a hoih mahmah pen khanglui vai, nusiat ding, ci-a a gen pawl om mawk hi. 

                Kiteen dan tawh kisai bang diak, gen ding tampi om hi. Tuhun ciangin Khriatiante in “Ngeina Siangtho” cih kiteenna kinei a, tua dan tawh a kiteeng lote pen ‘siangtho lo’ cihna hi mawk hi. Pawlpi ngeina tawh kiteen pen a hoih lo ka cihna hi lo a, ahi zongin mi tampi adingin hih pen ‘siantholohna’ hi mawk ahih manin awlmawh huai hi.

                Mi tampi te’n ut pipi a pawlpi ngeina siangtho tawh a kiteenlohna uh ahang pen, sum le pai tampi bei ding ahih manin ngap lo uh hi. Midangte kiteen dan bang lo a kiteen lah nuam sa loin, mi moh lim hawm bang, mi tangpi-tangta vak banga a vak theih kei ding uh leh maizum uh ahih manin kigukziau pen baihsak uh hi. Tua banga tumlam gamte ngeina banga tuhuna i kiteenna i sianthosak sawm pen ahi ding mah ahi hiam? cih pen ngaihsuthuai mahmah hi. Pawlpi’ ngeina siangtho tawh kiteeng, ci napi, a kiteen zawh kha 8 zong pha lo a, naungek kha kima piang khawng om thei veve lai!

                Lai Siangtho in, “Tua bangin kiteng un” cih nei lo napi (a mu lo ka hih leh thu tuam), ei hoihsak dana ‘sianthosak’ theih hi napi, bang hangin, sum le pai tampi bei dinga kitenna pen sawpsiang sawm sese i hiam? Ngaihsut kisam hi.

                I Zo ngeina-ah kiteen-kipi dan tawh kisaiin ngeina hoih mahmah kinei hi. Hun sawtpi pek, Khristian i suahma a i ngeina a hoih mahmah pen, sum tawh ‘sawp siang’ kulsak sese loin, siangtho sak mai leng bang a ci tam? En siangtho i cihte pen siangtho a ci ding Pa in siangtho a ci tam? Siangtho lo i cihte zong Aman siangtho in a saang veve tam?

                Pawlpi in a bawl, kiteenna tawh kisai ngeina pen siangtho lo, a ci ka hi kei a, nidang lai pana kizang a hoih mahmah i kiteen dante pen (ei ngaihsutna lamah)  siangthosak leng a ci ka hi hi. Pawlpi in thukhun/ngeina a bawl pen Khristian maan  taktakte adingin zuih pelmawh ding hi. Ahi zongin, tua i zuih ding pen siangtho veve si-in, a hoih veve, sum le pai tawm cik bei a bangci bawl ding? cih pen ngaihsuthuai hi.

                Zomite Khristian i suah ciangin, Lai Siangtho sunga thu tawh a kituak lo zong ahi lo, i pawi thupite, i kiteen dan, i Zo ngeina a hoih mahmah tampi kinusia a, tuate tawh Khriatian suah pen ahi thei lo bangin a ngaihsun mi tampi i om hi. Tua bang lungsim paikhia-in, eima minam ngeinate zahpih lo leh a thupisak semsem dingin hanciamhuai hi. Tua pen hong Bawlpa hong bawldan zong hikha ding hi.

Daihna Cabin || 30.7.2013

Thu Tuamtuam

Thu Tuamtuam

1. July 10, 2012 in Mizoram University nuaia kum 2008, 2009 leh 2010 a degree course tuamtuam B.A/B.Sc./B.Com/B.Sc (H) result kipulak a, laivuan khempeuh 5,124 lak panin mi 3,059 (59.70%) in gualzawhna ngah uh hi.

2. July 11, 2013 in Mizoram State Planning Board Vice Chairman Lalkhama in Champhai pha a, Champhai khua a Helipad bawl ding, Kelkang gama vanlengtual (airport) bawl ding, Champhai a cold storage manpha taka zat ahih nading, DC complex luia Auditorium sak ding, Tlangsam khua a Aisan hekna set koih ding, Indo-Myanmar Trade picing taka bawl a kisapna, Seling to Zokhawthar via Champhai pen double lane highway a nasep a kipat pah nading, Zokhawthar to Falam leh Zokhawthar to Tedim lampi double lane a bawl ahih theih nadingin a hatzaw sema mapan a kisapna thu Champhai khua sunga department ulian 20 valte tawh genkhawm hi.

3. Mizogam sunga Autonomous District Council 3, Lai, Chakma leh Mara ADC makaite in July 13, 2013 in Lawngtlai Circuit House ah District Councilte adinga State kumpi tawh kisai loin, Central kumpi pana sum ngah (direct funding) ding dan tawh kisai genkhawm uh a, July, 2013 sung a direct funding ngena Delhi ah pai ding hoih sa uh hi.

4. July 23, 2013 a Mizogam Mal lam khua 15 a V.C bye-election-ah independent candidatete in seat 24 la uh a, V.C 6 ah hatpen uh hi. Hmar Peoples Convention (HPC) in seat 15 la-in zom uh a, khua 3 ah hetpen uh hi. Mizogamah kumpi a sem lai Congress Party in seat 9 la-in, khua 2 ah hatpen uh a, MNF in zong seat 9 la-in, khua 1 ah hatpen uh a, a hatpen omlohna khua 3 om hi. Hih khua 15te pen Hmar galvan tawite HPC (D) in a nawngkaisakna hanga khua dangte kiteel huna kiteel thei lote ahi uh hi.

5. June 29, 2013 in President Pranab Mukherjee in Supreme Court a judge senior-pen Justice P. Sathasivam pen Chief Justice of India a 40-na hi dingin seh hi. P. Sathasivam pen Tamil Nadu state pan CJI masapen ding hi a, kum 64 mi hi-in, lonei innkuan pana khangkhia ahi hi.

6. Germany gama India palai Sujatha Singh pen India Foreign Secretary thak dingin kiseh a, July 31 cianga khawl ding Rajan Mathai laih ding hi. Kum 59 mi, 1976 IFS officer pen numei, Foreign Secretary dinmun a len thei thumna hi a, ama maiah Chokila Iyer leh Nirupama Raote in Foreign Secretary sem khin uh hi.

7. Assam kumpi in a state khuapi Guwahati a leinuai metro train service bawl ding a ngetna uh pen India kumpi in phalsak hi. Hih lampi pen km 65 a sau hi ding a, lampi thum hi-in, thumvei sepin kisem ding a, sum Rs. 140,000,000,000 (14,000 crore) kizang ding hi. Nasep bul kipat nadingin 25 crore ki-pia pah a, kum 10 sunga zawh ding ahihna July 11, 2013 in CM Tarun Gogoi in gen hi.

8. Kum 1850 pan kum 163 sung a kizang telegram service pen July 14 zan nai 9 panin kikhawlsak ta hi. Technology thak hong om ciangin telegram a zang nuam hong tawm mahmah a, a muhkhiat sangin a zatkhiat tamzaw ta ahih manin kihawlsak ahihna thu uliante in gen uh hi. A kikhawlsak laitakin centre 75 leh nasem 1000 kiim om a, tua nasemte pen BSNL in nasem dingin zang suak ding uh hi.

9. Leitung a inn lianpen a kigen, China gam sung, Chengdu a New Century Global Centre pen kihongta hi. A inn omna pen Sq. meter Teng 17 hi a, meter 100 a sang, a dung meter 500, a vang meter 400 ahi hi. US galkap munpi Pentagon sangin a zah thum in lianzaw hi! (Vl. 15.7.13)

10. Department of Power, Nagaland in Dimapur khuapi sungah pre-paid power meter zat sawm uh a, hih in a kisam lopi a meitha zatna tawmsak ding a upna thu uh pulak uh hi.

11. Myanmar President Thein Sein in tukum bei kuan ciangin politics hanga thongkiate khempeuh khahkhiat ahih ding leh thautawi tuamtuamte tawh kihona sawt loin neih ahih ding thu July 15, 2013 in London-ah gen.

12. Forbes in kimawlna team manpha pen a tehna uhah football club Real Madrid (3.3 trillion) pen khatna hi a, nihna Manchester United (3.17 trillion) leh thumna Barcelona (2.6 trillion) in zom a, lina-ah football club ahi lo New York Yankees (2.3 trillion) in zom hi.

13. India kumpi in J& K a China tawh gamgi, Line of Actual Control-ah galkap 50,000 koih ahih ding thu pulak a, tua hangin sum Rs. 65,000 crore kizang ding hi.

14. Assam state sunga Bogibeel a Brahmaputra lui tungah India gama lei (bridge) saupen kibawl a, kum 2016 ciangin zawh ding kilamen hi. Km. 4.94 a sau, meileng leh mawtaw pai nadinga kizang ding pen Upper Assam leh Arunachal Pradesh kizop nadingin hoih mahmah ding a, China gamgi zong naikal 10 bangin kitungbaih thei ding hi. Sum  75% pen Union Finance Ministry in si ding a, 25% pen Railways in si ding hi.

15.  Zomite gamh, Gullu Mual pen Zomite deihna leh thukimna om lopi a Sente leh Kawlgam kumpi in tawh a sawmna hangin leitungbup Zomite kilunghimawh ciat a, Kawlgam sung leh leitung mun tuamtuamh deihlohna thu kipulak hi. June 28, 2013 in Washington DC, USA, June 30 in Canberra, Australia, July 9, 2013 in New Delhi, India ah leh July 28, 2013 in Oslo, Norway ah lungphona Zomite in nei ziahziah hi. (ZBYF Tangko August 2013)

EBC LEH KBC KIHOLIM

EBC LEH KBC KIHOLIM

          June 11, 2013 in Evangelical Baptist Convention (EBC) Hq. New Lamka leh Imphal pansan Kuki Baptist Convention (KBC) pawlpi makaite in New Lamka-ah kimuhkhopna leh kivehtuahna masapen nei uh hi.

          Hih hunah Rev. Thangsat Kipgen, G.S., KBC in  a pawlpi kibulphuhdan leh kivaipuakdan gen a, salam leh khalam a kitanauna poimawhdan gen hi. KBC sungah biakinn 274, full communicant member 24,200 kiim, milip 44,199, leh Pastor 40 kiim om a, kum khat in annual assembly a neihzelna uh leh thukin leh poimawhte Convention Executive Council(CEC) in vaihawm zel cih thu pulak hi. Tua banah khateng a laithai (friday) 2veina-ah pawlpi milip in thungetkhopna nei zel uh a, KBC in Kanggui Christian College, Shalom Bible College kihelin sanginn zong nei ahihna uh gen hi.

          Rev. S.Vung Minthang, G.S., EBC in EBC kivaipuakzia a genna-ah, pawlpi neu leh lian kikal a gamlat luatloh nadingin localization system zang loin, centralized system tungtawnin Dorcas Hall in EBC pawlpi khempeuh tungah vaihawm hi, ci-in gen hi. EBC ah local church 153, pawlpi milip 57,003, full communicant member 33,529, Pastor 68, Administrative Staff 57, School Teacher 100 leh Missions Worker 164 om hi’n gen hi.

                Hih hunzatna-ah KBC Headquarters, Imphal a nasemte peon chihloh telkimin, EBC pan Lamka area a Pastor leh worker-te tel uh hi. EBC in KBC kiangah memento hoihtak pia uh a, pawlpi mipite adingin leh mun tuamtuama missionary-te adingin thungetna hun zong nei khawm uh hi. Hunzatna manpha a sakna uh leh, mai lamah zong hih bang kithuahkhopna neih zel dingin thukim uh hi. (Source : Internet)

ZBYF Tangko Editorial (August 2013)

                Ut bangbanga gamtat sawmnapi’n, utloh bangbanga gamta zel, duh bangbang nek sawm napi’n duhloh teng hong kilui, deih teng neih sawma gim le tawl thuak napi’n deihloh teng mah tawh kidiah ka nuntakna-in; Aw... Topa, nangmah kong kisam hi.

                Mailam zuana nungkik, pumpi sanga lungsim neu-zaw, khuak sanga gilpi a hatzaw, a hoih tampi thei napi’n a hoih lo mah sep nuam a sazaw, khemna a zo ding kimlai a khempa, mite khantoh nading sep theih a nei lo ka nuntakna-in; Aw...Topa, Na huhna ka kisam hi.

                Khuapi sungah ni khat bek om leng zong a kipilsak pah, makai a hong kiseh ciang hoih taka sem nuam lo napi’n hong kisehloh ciang a nuak thei, pau ding sang pauloh ding tam a pauzaw, la siamte tawh khut kiletna hang a la siam a kingaihsun, zu le sa munah, tua bang a zangte tawh a kithuah pah thei, leh biakinn-ah zong a laam pah thei, bulkip nei lo ka lungsim ngaihsutna-in a uk ka nuntakna-in; Aw.... Topa, N’ong makaihna ka kisam pha mahmah hi.

                A om nai lo munah upna tawh kalsuan ding genloh, a omsa tawh zong a kalsuankhia ngam lo, upna neu zong a nei baan lo, mi pilte laka hai, mi haite laka pil tuan lo, keima nuntakna sanga midangte a theician zaw, ka nasep sanga mite seploh a mucian theizaw, ka hawmthawhte sanga sep a siamzaw tuan het lo leh, ka theih ding sang ka theihloh ding a theizaw ka nuntakna-in; Aw... Topa, Nangmah pana pilna ka kisam hi.

                Lawmte tawh a kibangin guah thuak tek napi’n, kei omna munah a tam diak banga a ngaihsun, thuakthuak hanga pil thei lo, hilhhilh hanga theithei tuan lo, kalsuanzia ding zong a geel siam lo mailam a bingphut ka nuntakna-ah; Aw... Topa, ngaihsutna thak, a siangtho leh a maan hong guan in.

                Leitung mite lakah pilna leh hauhna na piak ngiat Solomon in zong, leitung mihingte nuntakna pen ‘a mawknapi’ a cih mah bangin, hih a mawknapi leitungah ka om sungin, nangmah lo tawh lungkim nading koi-ah mu ding ka hiam? Aw... Topa, Hong ompih tawntung in.

                Mailam hun ding bangmah thei lo napi’n, kong kisapna thu ka mangngilh ciangin zong nong ompihden manin; Aw... Topa, Nong hehpihna hangin ka lungdam hi.